Jon 1
1
Max elaj Jonás bay Dios yaloni
1Ay jun winak chi yik Jonás, c'ajol Amitai; a' max k'anjab Jehová bay, max yalon axca ti': 2Asi' bay miman conob Nínive, cax chaloni tol ok wak' lajwok el jun conob tu' yetok eb cajyom bay, yujtol max aj wal apnok is yobtakil eb ayin, ẍi Jehová.
3Palta a Jonás xin, maj yikej bay Cham. A ti yet, tol max na' tojcan bay Tarsis, xan max toj bay Jope. A bay tu' max ilchaj jun barco lananxa toj bay Tarsis tu'. Max manon is pasaje yet chi elaj najat satak Jehová yaloni. 4Axa Jehová xin, max yi aj wan jun miman owal cak'ek' bay yul a' mar tu', caw wal ijanxa chi mak'lay poj te barco yuj jun cak'ek' tu'. 5Max oc ijan xiwaj eb chi ion bey te barco tu'. Junjunxac'al eb chi yal ba bay is diosal; axa c'oli k'okon aytok eb is yikatz te barco tu' bay yul a' mar, yet chi sebbi yalil te'. Axa pax Jonás tu xin, maxax aytok bay yalan yul te barco tu'. A bay tu' chi wayi. 6Axa cham capitán max toj bay ayic' Jonás tu', max yalon bay axca ti':
—¿Tzet chon cayti', ach wayanc'al chonej? Ajan wanok cax chach txajli bay a diosal, talaj c'uxan chi ok' c'ul jin, cax chon colchaji, ẍi.
7Max yalon eb iom bey barco tu' bay junjun axca ti':
—A tinani' jaek oc junok suerte, yet watx' ok nachaj el juj, mactxel ay is mul, xan chi jay jun ti' jiban, ẍi eb.
Cax max yaon oc eb suerte xin. Axa max yunej, max ayc'ay yiban Jonás. 8Axa yalon eb axca ti' bay:
—Al ayon tzet yuj xan chi jayoc jun ti' jiban. ¿Tzet yuj xan chach tit cayti' tinani'? ¿Baytal max ca a tita? ¿Tzet bi a conob, cax tzet animail ach? ẍi eb.
9Max tak'wi Jonás tu' axca ti':
—Ayin ti' hebreo in. A bay Jehová Diosal satcan chin oc ayilal, Cham max watx'nen a' mar ti', c'al tx'otx' tx'otx', ẍi Jonás.
10-11Yuj tu xin, max c'oli yalon Jonás bay eb iom bey barco, tol lanan yelaj satak Jehová yaloni. A yet max yaben eb axca tu', cax max yilon pax oc eb tol yelc'ulal chi aj can yowal a' mar tu', xan max texac'al xiwaj eb, cax max c'oli k'anlen eb axca ti':
—¿Tzet yuj xan caytu' chon axca tu'? ¿Tzet watx' chi jun etok tinani', yet watx' chi oc wanaj yowal a' mar ti'? ẍi eb.
12Max yalon Jonás axca ti':
—K'okek in aytok yul a' mar ti', cax ok oc wanaj yowal a'. Wojtak wali tol wuj xan chi jayoc jun ti' jiban, ẍi.
13Max yak'on yip eb iom bey barco yiontok te' bay ay tx'otx' yaloni; palta junelnej majxa je' yuj eb, yujtol yelc'ulal chi aj can yowal a' aej tu'. 14Yuj tu xin max tewi eb bay Jehová, max yalon eb axca ti': Mamin, manchak on ak' cam yuj is camichal jun winak ti', axca chi yun cam eb mak'om cam anima, yujtol ach ti' Jehová lanan onen tzet nabil oj, ẍi eb.
15Max lajwi yalon eb axca tu', axa k'okon aytok eb Jonás tu' bay yul a' mar, axa yoc wanaj a' tu'. 16A wal yet max yilon eb iom bey barco tu', tol caytu' max yunej, max c'oli xiw eb bay Jehová, max yak'on eb jun xajanbal, c'al yak'on eb ti' bay.
17Yak'ban tu xin, max chekon Jehová jun no miman txay yet chi turlay aytok Jonás yuj. Oxeb c'ual c'al oxeb ak'bal max ayji ec' Jonás yul c'ul no txay tu'.
Currently Selected:
Jon 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989