YouVersion Logo
Search Icon

Jn 13

13
Yabixal yet max tx'aj Jesús yakan eb cuywom
1Yecalokxac'al k'in Pascua, max yojtaknej el Jesús, tol max jay tiempoal bekoncan yulyibank'inal ti', cax chi paxaj bay co Mam Dios. A eb yet-xa ayic' yulyibank'inal ti', caw wal camc'ulnebil eb yuj. A tinani', ok tx'oxo' tol jantakxa wal is camc'ulal yin eb.
2-4Toxa max oc nak diablo yin is nabal Judas, c'ajol Simón Iscariote, yuj yaon oc Jesús yul k'ab camich, palta a Cham yojtak tol a bay Dios titnak, cax ac'ala' bay ok paxajok. Yojtak tol a co Mam Dios max ak'on masanil ikbejlak yul is k'ab. Yuj tu' xan a yet lanan low Cham yetok eb is cuywom, max aj wan, max yion el an is jokan pichil, cax max pixon oc jun toalla yin is nan. 5Lajwi tu', max yaon ay aej yul jun palangana. Axa tx'ajon el yakan eb is cuywom tu', max joon tak yetok an toalla tu'.*fn* 6Axa yet ijan toxa ok tx'ajil yakan Simón Pedro max yalon Pedro tu' bay axca ti':
—Mamin, ¿tom ijan cha tx'ajil wakan ti' aloni? ẍi bay.
7—A tinani', c'am chi nachaj el oj tzet yetal jun chi wun ti', palta c'ojanc'ulal ok nachaj el oj, ẍi Cham bay.
8—C'am oxlajon bak'in tol ach ok a tx'ajil wakan ti', ẍi Pedro tu' bay.
—Ta c'am chak' in tx'ajil xin, c'am alon et wetok, ẍi Cham.
9—Ta caytu xin Mamin, manokab asannejok wakan ti' cha tx'aja', tx'aj c'apax in k'ab ti' c'al in jolom, ẍi Pedro tu'.
10Axa yalon Cham axca ti':
—K'inalok ay junok mac tolto max achinwi, manxa yowalilok chi tx'ajlay is mimanil masanil. Asanxanej yakan chi tx'ajlayi, yujtol a is mimanil sakxa yayji. Ayex ti', axca junok mayal achinwi tu', caytu' e yayji, yujtol toxa mayal watx'ji e nabal. Palta man e masanilok max watx'ji e nabal, ẍi Jesús.
11Yojtakxa mactxel jun ok aon oc yul k'ab camich. Yuj tu' xan max yal axca ti': Man e masanilok max watx'ji e nabal, ẍi.
12A yet max lajwi tx'ajon yakan eb tu', axa yaon pax oc an is jokan pichil tu' junelxa. Axa yay chotan yetok eb tu', max yalon Cham bay eb axca ti':
—¿Chimi nachaj el e yuj, tzet yuj xan caytu' chex wutej? 13Ayin ti', chin e yaloc e Meẍtolok, cax chin e yalon oc e Yajawilok. Yel ton che yala'. 14E Meẍtol in toni, e Yajawil in toni, palta ilab max in tx'ajil e yakan ti'. Yuj tu', moj wal caytu' che yut e ba c'apaxok. 15Max in tx'ox jun ti' ayex yet watx' axca chex wut ti', caytu' che yut e ba c'apaxok. 16Wal yel chi wal ayex, c'am junok mosejal ec'ban yintak is patrón. Cay c'apax tu' eb chekbej, c'am junok mac ec'ban yintak mac chi chekon eb tu'. 17Ta chi nachaj el juntzan ti' e yuj, cax che yikeni, caw wal watx' e yet.
18—Man e yujok e masanil, xan chi wal axca ti', yujtol wojtak mac ex sic'bil exxa el wuj. Palta yowalil ok yunc'alta' tzet tz'ibbilcan yul tx'an Un bay chi yal axca ti': A jun chi low wetok, a' max oc ajc'ulal win, ẍi tx'an. 19Ayokto chi waloncan juntzan ti' ayex, yet watx' a yet ok jayoc wiban, cax ok e yaon wal oc e c'ul win, tol ayin ton Cristo in. 20Wal yel chi wal ayex, a mac chi chaon eb in chekbej, ayin ton chin is cha eb. A eb chin chaon tu', chi cha' c'apax eb Cham cheknejintek, ẍi Jesús.
Max yalon Jesús mac ok aon oc yul k'ab camich
(Mt 26.20-25; Mc 14.17-21; Lc 22.21-23)
21A yet max lajwi yalon Jesús juntzan ti', max oc pitz'an cusc'ulal yin, xan max yal axca ti':
—Wal yel chi wal ayex, a e xol ay jun ok in aon oc yul k'ab camich, ẍi bay eb.
22Axa c'oli yil-len oc ba eb cuywom tu', yujtol man yojtakok eb mac jun chi yal tu'. 23Ay jun camc'ulnebil yuj Jesús sic'libil, chotan ay is tz'eyil yet lanan low eb tu'. 24Max yak'on Simón Pedro yechel bay, yet watx' chi k'anlej bay Jesús, mactxel jun chi yal tu'. 25Yuj tu xin, xan max jitzxac'al oc ba c'atan Cham, max k'anlen bay:
—Mamin, ¿mactxel jun chal tu' tinani'? ẍi bay Cham.
26Axa yalon Jesús bay axca ti':
—A mac bay ok wak' jabok ti' pan ok in la' xol vinagre, a ton jun tu', ẍi.*fn*
Max lajwi yalon Jesús axca tu xin, axa laon jab pan tu', max yak'on bay Judas, is c'ajol Simón Iscariote.
27Lajwic'al chaon Judas jab pan tu', cax max oc Satanás yin, axa yalon Jesús bay axca ti':
—A tzet max a nabalnej el oneni, chic'al ala', cax chak'on yun yin ayman, ẍi bay.
28A eb chi low yin meẍa tu' yetok, c'am junok eb max nachaj el yuj, tzet yuj xan caytu' chi yal bay. 29A Judas tu' c'ubom tumin yayji xol eb, yuj tu' xan ay mac max naoni, tol chi cheklaytok manon junok tzet yetal bay k'in tu', ma xin, a jabok tumin tu' chi cheklay toj yak' bay eb meba' naon eb. 30A Judas tu xin, max lajwic'al loon jab pan tu', max el xol eb, yet k'ekbintakilxa.
Max yaltek Jesús jun ac' chekbanil
31Axa yet max eltok Judas tu', max yalon Jesús axca ti':
—A tinani', ok tx'oxk'abnelay elok, tol caw wal miman welapnok ayin Chekbilintek yuj Dios xol eb jet animail ti', cax ok in tx'oxk'abnej c'apax elok, tol miman yelapnok Dios. 32Ta chin tx'oxk'abnej elok, tol miman yelapnok Dios, ok tx'oxk'abnej el Cham tol miman c'apax welapnok cax yin aymanil ok tx'ox Cham. 33Ex in camc'ulnebil, txenxanej tiempoal ayin ec' e yetok. Axca max yun walon bay eb aj Judea, axca tu' chi yun walon c'apax ayex: Ok in e sayic'ok, palta majto je' e yapni bay ok in apnok tu'. 34Ay junxa ac' chekbanil ok walcan ayex tinani', tol che camc'ulnelej e ba junjun ex. Axca chex wut in camc'ulneni, cayokab tu' che yut e camc'ulnen c'apax e ba. 35Ta che camc'ulnelej e ba junjun ex, ok yojtaknej el masanil eb anima, tol yel toni in cuywom ex, ẍi Jesús bay eb.
Max yaltek Jesús tol ok yiil Pedro yin
(Mt 26.31-35; Mc 14.27-31; Lc 22.31-34)
36Axa k'anlen Simón Pedro tu' bay:
—Mamin, ¿baytal ok ach tok xin? ẍi bay.
—A bay ok in apnok, majto je' e toj wetok tinani'. C'ojanc'ulalto ok je' e toj wetok bay tu', ẍi Jesús bay.
37—Palta Mamin, ¿tzet xan c'am chi je' in toj etok yin ayman tinani xin? Caw bekan in c'ul wak'lay cam oj, ẍi Pedro tu' bay.
38—¿Yel mi bekan a c'ul ak'lay cam wuj? Wal yel chi wal ayach, oxelxa quin eon el en, cax ok ok' no caẍlan yet jun ak'bal ti', ok aloni tol mayin ojtakok, ẍi Jesús bay.

Currently Selected:

Jn 13: ATBYK89

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy