Hag 1
1
Iptzebal yuj watx'jubal templo
1A yet is cab abil yoc Darío yin reyal, yet babel c'ual yet is wak xajaw, a Jehová max chekon Hageo is chekbej k'anjab bay cham gobernadoral Judá, a ton Zorobabel, c'ajol Salatiel, yetok bay Josué, cham sat sacerdote, c'ajol Josadac.
2-3A Jehová Cham Yajaw yin Masanil max chek is chekbej yalon juntzan ti': Ayex ti' che yala' tol ayto yapni c'ual yet chi ca watx'nelay aj in templo. 4A pax ayex ti xin, ¿Tom mayal apni c'ual e cajay bay yulak na manxa watx'ilok cawxi, yak'ban a pax in templo, uchchajnaktok? 5Ayin wal caw Jehová, Yajaw in yin Masanil chi wala', tol chi cam e naon wal yin tzet che yunej. 6Ayex ti', caw wal miman tzet che yawa', palta txennej sat e yawoj che wajajok. Chex lowi, palta c'am chi ec' e wajil. Che yuc'a', palta c'am chi ec' e takintial. Che yaoc e pichil, palta c'am chex k'aẍnaj aj yuj. A mac chi cha' tojol c'u, axca tol a yul olan tx'uy chi yaytok is tojol. 7Ayin wal caw Jehová, Yajaw in yin Masanil chi wal ayex, tol chi cam wal naon ba e c'ul yin tzet che yunej. 8Asek bay xolak te', cax che yiontek te te', yet che ca watx'nej aj in templo. Catatu' ok in ayjok yin tzalojc'ulalil bay tu', cax ok in tx'oxon in mayk'ak'al. 9Che na' tol xiwil tzet ok e yi' yin e yawoj; palta txennej pax tzet che yi'. Ayin wal caw Jehová in chi wala', tol a janic' che c'ubaj bay e yatut, ayin chin xu' saklem ayex. ¿Tzet yuj? Yujtol a in templo, caw wal uchquiltak yayji, yak'ban pax ayex ti', asan yin e watx'nen aj e yatut ayoc e nabal. 10A ton yuj tu' xan c'am chi ay nab bay ayex ti', c'am tzet chi yak' tx'otx' tx'otx' ti' ayex. 11Ayin max in mitx'oc waan yayc'ay nab yiban awoj, c'al bay jolomlak witz, xan chi takaj ixim trigo, yetok an uva, c'al yetok te olivo, yetokc'al masanil sat awoj chi wajlayi. C'amxa c'apax nab chi ay e yiban, tamwal yiban e jobbejal no', tamwal yiban masanil e mulnajil, ẍi Jehová, ẍi cham Hageo tu'.
12A wal yet max yaben Zorobabel, c'al Josué, a ton cham sat sacerdote, c'al yetok masanil anima juntzan k'anej Jehová Dios max yal Hageo is chekbej, caw wal max xiwaj eb bay Jehová, xan max yikej eb. 13Yuj tu xin, max yal Hageo is chekbej Jehová: Chi yal Jehová axca ti': Ayinc'al ec' e yetok, ẍi Cham, ẍi Hageo tu'.
14-15Caywal ti' max yun yiptzen Jehová Zorobabel, gobernador yayji bay Judá, yetok Josué, cham sat sacerdote, c'al masanil eb anima. A yet 24 waay yet is wak xajaw, a ton yet cab abil yoc Darío yin reyal, a ton yet tu' max chaon el eb yich ca watx'nen aj eb templo is Diosal, a ton Jehová Cham Yajaw yin Masanil.
Currently Selected:
Hag 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989