Dn 1
1
Yichbanil yabixal Daniel
1A wal yet is yox abilxa yoc Joacim yin reyal bay Judá, max jayoc Nabucodonosor reyal Babilonia bay Jerusalén cax max yoymanen aj conob tu' yetok is soldado. 2Max beklay cham rey Joacim tu' yuj Dios yul is k'ab eb. Axca tu' max yun yayc'ay yul is k'ab Nabucodonosor tu'; a jantak mitx'k'abej yet templo Dios max ilaytok bay Babilonia yuj eb, cax max yaon octok eb jantak mitx'k'abej tu' bay yul templo is diosal Nabucodonosor bay Babilonia tu'. Max yion c'apaxtok eb juntzan anima aj Judá yetok. 3Cax max chekon cham Nabucodonosor tu' cham Aspenaz, yajaw yayji yin yilon bay despacho, tol chi sic'lay el xol eb israel tu' eb ach'ej xol is yinatil eb rey, c'al xol yinatil eb mimek yopiso max ilaytek tu'. 4Mawal axca eb ach'ej tol watx', c'am jabok tacnakil is mimanil eb, eb jelan, aj nabal wal eb, is moj wal yak'wi serbil bay despacho. A ton eb tu' chi cuylay yin is ti', c'al yin tzet tz'ibbil yuj eb caldeo. 5Max chekon cham rey Nabucodonosor Aspenaz tu' tol axca wal is lobej cham chi lo', c'al is vino cham chi yuq'uej, a' chi ak'lay bay eb nak ach'ej tu', cax chi cuylay eb nak yin oxebok abil. Chi lajwi tu xin, cax chi oc eb yin yak'on serbil cham.
Daniel c'al eb ajun yetok bay despacho
6A xol juntzan eb ach'ej sic'bil el yuj cham Aspenaz tu', a tu' ayoc Daniel, Ananías, Misael c'al Azarías. A ton eb ti' max tit yin is tribual Judá. 7Max q'uexlay is bi eb yuj cham Aspenaz tu'. A Daniel max ak'lay yik Beltzasar; axa Ananías max ak'lay yik Sadrac. Axa Misael max ak'lay yik Mesac; axa Azarías xin max ak'lay yik Abed-nego. 8Palta max na' Daniel tol c'am chi can yin yobal satak Dios yuj is lobej c'al is yuc'a' cham rey tu', xan max k'an bay cham Aspenaz tu' tol c'am chi ak'lay pural yet chi lo' juntzan loj tu'. 9Yuj wal is colwal Dios, xan caw wal watx' Daniel tu' max yiloc cham Aspenaz tu'. 10Palta xin max yalon bay axca ti':
—Chin xiw bay cham wajawil yujtol a wal caw cham max alon tzet ok e lo' c'al tzet ok e yuq'uej. Ta axa ok yiloni tol tz'ontak exxac'al xol juntzanxa eb nak e yet ach'ejal, e yuj wal ayex ti', cax mi chin ak'lay cam yuj cham rey tu', ẍi cham.
11Max yaoc cham Aspenaz tu' jun yilomal Daniel, Ananías, Misael c'al Azarías, xan max yal Daniel bay jun yilomal tu' axca ti':
12—Chin tewi ayach tol chon ak' porobal yin lajonebok c'ual, tol asan comon loj chak' co lo', cax c'am chibej chak' co chi', asanc'al aej chak' juq'uej. 13A yet mayal ec' lajoneb c'ual tu xin, cax chon a lajban yetok juntzanxa eb jet ach'ejal chi loon loj axca wal yet cham rey tu'. Axca tu xin chi je' ak'on ayon tzet ok co lo' atac'ala' tzetbil jili oc, ok ela', ẍi Daniel tu'.
14Max chaon c'ul jun yilomal eb tu', yak'on tzet max k'an eb tu' yin lajoneb c'ual, yuj yak'lay porobal eb. 15Axa yet max ec'tok lajoneb c'ual tu xin, cax max il-layi tol yelxac'al watx' eb, caw wal tec'an eb yintak juntzanxa eb nak yet ach'ejal, eb chi loon loj axca yet cham rey chi lo'. 16Yuj tu xin, a yilomal eb tu' max yiel tzet t'inan chi lo eb c'al vino t'inan chi yuc' eb, cax asanc'al comon loj max ak'lay lo eb.
17A juntzan eb ach'ej ti xin, max ak'lay wal is jelanilal eb yuj Dios, yet chi nachaj el masanil cuyoj tu' yuj eb, c'al yaj can is nabal eb. Axa Daniel xin, ay is jelanil yin naon el wayichej c'al yin tzet chi ak'i yila'. 18Axa yet max ajapnok tiempoal jantak tzet albil yuj cham rey xin, cax max ilaytok masanil eb ach'ej cuywom tu' yuj cham Aspenaz bay satak cham rey Nabucodonosor bay is despacho. 19-20A yet max apni eb satak cham max k'anjab yetok eb, palta a xol eb nak ach'ej tu' masanil, c'am junokxa chi je' lajlen ba yetok Daniel, Ananías, Misael c'al Azarías. Max k'anlej cham rey bay eb yin masanil tzetak yetal yowalil chi oc yopiso jelanilal c'al aj nabalil. Max nachaj el yuj tol lajon el wal ec'ban is jelanil eb canwan ti' yintak masanil eb aj txum, eb naom el k'anej ay bay yul is makbej. Yuj tu' xan a eb tu' max cancan yin yak'on serbil cham rey. 21Axca tu' max yun cancan Daniel yin yopiso tu' masantac'al yet babel abil yoc Ciro yin reyal.
Currently Selected:
Dn 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989