YouVersion Logo
Search Icon

2 S 1

1
Max yaben aj David yuj is camichal Saúl
1A yet max ayc'ay eb amalecita yuj David, max meltzojtek cham cax max jayoc bay Siclag, cab c'ual max cancan bay tu'. 2Axa yet cabjial tu xin, max apni oc jun nak ach'ej petoj bay is campamento Saúl, toxa max tziltok is pichil ayocok, cax ay ajtok tx'otx' xol xil is jolom, yuj tx'oxon elok tol ay is cusc'ulal. A yet max apni oc bay satak David cax max ay nojanok. 3Max k'anlen David bay:
—¿Baytal petoj ach? ẍi bay.
—Petoj in bay is campamento eb et israelal, toxac'al max in elajok, ẍi nak.
4—¿Tzet max uj bay tu'? Al ayin, ẍi David tu'.
—Mayal ayc'ay eb. Ay eb maxto elcanok, ay eb xin max cami. Max cam c'apax Saúl yetok Jonatán is c'ajol, ẍi nak.
5—¿Tzet max yun ojtaknen elok tatol max cam Saúl yetok is c'ajol tu'? ẍi David bay nak. 6Max tak'wi nak bay:
—C'uxanc'al ayin ec' bay Witz Gilboa cax max wiloni tol nojanxac'al ay Saúl yiban is lanza, cax tzunanxac'al yapni oc eb ajc'ul tu' yintak yetok is carruaje eb yet owal c'al is chej eb. 7A yet jun bek tu' cax max toj t'annaj yintak, max quin yilontek, max quin yawteni. ¿Tzet ẍi mamin? quin chi bay. 8Cax max k'anlen ayin baytal titnak in. Max walon bay tol amalecita in. 9Cax max k'anon ayin tol chin jitz oc in ba is c'atan cax chin mak'on cam junelnej yaloni. Manak tu' caw wal iquisto, palta mayal oc pitz'an yailal yin c'ul. 10Yuj tu' max in jitztok in ba c'atan, cax max in mak'onxac'al camok yet c'am chi yab yail miman, yujtol max wila' t'inan ok camxac'al, yujtol mayal bek ay ba yiban txam is yespada. A yet max lajwi cam tu xin, cax max wion el is corona, c'al brazalete ayoc yin is k'ab, xan max witek ayach, mamin, ẍi nak.
11A yet max yaben David axca tu', max tzilontok is pichil yuj cusc'ulal, yetokc'al eb ajun yetok, 12cax max ok' eb yuj cusc'ulal yuj is camichal Saúl yetok Jonatán is c'ajol, yujtol mayal c'apax ayc'ay eb soldado yet israel is conob Jehová, yuj eb filisteo. Majxac'al low eb yuj cusc'ulal masantac'al yet max k'ekbi ay yet jun c'ual tu'. 13Yinxa tzunanil max k'anlej David bay nak ach'ej max ion jay k'anej tu':
—¿Baytal aljinak ach? ẍi bay nak.
—Ayin ti' c'ajol in jun amalecita cajan e xol ti', ẍi nak.
14—¿Tzet yuj xan max a tec'baj a ba a mak'on cam jun mac sic'bil el yuj Jehová? ẍi David tu'. 15Yet wal jun bek tu' cax max yawten jun is soldado:
—Mak' cam jun winak ti', ẍi David tu' bay.
A wal yet jun bek tu' cax max low k'ab nak soldado tu' yin. 16A wal yet lanan mak'lay cam nak tu', max yalon David:
—Ach ay a mul xan chach cami. Ach max al aj a mul tol max a mak' cam cham rey sic'bil oc yuj Jehová, ẍi David.
Bit yuj nalaytek Saúl c'al Jonatán
17Max bitnej David jun bit yet cusc'ulal yuj is nabaniltek Saúl c'al Jonatán is c'ajol, 18cax max chekon cuylay masanil eb Judá yin jun bit tu'. A jun bit tu' tz'ibbilcan ay yul libro yet Jaser:
19¡Ex wet israelal, ok'bal c'ulxac'al max yun yayc'ay co mayk'ak'al bay Witz Gilboa! ¡Ay… tzet xan wal max ayc'ay eb mimek winak yayji co xol!
20Manchak e yalil jun tzet max uj tu' bay Gat, c'amc'al che yalil bay yulak calle bay Ascalón, yet watx' c'am chi tzaloj aj eb ix ix filistea, yet c'am chi aj t'uknaj eb ix tx'ok conobal tu' yuj tzalojc'ulal.
21C'amxaokab chi ayc'ay nab c'al yal ak'bal yiban Witz Gilboa, tamwalokab chi ch'ib ixim trigo chi alay oc yin ofrendail bay tu', yujtol a bay tu' max tec'lay ay is makbal lanza eb nak is colomal israel caw wal tec'an. A bay tu' max lajwi jopopial yili is makbal lanza Saúl.
22C'am bay toc'al max meltzoj Saúl c'al Jonatán yin owal yin tol maj bontok eb yespada c'al is julbal bay xol chiq'uil c'al is seboal eb ajc'ul tol miman yelapnok.
23Ach Saúl c'al ach Jonatán, caw wal tol ochebil ex. Junejc'al e yayji yet iquis ex, cax junejc'al e yayji max ex cami. Caw wal jelan e yec'jab axca no tx'acbaj, caw wal ay e yip yintak no coj.
24Ex k'opojtak ix aj Israel, ok'anek yuj Saúl. Max ex pichlay yuj yetok cak k'ap c'al yetok lino caw wal watx', max yaoc oro yelbubok e pichil.
25¡Ay… tzet xan wal max ayc'ay eb mimek winak bay max oc owal! Max mak'lay cam Jonatán bay jolomlak witz.
26Caw wal chi cus in c'ul oj, wuẍtak Jonatán. C'amxa yalbanil jantak a watx'c'ulal max ak' ayin. Yelxac'al ec'ban max yun wochen a camc'ulal yintak camc'ulal junok ix ix.
27¡Ay… tzet xan wal max cam eb nak mimek winak! ¡Masanil is mitx'k'ab eb nak ak'om owal max c'aylaycan elok! ẍi David.

Currently Selected:

2 S 1: ATBYK89

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy