1 Ti 1
1
Is yichbanil carta Pablo
1Ayin ton Pablo in, chekbej in Jesucristo, yujtol axca tu' yaloncan Dios co Colomal, c'al Cham Jajawil Jesucristo, Cham chi jaoc yipok co c'ul. 2Ach Timoteo, ti chi watok jun in carta ti' ayach. Axca tol in c'ajol ach, yujtol wuj xan max aoc a c'ul yin Cristo. Yak'okabc'al co Mam Dios c'al Cham Jajawil Jesucristo is watx'c'ulal ayach. Ok'okab c'ul en, cax yak'okab c'apax is junc'ulal ayach bay tu'.
Is tenbanil oc waan yob cuybanil
3Caw chi wochej chach can bay conob Efeso tu', axcata' max wut tewok in ba ayach, yet max in toj bay Macedonia, yujtol chi wochej chi cam wal alon bay juntzan cuywajwom, tol c'amokabxa chi cuywaj eb yin tx'ok cuybanilejal. 4Chal bay eb tol manchakxa yaoc eb c'ul yin comon abix, c'al yin txolilal yabixal yichmam eb, tol c'am lajubal. Comonc'al chi teyelej aj ba eb yuj yin nabac'al. A juntzan abix tu', c'am yopiso con is cuyon yin tzet chi yochej Dios chi junej, ma yin jaon oc co c'ul yin.
5Chi waltok jun chekbanil ti abej, yet watx' ok ajwal can camc'ulal eb creyente bay tu'. Ta chi tojlonej oc ba eb, ta c'am chi tzulay eb yuj yikbomal is nabal, ta caw yel chi yaoc eb c'ul yin Dios, ok ajwal can is camc'ulal eb tu'. 6Palta ay eb chi bekoncan juntzan watx' beybalej chi waltek ti'. Yuj tu' xan comonxac'al chi yaoc eb nabal yin comon k'anej c'am yelapnok. 7Chi yochej eb chi oc meẍtolal yin ley Moisés. Caxc'al chi tz'ak tec'baj ba eb yaloni, palta c'am chi nachaj el yuj eb tzet chi yala'.
8Jojtak tol ay yopiso ley Moisés tu' ta chi jikej tzet chi yala'. 9Ojtaknej elok tol man yujok eb watx' beybal xan max ak'laycan jun ley tu', palta yuj eb ok waltek ti' xan max ak'laycanok: Yuj eb tenomtak chi yut ba bay Dios, eb man yikemok chi yut ba bay tzet chi yala', eb c'am chi beybalnen axca chi yochej Dios, eb yob is beybal, eb c'am yelapnok Cham yul sat, eb comonc'al chi buchwaj yin junok tzet yetal watx', eb chi mak' cam is mam c'al is txutx, c'al eb chi mak' cam juntzanxa yet animail, 10eb ajmul, eb chi yun mul yetok yet winakil, eb elk'om anima, eb lek'ti, eb chi naaj k'anej yin yet animail, chi yal elapnok eb chi beybalnen tzet yetal c'am chi cha ba yetok cuybej caw yel. Yuj eb, xan max ak'laycan jun ley tu'. 11A jun cuybanilej caw yel ti', a ton k'anejal yet colbanilej ti' max yak'can Dios ayin yuj walon elok. A jun ti', miman yelapnok. A chi alontek yabixal Dios, Cham cac'al ti' chi tzaloji.
Max ok' c'ul Dios yin cham Pablo
12Ayoc Cham Jajawil Jesucristo wetok yin wopiso ti'. Chi wal yuj diosalil bay Cham, yujtol yikem in yul sat Cham yala'. Yuj tu' xan max yak' wopiso wak'on serbil. 13A yet yalan xin, buchwajwom in yin Cristo. Caw max wak' yobc'ulal yin, toltax bajwajnak in yin, palta max ok' c'ul Dios win, yujtol maj nachaj el wuj tzet chi el wuneni, yujtol c'amto chi waoc Cham yin in c'ul yet tu'. 14Caw miman watx'c'ulal Cham Jajawil max tx'ox ayin. Max yak' waoc in c'ul yin, cax max yak'on c'apax in camc'ulal, axcac'al chi yut yak'on ayon junjun on, yujtol junxanej jayji yetok Cristo Jesús.
15Ay jun tzet caw yel ok wala', cax moj wal chi co cha' jabej. Ulnak ec' Jesucristo yulyibank'inal ti', yuj ul colon el eb yobtakwom. Ec'ban yobtakwom in xol eb yobtakwom tu'. 16Yuj ton tu' xan max ok' c'ul Dios win, yet watx' axc'a oc win chi txecloj elok tol ay is mimanc'ulal Jesucristo. Xan tx'oxbanil wayji bay jantak eb tolto ok yaoc c'ul yin, yet watx' chi cha' c'apax eb is k'inal tol ayc'al yin tojbalk'inal. 17A Dios, Yajaw yayji yin tojbalk'inal. C'am bak'in ok cam Cham. C'am junok mac chi je' yilon oc yin. Asan jun Dios ti', cax c'am junokxa. Mimanokab yelapnok Cham yul co sat. Jalek watx' k'anej bay yin tojbalk'inal. Yunokabi.
18Ach Timoteo, camc'ulnebil ach wuj axca tol in c'ajol ach. Chi waltok juntzan chekbanil ti' ayach, yet watx' ok ot mulnaj a ba axca max yun chekon Dios yal-lay en. Yuj tu', axca wal junok soldado caw watx' chi yut ba yin is yopiso, caytu' chot ak'on ep a mulnaj yin yet Dios. Tec'anc'al chot aon oc yin a c'ul tzet max a cha abej. Chac'al ab tzet chi yal yikbomal a nabal. 19Ay eb c'amxa chi cha yab tzet chi yal yikbomal is nabal, xan mayal etax el eb yin tzet chi yaoc eb yin c'ul. 20A Himeneo yetok Alejandro, caytu' max yut ba eb. Yuj tu' max waoc eb yul k'ab Satanás, yet watx' chi yojtaknej el eb tol c'am chi je' chi jal buchwal k'anej yin Dios.
Currently Selected:
1 Ti 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989