1 S 1
1
Max yak' Dios jun yune' xal Ana
1A bay conob Ramá, bay siquilal tx'otx' yul yet Efraín, a tu' cajan jun cham chi yik Elcana, is c'ajol Jeroham, yitxiquin Eliú, axa is mam icham is mam cham chi yik Tohu, is c'ajol Suf, yet is tribual Efraín. 2Cawan yistzil cham Elcana tu', jun xal chi yik Ana, junxa xal chi yik Penina. A xal Penina tu', tx'ial yune', axa pax xal Ana xin, c'am junok yet. 3Junjunc'al abil chi betic' cham Elcana bay Silo yak'on xajanbal, c'al ayilal bay Jehová, Cham Yajaw yin Masanil. A bay tu' ay cawan is c'ajol cham sacerdote Elí ayoc yin sacerdoteal yetok is mam, a jun chi yik Ofni, axa pax junxa xin, chi yik Finees.
4A yet chi jay c'ual k'in cax chi yak'on cham Elcana xajanbal, chi yak'on cham jabok no xajanbal tu' bay Penina is yistzil tu', c'al bay eb is yuninal yet chi chi eb. 5Axa pax yin Ana tu xin, caw wal ay is camc'ulal, xan yelxac'al watx' no chibej chi ak'lay bay, caxc'al yel c'am yune' xal max ak'lay yuj Jehová. 6Yuj tu xin, caw wal yob tzet chi yal xal Penina tu' yin xal Ana tu', yuj tx'emon cus c'ul yujtol c'am yune' chi yak' Jehová.
7A yet chi betic' cham Elcana tu' yetok eb xal yistzil yet junjun abil bay cajlobal Jehová, caw wal chi tx'emlaytek is chichonc'ulal xal Ana yuj xal Penina tu'; yuj tu' caw wal chi ok' xal Ana, xan c'amxa chi lowi. 8Xan max yal cham Elcana tu' bay xal Ana axca ti': Ana, ¿tzet yuj xan chach ok'i, cax c'am chach low yuj cusc'ulal? ¿Tom man watx'ok wayji etok yintak lajonwanok one'? ẍi cham bay.
9A yet junel yet ayic' eb bay Silo tu', a yet max xew yoc loj, max aj jucnaj xal Ana tu', max toj bay cajlobal Dios. Chotan ay cham sacerdote Elí bay puertail cajlobal Dios tu'. 10Chi ok' xal Ana bay tu', caw wal ayoc yin cusc'ulal, cax chi txajli bay Jehová. 11Cax max yak'on xal is ti' bay Cham: Mamin Jehová, tol Yajaw ach yin masanil, ta chin a natek, ayin a chekbej in ti', yin in cusc'ulal, ta chi el yin a c'ul chak' junok wune', et yayji nak yin junelnej, man ok tzuklay xil is jolom, axca tol yechel yayji ocok, tol et, ẍi xal.
12Caw wal najat max yut xal Ana yakan is txaj, yuj tu' xan max oc t'anan cham Elí yin xal, 13yujtol chi txajli yin is nabal bay Jehová palta c'am chi ablay tzet chi yala', asan tol chi bil is ti', xan max na' cham Elí tol uq'uem an xal. 14Max yalon cham:
—¿Bak'in ok a bek oq'uen an? K'okbilxa oq'uen an tu', ẍi cham.
15—C'amak mamin, man uq'uemanok in, c'amc'al tzet max wuc' aytok, asan tol ayin oc yin in cusc'ulal. A jun in cusc'ulal ti', lanan walon bay Jehová. 16C'am cha na' tol c'am yelapnok Cham yul in sat, ayxatax max in c'oli in txajli bay yuj jun in q'uixawc'ulalil ti', ẍi xal.
17—Asi' yin junc'ulal xin, yak'okab Jehová co Diosal ayon israel on ti' ayach tzet yetal cha k'an tu', ẍi cham.
18—Yuj wal dios ayach, ẍi xal; cax max meltzoji.
Maxc'al lajwi tu', max meltzoj xal Ana tu' lowok. Yettaxc'al tu' majxac'al oc xal yin cusc'ulal junelokxa. 19Yet puch k'inibalil yet junxa c'ual max oc eb yin ayilal bay Jehová; max lajwi tu' axa meltzoj eb bay yatut bay Ramá. Axa way cham Elcana yetok xal Ana tu', max nalaytek is txaj xal yuj Jehová. 20A yet tu' max occan xal yin yobixal. Axa yet max jay c'ual watx'ji c'ul xin, max jay jun is winak unin xal. Samuel max yak' xal yika', yujtol max k'an xal bay Jehová.*fn*
21Max lajwi tu xin, max jay pax c'ual k'in yet chi toj cham Elcana yak'on xajanbal axcac'al chi yun cham yet junjun abil, c'al yiken bay max yak' is ti' bay Jehová yetok eb xal yetbi c'al yuninal. 22Axa pax xal Ana xin, maj tok yetok eb, max yalon bay yichamil tu':
—C'am chin toj tinani', ato yet ok el nak unin ti' yin im, catatu' ok in tok. Catatu xin, ok tok nak unin ti' wetok, cax ok tok wak'onxac'al can nak junelnej bay Jehová, ẍi xal.
23Max tak'wi cham Elcana tu' axca ti':
—A tzet yetal watx' chi eloc chabej, a' chonej; yuj tu' canan. Atookab yet ok el nak yin im tu', cax ok ach tok, cax ok eken tzet max al bay Jehová, ẍi cham.
Yuj tu' xan max can xal yetok nak unin tu', masantac'al yet max el nak yin im. 24A yet max el nak unin yin im xin, axa yiontok xal Ana tu' nak bay is cajlobal Jehová bay Silo, caxc'al yaliẍto nak. Axa yiontok xal jun no toro oxeb*fn* abil is k'inal no', max yion c'apaxtok xal wak almu ixim trigo, yetok jun tz'um axca tx'uy yayji, nojnak yuj vino. 25Max lajwi tu' max mak'on cam eb no wacax tu' yin xajanbalil, max yak'on can eb nak yaliẍ unin yul k'ab cham sacerdote Elí. 26Max yalon xal Ana tu' bay cham Elí axca ti':
—Ak' mimanc'ulal win mamin, ayin ton ti' max quin ayji ec' a c'atan yet junel, yet max in txajli bay Jehová 27yuj in k'anon bay tol chi yak' jun wune' ti'. Ilab tol max yak' Jehová ayin. 28Yuj wal tu xin, chi el wal yin in c'ul, chi ul wak'on can nak bay Jehová. Masanil is k'inal nak bay yulyibank'inal ti', yet Cham yayji ocok, ẍi xal.
Yuj tu', max ay nojan yin ayilal satak Jehová.
Currently Selected:
1 S 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989