Miqueas 1
1
Cbel tcastiw tnam Samaria tu'n Dios
1Atzun yol lu tzaj tma'n Kman te Miqueas, aju aj Moreset, tuj tk'ijlalil tej tcawin Jotam, tuj tk'ijlalil tej tcawin Acaz ex tuj tk'ijlalil tej tcawin Ezequías, rey ke tuj tnam Judá. Tzaj k'ma'n te ti'j tnam Samaria ex ti'j tnam Jerusalén.
2Cycyakile akeye tnam cybintze ju yol lu, ex akeye xjal najl tuj tcyakil twitz tx'otx' cyk'ontz cywi'ye ti'j. Max ctzajel yolin Kman Dios tuj tja, aju ja xjan; c'oquel te testiw ti'j cybinchbene mya ba'n.
3Cyque'yinxe, lu Kman c'eletz tuj lugar jatum najl ex ctzajel bet cywi' ke witz.
4Che bel ulj ke witz tjak' tkan, ic tza'n in cub ulj xcab oc tocx k'ot tuj k'ak', ex te cabe che elel ke chk'ajlaj cyxe witz, mer ic tza'n otok cu'tz txkan a' tuj tmij.
5Cbantel tcyakil jlu nok tu'n tlaj miban che bin ke tiyjil Jacob ex tu'n tlaj cyil aj Israel. ¿Jatum ate' ke tiyjil Jacob miban che bin? Ate' tuj tnam Samaria. ¿Jatum ate' ke lugar jatum in che c'ulun aj Judá cywitz ke tilbilal? Lu ate' tuj tnam Jerusalén. 6Cyja'tzun in tma'n Kman: Bi'x cbajel xitj tnam Samaria wu'ne tu'n toc te jun cojbil jatum tu'n tcu'x awet tkan uva. Ke abj otok che cub tilj tuj tnam che bajel nsputine tuj chk'ajlaj t-xe witz, ex o'cx t-simyentil cyjel ten tuj k'ancha'l. 7Cycyakil ke tilbilal at cyu'n che bajel buchj, ex tcyakil cyoyaj in pon cyi'n tuj tja cydios che bajel patit. Bi'x che bajel naj cycyakil ke tilbilal nno'c cydiosin, porque chmet tcyakil jlu cyu'n ti'j oyaj in cyaj cyk'o'n xinak cye ke xu'j jawni cywitz cyuc'il xinak ax ate' tuj tja cydios, ex ax ke oyaj lu che ajbel te chojbil cye ke xu'j jawni cywitz cyuc'il xinak tuj juntl nasyon, chi Dios.
Oc ten Miqueas ok'el tu'n tbis
8Tu'n jlu chin oquel tene ok'el cyuw wen tu'n ta'w nbise, mi'n tz'oc nk'o'ne nxajbiye oc nbete, ex mi'n tz'oc nk'o'ne nxbalune; chin oquel tene wuyil ic tza'n in wuyin jun xo'j tu'n tbis, ex chin jawil sch'ine ic tza'n in k'ajt jun chyu'j avestrús. 9Porque aju c'ixbisabl cyi'j aj Samaria minti' k'anbil ti'j: aju c'ixbisabl lu ma pon canun tuj tx'otx' Judá ex ttzi tpwertil tnam Jerusalén, aju tnam jatum najl ke nxjalile.
10Mi'n txi cyma'ne jlu cye aj Gat, ex mi'n che oc tene ok'el. Cytolin jaw cyibe tu'n ta'w c'ixc'oj tuj kuk tuj tnam Bet-le-afra. 11Akeye xjal najl tuj tnam Safir, e cyxi k'i'ne pres tuj juntl lugar minti' cyxbalune tocsa'n tu'ntzun tcub cych'ixwiye. Ke xjal najl tuj tnam Zaanán mlay che etz. At ok'el tuj lugar Bet-esel, tu'ntzun jlu mlayx che oninjtze tu'n. 12Ke xjal najl tuj tnam Marot in xi cyẍoquin cyi'j tu'n ta'w c'ixc'oj ex cyajbil tu'n cyten tuj txubtxaj, porque ma tzul castiw tu'n Kman ex ma pon canun ttzi tpwertil tnam Jerusalén. 13Akeye xjal najl tuj tnam Laquis e oque miban che bine ic tza'n ke aj Israel, ex tu'n cylaje e binchan il ke aj Sión, cyja'tzun, cyc'alo'n oque cycheje cyi'j ke cycarwaje tu'n cyel oke. 14Akeye aj Judá, te jumajx cycolin cyaje tnam Moreset-gat; aju tnam Aczib c'oquel te c'obil cye cyrey aj Israel.
15Chi Kman in tma'n: Akeye xjal najl tuj tnam Maresa, ctzajel nsama'ne jun xjal tu'n tcub cyi'je tu'n, ex keju at mas cyoclen cyxol aj Israel, atzun che xel ok tuj toy' pic Adulam tu'n cyclonte cyib. 16Ex atzun cyeye aj Judá, cymatzo'mele tcyakil ttzmal cywi'ye te jun techal ti'j cybise, tu'n cylaj ke cyc'wa'le c'ujla'nxix cyu'ne. Jumajx cymatzo'mele ttzmal cywi'ye tu'ntzun tcyaj ic tza'n ti'j twi' jun c'utz tz'a'j ti'j, porque ke cyc'wa'le che xel k'i'n pres tuj juntl tnam najchak.
Currently Selected:
Miqueas 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993