Lamentaciones 1
1
Tnejel ok'el
1Aju tnam nojni cyu'n xjal nej, ma cyaj ten tjunalx minti' xjal tuj. Aju tnam ma' toclen cyxol mastl nasyon nej, ma tz'oc mer ic tza'n jun meba xu'j. Aju tnam in cawin cyibaj mastl nasyon nej, ja'lo ma cyaj ten tjak' tcawbil juntl nasyon.
2In xjik'ban tu'n ok'el tcyakil konic'an; in cu'tz ta'l twitz ti'j tk'o'tx. Cyxol cycyakil keju e c'ujlante te mi a'l jun cye in tzaj k'ukbante tc'u'j. Cycyakil ke tamiw ate' nej, ma che oc meltz'aj ti'j ex ma che oc te aj k'oj ti'j.
3Nimxix in che c'ixbisanjtz ke aj Judá ex ma che ocx k'o'n tjak' ak'untl cyuwxix, ax icx ma che'x k'i'n tuj juntl nasyon najchak. Ke tnam xjal lu ma che pon najal cyxol mastl nasyon, ex minti' in cnet ch'in ojlabl te cye. Ma che pon cnet cyu'n ke xjal e oc lpe' cyi'j tu'n cytzyet, ex ma baj cytxolban cyib cyi'jele tu'n mi'n cytzokpaj.
4Bisbajilxix cyque'yinx ke be in che pon tuj tnam Sión, porque mi jun cyja' t-xi' cyuj ke nink'ij. Minti'tl xjal in che bet cytzi' tlamel tnam, in che ok' ke pal, in baj cyc'u'j ke k'apoj ate' tuj, ex nim c'ixc'oj nnic'x cyu'n aj Jerusalén.
5Ke aj k'oj cyi'j in che cawin cyibaj, akeju ic'ul cye in che tzalaj wen tu'nju ate Kman ma baj c'ixbisante cye, tu'nju nim il o cybincha. Ke cyc'wa'l ma che'x tzyu'n ex ma che'x k'i'n cyu'n aj k'oj tuj juntl nasyon najchak.
6Tcyakilju tbanil que'yin at tuj tnam Sión ma cub naj; ke nejenel cyxol ic cyten ic tza'n ke masat, in che jyon c'ul te cywa ex minti' in cnet cyu'n; ya minti'tl cyipun tu'n cyel ok cywitz keju lajol cye.
7In tzaj cyna'n aj Jerusalén aju bis ex c'ixc'oj otok tzaj cyi'j ex in tzaj cyna'n tcyakilju cyk'inumabl o ten ojtxi; ex in tzaj cyna'n tej tcub cyi'j cyu'n aj k'oj ex minti' jun o tz'onin cyi'j. Tej toc cyque'yin ke aj k'oj otok cub xitj tnam e xmayin ti'j.
8Nimxix il ma cybincha aj Jerusalén, cyja'tzun ma che oc ic tza'n jun ti'xti puro tz'il. Akeju in che niman cye nej, atzun ke in che el ic'unte cye ja'lo, porque ma cyil in che ch'ixwi ic tza'n jun xjal minti' t-xbalun toc. Cyja'tzun in che ok' ex nne'l cyewan cywitz tuc'il nim cych'ixwi.
9K'ancha'l tz'il ti'jxi cyxbalun; ic cyten ic tza'n jun xu'j in tz'ilix tu'n ẍwo'j, ex minti' e ximan ti'j ka te mancbil at tu'n tcub cycastiw. Atzun ja'lo minaben ma che cub tz'ak ex mi a'l jun ba'n tk'ukbante cyc'u'j, ex in cyma'n cyja': Kman Dios, que'yintza aju yajbil keye, ke aj k'oj ki'je ma jaw cyniman cyib, che chi.
10Ke aj k'oj cyi'j ma tz'el cyetzan tcyakil cyk'inumabl at tuj Jerusalén. Ke xjal mya nimal Dios ke e ilwaj tej cyocx tzokpaj tuj tjaya, akeju tzaj tma'na cye minti' tu'n cyocx tuj ju lugar jatum in cub cybuyin cyib ke xjal etzan tu'na.
11Cycyakil xjal najl tuj tnam in che ok' ex in che jyon ti'j cywa; xi cyk'o'n cyk'inumabl tu'n tcnet cywa tu'ntzun cyank'in ch'intl. Kman, que'yintza, nimxix in ko el ic'une cyu'n xjal.
12Akeye in che bet tuj be, ¿minti'pe in tzaj k'ak'an cyc'u'je ki'je? Che tencuye ximal ti'j ka at jun in c'ixbisanjtz ic tza'n keye, nimxix in ko c'ixbisanjtze wen. Ma tzaj t-sama'n Kman aju c'ixbisabl lu kibaje tej saj tk'oj ki'je.
13Max twitz cya'j ma tzaj t-xo'n Kman jun k'ak' ki'je ex bi'x ma che tz'e'y kbakile tu'n; ma cub tk'o'n jun c'obil tuj kbeye ex bi'x ma ko aj pac'chaje tu'n; ma ko cyaj coline tu'n ex tuj enter k'ij ato'ye tuj c'ixc'oj.
14Ma til Dios ju kile ex ma cub tc'alo'n tu'n tk'ab ex ma jax tk'o'n tibaj kkule ic tza'n jun yuw; tu'ntzun jlu ma baj kipune. Ma ko'x k'o'ne tuj cyk'ab aj k'oj, akeju mlay ko xcye'ye cyi'j.
15Najchak ma che el tlak'ba'n Kman ti'j ju tnam Jerusalén cycyakil ke xjal cyuwxix cyc'u'j, akeju in che colintok ki'je. Tzaj tchmo'n txkan soldad k'ojlel ki'je tu'ntzun cycub byo'n ke xinak cyuwxix cyc'u'j ate' kuc'ile. Aju tnam Judá ma baj waban tu'n Kman ic tza'n in baj waban twitz uva tu'n tel ta'l.
16Tu'ntzun jlu in ko ok'e wen. Nne'l txutin ta'l kwitze, mi a'l jun ba'n ttzaj k'ukbante kc'u'je, mi a'l jun ba'n ttzaj k'onte kipune. Tuj mebayil ma che cyaj ke kxjalile, porque aju aj k'oj ki'je masxix tipun kwitze.
17Ke aj Jerusalén in xi cynukpi'n cyk'ab tu'ntzun cytzaj onin, pero mi jun in tzaj k'ukbante cyc'u'j. Ma tzaj tma'n Dios tu'n tbaj cytxolban cyib ke aj k'oj cyi'j ke tiyjil Jacob; aju tnam Jerusalén ma tz'oc cyk'o'n ic tza'n jun ti'xti puro ic'bilxix.
18Tuj ttxolil ma tbincha Dios jlu ki'je, porque minti' o txi knimane ke tmandamyent. Ko cybintze cycyakile akeye tnam ex cyque'yin oque aju c'ixc'oj ki'je. Ke cu'xun ex ke k'apoj ate' kxole ma che'x k'i'n pres tuj juntl nasyon najchak.
19Xi kkanine onbil cye keju mojl kyole cyuc'il nej, pero nok ma ko cub sbu'ne cyu'n. Ke pal ex ke tij xjal ate' kxole ma che cyim tuj tnam tej in che jyontok cywa tu'n cyank'in ch'intl.
20Kman, que'yintza aju ta'w bis ki'je. In kna'ne mer ic tza'n cjawitz ok kanmiye. Oc in ko oc tene ximal ti'j tu'nju minti' ma txi knimane tmandamyenta, in tzaj ta'w tuj kanmiye. Ti'jxi tnam nim xjal in che cub byo'n tu'n spad, atzun tuj tnam nim xjal in che cyim tu'n tx'u'j yabil.
21In cybi'n xjal in ko ok'e, pero mi a'l jun in tzaj k'ukbante kc'u'je. Cycyakil aj k'oj ki'je ba'n cyu'n aju mya ba'n ma tzaj ki'je, ex ma che jaw tzalaj tu'nju ma tbinchaya jlu ki'je. Nman, cuchiwt tu'n tul naj tk'ijlalil castiw aju banin ti'j tu'na, tu'ntzun tcub cycastiw ic tza'n keye ma cub tk'o'na kcastiwoye.
22Que'yintza tcyakil cybinchben mya ba'n; binchama cyi'j ic tza'n ma tbinchaya ki'je tu'n tlaj kile, porque nimxix in ko ok'e ex ma baj tipun kanmiye.
Currently Selected:
Lamentaciones 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993