Salmib 55
55
U ch'awem ruc' Dios ri terenem pa rakan
1Nu Dios,
chta' la ri nu ch'awem;
xak mäya' la can
chi jeri' ri tok'ob
ri quintz'onoj che la.
2-3Choc la il chwe,
chinch'abej la ulok;
pa ri nu c'axc'olil
quintz'onoj tok'ob che la.
Quinbirbit
rumal ri qui ch'abal ri c'ulel,
ri qui rakoj tak chi'aj
ri e banal tak etzelal.
Qui mulin c'axc'ol chwij,
cäquiban c'ax chwe ruc' ch'ujilal.
4Ri wanima', cäk'oxow cho nu c'u'x;
ri xibriquil re ri cämical
kajinak panuwi'.
5Nu rikom nimalaj xibriquil;
¡quinbirbit rumal xe'n ib!
6Quinbij c'ut:
“C'o ta banom wi e c'o ta nu xic'
jacha' ri palomax;
quinrapap ta ri',
cuya' c'u ri' quinuxlanic.
7Quinrapap ta ri' quinbe naj;
quinejekel ta ri' pa ri chaki'j uwo sak.
8Quinxiq'uin ta ri'
quinbe ruc' aninakil
che u ch'ukic wib
rech man cuban ta c'ax
ri quiakik' chwe xukuje' ri cakulja.”
9Sacha' la qui wäch Ajawaxel,
yuju' la ri qui ch'abal,
man c'o ta chi jas quinwilo
xuwi ri banoj c'ax
xukuje' ri oyowal,
10chi pa k'ij chi chak'ab
caquibinibej ri tinimit.
Etzelal
xukuje' ch'ayanic queban pa ri tinimit:
chuwirinak chi ri tinimit;
11nojinak ri u xo'l tak ja che tokinic
xukuje' subunic.
12Man jun c'ulel ta
ri banowinak ta c'ax chwe,
quincuin ta c'u ri' quincuy u mac;
mawi jun ri cäretzelaj ta nu wäch
ri xuyac ta rib chwij,
quincuin ta c'u ri' quinc'u' wib chuwäch.
13¡Lal, ri lal banowinak c'ax chwe,
ri kachil kib uc' la,
14ri junam cakarik kib uc' la
pa ri rachoch ri Dios
rech cujtzijon ruc' ronojel kanima',
ri xenwachilaj xujbin
chquixo'l ri winak!
15¡Chemajix ri e nu c'ulel
rumal ri cämical!
¡E c'asc'oj chekaj pa ri mukubal,
nojinak c'u ri canima' che ri etzelal!
16Ri in c'ut quinsiq'uij na ri Dios;
ri Ajawaxel quinuto' na.
17Quintzujun na chuwäch,
quinok' na ak'ab, benak k'ij
xukuje' chak'ab,
cutatabej c'u na ri nu ch'abal.
18Quinuto' na pa tak ri ch'o'j;
cuchajij ri nu c'aslemal,
pune' sibalaj e q'ui ri quewalij chwij.
19Ri Dios ri cajawin chbe k'ij sak,
cutatabej na ri nu ch'awem
quebukasaj c'u na ri e nu c'ulel;
man cäquiq'uex ta c'u ri qui no'j
mawi cäquixe'j ta quib chuwäch ri Dios.
20Caquiwalijisaj ri qui k'ab
chquij ri cachil;
man caquitz'akatisaj ta ri qui chi'nic
chi canima' quib cuc'.
21C'o na ri u lebebic ri qui tzij
chuwäch ri mantequiy,
ch'o'j c'ut ri cacaj.
Ri qui ch'uch'ujil ri qui tzij c'o na
chuwäch ri aseit,
man je ta c'ut
xa c'u e ch'ich' re ch'o'j.
22Chaya' can ronojel ri a bis
pa u k'ab ri Ajawaxel,
catutok'ej c'u na;
mawi c'u jumul cuya' be chi
cätzak ri winak ri cäniman che.
23Nu Dios,
ri cämisanelab
xukuje' ri banal tak tzij
man naj ta quec'asi'c
mawi cäniq'uiajir ri qui c'aslemal;
lal caban na la chque chi quetzak bic
chupam ri mukubal,
ri in c'ut nu cuban nu c'u'x chij la.
Currently Selected:
Salmib 55: QUICH1
Highlight
Share
Copy
Want to have your highlights saved across all your devices? Sign up or sign in
Biblia Quiché © Sociedades Bíblicas Unidas, 1995.