Salmib 118
118
Ri u cuinem ri Ajawaxel man c'o ta cajunamataj ta wi
1Chiya' maltioxinic
che ri Ajawaxel,
rumal rech chi utz ri are';
rumal rech chi
ri lok'ok'ebal u c'u'x junalic.
2Chquibij ri aj israelib:
“Ri lok'ok'ebal u c'u'x ri Ajawaxel
junalic.”
3Chquibij ri e cojol tabal tak tok'ob:
“Ri lok'ok'ebal u c'u'x ri Ajawaxel
junalic.”
4Chquibij
ri queyo'w u k'ij ri Ajawaxel:
“Ri lok'ok'ebal u c'u'x ri Ajawaxel
junalic.”
5Pa ri nu c'axc'obic
xinsiq'uij ri Ajawaxel;
ri are' xinutatabej,
xuya' c'u ri nu torotajic.
6Ri Ajawaxel c'o wuc';
man quinxe'j ta wib.
¿Jas ta ri cäcuin ri winak
cuban ta chwe?
7Ri Ajawaxel c'o wuc';
are' cäyo'w to'banic chwe.
¡Quinwil na aretak quech'äctaj
ri cäquetzelaj nu wäch!
8Are utz na ri u jiquibaxic c'uxaj
chrij ri Ajawaxel
chuwäch ri u jiquibaxic c'uxaj
chrij ri winak.
9Are utz na ri u jiquibaxic c'uxaj
chrij ri Ajawaxel
chuwäch ri u jiquibaxic c'uxaj
chquij winak ri nimak qui k'ij.
10Conojel ri nimak tak tinimit
xquisutij wij,
pa ri u bi' c'u ri Ajawaxel xebench'äco.
11Xquisutij wij pa ronojel c'olbal,
pa ri u bi' c'u ri Ajawaxel xebench'äco.
12Xquisutij wij e jacha' ta ne sita'l,
xchup c'u ri coyowal
jacha' k'ak' quech q'uix;
pa ri u bi' ri Ajawaxel xebench'äco.
13Xinquich'icmij
ruc' chuk'ab rech quintzakic,
xpe c'u ri Ajawaxel che nu to'ic.
14In quinbixon che ri Ajawaxel,
ri cäyo'w nu chuk'ab; are' nu colonel.
15Pa tak ri cachoch ri e jic winak
e c'o quicotemal tak bix re ch'äcanic:
“Ri u cuinem ri Ajawaxel
xyo'w ri ch'äcanic.
16¡Ri u cuinem ri Ajawaxel
man c'o ta cäjunamataj ta wi!
¡Ri u cuinem ri Ajawaxel
xyo'w ri ch'äcanic!”
17¡Man quincäm ta na,
xane' quinc'asi' na,
che u tzijoxic ri u banom ri Ajawaxel!
18Ri Ajawaxel u c'äjisam nu wäch
ruc' c'anal,
man in u jachom ta c'u
pa u k'ab ri cämical.
19¡Chebijaka' ri roquibal
ri rachoch Dios,
quinwaj quinoc chupam
che u ya'ic maltioxinic
che ri Ajawaxel!
20Are oquibal wa'
ri coc wi na ri Ajawaxel,
chi' c'u queboc wi na ri e jic.
21Quinya' maltioxinic che la, Ajawaxel,
rumal chi tzelem la u wäch nu tzij,
xukuje' chi lal nu colonel.
22Ri abaj ri xetzelax u wäch
cumal ri e banal tak ja,
are c'u uxinak ri abaj
ri nim na u patan.
23Wa' are' banowinak ri Ajawaxel
uj c'u mayininak.
24Are k'ij wa' ri u banom ri Ajawaxel:
chujajatok chujquicot pa ri are'.
25Bana' la tok'ob Ajawaxel,
chujcolo' la.
Bana' la tok'ob Ajawaxel,
¡bana' la chi utz cujelic!
26¡Tewichital ri cäpe
pa ri u bi' ri Ajawaxel!
Quixkatewichi'j ulok
kas chupam ri rachoch ri Ajawaxel.
27Ri Ajawaxel are' Dios;
¡are' cujtunanic!
Chichaplej ri nimak'ij,
chebic'ama' bic qui k'ab tak che'
c'ä cuc' tak ri ruc'a' ri porobal.
28Quinmaltioxin che la quinya' c'ut
u k'ij ri nimalil la,
lal c'ut ri nu Dios.
29Chebiya' maltioxinic
che ri Ajawaxel,
rumal rech chi utz ri are';
rumal rech chi
ri lok'ok'ebal u c'u'x junalic.
Currently Selected:
Salmib 118: QUICH1
Highlight
Share
Copy
Want to have your highlights saved across all your devices? Sign up or sign in
Biblia Quiché © Sociedades Bíblicas Unidas, 1995.