Nah 1
1
Ri royowal ri Dios pa ruwi' ri tinamit Nínive
1Chupan re wuj re' tz'ibatel-wi kan ri xtibebanatej rik'in ri tinamit Nínive achi'el xq'alajirisex chuwech ri Nahum ri aj pa ko'ol tinamit rubini'an Elcós.
2Ri Jehová kan jun Dios ri kan man niqa' ta chuwech chi niban itzel chike ri ruwinaq.
Kan nuya' k'a rutojbalil-mak pa kiwi' rije'.
Rija' kan nuya' k'a ruk'exel chike ri nikipaba-ki' chuwech.
Kan noyower k'a kik'in ri e itzel taq winaqi'.
3Ri Jehová kan k'o chupan ri kaq'iq' rachibilan ri job y ri surkum,
y ri nimalej taq sutz' chuwech rija' achi'el ri poqolaj ri nuyek ri raqen toq nibiyin.
Ri Jehová kan janila ruchuq'a' y man chi'anin ta noyower,
jak'a kan man xtuya' ta kan ri aj-mak choj keri'.
4Rija' yeruch'olij ri palou y nuben chike chi yechaqi'j-qa;
chuqa' nuben chi ronojel ri raqen taq ya' yetzaj-qa.
Jajun ri ruwach'ulew Basán y ri juyu' Carmelo xa man yewachin ta chik,
y ri kotz'i'j richin ri juyu' Líbano chuqa' xa yemayamo-qa.
5Ri juyu' yebaybot chuwech rija',
y ri ch'uti'n taq juyu' xa yek'is-qa.
Ri ruwach'ulew kan nisilon chuwech rija',
keri' chuqa' ronojel ri ek'o chuwech.
6¿Achike kami nitikir nikoch'on ri royowal rija'?
¿Achike ta k'a nitikir nikoch'on ri ruq'aq'al ri royowal?
Roma ri royowal rija' kan nitix achi'el ri ch'ich' ri ya'erisan pa q'aq',
y chuwech k'a rija' yepax ri nima'q taq abej.
7Ri Jehová kan janila utz;
rija' kan jun tobel chupan ri q'ij toq k'o q'axomal.
Kan yeruto' ri kikuquban kik'u'x rik'in.
8Jak'a ri e etzelanel richin kan xkeruk'is el,
achi'el nuben jun nim raqen-ya' ri kan nibolqo't y nuk'uaj-el ronojel.
Ri Jehová kan xkeruq'i' k'a ri e etzelanel richin chupan jun nimalej q'equ'm richin yeruk'is.
9¿Achike k'a nich'ob chirij ri Jehová?
Rija' kan xtuya-wi-pe ri wululen y xtuben chi xtik'is ronojel.
Man nik'atzin ta richin nukamuluj chik.
10Ri e etzelanel kan kisuq'un-ki' chupan jun k'ix ri man yetikir ta chik nikikol-ki'.
Chuqa' kan achi'el nuben jun q'abarel.
Kan xkek'is k'a achi'el ri chaqi'j k'im.
11Jun k'a chike ri iwinaq rix aj-Nínive ri xunojij itzel chirij ri Jehová,
y re wineq re' kan jun itzel ya'ol na'oj.
12Roma ri' kere' nubij ri Jehová chire ri rutinamit Judá:
Stape' ri e etzelanel awichin k'o janila kuchuq'a' y janila e k'iy,
man rik'in ri' yin kan xkenchoy-el achi'el yechoy-el ri q'ayis.
y man jun bey chik xkebek'ulun-pe.
Yin kan janila k'a at nuya'on-pe pa poqon;
jak'a re wakami kan man xkatinya' ta chik pa q'axo'n, rat nutinamit Judá.
13Wakami k'a xkatinwelesaj chuxe' ri kuchuq'a' rije'.
Chuqa' kan xkatotej pa kiq'a'.
14Jak'a pan iwi' rix aj-Nínive, ri Jehová kan ruya'on k'a rutzijol.
Kan man jun iwijatzul xkek'oje' richin xkixnatex.
Kewulex-el ri wachibel e banon rik'in che' y ri e ya'erisan pa q'aq'.
Y keri' ri jay kichin ri dios ri' kan xketole' kan.
Xtuben k'a chi chiri' xkixmuq-wi roma yalan itzel ik'aslen xiben chuwech rija'.
15Rix winaqi' aj-Judá titz'eta' ri achike k'amayon-pe ri utzilej rutzijol.
Rija' kan peteneq k'a chuwa taq juyu';
kan peteneq k'a ri niq'alajirisan ri uxlanibel-k'u'x.
Kan kixnimaq'ijun k'a rix aj-Judá;
kan ke'iya' k'a ri isujun chire ri Jehová,
roma man jun bey chik k'a xkepe chiwij ri e etzelanel iwichin.
Rije' xa kan jumul k'a xkek'is-el.
Currently Selected:
Nah 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.