Lam 1
1
Ri Jerusalem xa xuyonij kan
Ri q'alajirisey ruch'abel ri Dios nubij:
1Ri nimalej tinamit ri xek'oje' e k'iy ruwinaq ojer kan,
wakami xa xuyonij kan.
Ri tinamit ri kan nim rubanon chikikojol ri ch'aqa' chik ruwach'ulew,
wakami xa xok kan achi'el jun malka'n ixoq.
Ri ojer kan ri tinamit ri' ja rija' ri reina pa kiwi' ri ch'aqa' chik ruwach'ulew;
jak'a re wakami xa xxime' pa samaj.
2Ri pa taq chaq'a' kan nuk'is-ri' chi oq'ej.
Ri ruya'al runaq' taq ruwech kan nibiyin k'a qa chupalej.
Man jun k'a chike ri xe'ajowan richin ri nikuquban ta juba' ruk'u'x.
Konojel k'a ri e rachibil xa xepiskolin chirij y xe'ok etzelanel richin.
3Ri winaqi' aj-Judá pa ruwi' ri kan janila xkitej poqon y janila kow xesamej.
Chuqa' kan xbekiya' k'a ki' pa ximonri'il.
Rije' xebek'oje' chikikojol ch'aqa' chik winaqi' kichin ri ruwach'ulew,
kan man xkil ta uxlanen.
Konojel ri xe'oqotan kichin xebekila' k'a akuchi kewan-wi-ki',
kan xekiya' k'a pa latz'.
4Ronojel ri bey richin Sión, kan bis, bis nitzu'un.
Kan man jun chik wineq napon ta chiri' richin ninimaq'ijun.
Ri pa taq ronojel okibel kan man jun chik nok-apo chupan.
Ri e sacerdote kan yejilon janila,
ri xtani' ri yebixan chiri' kan e poqonatajineq,
ri ruk'aslen ri tinamit xa k'ey-k'ey rubanon.
5Ri e etzelanel richin xa kan xe'ok-q'anej tata'al pa ruwi'.
Ri itzel yetz'eton richin, wakami xa xebe pa jotol.
Ronojel re tijoj-poqonal re' xuya' ri Jehová pa kiwi' ri winaqi',
kere' xkik'uluwachij roma ri kimak kan pa ruk'iyal ri xkiben.
Ri winaqi' kan xe'uk'uex-el pa ximonri'il koma ri e etzelanel kichin.
6Ri jebelej rubanikil ri tinamit Sión xa xk'is ronojel.
Ri e tata'al xa kan xebe achi'el nikiben ri masat ri man nikil ta kiway.
Xa kan xk'is k'a kuchuq'a' chikiwech ri e tzeqelibeyon kichin.
7Ri winaqi' aj-Jerusalem kan noqaqa k'a chikik'u'x ronojel ri beyomel ri xk'oje' kik'in ri ojer kan.
Jak'a re wakami xa nikitej poqon juk'an chik ruwach'ulew.
Toq xetzaq pa kiq'a' ri e etzelanel kichin,
kan man jun xto'on kichin.
Ri e etzelanel kichin xekitzu' y xetze'en chikij roma ri kiwululen.
8Ri aj-Jerusalem kan janila nim ri kimak ri kibanon.
Roma ri' xa xe'ok man ch'ajch'oj ta.
Konojel ri xeya'on kiq'ij, wakami xa xeketzelaj kan,
roma xkitz'et chi xa xqasex kiq'ij.
Rije' kan yejiq'ijo'x,
y kan xkewaj-ki' roma ri kik'ix.
9Ri kitziaq kan xtz'ilobitej roma ri mak ri',
rije' kan man xkich'ob ta k'a ri nuk'en-pe pa kiwi'.
Kan nak'en rukiy toq xechapatej chupan ri kimak.
Y re wakami kan man jun k'a achike ta nikuquban kik'u'x.
Nikik'utuj k'a chire ri Jehová chi tutzu' ri kiq'axo'n.
roma ri e etzelanel kichin kan xkinimirisaj-ki'.
10Ri e etzelanel kichin ri aj-Jerusalem kan xkichop-qa ri kibeyomel.
Rije' kan xekitz'et k'a toq ri winaqi' maneq Dios chikiwech xe'ok-apo chupan ri rachoch rija',
ri rubin kan chi man xabachike ta wineq nok-apo chupan.
11Konojel ri winaqi' ye'oq' rokik nikikanoj ri k'atzinel richin nikitej.
Rije' nikijel ri kibeyomel chuwech juba' kiway.
Kere' xkiben xaxe richin man yeken ta.
Ri winaqi' aj-Jerusalem nikibij:
Tabana' utzil, Jehová, qojatzu' chi kan ojk'o pa jun k'ixbilal.
12Y rix ri janipe' yixq'ax chupan ri bey, kixpa'e' y titz'eta'.
Tich'obo-qa wi k'o ta chik jun q'axo'n,
achi'el re q'axo'n re qajineq pa qawi' roj.
Ri Jehová kan xuya' k'a pe re tijoj-poqonal re' pa qawi'
toq xyakatej janila royowal chiqij.
13K'a chila' chikaj xuteq-pe q'aq' pa qawi'
y ri q'aq' ri' kan yeruk'et ri qabaqil.
Xuya' k'a pikbel pa qabey,
y re' kan xojrujaq'mayij kan chiqij.
Xojrumalij kan, y xojruya' kan rik'in q'axo'n ronojel q'ij.
14Ri ralal ri qamak kan jak'a ri' ri xuya' ri Dios pa qawi'.
achi'el ri che' ri niya'ox pa kiwi' ri bóyix.
Y ri' kan xuk'is k'a chijun quchuq'a'.
Ri qajaw xojrujech pa kiq'a' ri winaqi' ri man xojtikir ta chikij.
15Ri qajaw kan xeruk'is k'a el ri aj-labal ri e qichin roj.
Y xeroyoj k'a winaqi' chiqij richin chi yojkik'is.
Xepe richin xekikamisaj kan ri k'ajola'.
Ri Jehová kan xuben k'a chiqe achi'el toq nipitz' ri uva.
16Roma ri' kan janila yojoq';
kan nibiyin k'a ri ruya'al runaq' taq qawech.
Roma xa maneq chik ri nikuquban qak'u'x,
ri niya'on uxlanen pa qánima.
Ri qalk'ual kan xek'is k'a konojel,
roma ri e etzelanel kan xech'akon chiqij.
17Ri tinamit Sión kan xuk'utuj to'onik,
jak'a kan man jun xto'on richin.
Ri Jehová kan jare' k'a ri ruchojmilal ri ruya'on kan pa ruwi';
chi ri tinamit ri ek'o chunaqaj xke'ok etzelanel richin.
Roma ri' ri Jerusalem kan itzel k'a xtz'et koma rije'.
Ri winaqi' aj-Jerusalem nikibij:
18Rat Jehová kan pa ruchojmilal ri xaben.
Roj kan xqapaba-qi' chuwech ri ach'abel.
Y rix winaqi' tiwak'axaj k'a, chi qonojel roj niqatej poqon.
Konojel k'a ri qalk'ual, chi xtani', chi alaboni' xe'uk'uex-el pa ximonri'il.
19Xeqoyoj k'a ri xe'ajowan qichin richin yojkito',
jak'a rije' xa xojkiq'ol.
Ri qa-sacerdote y ri e tata'al, rokik e beneq chukanoxik ri k'atzinel richin nikiq'axbej-ki', xa xeken kan pa tinamit.
20Nimalej Jehová, tabana' utzil qojatzu-pe chi janila oj k'ayewatajineq;
kan janila k'a rukiy ri qaq'axo'n.
Kan nich'ujer ri qánima, roma kan janila xojmakun chawech.
Ri qawinaq ri e eleneq-el chuchi' re tinamit kan xekamisex,
y ri ek'o kan chupan, chuqa' kan xoqaqa k'a ri kamik kik'in.
21Ri winaqi' kan nikak'axaj ri qajiloj,
jak'a kan man jun xkuquban ta juba' qak'u'x.
Konojel ri e etzelanel qichin xkak'axaj k'a re qatijoj-poqonal,
kan xekikot k'a roma re xaben chiqe.
Jak'a kan xtapon na k'a ri q'ij ri abin-pe richin ruk'ayewal pa kiwi' rije',
richin xtikik'uluwachij achi'el re qak'uluwachin roj re wakami.
22Kan xtapon yan ta k'a chawech rat ronojel ri kimak.
Kan tabana' k'a chike rije' achi'el re abanon chiqe roj roma ri qamak.
Ri qaq'axo'n kan janila nim,
y ri qánima kan janila k'a poqonatajineq.
Ri Jehová xuwulaj ri tinamit Jerusalem
Ri q'alajirisey ruch'abel ri Dios nubij:
Currently Selected:
Lam 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.