Jos 21
21
Ri tinamit kichin ri levita
1Ri aj-raqen richin ri tzobaj richin ri Leví xebe pa tinamit Siló richin xebech'on kik'in ri sacerdote Eleazar, ri Josué y ri e tata'al kichin ri e kablajuj tzobaj. 2Y xech'on kik'in chiri' pa Siló, ri k'o pa ruwach'ulew Canaán; y kere' k'a xkibij: Ri Jehová rubin chire ri Moisés richin tiya'ox qatinamit richin yojk'oje' roj chupan, y chuqa' rik'in kisoq'olbal richin yek'oje' ri qawej chupan, xecha'. 3Ri ch'aqa' chik israelita kan keri' k'a xkiben kik'in; xkiya' k'a jujun kitinamit ri xkichinaj kan, rik'in kisoq'olbal akuchi yek'oje-wi ri kawej, achi'el rubin ri Jehová. Jare' ri xya'ox kan chike rije'.
4Xsakix k'a ri tinamit, y ja ri e rijatzul kan ri Quehat, rumama' kan ri sacerdote Aarón, ri xek'uluman nabey. Y rije' xkik'ulumaj kan jujun tinamit ri xsipex kan chike koma ri tzobaj richin ri Judá, ri Simeón y ri Benjamín: Ronojel re' e oxlajuj tinamit. 5Ri ch'aqa' chik rijatzul kan ri Quehat xkik'ulumaj kan rik'in sakinik lajuj tinamit, pa kiq'a' ri tzobaj richin ri Efraín, ri Dan y ri nik'aj tzobaj richin ri Manasés ri k'o pa qajbel-q'ij chire ri raqen-ya' Jordán. 6Y ri rijatzul kan ri Guersón xkik'ulumaj kan rik'in ri sakinik jujun tinamit ri xsipex kan koma ri tzobaj richin ri Isacar, ri Aser, ri Neftalí y ri nik'aj chik chire ri tzobaj richin ri Manasés ri k'o pa ruwach'ulew Basán: Ronojel ri xkik'ulumaj kan e oxlajuj tinamit. 7Ri e rijatzul kan ri Merarí xkik'ulumaj kan ri xsipex kan koma ri tzobaj richin ri Rubén, ri Gad y ri Zabulón: Ronojel ri xkik'ulumaj kan e kablajuj tinamit.
8Y ri ch'aqa' chik israelita xkijachala' k'a chike ri e rijatzul kan ri Leví rik'in sakinik, ri tinamit y ri kisoq'olbal richin nikiya' ri kawej achi'el xubij ri Jehová chire ri Moisés. 9Ja tinamit re' ri xkiya' kan ri tzobaj richin ri Judá y ri Simeón, 10y re tinamit re' xkichinaj kan ri e rijatzul kan ri Aarón ri rumam ri Quehat; y ri Quehat ri' rijatzul kan ri Leví. Ja rije' ri xek'uluman pa nabey chire ri sakinik. 11Ri xya'ox kan chike ja ri rutinamit Arbá, ri tinamit richin kan ri rutata' ri Anac ri nibix chuqa' Hebrón chire, ri k'o chuwi-juyu' richin ri Judá, rik'in ri kisoq'olbal, 12jak'a ri qasanbel-ulew richin ri tinamit y ri kokoj kitinamit, kan richinan chik ri Caleb ruk'ajol ri Jefuné.
13Y keri' xya'ox kan ri tinamit Hebrón chike ri e rijatzul ri sacerdote Aarón. Y ri tinamit ri' richin tobel kichin ri winaqi' ri chaq k'ate' nikiben jun kamik. Y chuqa' xya'ox kan ri tinamit Libná, 14Jatir, Estemoa, 15Holón, Debir, 16Ain, Jutá y ri Bet-semes. Ronojel re' e beleje' tinamit rik'in ri kisoq'olbal ri k'o chupan ri kiruwach'ulew ri e ka'i' tzobaj richin ri Judá y ri Simeón. 17Ri tzobaj richin ri Benjamín xkiya' kan ri tinamit Gabaón, Gueba, 18Anatot y Almón: Ronojel re' kaji' tinamit rik'in kisoq'olbal. 19Konojel ri tinamit kichin ri sacerdote ri e rijatzul ri Aarón, xuben oxlajuj tinamit, chikijujunal rik'in ri kisoq'olbal ri ek'o chuchi-el ri tinamit.
20Ri ch'aqa' chik chike ri e rijatzul kan ri Leví ri e rijatzul kan ri Quehat, xkik'ulumaj kan rik'in sakinik ri tinamit kichin ri tzobaj richin ri Efraín. 21Xya'ox k'a chike ri tinamit Siquem ri k'o chuwi-juyu' richin ri Efraín. Re tinamit re' richin tobel kichin ri winaqi' ri chaq k'ate' nikiben jun kamik. Chuqa' xya'ox kan ri tinamit Guézer, 22Quibsaim y ri tinamit Bet-horón. Ja kaji' tinamit re' rik'in ri kisoq'olbal. 23Ri tzobaj richin ri Dan xkijech kan ri tinamit Eltequé, Guibetón, 24Aialón y ri tinamit Gat-rimón: Kaji' tinamit rik'in kisoq'olbal. 25Y ri nik'aj tzobaj richin ri Manasés ri ek'o pa Basán xkijech k'a ri ka'i' tinamit, Taanac y Gat-rimón, rik'in ri kisoq'olbal. 26Ronojel re' xkik'ulumaj kan ri ch'aqa' chik chire ri e rijatzul kan ri Quehat; lajuj tinamit rik'in ri kisoq'olbal.
27Ri e rijatzul kan ri Guersón, ri rijatzul kan ri Leví, xya'ox ka'i' tinamit chike koma ri nik'aj tzobaj richin ri Manasés: Ri tinamit Beesterá y ri tinamit Golán ri k'o pa ruwach'ulew Basán. Y ri Golán ri' jun tinamit richin tobel kichin ri winaqi' ri chaq k'ate' nikiben jun kamik: Ri ka'i' tinamit ri' rik'in kisoq'olbal. 28Ri tzobaj richin ri Isacar xkijech kan ri tinamit Quisión, Daberat, 29Jarmut y ri ralaxbel-ya' Ganim: Kaji' tinamit rik'in ri kisoq'olbal. 30Ri tzobaj richin ri Aser xkiya' kan ri tinamit Misael, Abdón, 31Helcat y ri Rehob: Ja kaji' tinamit re' rik'in ri kisoq'olbal. 32Ri tzobaj richin ri Neftalí xkijech kan ri tinamit Hamot-dor, Cartán y ri Quedes ri k'o pa ruwach'ulew Galilea. Y ri Quedes ri' jun tinamit richin tobel kichin ri winaqi' ri chaq k'ate' nikiben jun kamik. Ja oxi' tinamit re' rik'in ri kisoq'olbal. 33Ronojel ri tinamit kichin ri e rijatzul kan ri Guersón e oxlajuj tinamit rik'in ri kisoq'olbal.
34Jak'a ri e rijatzul kan ri Merarí ri man jani tiya'ox kitinamit, xya'ox chike koma ri tzobaj richin ri Zabulón re tinamit re': Ri Jocneam, Cartá, 35Dimná y Nahalal. Ja kaji' tinamit re' rik'in ri kisoq'olbal. 36Ri tzobaj richin ri Rubén xkijech kan ri tinamit Béser, Jahas, 37Cademot y ri Mefáat. Kaji' tinamit rik'in ri kisoq'olbal. 38-39Ri tzobaj richin ri Gad xujech kan ri tinamit Mahanaim, Hesbón, Jazer y ri Ramot richin ri Galaad. Y ri Ramot ri' tinamit richin tobel kichin ri winaqi' ri chaq k'ate' nikiben jun kamik. Re' e kaji' tinamit rik'in ri kisoq'olbal. 40Ronojel ri tinamit kichin ri e rijatzul kan ri Merarí e kablajuj tinamit rik'in ri kisoq'olbal.
41-42Ronojel ri tinamit kichin ri levita chukojol ri kulew ri e rijatzul ri Israel e kawineq waqxaqi' tinamit, y chikijujunal ri tinamit ri' k'o kisoq'olbal chikinaqaj.
Ri tinamit Israel xe'ok kan chuwech ri ruwach'ulew
43Kere' k'a xuben ri Jehová richin xuya' ronojel ri ruwach'ulew chike ri tinamit Israel, roma kan xuya' rutzij chike ri kite-kitata' chi kan xtuya-wi chike. Y rije' xkichinaj k'a y chiri' xek'oje-wi. 44Y man jun k'a chike ri etzelanel kichin ri xupaba' ta ri' chikiwech rije', roma ri Jehová kan xerujech pa kiq'a'. Y keri' kan xuya' k'a uxlanenri'il ri chiri' pa kiruwach'ulew, achi'el ri ya'on-tzij ri rubanon kik'in ri kite-kitata'. 45Kan man jun k'a ch'abel ri man ta xbanatej chire ronojel ri rusujun ri Jehová chike ri e rijatzul kan ri Israel; kan ronojel k'a xbanatej.
Currently Selected:
Jos 21: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.