Jos 20
20
Tinamit richin tobel
1Ri Jehová xch'on rik'in ri Josué y xubij chire: 2Kach'on kik'in ri awinaq y kere' k'a tabij chike: Ke'icha' ri tinamit richin tobel achi'el xinbij chire ri Moisés, 3richin keri' chiri' nuto-wi-ri' ri wineq ri nukamisaj jun chik wineq ri xa man ruch'obon ta richin keri' nuben. Re tinamit re' kan xtik'atzin k'a richin tobel chuwech ri nich'ojin pa ruwi' ri wineq ri xken. 4Ri wineq ri niberuto-ri' chiri', napon k'a chuchi' ri tinamit y chiri' niberuq'alajirisaj chikiwech ri aj-raqen richin ri tinamit ri achike roma animajineq-el. Y rije' xtikiya' q'ij richin nok-apo, y xtik'oje-qa chiri' pa tinamit richin tobel. 5Wi k'o ta jun wineq ri nich'ojin pa ruwi' ri kamineq y rutzeqeliben-el ri xbanon ri kamik, kan man xtijach ta pe chire roma xa chaq k'ate' keri' xuben chire ri rachpochel y man roma ta k'ululanik xuben keri'. 6Keri' ri animajineq-el nik'oje' kan chupan ri tinamit ri' k'a toq xtapon ri nich'ojin pa ruwi' ri kamineq, y k'ari' xtuk'uex chuwech ri rutinamit richin xtiq'at-tzij pa ruwi'. Y ri animajineq-el, nik'oje' kan chupan ri tinamit richin tobel k'a niken na ri nimalej sacerdote ri k'o toq xapon chiri', k'ari' nitzolej pa rutinamit y nibe chirachoch, xcha' chire ri Josué.
7Jak'a tinamit re' richin tobel ri xekicha': Ri Quedes ri k'o pa Galilea ri k'o chuwi-juyu' richin ri Neftalí, ri Siquem ri k'o chuwi-juyu' richin ri Efraín y ri rutinamit Arbá ri nibix chuqa' Hebrón chire ri k'o chuwi-juyu' richin ri Judá. 8Y ri juk'an chik ruchi' ri raqen-ya' Jordán, chuwech-apo ri tinamit Jericó, xkicha' k'a ri tinamit Béser, ri k'o pa tz'iran ruwach'ulew, y re' k'o pa taq'aj chupan ri kiruwach'ulew ri tzobaj richin ri Rubén; y chupan ri ruwach'ulew Galaad xkicha' ri tinamit Ramot ri kichin ri tzobaj richin ri Gad; y chupan ri ruwach'ulew Basán xkicha' ri tinamit Golán, y re' kichin ri tzobaj richin ri Manasés. 9Ja tinamit re' xecha'ox richin nikito-ki' xabachike winaqi', ri e rijatzul kan ri Israel y ri man e kiwinaq ta ri ek'o chikikojol rije'. Xecha'ox k'a ri tinamit ri' e richin tobel kichin ri chaq k'ate' nikiben jun kamik, richin man nikamisex ta roma ri nich'ojin pa ruwi' ri kamineq, k'a toq xtapon na ri qij richin niq'at-tzij pa ruwi'.
Currently Selected:
Jos 20: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.