Jos 2
2
Ri Josué xeruteq nachanela' pa Jericó
1Toq ri tinamit Israel k'a ek'o na chiri' pa k'echelaj Sitim, ri Josué ri ruk'ajol kan ri Nun, xeruteq-el ka'i' achi'a' pan ewel richin yebe chupan ri ruwach'ulew Canaán richin nibeketamaj kan jebel ri tinamit rubini'an Jericó. Y ri achi'a' xebe k'a y xe'ok pa rachoch jun ixoq itzel ruk'aslen rubini'an Rahab y chiri' xkiq'axaj-wi ri aq'a'. 2Y k'o k'a jun xya'on rutzijol chire ri rey richin ri Jericó y xubij chire: Wakami ek'o achi'a' e rijatzul kan ri Israel ri xe'oqaqa-el wawe' richin chi nokinachaj kan re qaruwach'ulew, xcha'.
3K'ari' ri rey ri' xuteq rubixik chire ri Rahab y xubij-el: Ke'awelesaj-pe ri achi'a' ri ek'o pan awachoch y ke'ajacha-pe, roma xa e peteneq wawe' richin chi nokinachaj chijun re qaruwach'ulew, xcha'.
4Jak'a ri Rahab xa xerewaj ri achi'a', y xubij-el chike ri yekanon kichin: Qitzij na wi chi ek'o achi'a' xek'oje-el pa wachoch, jak'a man xinwetamaj ta akuchi na kepe-wi, 5jak'a toq niq'equmer yan pe y nitz'apex yan kan ruchi' ri tinamit, ri achi'a' ri' xe'el-el y man wetaman ta akuchi xebe-wi, ke'itzeqelibej k'a chi'anin richin xkebe'iq'i', xcha'.
6Rija' keri' xubij chike, jak'a xa man keri' ta, xa e rujotoban-q'anej pa ruwi' ri rachoch y xerewaj chukojol ri raqen lino ri e rusa'on pa ruwi' ri jay. 7Y ri achi'a' xebekikanoj ri nachanela' y toq e eleneq chik el ri yekanon kichin jari' toq xtz'apex kan ruchi' ri tinamit. Y rije' xebe, xekikanoj chijun ri bey ri nibe pa raqen-ya' Jordán, y xe'apon k'a chuchi' ri raqen-ya' y xekikanoj chiri' y man xekil ta.
8K'ari' ri Rahab xjote-q'anej pa ruwi' ri jay kik'in ri nachanela' toq k'a man jani kewer-qa y xubij chike: 9Yin wetaman chi ri Jehová xujech yan re ruwach'ulew re' chiwe, roma ri' ri ikiy rix xoqaqa yan pa qawi' roj, y qonojel ri ojk'o chupan re jun tinamit re' xmayamoyan-qa ri qánima iwoma rix, 10roma qak'axan chik chi toq xixel-pe pan Egipto, ri Jehová kan xuchaqirisaj ri Kaqa-Palou chiwech richin chi xixq'ax chupan, y chuqa' qak'axan chik toq xe'ik'is ri Sihón y ri Og, rey kichin ri amorreo ri ek'o juk'an chire ri Jordán. 11Toq roj xqak'axaj re' kan xk'is ruchuq'a' ri qánima, y konojel ri achi'a' kan kixibin-ki' iwoma rix, roma ri Jehová ri i-Dios rix, kan jari' ri Dios richin chila' chikaj y richin re ruwach'ulew. 12Wakami k'a nink'utuj k'a jun nimalej utzil chiwe, richin chi niya' itzij chuwe, pa rubi' ri Jehová ri i-Dios richin achi'el k'a yin xinjoyowaj iwech, keri' chuqa' xtiben pa kiwi' konojel ri aj pa wachoch y kan xtiya' jun retal chuwe chi kan jujik chi xtiben. 13Y xtikol ri kik'aslen ri nte-nata', ri e nuxibal, ri e nunimal, ri e nuchaq' y konojel ri kalk'ual rije', richin xtikolotej ri qak'aslen chuwech ri kamik ri', xcha' ri Rahab.
14Y ri nachanela' xkibij: Roj xtiqaya' qatzij chi kan xtiqakol ri ik'aslen, wi man xqojisujuj ta ri achike roma ojk'o wawe' roj, y toq ri Jehová xtuya' re ruwach'ulew re' chiqe, kan qitzij wi chi xtiqajoyowaj iwech, xecha'.
15Y ri Rahab xukusaj jun kolo' richin chi yeruqasaj-qa pa ventana, roma ri rachoch rija' k'o chuwech ri tz'aq ri rusutin-rij ri tinamit. 16Y toq man jani keqaqa-qa xubij chike: Kixbiyin k'a la chuwa taq juyu' y tiwewaj-iwi' chiri' oxi' q'ij richin chi man yixilitej ta koma ri e tzeqelibeyon-el iwichin y toq xketzolin-pe rije', k'ari' xtichop-el ibey rix, xcha'.
17Y rije' xkibij k'a chire ri Rahab: Roj kan xtiqataqej ri ya'on-tzij y xtiqaben ri xak'utuj chiqe. 18Jak'a toq xqojok chupan re ruwach'ulew re', rat xtaxim re kolo' keq chuchi' ri ventana akuchi xqojaqasaj-wi roj y xke'amol chupan ri awachoch, ri ate-atata' y konojel ri awach'alal y ri e rach'alal ri atata'. 19Y xabachike k'a ri xtel-el chupan ri awachoch toq najin ri oyowal y xtiken, man qamak ta chik roj; y konojel ri xkek'oje' awik'in chupan ri awachoch, wi xkeken, kan roj xqojejqalen. 20Y wi rat xqojasujuj ri achike roma oj peteneq re wawe', roj chuqa' xqojtotej chire ya'on tzij ri niqaben pa ruwi' ri xak'utuj chiqe, xecha' rije'.
21K'ari' ri Rahab xubij: Keri' k'a xtibanatej achi'el ri xibij, xcha'. K'ari' chi'anin k'a xerujech-el y jari' xeqaqa-el y xebe. Y ri kolo' keq xxime' kan chiri' pa ventana richin retal.
22Y xebe k'a ri nachanela', xe'apon k'a ri chuwa taq juyu', y chiri' k'a xkewaj-wi-ki' oxi' q'ij, k'a xetzolin na pe ri yekanon kichin k'ari' xebe. Kan janila k'a xekanox y man xe'ilitej ta, y roma ri' ri yekanon kichin xetzolin pa Jericó. 23K'ari' ri nachanela', xetzolin y xebeqaqa-pe chuwa taq juyu' richin xkiq'axaj ri raqen-ya', y xe'apon rik'in ri Josué y xkitzijoj chire ronojel ri xkik'uluwachij. 24Y rije' xkibij chire ri Josué: Kan qitzij na wi chi ri Jehová xujech yan chijun ri ruwach'ulew Canaán pa qaq'a' y ri winaqi' ri ek'o chupan ri ruwach'ulew ri' kan xpe k'a jun nimalej xibinri'il chike. Y xmayamo' yan qa ri kánima qoma roj, xecha' rije'.
Currently Selected:
Jos 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.