Jos 14
14
Ri Josué xujech ri ruwach'ulew Canaán
1Jare' ri ruwach'ulew ri xkichinaj kan ri israelita pa Canaán. Y ri xejachon ja ri sacerdote Eleazar, ri Josué ruk'ajol kan ri Nun, y ri e tata'al richin ri tzobaj kichin ri winaqi' israelita. 2Ri ruwach'ulew ri xkichinaj kan, xjach rik'in sakinik chike ri beleje' tzobaj rik'in nik'aj, achi'el ri rubin ri Jehová chire ri Moisés. 3Jak'a ri ka'i' tzobaj rik'in nik'aj ya'on chik kan ri kiruwach'ulew roma ri Moisés ri kan k'o chi nikichinaj ri pa relebel-q'ij chire ri raqen-ya' Jordán. Jak'a ri tzobaj richin ri Leví man jun ruwach'ulew richin tiko'n xkichinaj chikikojol rije'. 4Ri e ruk'ajol kan ri José ka'i' tzobaj kibanon; ri jun tzobaj ja ri richin ri Manasés y ri jun chik tzobaj ja ri richin ri Efraín. Jak'a ri tzobaj richin ri Leví man jun ri xkichinaj kan richin yetikonej chuwech; ri xkichinaj kan rije' xaxe jujun tinamit richin yek'oje-wi y juba' kisoq'olbal richin ri kiwákix y ri kikarne'l. 5Keri' xkiben ri israelita richin xkijech ri ruwach'ulew Canaán chikiwech rije', achi'el ri rubin ri Jehová chire ri Moisés.
Ri Caleb xya'ox ri tinamit Hebrón chire
6Y jujun chike ri e rijatzul kan ri Judá xebe richin xebetzijon rik'in ri Josué pa Guilgal; y chikikojol rije' beneq ri Caleb ruk'ajol ri Jefuné ri rijatzul ri Quenaz, y rija' xubij-apo chire ri Josué: Rat kan jebel awetaman achike xubij ri Jehová chire ri Moisés pa Cadés-barnea pa nuwi' yin y pan awi' rat. 7Yin k'o k'a kawineq nujuna' toq ri Moisés xojruteq-pe, y xojel k'a pe pa Cadés-barnea, richin xoqetamaj kan re ruwach'ulew re' y yin xink'uaj-el ri rutzijol chire achi'el ri xuna' ri wánima toq xintz'et re ulew re'. 8Ri qachibil ri xepe qik'in richin xoqanik'oj re ruwach'ulew re' xa xkiben chire ri tinamit richin xmayamo-qa ri kánima; jak'a yin xinben achi'el rubin ri Jehová ri qa-Dios. 9Jari' toq ri Moisés xuya' rutzij y xubij chuwe: Kan qitzij na wi ri ruwach'ulew ri akuchi xaq'ax-wi, jari' xtok awichin rat y kichin ri awijatzul richin jantape', roma kan xaben pa ruchojmilal achi'el xubij ri Jehová ri qa-Dios, xcha' chuwe. 10Xq'ax yan k'a kawineq wo'o' juna' toq ri Jehová xubij re' chire ri Moisés toq k'a yojbiyin na chupan ri tz'iran ruwach'ulew y k'a ruya'on na nuk'aslen k'a re wakami, y wakami jumuch' wo'o' chik nujuna'. 11Jak'a yin kan k'a janila in kow nina' kan k'a achi'el ri q'ij ri' toq xojruteq-pe ri Moisés, richin xoqanik'oj re ruwach'ulew re'. Y k'a k'o na wuchuq'a' richin yibe pa labal. 12Taya' k'a chuwe re chuwi' taq juyu' re' achi'el xubij kan ri Jehová chupan ri q'ij ri'. Rat kan xawak'axaj chupan ri q'ij ri', chi ri nima'q kipalen achi'a' ri e rijatzul kan ri Anac ek'o chiri' y kan k'a ek'o na chiri' chupan ri nima'q taq tinamit ri e sutin-kij rik'in tz'aq; rik'in ri ruto'onik ri Jehová xkenwelesaj-pe achi'el rubin rija', xcha' ri Caleb.
13K'ari' ri Josué xuya' ri urtisanik pa ruwi' ri Caleb, y xujech kan pa ruq'a' ri tinamit Hebrón richin xrichinaj kan. 14Kan chupan k'a ri q'ij ri' ri Caleb xrichinaj kan ri tinamit Hebrón, roma kan xutaqej ronojel ri xbix chire roma ri Jehová ri ki-Dios ri israelita. 15Ri tinamit Hebrón, ojer kan rubini'an Rutinamit ri Arbá, roma ojer kan ri chiri' xk'oje' jun achin nim rupalen rubini'an Arbá rijatzul kan ri Anac. Y ri israelita xetane' k'a chire ri labal.
Currently Selected:
Jos 14: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.