Hebreos 1
1
Ri Dios ja ri ruk'ajol ri xukusaj richin xuq'alajirisaj ri ruch'abel
1Ri ojer kan ri', ri Dios k'iy k'a bey y k'iy rubanik xch'on kik'in ri qati't-qamama' y xerukusaj ri yeq'alajirisan ri ruch'abel. 2Jak'a chupan re q'ij ojk'o-wi roj, ri ruk'isibel q'ij richin re ruwach'ulew, ri Dios kan ja ri Ruk'ajol ri xukusaj richin xuq'alajirisaj ri ruch'abel chiqawech y pa ruq'a' rija' xuya-wi ronojel. Y roma rija' xuben re ruwach'ulew y ronojel ri k'o. 3Rik'in ri Ruk'ajol niq'alajin ri ruq'ij-ruk'ojlen. Ri Ruk'ajol kan junan rik'in rija' y ja ri K'ajolaxel ri uk'uayon richin ronojel ri k'o; rik'in ri ruchuq'a' ri ruch'abel ruchapon-wi. Rija' xtikir xuyoj ri qamak, y k'ari' xbetz'uye' chila' chikaj pa rijkiq'a' ri nimalej Dios.
Ri Ruk'ajol ri Dios más ruq'ij chikiwech ri ángel
4Ri Dios xuben chi ri ruk'ajol k'o más ruq'ij chikiwech ri ángel. Y chuqa' ri rubi' ri xya'ox kan más nim rejqalen chuwech ri kibi' ri ángel. 5¿Achike ta k'a chike ri ángel ri rubin ta ri Dios?*f1*
Rat at nuk'ajol y yin in atata':
O rubin ta pa ruwi':
Yin xkinok achi'el jun tata'aj chire rija',
y rija' xtok achi'el nuk'ajol.
6Y toq ri Dios xuteq-pe ri Ruk'ajol chuwech re ruwach'ulew, xubij chike konojel ri ru-ángel chi tikiya' ruq'ij. 7Chikij ri ángel xaxe nubij:*f2*
Ri nu-ángel ninben chike chi e achi'el ri kaq'iq',
chi e achi'el ri ruxaq-q'aq', nicha'.
8Jak'a chire ri K'ajolaxel nubij:*f3*
Ri awajawaren, rat Dios kan richin q'asen
y ja rat xkaq'aton-tzij pa ruchojmilal.
9Kan niqa' chawech ri ruchojmilal y ri etzelal kan nawetzelaj.
Roma ri' kan xarucha' ri Dios,
kan xarunojisaj rik'in kikoten, más ke chikiwech ri awachibil.
10Y chuqa' nubij:*f4*
Rat ajaw kan xajikiba' ri ruwach'ulew pa rutikeribel.
chijun ri kaj kan ja rat ri xabanon rik'in ri aq'a'.
11Ri ruwach'ulew y ri kaj xkek'is.
Jak'a rat kan man jun bey xkak'is.
Ri ruwach'ulew y ri kaj xa kan xkerijix,
achi'el yerijix ri tzieq.
12Rat kan xtaben k'a chire ronojel
achi'el jun tzieq ri xa nijal kan y kan yejalatej k'a el.
Jak'a rat kan man yajalatej ta.
Rat kan man jun bey k'a xkak'is.
13¿Achike ta k'a chike ri ángel ri xubij ta ri Dios:*f5*
Katz'uye-pe re pa wijkiq'a'
y xkenya' pan aq'a' ri ye'etzelan awichin?
14Ri ángel ri' choj e rusamajela' ri Dios y ja rije' ri yetaq roma ri Dios richin yekito' ri xkekolotej.
Currently Selected:
Hebreos 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.