Hab 1
1
Ri Habacuc nich'ojin rik'in ri Jehová
1Yin Habacuc jun rusamajel ri Jehová. Rija' xuk'ut k'a chinuwech chupan jun achi'el achik', ri xtibebanatej-apo chupan ri ruwach'ulew Judá.
Ri Habacuc nisujun chuwech ri Jehová
2Yin Habacuc kere' xinbij:
Wajaw, ¿k'a janipe' k'a yinawak'axaj?
Roma yin kan jantape' nink'utuj to'onik chawe,
jak'a rat xa man yinawak'axaj ta.
Yin kan jantape' k'a yisujun chawech
roma ri kamik ri nibanatej chupan ri qatinamit,
jak'a rat xa man yojakol ta.
3¿Achike roma aya'on q'ij chi roj k'a niqatej na poqon?
¿Achike roma rat kan akoch'on natz'et-pe ri itzel banobel ri nikiben ri nuwinaq?
Kan xaxe k'a ri kamik y ri wululen ri k'o xabakuchi.
Xabakuchi yetz'ukutej-wi-el oyowal y ch'ojinik.
4Ri apixa' xa kan maneq chik rejqalen niban chire.
Xa kan man jun chik ruchojmilal nibanatej.
Ri e banoy etzelal kan jantape' k'a e kitzeqeliben ri choj kik'aslen.
Y ri winaqi' xa nikixotoba' ri ruchojmilal.
Ri aj-Babilonia xkekiya' pa ruk'ayewal ri aj-Judá
5K'ari' ri Dios xubij pa kiwi' ri aj-Judá:
Ke'itz'eta' ri ruwach'ulew ri ek'o chi'inaqaj y kan xke'imey,
roma yin kan xtinbenbana' k'a jun nimalej banobel chupan re iq'ij rix.
Stape' rix man xtiya'ox ta rutzijol chiwe,
y stape' man xtinimaj ta,
re banobel re' kan xtibanatej-wi
6Roma yin kan xkenbentaqa' k'a pe ri aj-Babilonia richin nikiben labal iwik'in.
Rije' kan e itzel taq winaqi'.
Kan e anineq k'a richin xtikiben labal;
kan xkeq'axlan k'a chupan chijun ruwach'ulew
richin ye'ok kan chuwech jun chik ruwach'ulew ri xa man kichin ta rije'.
7Re winaqi' re' kan k'o kikiy;
y kiyon k'a rije' nikiben ri kipixa',
y rije' kan janila e nima'q nikina-ki'.
8Ri kikiej kan más k'a anineq yebiyin chikiwech ri balma.
Y ri winaqi' kan e k'uxunela',
achi'el ri utiwa' ri yebiyajilan chi'aq'a' richin nikikanoj kiway.
Ri kiej kan nikajo' yan nikiben labal,
y kan k'a janila nej xkepe-wi.
Rije' xkepe anineq,
achi'el ri kot yexik'an pa kaq'iq' toq k'o nikajo' nikichop.
9Konojel k'a re' xkepe richin xkekich'ek rik'in kamik.
Chikiwech rije' ninabeyej k'a ri nimalej xibinri'il.
Y ri awinaq ri xkekik'uaj-el pa ximonri'il,
kan achi'el k'a ri sanayi' ri k'o chuchi' ri palou.
10Xketze'en chikij ri rey y ri e tata'al.
Ri tinamit ri e tz'apen-kij chi tz'aq kan man jun kejqalen xtikiben chike.
Y xtikiben kipalibal rik'in ulew richin xke'ok chupan ri tinamit ri'.
11Chirij re' rije' xkebe,
kan achi'el k'a ri kaq'iq' ri xaxe xq'ax chupan jun tinamit y xtibek'ulun chik juk'an.
Ri aj-Babilonia e makuwineq,
roma rije' kibanon ki-dios chire ri uchuq'a' ri k'o kik'in, xcha' ri Dios.
Ri Habacuc nich'ojin chik jun bey rik'in ri Dios
12Chirij re' yin xich'on chik rik'in ri Dios y xinbij:
Jehová, rat ri at Dios ri atk'o-pe pa rutikeribel.
Nimalej Jehová ja rat ri at Loq'olej nu-Dios yin,
y at richin tibe-q'ij tibe-seq.
Ja rat Jehová xayako-pe kichin re winaqi' re' chiqij,
richin xtikiya' ri rutojbalil-mak pa qawi'.
Ja rat nimalej to'onel xabanon kichin re winaqi' re',
richin xtikiya' ri tijoj-poqonal pa qawi'.
13Rat Jehová kan at ch'ajch'oj
y man nakoch' ta natz'et ri mak.
Chuqa' man nakoch' ta natz'et ri etzelal ri yebanatej.
¿Achike k'a roma xtaya' q'ij chike ri aj-Babilonia richin xtikiben ri etzelal?
¿Achike k'a roma kan man jun xtabij,
toq rije' xqojkiya' pa tijoj-poqonal, stape' roj más choj qak'aslen chikiwech rije'?
14¿Achike roma naben chiqe
chi oj achi'el ker ri ek'o chupan ri palou,
y oj achi'el chikopi' ri nikiqirirej-ki' ri xa man jun niq'aton-tzij pa kiwi'?
15Ri e etzelanel qichin kan yojkichop,
achi'el nikiben ri chapoy taq ker toq yekichop ri ker rik'in ri chapbel.
Yojkimol k'a qonojel,
achi'el nikiben ri chapoy taq ker toq yekichop chupan ri ya'l.
Y roma ri' kan yekikot y yenimaq'ijun.
16Rije' nikiya' kiq'ij ri kikamisabal,
achi'el ri e chapoy ker ri kan yekisuj kamelabel pa rubi' ri kiya'l,
y kan yekamela'an k'a roma ri'.
Roma rik'in ri' nikil-wi ri janila jebelej taq q'utun,
y kan pa ruk'iyal.
17¿Kan jantape' k'a xqojkichop ri e etzelanel qichin
achi'el nikiben ri chapoy taq ker?
¿Kan jantape' kami man nikijoyowaj ta qawech ri winaqi' ri',
y man yetane' ta richin yojkik'is?
Currently Selected:
Hab 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.