ᕈᒪᓇ 1
1
1ᐹᓪ, ᐅᑦ ᐊᑑᔅᑫᓛᑲᓇ ᒋᓴᔅ ᙭, ᐁ ᑮ ᓇᑐᒥᑲᐎᔮᓐ ᑭᒋ ᐊᐸᔅᑕᓕᐎᔭᓐ, ᐁ ᑮ ᐹᑲᓂᐃᑲᐎᔮᓐ ᑭᒋᒪᓂᑐ ᐅ ᒥᓗᐋᒋᒧᐎᓂᒃ ᐃᔑ,
2ᐌᔅᑲᒡ ᑳ ᑮ ᐊᔓᑕᒫᑫᔅᐸᓐ ᐅᑦ ᐅᑭᔅᑭᐙᐃᑫᒪ ᐅᒋ ᐸᓓᑭ ᒪᓯᓇᐃᑲᓂᒃ, 3ᐅᑯᓯᓴ ᒋᓴᔅ ᙭ ᑭ ᑎᐯᓕᒋᑫᒥᓇᐤ ᐅᒋ, ᑳ ᑮ ᐯᒋ ᐅᒌᑦ ᐅᑦ ᐊᐙᔑᒥᔑᒃ ᑌᐱᑦ ᐎᔮᓯᐎᐎᓂᒃ ᐃᔑ; 4ᐁ ᑮ ᐃᑖᑲᓂᐎᑦ ᒫᑲ ᑭᒋ ᐅᑯᓯᓯᒥᑯᑦ ᑭᒋᒪᓂᑐᐗ ᓱᑳᑎᓯᐎᓂᒃ, ᐸᓓᑭᓯᐎᓂ ᐊᒑᑾ ᐃᔑ, ᐁ ᑮ ᐗᓂᔥᑳᓈᑦ ᐅᓂᐱᐗ ᐅᒋ: 5ᐁᐗᑯ ᐊᐗ ᑳ ᑮ ᐅᒋ ᒥᓕᑲᐎᔭᒃ ᔕᐌᓕᒋᑫᐎᓐ ᓀᔥᑕ ᐊᐸᔅᑕᓕᐎᐎᓐ, ᑭᒋ ᐅᒋ ᓇᓇᐃᑕᑭᒃ ᑖᐺᔦᓕᑕᒧᐎᓂᓕᐤ ᒥᓯᐌ ᐁ ᐃᑕᑐᔅᑳᓀᓯᒋᒃ ᐃᓕᓕᐗᒃ, ᐅᑦ ᐃᔑᓇᑳᓱᐎᓐ ᐅᒋ: 6ᒣᑴᔪᔥ ᐁᐗᑾᓂᑭ ᑭᓚᐗᐤ ᐊᓯᒋ ᑳ ᓇᑐᒥᑖᒃ ᒋᓴᔅ ᙭:
7ᒥᓯᐌ ᕈᒥᒃ ᑳ ᐃᑖᔦᒃ, ᑳ ᓵᑭᐃᑖᒃ ᑭᒋᒪᓂᑐ, ᑳ ᓇᑐᒥᑳᐎᔦᒃ ᑭᒋ ᐸᓓᑭᓯᔦᒃ: ᔕᐌᓕᒋᑫᐎᓐ ᓀᔥᑕ ᑳᔮᒣᓕᑕᒧᐎᓐ ᑭ ᑳ ᐎ ᐋᔮᓇᐗᐤ ᑭᒋᒪᓂᑐ ᑯᑖᐎᓇᐤ ᐅᒋ, ᓀᔥᑕ ᑌᐯᓕᒋᑫᑦ ᒋᓴᔅ ᙭᙮
ᓇᓈᔅᑯᒧᐎ ᐊᔭᒥᐋᐎᓐ
8ᓂᔥᑕᒻ, ᓂ ᓇᓈᔅᑯᒪᐤ ᓂ ᑭᒋᒪᓂᑐᒻ ᐎᓚ ᐅᒋ ᒋᓴᔅ ᙭ ᒥᓯᐌ ᑳ ᐃᑕᔑᔦᒃ ᐅᒋ, ᑭ ᑖᐺᔦᓕᑕᒧᐎᓂᐗᐤ ᐁ ᐋᓕᒧᒋᑳᑌᒃ ᒥᓯᐌ ᐊᔅᑮᒃ᙮ 9ᐌᓴ ᑭᒋᒪᓂᑐ ᓂ ᑭᔅᑫᓕᒥᒃ, ᐊᓇ ᓂᑦ ᐊᒐᑯᒃ ᑳ ᐅᒋ ᐊᑖᔅᑲᐗᒃ ᐅ ᒥᓗᐋᒋᒧᐎᓂᓕᒃ ᐅᑯᓯᓴ, ᐁᑳ ᐁ ᐳᓂᔮᓐ ᒧᔕᒃ ᐁ ᐋᔭᒥᐁᔅᑕᒫᑕᑾᒃ; 10ᐁ ᓇᑐᑕᒫᔮᓇ, ᑮᔥᐱᓐ ᓈᓐᑕᐤ ᐋᔨᔅᐸᓕᑭ ᐊᓄᒡ ᑫᑳ ᑭᒋ ᒥᓗ ᐱᒥᐱᒋᔮᓐ ᐃᑌᓕᑕᑫ ᑭᒋᒪᓂᑐ ᑭᒋ ᐯᒋ ᓈᑎᑖᑾᒃ᙮ 11ᐌᓴ ᓂ ᑭᐗᔐᓕᑌᓐ ᑭᒋ ᐙᐸᒥᑕᑾᒃ, ᑭᒋ ᑮ ᒥᓕᑕᑾᒃ, ᑭᒋ ᑮ ᒥᓕᑕᑾᒃ ᓈᓐᑕᐤ ᐊᒑᑯᐎ ᒥᓕᐌᐎᓐ, ᑭᒋ ᐅᒋ ᐋᔨᒋᑳᐸᐎᐃᑲᐎᔦᒃ; 12ᐁᐗᑯ, ᑭᒋ ᐃᔑ ᒫᒪᐎ ᒥᓜᓕᒧᐃᑯᔭᒃ ᐁ ᐃᔑ ᑖᐱᔅᑯᒡ ᑖᐺᔦᓕᑕᒪᒃ ᑭᓚᐗᐤ ᓀᔥᑕ ᓂᓚ᙮
13ᓇᒪᐎᓚ ᑭ ᓇᑕᐌᓕᒥᑎᓇᐗᐤ, ᓂᒋᔖᓂᑐᒃ, ᑭᒋ ᐁᑳ ᑭᔅᑫᓕᑕᒣᒃ ᒥᒉᑡᐤ ᐁ ᑮ ᐃᑌᓕᑕᒫᓐ ᑭᒋ ᐯᒋ ᓈᑎᑖᑾᒃ, ᒫᑲ ᐊᓄᒡ ᐃᔅᑯ ᓂ ᑮ ᐅᒋᐃᑲᐎᓐ, ᑭᒋ ᑮ ᐋᔮᔮᓐ ᑳ ᒥᓂᔑᐎᔦᒃ ᑭᓚᐗᐤ ᐊᓯᒋ, ᑖᐱᔅᑯᒡ ᑯᑕᑭᔭᒃ ᒉᓐᑖᐃᓕᒃ᙮ 14ᓂ ᑮ ᒪᓯᓇᐃᑫᔅᑕᐗᐗᒃ ᒫᒪᐤ ᐊᓂᑭ ᒃᕆᑲᒃ, ᓀᔥᑕ ᐹᕐᐯᕆᔮᓇᒃ; ᑖᐱᔅᑯᒡ ᐃᔑ ᐊᓂᑭ ᑳ ᑲᑫᑕᐌᓕᑕᑭᒃ ᓀᔥᑕ ᐊᓂᑭ ᐁᑳ ᑳ ᑲᑫᑕᐌᓕᑕᑭᒃ᙮ 15ᐃᓕᑯᒃ ᒫᑲ ᐁ ᐃᔑ ᑲᔥᑭᑖᔮᓐ, ᓂᑦ ᐋᔦᔅᑳᐎᓰᓐ ᒥᓗᐋᒋᒧᐎᓐ ᑭᒋ ᑲᑫᔅᑭᒪᑕᑾᒃ ᐙᐙᒡ ᑭᓚᐗᐤ ᕈᒥᒃ ᑳ ᐃᑖᔦᒃ᙮
ᐁ ᐃᔑ ᓲᑭᒪᑲᒃ ᒥᓚᐗᒋᒧᐎᓐ
16ᐌᓴ ᓇᒪᐎᓚ ᓂ ᓇᓀᐯᐎᓰᔅᑕᒸᓐ ᐅ ᒥᓗᐋᒋᒧᐎᓐ ᙭: ᐌᓴ ᐁᐗᑯ ᐅ ᑲᔥᑭᐅᐎᓐ ᑭᒋᒪᓂᑐ ᐁ ᐱᒫᒋᐃᑯᒋᒃ ᒥᓯᐌ ᐊᓂᑭ ᑳ ᑖᐺᑕᑭᒃ; ᓃᔥᑕᒻ ᐊᓇ ᑳ ᒎᐎᑦ, ᐊᓯᒋ ᓀᔥᑕ ᐊᓇ ᑳ ᒃᕆᑭᐎᑦ᙮ 17ᐌᓴ ᐁᑯᑕ ᑭᒋᒪᓂᑐ ᐅ ᒀᔭᔅᑭᑖᑎᓯᐎᓐ ᐁ ᓄᑯᑖᓂᐗᓂᓕᒃ ᑖᐺᔦᓕᑕᒧᐎᓂᒃ ᐅᒋ ᓀᔥᑕ ᑖᐺᔦᓕᑕᒧᐎᓂᒃ ᐃᔑ: ᒬᒋ ᐁ ᐃᑕᓯᓇᐃᑳᑌᒃ, ᐅᒀᔭᔅᑭᑎᐤ ᑖᐺᔦᓕᑕᒧᐎᓐ ᑲᑕ ᐅᒋ ᐱᒫᑎᓯᐤ᙮
ᒥᓯᐌ ᐃᓕᓕᐗᒃ ᐅᑕ ᐊᔅᑮᒃ ᒪᒑᑎᓯᐗᒃ
18ᐌᓴ ᐅᑦ ᐋᑯᓚᐌᓯᐎᓐ ᑭᒋᒪᓂᑐ ᑭᒋᑭᔑᑯᒃ ᐅᒋ ᓄᑾᓂᓕᐤ ᐁ ᐃᑌᓕᑕᒸᑦ ᐃᓕᓕᐗ ᒥᓯᐌ ᐅ ᒪᒋᐱᒫᑎᓯᐎᓂᓕᐤ ᓀᔥᑕ ᐅ ᒪᒑᑎᓯᐎᓂᓕᐤ, ᑳ ᒥᒋᒥᓇᒥᓕᒋ ᑖᐺᐎᓂᓕᐤ ᒪᒑᑎᓯᐎᓂᒃ; 19ᐌᓴ ᑮ ᐋᔮᓕᐗ ᐊᓂᐁᓕᐤ ᑫ ᐅᒋ ᑭᔅᑫᓚᒫᓕᒋ ᑭᒋᒪᓂᑐᐗ; ᐌᓴ ᑭᒋᒪᓂᑐ ᑮ ᐙᐸᑎᓓᐤ᙮ 20ᐌᓴ ᐊᓂᐃ ᐁᑳ ᑳ ᓄᑾᓂᓕᑭ ᐅᑦ ᐋᔮᓇ ᐊᔅᐱᓐ ᑳ ᑮ ᐅᔑᑖᓂᐗᒃ ᐊᔅᑭ ᐅᒋ ᐹᔦᑌᓈᑾᓂᓕᐗ, ᐁ ᐅᒋ ᓂᓯᑐᒋᑳᑌᓕᑭ ᐊᓂᐃ ᑳ ᑮ ᐅᔑᑖᓂᐗᑭ, ᐅ ᑳᑭᑫ ᑲᔥᑭᐅᐎᓐ ᓀᔥᑕ ᐅ ᑭᒋᒪᓂᑐᐎᓐ; ᑳ ᐅᒋ ᐁᑳ ᑮ ᑶᑕᐎᐃᑗᒋᒃ: 21ᐌᓴ ᐃᔅᐱ ᑫᔅᑫᓕᒫᒋᒃ ᑭᒋᒪᓂᑐᐗ, ᓇᒪᐎᓚ ᑖᐱᔅᑯᒡ ᑭᒋᒪᓂᑐ ᑮ ᐃᔑ ᑭᔅᑌᓕᑖᑯᐁᐗᒃ, ᓇᒪ ᓀᔥᑕ ᑮ ᓇᓈᔅᑯᒧᐗᒃ; ᒫᑲ ᐸᑾᓐᑕᐤ ᑮ ᐊᑎ ᐃᑎᐗᒃ ᐅ ᒥᑐᓀᓕᒋᑲᓂᐙᒃ, ᓀᔥᑕ ᐅ ᑲᑫᐹᒋᑌᐃᐗᐤ ᑮ ᐗᓂᑎᐱᔅᑳᓕᐤ᙮ 22ᓂ ᑲᑫᑕᐌᓕᑌᓋᓐ ᐁ ᑮ ᐃᑕᑭᒥᑎᓱᒋᒃ, ᑮ ᐊᑎ ᑲᑫᐹᑎᓯᐗᒃ, 23ᓀᔥᑕ ᑮ ᑴᔅᑭᓇᒬᐗᒃ ᐅ ᑭᔅᑌᓕᑖᑯᓯᐎᓂᓕᐤ ᐊᓂᐃ ᐁᑳ ᑫ ᓂᔑᐗᓈᑎᓯᓕᒋ ᑭᒋᒪᓂᑐᐗ ᑭᒋ ᐃᔑᓈᑾᓂᓕᒃ ᑖᐱᔅᑯᒡ ᑫ ᓂᔑᐗᓋᑎᓯᓕᒋ ᐃᓕᓕᐗ, ᓀᔥᑕ ᐱᓓᓯᒃ ᐃᔑ, ᓀᔥᑕ ᐁ ᓀᐅᓯᑌᐎ ᐊᐌᓯᓯᒃ ᐃᔑ, ᓀᔥᑕ ᑳ ᐸᐸᒥᑕᒋᒧᓕᒋ ᐊᐗᑳᓇ ᐃᔑ᙮
24ᐁᐗᑯ ᐅᒋ ᒫᑲ ᑭᒋᒪᓂᑐ ᑮ ᐸᑭᑎᓀᐤ ᐎᓂᐅᐎᓂᒃ ᐃᔑ, ᐁ ᐃᔅᐱᒋ ᒪᒋ ᓇᑕᐌᓕᑕᑭᒃ ᑎᐱᓚᐌ ᐅᑌᐃᐙᒃ, ᑭᒋ ᒪᒉᓕᑖᑯᑕᒫᑐᒋᒃ ᑎᐱᓚᐌ ᐎᔭᐙᐗ; 25ᐊᓂᑭ ᑭᓛᔅᑭᐎᓂᒃ ᑳ ᐃᔑ ᑴᔅᑭᓇᒸᒋᒃ ᑭᒋᒪᓂᑐ ᐅ ᑖᐺᐎᓂᓕᐤ, ᓀᔥᑕ ᐊᐙᓯᑌ ᑮ ᐋᔭᒥᐁᔅᑕᐌᐗᒃ ᐅᔑᐋᑲᓇ ᐃᔥᐱᔥ ᐅᔑᐃᐌᐗ, ᐊᓇ ᑳᑭᑫ ᑳ ᒫᒥᒋᑖᑯᓯᑦ᙮ ᐁᒣᓐ᙮
26ᐁᐗᑯ ᐅᒋ ᒫᑲ ᑭᒋᒪᓂᑐ ᑮ ᐸᑭᑎᓀᐤ ᑭᒋ ᐎᓂᓯᐎ ᐸᑯᓭᓕᒧᓕᒋ: ᐊᐳᒋᑲ ᐅᑦ ᐃᔅᑴᒥᐗᐗ ᑮ ᐃᔑ ᑴᔅᑭᐊᐸᒋᑖᓕᐗ ᐃᑌ ᐁᑳ ᐁ ᐃᔑ ᓂᐃᐸᓕᓕᒃ: 27ᐊᓯᒋ ᓀᔥᑕ ᓈᐯᐗᒃ, ᐁ ᐳᓂ ᐋᐸᒋᐋᒋᒃ ᐃᔅᑴᐗ, ᐁ ᐎᓂᓯᐎ ᐃᑌᓕᑕᑭᒃ ᑮ ᐃᔅᒀᓱᔅᑖᑐᐗᒃ; ᓈᐯᐗᒃ ᑭᑭ ᓈᐯᐗ ᐁ ᑐᑕᑭᒃ ᑳ ᒫᓛᑕᓂᓕᒃ, ᓀᔥᑕ ᐎᓚᐗᐤ ᑫᒋᐙᒃ ᐁ ᐅᑎᓇᑭᒃ ᐊᓂᐁᓕᐤ ᐁ ᐃᔑ ᓇᐃ ᑎᐸᐊᒫᑫᒪᑲᓂᓕᒃ ᐅ ᐗᓂᐅᐎᓂᐗᐤ᙮
28ᓀᔥᑕ ᒫᑲ ᐁᑳ ᐁ ᑮ ᐎ ᒥᒋᒥᓈᒋᒃ ᑭᒋᒪᓂᑐᐗ ᐅ ᑭᔅᑫᓕᑕᒧᐎᓂᐙᒃ, ᑭᒋᒪᓂᑐ ᑮ ᐃᔑ ᐸᑭᑎᓀᐤ ᑭᒋ ᐸᑾᓐᑕᐤ ᒥᑐᓀᓕᒋᑲᓂᓕᒋ, ᑭᒋ ᑐᑕᒥᓕᒋ ᐊᓂᐃ ᑫᒀᓇ ᐁᑳ ᑳ ᓇᐃᐸᓕᓕᑭ; 29ᐁ ᑮ ᓵᑲᔅᑭᓀᔅᑳᑯᒋᒃ ᒥᓯᐌ ᒪᒑᑎᓯᐎᓂᓕᐤ, ᐱᔑᒀᑎᓯᐎᓂᓕᐤ, ᒪᒋᑣᐎᓂᓕᐤ, ᒧᔅᑌᓇᒫᑫᐎᓂᓕᐤ, ᑭᒧᒋᐸᒀᑎᑐᐎᓂᓕᐤ; ᐁ ᓵᑲᔅᑭᓀᔅᑳᑯᒋᒃ ᐅᑌᓕᑕᒧᐎᓂᓕᐤ, ᓂᐸᔨᐌᐎᓂᓕᐤ, ᑲᑴᔕᑯᒋᒥᑐᐎᓂᓕᐤ, ᑲᑳᔦᓕᓯᐎᓂᓕᐤ, ᒪᒉᓕᒥᐌᐎᓂᓕᐤ; ᐁ ᑭᒧᑐᐌᔅᑭᒋᒃ, 30ᐁ ᐸᑾᓄᒥᐌᒋᒃ, ᐁ ᐸᒀᑖᒋᒃ ᑭᒋᒪᓂᑐᐗ, ᐁ ᒪᒉᓕᒥᐌᔅᑭᒋᒃ, ᐁ ᑭᔅᑌᓕᒧᒋᒃ, ᐁ ᑲᑭᒋᒧᒋᒃ, ᐁ ᒥᔅᑲᐙᑖᒋᒃ ᑳ ᒫᓛᑕᓂᓕᑭ, ᐁ ᐋᓉᑕᐙᒋᒃ ᐅᓂᑭᐃᑯᐗᐗ, 31ᐁᑳ ᐁ ᐅ ᓂᓯᑐᑕᒧᐎᓂᒋᒃ, ᐁ ᐱᑯᓇᑭᒃ ᓂᔅᑯᒥᑐᐎᓂᓕᐤ, ᐁᑳ ᐁ ᐅ ᓵᑭᐃᐌᐎᓂᒋᒃ, ᐁᑳ ᐁ ᐳᓂ ᑭᔕᐌᓕᒥᐌᒋᒃ, ᐁ ᐊᒀᑎᓯᒋᒃ: 32ᐁᐗᒀᓂᑭ ᐋᑕ ᐁ ᑭᔅᑫᓕᑕᒸᒋᒃ ᑭᒋᒪᓂᑐ ᐅ ᑎᐹᔅᑯᓂᑫᐎᓂᓕᐤ, ᐊᓂᑭ ᐅᒣᓕᐤ ᑐᐎ ᑳ ᑐᑕᑭᒃ ᐁ ᑌᐸᑫᓕᑖᑯᓯᒋᒃ ᑭᒋ ᓂᐱᒋᒃ, ᓇᒪᐎᓚ ᐱᑯ ᑫᒋᐙᒃ ᑐᑕᒶᒃ, ᒫᑲ ᐊᓯᒋ ᓀᔥᑕ ᓇᐃᓚᐌᐃᑯᐗᒃ ᐊᓂᐃ ᑳ ᑐᑕᒥᓕᒋ᙮
Currently Selected:
ᕈᒪᓇ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.