ᐹᐃᓕᒪᓐ 1
1
1ᐹᓪ, ᐅ ᑭᐸᐙᑲᓇ ᒋᓴᔅ ᙭, ᓀᔥᑕ ᑎᒧᑎ ᑭᒋᔖᓂᓇᐤ, ᐁ ᒪᓯᓇᐊᒪᐙᑦ ᐊᓂᐃ ᐹᐃᓕᒪᓐ ᓈᔅᐱᒡ ᑳ ᓵᑭᐃᑕᒃ, ᓀᔥᑕ ᓂᒋ ᐊᑑᔅᑫᓛᑲᓂᓈᓐ; 2ᓀᔥᑕ ᑳ ᓵᑭᐊᑭᑦ ᐋᑉᐱᔭ, ᓀᔥᑕ ᐋᕐᑭᐸᔅ, ᓂᒋ ᓄᑎᓂᑫᐎᓕᓕᒥᓈᓐ, ᓀᔥᑕ ᐊᓂᑭ ᒫᒪᐎᐋᔭᒥᐋᐗᒃ ᑳ ᐃᑖᒋᒃ ᑭᑭᒃ:
3ᔕᐌᓕᒋᑫᐎᓐ ᑭ ᑳ ᐎ ᐋᔮᓇᐗᐤ, ᓀᔥᑕ ᑳᔮᒣᓕᑕᒧᐎᓐ ᑭᒋᒪᓂᑐ ᐌᐅᑖᐎᒪᐎᑦ ᐅᒋ ᓀᔥᑕ ᐅᑎᐯᓕᒋᑫᐤ ᒋᓴᔅ ᙭᙮
ᐹᐃᓖᒪᓐ ᐅᓵᑭᐃᐌᐎᓐ ᓀᔥᑕ ᐅᑖᐺᔦᓕᑕᒧᐎᓐ
4ᓂ ᓇᓈᔅᑯᒪᐤ ᓂ ᑭᒋᒪᓂᑐᒻ, ᒧᔕᒃ ᐁ ᐋᓕᒧᒥᑖᓐ ᓂᑦ ᐋᔭᒥᐋᐎᓂᒃ, 5ᐁ ᐯᑕᒫᓐ ᑭ ᓵᑭᐃᐌᐎᓐ ᓀᔥᑕ ᑭ ᑖᐺᔦᓕᑕᒧᐎᓐ, ᐁ ᐃᔑ ᓵᑭᐊᑦ ᐅᑎᐯᓕᒋᑫᐤ ᓀᔥᑕ ᒥᓯᐌ ᐅᐸᓓᑭᓴᒃ; 6ᐁ ᐙᐸᑎᓕᐌᔭᓐ ᑭ ᑖᐺᔦᓕᑕᒧᐎᓐ ᑭᒋ ᑲᔥᑭᐅᒪᑲᒃ ᐁ ᐎᒋᑳᑌᒃ ᒥᓯᐌ ᑕᑐ ᒥᓗ ᑫᒀᓐ ᑳ ᐱᒋᔅᑳᑯᔭᓐ ᙭ ᒋᓴᓯᒃ᙮ 7ᐌᓴ ᓂᑦ ᐋᔮᓈᓐ ᒥᔅᑕᐃ ᒥᓚᐙᑕᒧᐎᓐ ᓀᔥᑕ ᑳᑭᒋᐃᑯᓯᐎᓐ ᑭ ᓵᑭᐃᐌᐎᓂᒃ, ᐌᓴ ᐅᑌᐃᐙᐗ ᐅᐸᓓᑭᓴᒃ ᒥᓜᓕᑕᒧᒪᑲᓂᓕᐗ ᑭᓚ ᐅᒋ, ᓂᒋᔖᓐ᙮
ᒋ ᑮᐌᐅᑎᓂᑦ ᐅᓂᓯᒪᔅ
8ᐁᐗᑯ ᐅᒋ, ᐋᑕ ᐁ ᐃᑌᓕᑖᑯᓯᔮᓐ ᓈᔅᐱᒡ ᑭᒋ ᓱᑫᓕᒧᔮᓐ ᙭ᑎᒃ ᑭᒋ ᐃᑕᔓᒥᑖᓐ ᐊᓂᒪ ᑳ ᓇᐃᐸᓕᒃ, 9ᐁᓕᐌᒃ ᒫᑲ ᓵᑭᐃᐌᐎᓐ ᐅᒋ, ᓇᐗᒡ ᑭ ᐸᑯᓭᓕᒥᑎᓐ, ᐁ ᐋᐎᔮᓐ ᐊᓇ ᐹᓪ ᑳ ᑫᑌᔮᑎᓰᑦ, ᐊᓄᒡ ᓀᔥᑕ ᐅ ᑭᐸᐙᑲᓇ ᒋᓴᔅ ᙭᙮ 10ᑭ ᐸᑯᓭᓕᒥᑎᓐ ᓂᑯᓯᔅ ᐅᓂᓯᒪᔅ ᐅᒋ, ᑳ ᑮ ᓂᑕᐎᑭᐊᒃ ᓂ ᒫᒫᒋᒀᐱᓱᐎᓂᒃ; 11ᐊᓇ ᐌᔅᑲᒡ ᐁᑳ ᓈᓐᑕᐤ ᑳ ᑮ ᐃᑖᐸᒋᐃᔉ, ᐊᓄᒡ ᒫᑲ ᑳ ᐃᑖᐸᒋᐃᔉ ᓂᓚ ᓀᔥᑕ:
12ᒥᓇ ᒫᑲ ᓂ ᑮ ᐃᔑᑎᔕᐗᐤ: ᐅᑎᓐ ᒫᑲ ᑖᐱᔅᑯᒡ ᑎᐱᓚᐌ ᓂ ᐱᒋᓚᐤ᙮ 13ᐊᓇ ᑫ ᑮ ᑲᓇᐌᓕᑕᒫᓱᔮᐸᓐ, ᒦᔅᑯᒡ ᑭᓚ ᑭᒋ ᐊᑑᔅᑲᐎᑦ ᐁ ᐃᔑ ᒫᒫᒋᒀᐱᓱᔮᓐ ᒥᓗᐋᒋᒧᐎᓂᒃ᙮ 14ᒫᑲ ᐁᑳ ᑭᓚ ᐁ ᐃᑌᓕᑕᒪᓐ ᓇᒪᐎᓚ ᑫᒀᓐ ᓂ ᐎ ᑐᑌᑖᔾ; ᑭ ᒥᓗᑐᑖᑫᐎᓐ ᐁᑳ ᑖᐱᔅᑯᒡ ᐋᓕᓵᒡ ᑭᒋ ᐃᑐᒋᑳᑌᒃ, ᒫᑲ ᐁ ᒥᓜᓕᒋᑳᑌᒃ᙮
15ᐌᓴ ᒫᔅᑯᒡ ᐊᒋᓚᐤ ᑮ ᑭᑐᑌᐤ, ᑳᑭᑫ ᑭᒋ ᐅᑎᓇᑦ; 16ᓇᒪᐎᓚ ᐁᑯ ᑖᐱᔅᑯᒡ ᐊᑑᔅᑫᓛᑲᓐ, ᒫᑲ ᐊᐙᓯᑌ ᐃᔥᐱᔥ ᐊᑑᔅᑫᓛᑲᓐ, ᐎᒋᔖᓂᒪᐤ ᑳ ᓵᑭᐋᑲᓂᐎᑦ, ᐅᓵᒻ ᒫᑲ ᓂᓚ ᐅᒋ; ᒫᑲ ᐊᐙᓯᑌ ᒥᔅᑕᐃ ᑭᓚ ᐅᒋ, ᑖᐱᔅᑯᒡ ᐎᔮᓯᒃ ᓀᔥᑕ ᐅᑎᐯᓕᒋᑫᒃ!
17ᑮᔥᐱᓐ ᒫᑲ ᐎᒉᐙᑲᓐ ᐌᑕᑭᒥᐗᓀ, ᑖᐱᔅᑯᒡ ᓂᓚ ᑫᒋᐙᒃ ᐅᑎᓐ᙮ 18ᑮᔥᐱᓐ ᑳ ᓈᔦᑕᐙᑐᑖᔅᑴ, ᓀᔥᑕᐱᑯ ᑫᒀᓐ ᑳ ᒪᓯᓇᐃᑫᔅᑖᔅᑴ, ᐃᑕᔅᑖ ᓂᑦ ᐊᑖᐎᒪᓯᓇᐃᑲᓂᒃ: 19ᓂᓚ ᐹᓪ ᑎᐱᓚᐌ ᓂᒋᒌᒃ ᓂ ᑮ ᐅᒋ ᒪᓯᓇᐁᓐ, ᓂ ᑳ ᑭᑣᒥᑎᐸᐁᓐ: ᐁᓕᐌᒃ ᒫᑲ ᓇᒪᐎᓚ ᑭᑦ ᐃᑎᓐ, ᑭᓚ ᑫᒋᐙᒃ ᐊᐴᒋᑲ ᐁ ᐃᑌᓕᑖᑯᓯᔭᓐ ᑭᒋ ᐸᑭᑎᓂᑎᓱᔅᑕᐎᔭᓐ᙮ 20ᐁᐁ, ᓂᒋᔖᓐ, ᐁᑯᔑ ᑭ ᑳ ᒥᓚᐙᑎᑎᓐ ᐅᑎᐯᓕᒋᑫᒃ: ᑳᑭᒋᑖ ᓂ ᐱᒋᓚᐤ ᐅᑎᐯᓕᒋᑫᒃ᙮
21ᐁ ᒪᔥᑲᐎ ᐊᔅᐯᓕᒧᔮᓐ ᑭ ᓇᓇᐃᑕᒧᐎᓂᒃ, ᑭ ᒪᓯᓇᐊᒫᑎᓐ, ᐁ ᑭᔅᑫᓕᑕᒫᓐ ᐊᐙᓯᑌ ᑭᒋ ᑐᑕᒪᓐ ᐃᔥᐱᔥ ᐊᓂᒪ ᑳ ᐃᑗᔮᓐ᙮ 22ᒫᑲ ᐊᓯᒋ ᐋᔦᔅᑲᐎᑕᒪᐎᓐ ᐃᑕ ᑫ ᐎᑭᔮᓐ; ᐌᓴ ᓂᑦ ᐃᔑ ᐸᑯᓭᓕᒧᓐ ᑭᑦ ᐋᔭᒥᐋᐎᓂᐗᐗ ᐅᒋ, ᓂᓚ ᑭᒋ ᐸᑭᑎᓇᒫᑲᐎᔦᒃ᙮
ᒫᒋᒡ ᐙᒉᑫᒧᐎᓐ
23ᐅᑯ ᑭᑦ ᐊᑕᒥᔅᑳᑾᒃ ᐁᐸᑉᕌᔅ, ᓂᒋᑭᐸᐙᑲᓐ ᙭ ᒋᓴᓯᒃ; 24ᒫᕐᒃ, ᐋᕆᔅᑖᕐᑲᔅ, ᑎᒫᔅ ᓂᒋᐊᑑᔅᑫᒫᑲᓇᒃ᙮
25ᐅ ᔕᐌᓕᒋᑫᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᑭ ᑳ ᐎ ᐎᒉᐎᑯᐙᐤ ᑭᑦ ᐊᒑᑯᒃ᙮ ᐁᒣᓐ᙮
Currently Selected:
ᐹᐃᓕᒪᓐ 1: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.