YouVersion Logo
Search Icon

Jn 14

14
Jesús ena'am ta'le naq'aec jo'ne yelo'ta ñe'me Qadet'a Dios
1“Ena'te ami totelo'te, dite da'me jayem auep'iiya'a nataq'aen da'me auep'iiya'a ñe'me Dios. 2Di'me na'ña ñe'me Taĝadena' uo'oe gaa'me 'nachaqa'te jo'ne qayoĝode'. Yataqachiñe eja da'me dojo', qo'che' joote ami ja'aĝatema da'me jec qaedi jiyamaĝateta'ajalo jogaa'me mach'e at'achaqachidi'. 3Chane'eja qom yem da'me jec nataq'aen da'me jiyamaĝateta't gaa'me at'achaqachidi', qama'le yitaĝa 'ñiyelaq qaedi male ami yequiaĝa'u, qaedi ami nach'e eta't da'me oñiya'ña di'me jo'ne 'nachaqa' di'me jo'ne nach'edi 'nachaqa' jo'ne joneta'ña. 4Ami joote auayachiñe jenjo' naq'aec jo'ne ladic ñe'me jo'ne jec'ata.”
5Qama'le Tomás 'yateguet joñe'me Jesús, enaac:
—Jaliaĝanec, ja jayatenaq ga'me auajoyi. ¿Toqoch'e aueetapega jayatenaq ga'me naq'aec?
6Jesús 'yateguet joñe'me:
—Naqayem jo'ne naq'aec, 'me eja nataq'aen da'me nec'alaĝa. Qaya'te naq'aec laqaya ta'le qoyovida'a ñe'me Taĝadena'. 7Da'me ami joote jayem auatetoñi, qama'le nach'e ena'am auatetoñi ñe'me Taĝadena'. Chane'eja chiyoqotelegue nayi, yataqata auatetoñi joñe'me nataq'aen auec'achiñetac.
8Qama'le ñe'me Felipe male enaac:
—Jaliaĝanec, qo'mi auaje'tema da'me jec'atenaq ñe'me Adet'a, qa'a nach'edata da'me jouenaqataque.
9Qama'le Jesús 'yateguet joñe'me:
—Am Felipe, joote qayoĝode' jaa'me noloqo'ote da'me ami jouetauelo, qama'te ¿qo'li maliaĝa ja jayem 'te auatetoñi? Ga'me jo'ne joote jayem yateton, nach'ega joote yauana ñe'me Taĝadena'; qama'le ¿toqoch'e jayem anachoĝodeñetapecot da'me jetaque ami jaje'tema ta'le auañiya ñe'me Taĝadena'? 10¿Qo'li ja a'uamaqachiñe da'me nach'ayem jo'ne jone'tajop joñe'me Taĝadena', nataq'aen joñe'me mach'e jayem ne'tajop? Naa'me naajo' jo'ne ami ja'aĝatetapema ja naq'aeta ta'le mach'e 'yaqataqa, dite da'me 'uo ñe'me Taĝadena' jo'ne jayem ne'tajop, nach'eñe jo'ne ya'uo na'me mach'e 'lonataĝanaĝac nale. 11Ena'te jayem auoqoleguechi dite da'me jayem a'uamaqachiñe queda'me jenaac da'me jone'tajop joñe'me Taĝadena', nach'e ena'am joñe'me Taĝadena' jayem ne'tajop; qalaĝaja qom ja auaqanachichi ta'le jayem auep'iiya'a yajouaĝat da'me jenaac, qama'le maqachaĝa jayem auep'iiya'a yajouaĝat naa'me mach'e 'yonataqa. 12Eja da'me ami ja'aĝatema: ga'me jo'ne jayem p'iya'a nach'e ena'am yauo'oe naa'me 'nonataqa jo'ne joote jauo'oe, nataq'aen yitaĝa yauo'oe qomle gaa'me 'nonataqa laqaya' jo'ne yataqachiñe let'adayaqa, yajouaĝat da'me male jec'ata di'me neta'ña joñe'me Taĝadena'. 13Qom yataqachiñe jayem ademii'teguet, qama'le ami janema yema ga'me jo'ne auajelaĝañiyaque, qaedi da'me jayem jo'ne jayem Dios Lec'oĝot male jaloĝon da'me 'lonaĝac joñe'me Taĝadena'. 14Je'et qomle gamachaqaega ga'me aviyaĝañiyaque, qom yataqachiñe jayem ademii'teguet.
Jesús 'naĝatela't da'me namaĝaquena ñe'me Dios Lepaqal
15Yitaĝa enaac ñe'me Jesús:
—Qom yataqata jayem adoqopichiya, qama'le auoqochiya'alo naa'me yamaĝajoĝonaĝaco. 16Qama'le jajelaĝanot ñe'me Taĝadena' qaedi namaĝaquena ga'me laqaya jo'ne necochaĝaua, qaedi nach'e eta't ami uetauelo. 17Nach'eñe ñe'me Dios Lepaqal jo'ne yataqatelegue; joga'me aleua laje'pi ja yaqanate't ta'le yacoteguet, qa'a ja yauata nataq'aen da'me ja yateto'n; qalaĝaja da'me ami yataqata auatetoñi, qa'a nach'e eta't ami ue'tajopa nataq'aen da'me male ami uetauelo qomle.
18“Da'me jayem ja ami 'te jeca'ae qomle, dite da'me 'ñiyelaq qomle qaedi yitaĝa ami jouetauelo. 19Qomle male ja jayem 'te yauata ga'me aleua laje'pi, qalaĝaja da'me ami qamqa'me yitaĝa jayem auañiya qomle, nataq'aen da'me adec'aletedaye qomle qa'a nach'e ena'am da'me jayem yitaĝa jec'aletaye qomle. 20Qama'le qom yovita ga'me nolo' joote auayachiñe queda'me jone'tajop joñe'me Taĝadena', nataq'aen da'me ami yataqata jayem ademii'teguet, qama'le nach'e ena'am da'me jayem ami jouetauelo. 21Joga'me jo'ne yaconegueta daa'me yamaĝajoĝonaĝaco nataq'aen da'me yoqo'chalo, qama'le nach'ega yaloĝon da'me yataqachiñe eja jayem noqopita. Qama'le ñe'me Taĝadena' noqopita ga'me jo'ne jayem noqopita, qama'le nach'e ena'am da'me jayem joqopita joga'me nataq'aen da'me ñaloĝoneguet.”
22Ñe'me Judas jo'ne lenaqateua ñe'me Iscariote yenat joñe'me:
—Jaliaĝanec, ¿toqoch'e qo'mi analoĝonegueta qama'te ja analoĝonegueta jena'me jiyaĝadipi laqaya' jo'ne aleua laje'pi?
23Jesús 'yateguet joñe'me:
—Ga'me jo'ne jayem noqopita, yoqocha'alo naa'me 'yaqataqa, qama'le Taĝadena' noqopita ga'me, qama'le ñe'me Taĝadena' nataq'aen jayem ñanaĝaquena qaedi jonaqa'ajop joga'me. 24Ga'me jo'ne ja jayem 'te noqopita, nach'ega jo'ne ja yoqocha'alo naa'me 'yaqataqa. Nach'ena na'me 'yaqataĝanaĝac jo'ne joote auomachiya; ja mach'e yelnataĝac, dite da'me chiyoqo'ot joñe'me Taĝadena' jo'ne jayem namaĝaquena.
25“Ami ja'aĝatetapema yema naa'me naajo' queda'me cha'li ami jouetauelo; 26qalaĝaja ñe'me Necochaĝaua, ñe'me Dios Lepaqal jo'ne namaĝaquena qomle joñe'me Taĝadena', nach'eñe joote qoyanem da'me yañoqotaĝanaĝac qaedi ami yapaĝagueneque ena'uac naa'me naajo' uo'oe nataq'aen ami netouenaĝanaĝaneque yema da'me jo'ne joote ami ja'aĝatetapema.
27“Ami jepotajopa da'me 'nemaĝac. 'Yemaĝac ami janema nayi, qalaĝaja da'me dojo' jo'ne ja'uo nayi, ja ena'am da'me yauotedac nale jena'me aleua laje'pi. Ena'te lichiguilo naa'me adai'lidi', uotaĝa ta'le at'oyiyi. 28Joote jayem auayachiñe da'me jec qomle, qalaĝaja yitaĝa 'ñiyelaq qomle qaedi yitaĝa ami jouetauelo. Qom yataqachiñe eja da'me jayem adoqopichiya, qama'le ami made'tapolqa da'me auayachiñe da'me jec'ata ñe'me Taĝadena', qa'a nach'eñe jo'ne jayem napacalegue. 29Jenjo' ami ja'aĝatema nayi da'me jona'li 'uo ga'me di'yoq, qaedi qom yovita da'me yepaquichigui qama'le yataqata jayem auep'iiya'a.
30“Nayi male ja jalcote ta'le ami jojapegue'to, qa'a male novitequena ga'me jo'ne damaĝajoĝolegue jenjo' aleua. Te'me qaya'te ta'le lañoqotaĝanaĝac da'me jayem nejaliaĝatelegue, 31qalaĝaja 'noota ta'le naq'aeta da'me ja'uo, qaedi jenjo' aleua laje'pi yataqata yayate'n da'me joqopita ñe'me Taĝadena', qama'le ja'uo yema ga'me jo'ne jayem yamaĝalegue.
“Nayi oñiijeguem, qolaqa'e jenjo'.”

Currently Selected:

Jn 14: TSN

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy