Gl 1
1
Lep'iyenataĝanaĝac ñe'me Pablo
1Jayem Pablo jo'ne jayem Jesucristo lamaĝajec, jo'ne jayem qoyeladelegue da'me qaedi ja'aĝatetac 'naqataĝanaĝac jo'ne onaĝaic. Qaya'te gamachaqaega ch'e aleua le'ec ta'le jayem yiyaĝana qaedi jayem lamaĝajec, dite nach'eñe ñe'me Jesucristo nataq'aen ñe'me Dios mach'e Let'a jo'ne 'niyelaĝachijeguem ca'li joñe'me.
2Ami yaqaya'olqa 'me p'etaqadaiquipi jo'ne at'achaqadi' di'me aleua jo'ne Galacia: jayem nataq'aen jogaa'me jayem ueteda'ajop jo'ne qadepi'iyaĝa'u ami janemaĝama da'me qadep'iyenataĝanaĝac. 3'Noota qom Dios mach'e Qadet'a nataq'aen ñe'me Qadejaliaĝanec Jesucristo ami yanema da'me anichoĝodenataguequi nataq'aen da'me at'emaĝaqui.
4Jesucristo nach'e eta't yoqo'cha ñe'me Qadet'a Dios, qama'le yaconeguet da'me leleuaĝa qaedi qoyapalaĝa't naa'me qadoeco, qama'le qo'mi yachiyoĝotedaue jena'me aleua 'me ja no'en da'me qo'mi nec'alaĝatedegue. 5¡'Noota qom nach'e eta't 'ñonaĝataĝaye joñe'me! Jaja'a, nach'e naq'aeta da'me dojo'.
Qaya'te laqaya da'me 'naqataĝanaĝac jo'ne yataqatelegue
6Dios ami yiyaĝanalo, nataq'aen chiyaqayi ñe'me Cristo da'me ami yaloĝonalo da'me leyalaqataĝanaĝac. Qo'che' yataqachiñe joqoch'em da'me paja'a aĝañiñi da'me auec'achiya ñe'me Dios nataq'aen auacoñiyeguet ga'me 'naqataĝanaĝac jo'ne ja ena'am da'me dojo' 'naqataĝanaĝac 'me onaĝaic. 7Qalaĝaja eja queda'me qaya'te 'naqataĝanaĝac laqaya: ñenaĝategue da'me dojo' qa'a uo'oe gaa'me jetaque yaqataqate'n da'me onaĝaic 'naqataĝanaĝac jo'ne 'yaĝatetac ñe'me Jesucristo, qama'le ami yejomaĝana'ape. 8Qalaĝaja qom 'uo ga'me ami 'yaĝatema ga'me 'naqataĝanaĝac laqaya jo'ne ja ena'am ga'me joote ami ja'aqataĝanaĝama, qama'le ñachoĝodenot ñe'me Dios qaedi ya'uo ne'uaĝanaguec joga'me, mate mane'e chiyoĝogue di'me piyem uotaĝa qo'mi chiyaqauelo. 9Yitaĝa ji'iyelaĝatalegue ga'me jo'ne joote ami ja'aĝatema: qom 'uo gamachaqaega 'yaĝatetac da'me 'naqataĝanaĝac jo'ne ja ena'am ga'me joote auacoñiyeguet, ¡'noota qom Dios ya'uo ne'uaĝanaguec!
10Ja jelotaque ta'le jiyaĝadipi 'yamaqate'n ga'me ñenaĝategue, uotaĝa ta'le jelotaque da'me qaedi gamachaqaega jayem yiyamaĝaden. Ta'le naq'aeta da'me ja'uo qama'le ena'am ta'le ja jayem 'te Cristo lalemaĝajet. Qalaĝaja da'me mach'e jayem, ¡ga'me jo'ne jen p'ajaye ta'le nach'eñe ñe'me Dios jayem yiyamaĝaden!
Cristo yiyaĝana ca'li ñe'me Pablo
11Ami yaqaya'olqa, 'noota qom yataqachiñe auayachiñe da'me qaya'te gamachaqaega jiyaĝaua ta'le yaqanatet da'me 'nedijeguem da'me dojo' onaĝaic 'naqataĝanaĝac jo'ne ami ja'aĝatema. 12Ja naqaeda ta'le ch'e jayem yep'iquin gamachaqaega jiyaĝaua 'me aleua le'ec uotaĝa ta'le jayem yapaĝaguenec, dite da'me naqaeñe ca'li ñe'me Jesucristo nach'eñe jayem naloĝoneguet.
13Ami joote auayachiñe da'me eeta da'me 'yoyaĝac, ca'li maliaĝa jouetaue da'me lepe'e' jogaa'me judiopi. Nataq'aen auayachiñe ca'li jecaa'tape jogaa'me Dios lec'oqo'tepi, ja'uo lachoĝode'j qa'a jetaque japalaĝa't jogaa'me. 14Jeque'tegue da'me lepe'e' jogaa'me judiopi, jo'ne ñapacalo'te gaa'me yaqaya' 'me jena'ama yataqachiñe jalemaqa'teguet da'me jeque'teguelo jodaa'me namaĝajoĝonaĝaco jo'ne chiyoĝogueta dia'me qadet'al. 15-16Qalaĝaja Dios jalcote jayem noqopita, qama'le chiyoqo'teguet ca'li maliaĝa ja ñiyiñe, jayem 'yatetelegue qaedi jo'onataĝaneuo'o joñe'me. Uoja'eda jayem yatetonaĝaneguet ñe'me c'oĝot qaedi ja'aqataĝanema ena'uaque gaa'me jiyaĝadipi jena'me aleua da'me onaĝaic 'naqataĝanaĝac jo'ne 'yaĝatetac joñe'me. Ca'li di'yoq da'me dojo' qama'le ja jachoĝoya gamachaqaega qaedi jayem yapaĝaguen, 17uotaĝa ta'le jec'ata di'me Jerusalén qaedi jiyaĝanaque ga'me lelnataĝa'j gaa'me jo'ne joote namaĝa's. Ja naq'aeta, dite da'me paja'a jec'ata di'me aleua jo'ne Arabia; ca'li ji'iyelaq male jec'ata di'me noic jo'ne Damasco.
18Ca'li yenoĝodegue gaa'me tres 'uoidi male jec'ata di'me Jerusalén qaedi jateton ñe'me Pedro, qama'le quince noloqo'ote da'me joue'tajop ñe'me. 19Nach'e ena'am jauana ñe'me Santiago, jo'ne mach'e lanoqolec ñe'me Qadejaliaĝanec Jesucristo. Qaya'te onolec laqaya jo'ne namaĝajec ta'le jauana. 20Yataqachiñe eja da'me dojo' ami ja'aĝatema. ¡Dios jayem yayaten queda'me ja joqovinaĝatac!
21Ca'li yem da'me dojo', male jec'atalo dia'me ale'u jo'ne Siria nataq'aen Cilicia. 22Jaa'me jaajo' noloqo'ote gaa'me p'etaqadaiquipi jo'ne p'iida'a ñe'me Cristo jo'ne neda'ña di'me Judea maliaĝa jona'li jayem yateto'n. 23Nach'edata da'me domachita da'me 'naqataĝanaĝac jo'ne jayem qo'yaĝatetac 'me enaac: “Jenjo' jiyaĝaua jo'ne ya'uo qadachoĝodec ca'li, male ue'ta nayi da'me 'yaĝatetac da'me onaĝaic 'naqataĝanaĝac jo'ne jetaque yapalaĝat ca'li.” 24Qama'le yemeda 'nonaĝachidegue ñe'me Dios, qa'a nach'eñe ñe'me jayem yanem da'me yadalaĝac.
Currently Selected:
Gl 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina