Ef 1
1
Lep'iyenataĝanaĝac ñe'me Pablo
1Mach'e jayem Pablo, jo'ne lamaĝajec joñe'me Jesucristo, qa'a Dios mach'e yataqata jayem ee'tec.
Ami yaqaya'olqa jo'ne Éfeso laje', ami jo'ne eja yataqata ovitaue jena'me Dios lec'oqo'tepi, nataq'aen yataqata auep'iiya'a joñe'me Jesucristo, yataqata t'adaic da'me yamaic ami janema. 2'Noota qom Dios mach'e Qadet'a nataq'aen ñe'me Qadejaliaĝanec Jesucristo ami yanema da'me anichoĝodenataguequi nataq'aen da'me at'emaĝaqui.
Pablo yanem lamaic joñe'me Dios
3Yataqata 'noota ta'le qo'nonaĝachigui joñe'me Dios, jo'ne Let'a joñe'me Qadejaliaĝanec Jesucristo, qa'a qo'mi yichoĝode'n jouaĝat da'me joqo'taqataguet ñe'me Cristo. Chane'eja qo'mi yanema naa'me yodapecache lichoĝodenataĝanaĝaco 'me ja di'yo't, jo'ne chiyoqodaje'ma di'me piyem. 4Ca'li maliaĝa ja di'yoq jena'me aleua, Dios joote en qo'mi liquiyaqa qaedi qolaĝague ñe'me mach'e Liquiyac Jesucristo, da'me en jajoyaqa'aguet joñe'me Dios, male yataqata ja qo'mi 'te 'nalo'te, qaya'te qanaviyaqataguec.
Dios yataqata qo'mi noqopitalo, 5qama'le 'uo da'me lamaic da'me namaĝaquena joñe'me c'oĝot Jesucristo qaedi qo'mi ee'teque qo'mi liaqataqa, nach'ena jena'me jenjo' joote en lelnataĝac ca'li yemta. 6Chane'eja 'noota qom yataqata 'ñonaĝataĝaye joñe'me jouaĝat jena'me jenjo' t'adaic 'lonaĝac, 'me chiyaqayi da'me onaĝaic loqopich'i jo'ne qo'mi yanema. Jayatenaq da'me yataqata eja da'me loqopich'i, qa'a joote qo'mi yanema joga'me qadec'alaĝac chiyaqayi joñe'me onolec lec'oĝot ca'li namaĝaquena. 7Da'me leleuaĝa joñe'me Jesucristo ca'li uetalegue jaga'me sodoso, male Dios en qo'mi uojotedañi, da'me yapalaĝa't yemeda jogaa'me qadoeco. Nach'ena jena'me jenjo' ya'uo ca'li qa'a jouaĝat da'me yataqata eja qo'mi noqopitalo. 8Dios joote jalcote da'me qo'mi yanema, qaedi yataqata 'uo da'me qadayatenaĝanaĝac nataq'aen da'me qadatetonaĝanaĝac, 9qama'le qo'mi yaloĝonalo jena'me jenjo' lelnataĝac jo'ne ja di'yoq ca'li yemta 'uo jena'me jenjo' aleua, ga'me jo'ne jetaque ya'uo 'me chiyaqayi da'me qoyalat ñe'me mach'e Liquiyac. 10Qom male yovita ga'me laloqo' qama'le yataqata en yomat yema joga'me jetaque ye'et, da'me yemata'a't yema jogaa'me uo'oe, gaa'me ueteda'a di'me piyem, chayovida'a jena'me ue'ta jena'me aleua, qaedi male yataqata qonauachigui da'me qoyen nejaliaĝanec joñe'me Cristo, yataqata qodajotalegue joñe'me.
11Da'me 'uo ñe'me Cristo, Dios male en qo'mi liquiyaqa ca'li yemta da'me 'lonataĝanaĝac, qaedi yataqata en qo'mi lec'oqo'te, qaedi male jaconaĝaguet yema joga'me 'yaĝatetac ca'li. Nach'ena jena'me jenjo' Dios lelnataĝac jo'ne qo'mi yanema, nach'eñe jo'ne ja yoqovin joga'me 'laqatac uotaĝa 'lonataĝanaĝac. 12Dios yataqata paquetapega da'me qo'mi jo'ne judío laje' yataqata je'uauaqachiñe da'me eja jep'iyaqa joñe'me Cristo, qaedi male yataqata qa'nonaĝachigui da'me lañoqotaĝanaĝac t'adaic ñe'me Qadet'a Dios.
13Qama'le nayi nach'e ena'am da'me ami male ami Dios lec'oqo'tepi, chiyaqayi da'me joote auomachiiya jena'me jenjo' 'naqataĝanaĝac jo'ne eja 'me 'yaĝatetac ñe'me Dios, 'naqataĝanaĝac jo'ne chiyaqayi da'me adec'alaĝaqui, nach'ena jena'me jenjo' male chiyaqayi joñe'me Cristo, da'me joote auacoñiyeguet joñe'me Dios Lepaqal jo'ne ja 'nalegue, nach'ena jenjo' qo'yaĝatapema joñe'me, qama'le en di'yoq da'me yataqata ami Dios lec'oqo'te. 14Nach'eñe ñe'me Dios Lepaqal en yataqatelegue da'me jaconaĝaguet qomle yema ga'me jo'ne Dios joote qo'mi 'yaĝatema, qom male yem da'me en uojotedañi q'ae'n yemeda gaa'me mach'e liquiyaqa. Chane'eja, ¡'noota qom nach'e eta't da'me qa'nonaĝachigui da'me lañoqotaĝanaĝac t'adaic joñe'me!
Pablo netamelo'te gaa'me p'etaqadayaqa jo'ne neda'ña di'me Éfeso
15Chane'eja, queda'me joote ami jayate'n da'me yataqata auep'iiya'a joñe'me Jaliaĝanec Jesús, nataq'aen da'me yataqata adoqopichiyalo jogaa'me adaqayadi' jo'ne nataq'aen p'iida'a jena'me jenjo' 'noota, 16qama'le yataqata ja ami 'te japalaĝate'talo nale ñetametac, chayovida'a da'me nach'e eta't janem da'me yamaic ñe'me Dios queda'me eja yataqata auep'iiya'a joñe'me. 17Nataq'aen ñachoĝodenot joñe'me Nedios ñe'me Qadejaliaĝanec Jesucristo, ñe'me mach'e Qadet'a jo'ne onaĝaicaloec, qaedi ami yanema joñe'me Lepaqal jo'ne ja 'nalegue, qaedi ami yatenaĝanaĝayaqa nataq'aen male yataqata at'amaqayec joñe'me Dios. 18Nataq'aen male ñachoĝodenot joñe'me Dios qaedi ami yaloĝo'talo chayovida'a da'me yataqata auayachiñe da'me eeta da'me qadeuataqataĝanaĝac jo'ne chiyaqayi da'me nec'alaĝa jo'ne jetaque qo'mi yanouelo, nataq'aen qaedi auayachiñe da'me eeta da'me lajo'viyaĝac ga'me onaĝaic jo'ne qaya'te ena'am da'me li'yoĝodic, nach'eda da'me jetaque yanema yemeda gaa'me mach'e lec'oqo'tepi. 19'Noota qom yataqata auayachiñe joda'me lañoqotaĝanaĝac joñe'me, nale qo'mi lecochiyalo yemeda naa'me noloqo'ote, qaya'te yiyota'ya da'me lañoqotaĝanaĝac yataqata qaya'te loiquiaqa'. 20Qama'le naqaeñe joñe'me Dios t'onataĝana ca'li en 'niyelaĝajeguem joñe'me Cristo, qama'le ya'uo di'me 'lachaqa' jodi'me piyem, male en na'ña jena'me yayaten joñe'me. 21Jena'me jenjo' lañoqotaĝanaĝac ñe'me Dios joote yanem joñe'me Cristo, qaedi male nejaliaĝatelo'te yemeda jogaa'me nepaqa'li jo'ne nataq'aen 'uo da'me mach'e lañoqotaĝanaĝac, qalaĝaja ja naloteda'aguet joñe'me Cristo, chayovida'a da'me Cristo male nejaliaĝatelo'te yemeda jogaa'me ueteda'a jena'me jenjo' aleua, nataq'aen jogaa'me uo'oe jo' qomle ga'me aleua dalaĝaic. 22Dios joote yanem ñe'me Cristo da'me lañoqotaĝanaĝac qaedi male yataqata nejaliaĝatelo'te yemeda jogaa'me uo'oe, nataq'aen male naqaeñe jo'ne qoyen Lejaliaĝane'j yema jogaa'me Dios lec'oqo'tepi, 23ena'am ga'me laqaic ga'me jiyaĝaua jo'ne yelolegue yema ga'me 'loyaĝac, qama'le naqaeñe ñe'me Cristo da'me en nalo'ta'ajalo jogaa'me, qa'a nach'eñe ñe'me jo'ne yemata'a't yemeda gaa'me uo'oe.
Currently Selected:
Ef 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina