2 Ts 1
1
Lep'iyenataĝanaĝac ñe'me Pablo
1Mach'e qo'mi Pablo, Silvano nataq'aen Timoteo, yataqata t'adaic jena'me qadamaic ami jamaĝajaĝalo, ami qadaqaya'olqa p'etaqadayaqa jo'ne Tesalónica laje', naqa'ami jo'ne Dios lec'oqo'tepi nataq'aen da'me ademii'teguet ñe'me Qadejaliaĝanec Jesucristo: 2'Noota qom Dios mach'e Qadet'a nataq'aen ñe'me Qadejaliaĝanec Jesucristo ami yanema da'me anichoĝodenataguequi nataq'aen da'me at'emaĝaqui.
Pablo ya'uo netamenaĝac, dajelaĝalo'te gaa'me Tesalónica laje'
3Ami yaqaya'olqa, 'noota qom yemeda naa'me naajo' noloqo'ote janemaĝam da'me qadamaic joñe'me Dios, jouaĝat da'me ami. Nach'ena jena'me jenjo' ta'le jauoqo, qa'a da'me ami male yataqata auep'iiya'a joñe'me Dios, nataq'aen da'me di'yoq yataqata anoqopich'iya't, da'me ami naqaya' onolqa'tape da'me ami. 4Qama'le nayi yataqata 'uo da'me qadamaic nale ami jenataqa'talo nataq'aen ami ja'aĝataqa'tape nale 'uo ga'me jouaqa'ta na'me tamenaĝaiqui jena'me jenjo' aleua jo'ne mach'e Dios 'lemaqa. Nataq'aen da'me jayatenaq na'me ovi'ta yataqata 'uo ga'me laqalaic da'me jenjo' 'noota, chayovida'a da'me 'uo ga'me adachoĝodequi, qalaĝaja yataqata ami ejoda da'me auep'iiya'a joñe'me Qadet'a Dios. 5Nach'ena yataqata eja da'me male yaloĝon queda'me qaya'te lepatenaĝanaĝac ñe'me Dios, nach'eñe jo'ne yataqachiñe eja da'me lec'atenaĝanaĝac, qama'le ami yela'a da'me yataqata adaloyeguet da'me male ovitaue da'me lejaliaĝa joñe'me Dios: yajouaĝat da'me dojo' cha'li 'uo ga'me qoyen adachoĝodequi.
6Jena'me jenjo' yataqata 'noota ta'le joñe'me Qadet'a ya'uo lachoĝodec joga'me ami yalate'tape nayi. 7Qama'le ami yichoĝode'n qomle, da'me ami jo'ne 'uo da'me adachoĝodequi nayi, qaedi qadalo'ta't da'me qo'mi yichoĝode'n, qom yovita ga'me nolo' da'me yitaĝa 'niyelaq joñe'me Qadejaliaĝanec Jesús chiyaqa'ague jodi'me piyem, da'me naquetaue joga'me ena'am ta'le dole' lauaq, nataq'aen naequetedapegue' jogaa'me piyem laje' jo'ne yataqata p'ajodaye. 8Qama'le 'uo qomle ga'me 'yeteque jogaa'me jo'ne ja yoqochideta ñe'me Qadet'a choqogaa'me jo'ne ja yacoteguet da'me 'naqataĝanaĝac 'me 'yaĝatetac ñe'me Qadejaliaĝanec Jesucristo. 9Nataq'aen male yataqata qoyapalaĝa't jo' qomle, nataq'aen da'me qoyiyota'alo, yataqata ja yaqanate't ta'le ueteda'ajop joñe'me Jaliaĝanec, uotaĝa ta'le yauata da'me 'lonaĝac choqoda'me lañoqotaĝanaĝac t'adaic. 10Nach'ena 'uo jo' qomle male 'niyelaq ñe'me Qadejaliaĝanec Jesucristo, qama'le ga'me Dios lec'oqo'tepi yataqata 'nonaĝachidegue joñe'me, chayovida'a da'me yoqochetem yemeda ga'me p'etaqadaiquipi. Qama'le da'me ami nach'e ena'am ovitaue joga'me Dios lec'oqo'tepi, qa'a auacoñiyeguet ca'li ga'me 'laqatac joñe'me Qadec'alaĝaiqui jo'ne ami ja'aĝatapema.
11Nataq'aen yemeda naa'me noloqo'ote da'me ami jajelaĝanaĝalo'te, da'me ñachoĝodenoqot joñe'me Dios qaedi ami e'n adaloyeguet da'me 'noyaĝac jo'ne auacoñiyeguet ca'li ami qoyiyaĝanalo, nataq'aen qaedi ami yanema ena'uaque daa'me 'noote' jo'ne auepaquitapegalo, qaedi yataqata ami onaĝayaqa nataq'aen qaedi auomachi' gaa'me at'onataqadi' 'me chiyoqodayi da'me adepi'i, qa'a nach'eñe jo'ne qaya'te yaqalaatac. 12Qom naq'aeta qama'le ami yataqata qo'nonaĝachigui joñe'me Qadejaliaĝanec Jesucristo yajouaĝa't da'me ami, qama'le joñe'me nach'e ena'am da'me ami 'nonaĝachiguilo onolqa'tape da'me ami, qa'a naqaeda da'me leyalaqataĝanaĝac joñe'me Qadet'a Dios, choqoñe'me Qadejaliaĝanec Jesucristo.
Currently Selected:
2 Ts 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina