Eholololo 1
1
1Eholololo lyaJesus Kristus ndyaa pewa kuKalunga okuyulikila ovantu ve ovipuka mbyaa thele okuningwa dhiva. Jesus we tji hololola hiaa tuma omweengeli we komuntu we Johannes, 2ngwaa hipulula odhondaka dhaKalunga noumbangi waJesus Kristus, atjihe hiaa mona. 3Omunalao onguma tanga nanguma tee odhondaka dhouprofeti hembu, ye ha takametha ovipuka mbyaa sonekwa mo, mena lyokutya otembu i li popedhi.
Omaongalo epanduvali maa popithwa
4Johannes ma popitha omaongalo epanduvali omoAsia:
Et̯ilonkenda nouwa mbumau dhi kuKalunga nguu li ko, ngwaa li ko, ye ngume ya, nokodhombepo ndhoka epanduvali ndhii kala kotjipunditumino tje,#Eks. 3:14; Ehol. 4:5 5nokuJesus Kristus, ombangi omuliun̯ikwa, omutenga mokwiimunwa kout̯e, omutumini wodhohamba dhokombanda yohi ngau kale nan̯e.
Ye nguu tu hole, ngwee tu kutulula kodhonkali dhetu nombindhi ye,#Jes. 55:4; Eps. 89:27 6we tu ninga ombala yovayambethi, tu undapele Kalunga Ihe, nga tumbalekwe, ye nga tumine apehe katee apehe. Amen.#Eks. 19:6; Ehol. 5:10
7Taa tuutuu, ye me ya momakaka, nomeho ovantu avehe mae ke mu mona, nambave mu twela neonga mave ke mu mona, noviwan̯a avihe vyokombanda yohi mavi ka lila himavi mu mono. Iinga matji ka ningwa! Amen.#Dan. 7:13; Sak. 12:10; Mat. 24:30; Mark. 13:26; Luk. 21:27; Joh. 19:34,37; 1 Tes. 4:17
8“Aame Alfa naOmega,”#1:8 Alfa naOmega: Matji tya “eutilo nehulilo”. Alfa mOtjigreka ondanda yolutenga, Omega mOtjigreka ondanda yathiinina. Muhona Kalunga otjo ma popi, hengu nguu li ko, ngwaa li ko, ye ngume ya, Omutuminiwaavihe.#Eks. 3:14; Ehol. 22:13
Jesus me liholololele Johannes kompanga yaPatmos
9Aame Johannes omukwen̯i, ngundji na oukumo umo nan̯e muJesus mokulikambulithila, moudheu nomotjilongo tje. Mba li kompanga ndjii tiwa oPatmos, mena lyokutya mba teetha odhondaka dhaKalunga, ame he hipulula Jesus. 10Metango lyaMuhona mba kambulwa kOmbepo, he tee ondaka onene kon̯ima yandje ndjimai ngala onkwino, 11hai tyaa: “Soneka medhingwambo hiuu lwete, ove u li tumine omaongalo epanduvali: LyokoEfeso nolyokoSmirna nolyokoPergamo nolyokoTiatira nolyokoSardes nolyokoFiladelfia nolyokoLaodikea.”
12Ame mba piluluka ndji tale ondaka ndjimai mpopitha, himba piluluka mba mona ovituliko vyodholamba vyotjingoldo epanduvali. 13Mokati kovituliko vyodholamba mba mona mo umo, nguma ngala Omuna wOmuntu ngwaa dhala omudhalo omule mbwaa tono kodhompadhi, nomuvya wotjingoldo pontulo.#Dan. 7:13; 10:5 14Omutwe we nodhondjutji dha li adha pembana too ngonyange ne ngodhompawe. Omeho e a ngala omalakulaku omulilo,#Dan. 7:9 #Dan. 10:6 15nodhompadhi dhe dhi ngala otjivela otjindumbu hitja pya momulilo, nondaka ye i ngala otjihoomo tjomeva omengi,#Hes. 1:24; 43:2 16mokuwoko kwe kwokokulyo mwa li odhonyothi epanduvali, nomotjinyo tje mwa dha omukonda mbwaa twa kuvali, notjipala tje tja li amatji ngala etango amali tungatele mokati komutenya. 17Iya himbe mu mono, mba wila podhompadhi dhe ngangumba t̯i. Iya wa ntendeka okuwoko kwe kwokokulyo ha tyaa: “Hó tila, aame omutenga nomuthiinina,#Jes. 44:6; 48:12; Ehol. 2:8; 22:13 18ngundji na omwenyo. Ame mba t̯ile, iya taa tuutuu, napano me kala nomwenyo apehe katee apehe. Iya ndji na odhosapi dhet̯o nodhomotjovat̯e. 19Iya ovipuka mbiwa mono, vi soneka, nambii li po nambimavi ke ya kon̯ima. 20Otjiholekwa tjodhonyothi ndhoka epanduvali ndhiwa mono mokuwoko kwandje kwokokulyo novituliko vyodholamba vyotjingoldo epanduvali matji tya hinyahi: Odhonyothi epanduvali ovaengeli womaongalo epanduvali, novituliko vyodholamba epanduvali omaongalo epanduvali.
Currently Selected:
Eholololo 1: DBNT
Highlight
Share
Copy
Want to have your highlights saved across all your devices? Sign up or sign in
Dhimba New Testament © Bible Society in Namibia, 2010.