OVAFILIPPI 1
1
1Paulus naTimoteus, ovapiya vaKristus okovayapuki aveshe muKristus Jesus, ovo ve li muFilippi nokovafita nokovayakuliongalo. 2Efilonghenda kunye nombili yaKalunga Tate yetu noyOmwene Jesus Kristus!
Paulus ta ilikanene Ovafilippi
3Ohandi pandula Kalunga kange keshe tuu apa handi mu dimbulukwa, 4ndele momailikano ange aeshe ohandi mu ilikanene alushe nehafo, onye amushe, 5eshi mu nekwatafano lomevaengeli okefiku linya lotete fiyo opaife, 6nohandi lineekele shili nokutya, ou a hovela oshilonga shiwa munye, Oye ote shi wanifa yo fiyo okefiku laKristus Jesus. 7Naasho sha yuka yo, ndi kale noku mu diladila ngaha onye amushe, osheshi ondi mu kwete momutima wange, nofimbo ndi li meemango nomanga handi popile nohandi pameke evaengeli, onye ava mu noshitukulwa shonghenda pamwe naame. 8Osheshi Kalunga Oye ondobwedi yange, nhumbi nde mu djuulukwa nohole yokomwenyo yaKristus Jesus.
9Ndele eshi handi indile ohole yeni i hapupale alushe mokushiiva nomokukoneka akushe, 10mu shiive okutongola oinima ei iwa unene, mu kale fiyo okefiku laKristus mwa koshoka, nye muha limbilike nande omunhu, 11mwa yadifwa noiimati youyuki, oyo i li po molwaJesus Kristus okufimanekifa nokuhambelelifa Kalunga.
Omalyenge a tandavelifa evaengeli
12Ndelenee ovamwatate, nda hala mu kale mu shi shii, eshi sha ningilwa nge, osha tandavelifa evaengeli, 13fiyo sha shiivika ketanga alishe lovakwaita vomouhamba nokuvamwe aveshe nokutya, ame nda mangwa omolwaKristus. 14Novamwatate vahapu vomOmwene mokulineekela omalyenge ange va tuwa ouladi u dule wonale okupopya eendjovo daKalunga vehe noumbada.
15Nande vamwe hava udifa Kristus kondubo nokepatafano ndele vamwe kehalo liwa, 16ava ohave shi ningi kohole, osheshi ve shi shii, ame nda tulwa po okupopila evaengeli, 17ndele venya vamwe ohava udifa Kristus nokukonga osho shavo vene nomwenyo inau yela, nove shii tava wedele nge oluhodi momalyenge ange. 18Ndelenee opo ope na shike? Kristus shimha ta udifwa keenghedi adishe, ngee pamoniko longaho ile moshili! Nondi li po handi shi nyakukilwa nohandi ke shi hafela komesho yo.
Kristus aeke na fimanekwe
19Osheshi ndi shi shii, eshi otashi lundulukile nge exupifo omolwomailikano eni nokekwafo lOmhepo yaJesus Kristus, 20ongaashi ndi neteelelo nelineekelo nokutya, ame itandi ka fifwa ohoni nande moshinima shimwe, ndelenee Kristus ta ka fimanekwa nouladi aushe paife naalushe omolutu lange nongeenge mokukalamwenyo ile mefyo. 21Osheshi omwenyo wange oKristus, nokufya okwo elikolo. 22Ndelenee ngeenge ndi nokukala ndi nomwenyo mombelela otaku etele oshilonga shange oiimati, ndele nghi shi shii shilipipo handi hoolola. 23Hano handi fininikwa keembinga mbali, onda hala okudja po ndi ka kale puKristus, osheshi osho sha wapalela nge unene; 24ndelenee okukala mombelela omolweni ku dule po shinya. 25Ndele eshi nda shiiva eshi shili, ondi shi shii yo kutya handi ka kala nomwenyo nohandi kala punye amushe, mu kulifwe, nye mu hafifwe meitavelo, 26opo elitango leni omolwange muKristus Jesus tali kala lihapu unene mokuuya kwange kunye vali.
Kaleni omukoo umwe
27Kaleni ashike nokweenda nokuwapalela evaengeli laKristus, opo ngeenge nde uya ko, ndi mu mone ile ngee ndi li kokule, ndi mu ude, mu li momhepo imwe, nye mu li omukoo umwe mokukondjela eitavelo levaengeli pamwe naame, 28ndele nye muha mbadapalifwe kovanandubo nande moshinima shimwe. Eshi osho edidiliko lekano kuvo, ndelenee kunye olexupifo, edidiliko la dja kuKalunga. 29Osheshi onye omwa pewa hakwiitavela akuke Kristus, ndelenee oku mu hepekelwa yo, 30nye mu nolwoodi tuu olo mwe li mona ndele hamu udu paife ndi li kwete.
Currently Selected:
OVAFILIPPI 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.