DEUTERONOMION 9
9
Ovaisraeli ovalundakani novatauluki voipango
1“Pwilikina, Israel, paife oto ka tauluka Jordan, u taatae oiwana inene noi neenghono i ku dule, nokunangala oilando inene oyo ya pamekwa neehotekuma da twa fiyo okeulu, 2oshiwana shinene shi novanhu vale, Ovaanaki, ava va shiivika kwoove mwene nowe va uda tava popiwa: ‘Olyelye ta dulu okulipopila kOvaanaki?’ 3Hano kala u shi shii nena eli nokutya, Omwene Kalunga koye ote ku tetekele ngaashi omundilo tau lungwinifa. Ye ote ke va hanauna po, Oye ote ke va ta po komesho yoye, opo ove u shiive oku va taataa diva ndele to dulu oku va komba po, Omwene ngaashi e ku udanekela.
4“Omwene Kalunga koye ngeenge e va taataa po komesho yoye, ino diladila momutima woye nokutya: ‘Omolwouyuki wange Omwene okwa eta nge ndi nangale oshilongo eshi.’ Osheshi omolwoukolokoshi woiwana ei Omwene te i te po komesho yoye. 5Hamolwouyuki woye ile okuyuka kwomwenyo woye ove to uya moshilongo shayo, u shi nangale, ndelenee omolwoukolokoshi woiwana oyo, Omwene Kalunga koye ote i taataa mo komesho yoye, opo a wanife ondjovo yaye, ei Omwene a anena ooxo Abraham, Isak naJakob.
6“Kala u shi shii hano nokutya, Omwene Kalunga koye ite ku pe edu eli liwa u li nangale molwouyuki woye, osheshi ove oshiwana sha lundakana. 7Dimbulukwa ndele ino shi dimbwa, ove nhumbi wa handukifa Omwene Kalunga koye mombuwa. Okudja kefiku tuu olo ove wa dja medu laEgipiti fiyo mwe uya konhele tuu ei, nye omwa twa ondubo nOmwene. 8Heeno, puHoreb nye mwa handukifa Omwene, onghee hano Omwene e mu handukila, okwa li a hala oku mu komba po. 9Ame eshi nda londa komhunda ndi tambule oipelende yomamanya, oipelende yehangano, Omwene e li ninga nanye, ame nda kala komhunda omafiku omilongo nhee oufiku nomutenya, noinandi lya omungome, inandi nwa omeva, 10nOmwene okwa pa nge oipelende oyo ivali yomamanya, ya shangwa nomunwe waKalunga, ndele muyo omwa li eendjovo adishe odo Omwene e di mu lombwela komhunda mokati komundilo mefiku linya loshiongalele sheongalo. 11Ndele omafiku omilongo nhee, oufiku nomutenya, eshi a pita, Omwene okwa pa nge oipelende oyo ivali yomamanya, oipelende yehangano, 12nOmwene okwa lombwela nge ndele ta ti: ‘Fikama, koloka po diva apa, osheshi ovanhu voye we va pitifa muEgipiti, ova longa oixuna. Vo ova kanduka mo diva mondjila Ame nde i va lombwela. Vo ove liningila oshitelekwafano.’
13“Omwene okwa popya vali naame ndele ta ti: ‘Ame nda tala oshiwana eshi, ndele tala, sho oshiwana shikukutu. 14Efe nge, Ame ndi va kombe po nedina lavo ndi li dime po koshi yeulu, ndele Ame ohandi ku ningi oshiwana shi dule venya meenghono nomouhapu.’ 15Opo nee ame nda pilamena ko ndele nda koloka komhunda fimbo omhunda ya xwama omundilo, noipelende oyo ivali yehangano ya li momake ange avali. 16Opo nee nda mona nokutya, nye mwa nyona shili kOmwene Kalunga keni. Nye mwe li ningila oshitelekwanhana. Nye mwa kanduka mo diva mondjila ei Omwene e i mu lombwela. 17Ndele ame nda kwata oipelende oyo ivali, ndele nde i ekela shi nomake ange avali, ndele nde i teyaula po komesho yeni. 18Opo nee nda wila eombe koshipala shOmwene ngaashi tete, omafiku omilongo nhee, oufiku nomutenya, inandi lya omungome, inandi nwa omeva, omolwomatimba eni aeshe mwe a ninga, eshi mwa longa osho inashi yuka momesho Omwene, ndele mwe mu handukifa. 19Osheshi ame nda tila ehandu noupyuhandu wOmwene kwa li e mu handukila, kwa li e mu kombe po. Ndelenee Omwene okwa uda nge nomefiku tuu olo. 20Omwene okwa handukila unene Aron yo, onghee okwa li a hala oku mu dima po. Ndelenee ame nda ilikanena yo Aron mefimbo linya. 21Ndele ame nda kufa po oshinyonifo sheni, onhana oyo mwe i ninga, ndele ame nde i xwika po momundilo noku i tataula noku i twa oufila ngaashi ondwi. Ondwi oyo nde i ekela momulonga ou wa kungulukila momhunda. 22Nosho mwa handukifa Omwene muTabera nomuMassa nomuKibrot-Hattava. 23NOmwene eshi e mu tuma muKades-Barnea neendjovo edi: ‘Fikameni, mu ye mu ka nangale oshilongo nde shi mu pa,’ nye mwa li omhinge nelombwelo lOmwene Kalunga keni, ndele inamu itavela ndele inamu dulika kondaka yaye. 24Mwa li omhinge nOmwene okefiku tuu linya ame ndi mu shii. 25Ndele ame nda wila eombe koshipala shOmwene omafiku omilongo nhee, oufiku nomutenya, nda wila eombe, shaashi Omwene okwa tile, Ye a hala oku mu komba po. 26Ndele ame nda indila kOmwene ndele handi ti: Omwene Kalunga, ino hanauna po ovanhu voye nefyuululo loye, olo we li kulilifa eenghono doye, nowe li pitifa muEgipiti neke li neenghono. 27Dimbulukwa ovapiya voye Abraham, Isak naJakob. Ino tala oukukutu wovanhu ava ile oukolokoshi wavo ile omatimba avo, 28opo moshilongo musho we tu pitifa mo muha tiwe: ‘Omwene eshi a nyengwa oku va twala moshilongo eshi e va udanekela, ndele Ye eshi te va tondo, Ye okwe va pitifa mo va file mombuwa.’ 29Akutu, vo ovanhu voye, oshifyuululwa shoye, we shi pitifa mo meenghono doye dinene nokwooko kwa yeluka.
Currently Selected:
DEUTERONOMION 9: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.