DEUTERONOMION 22
22
Omalongo okuyakulafana nohole
1“Ove ngeenge to mono ongobe yamukweni ile odi ya kana, ino i efa ngaho, ndelenee i shunifa shili kumukweni. 2Omukweni ngeenge ke po popepi naave, ndele ove ku mu shii, u noku i idilila meumbo loye, ndele i nokukala pwoove fiyo mukweni te i kongo. Opo nee to i mu alulile. 3Osho yo u nokuninga nondongi yaye nosho yo oshikutu shaye, nosho yo keshe eshi shamukweni sha kana, ove to shi mono, ino shi fiya po opo.
4“Ove ngeenge to mono ondongi ile ongobe yamukweni ya wila mondjila, ino i koya po. Pamwe namukweni mu noku i kwafa shili oku i tumba i kale ofika komaulu ayo.
Omakumaido
5“Omukainhu ehe nokudjala omidjalo domulumenhu. Nomulumenhu ehe nokudjala omudjalo womukainhu. Osheshi aveshe ava tave shi ningi, vo oixuna momesho Omwene.
6“Mondjila yoye to ende mo ngeenge to mono mo oshihadi shodila, ngee momuti keshe, ile poshi, musho mu noudilona ile omai, naina ta utumanene oudilona ile omai, ino kufa ina pamwe noudilona, 7ahowe, u nokweefa shili ina, i tuke po. Oudilona ovo aveke u kufa po, opo u kale u nelao nomwenyo omule.
8“Ove ngeenge ho tungu ongulu ipe, u nokutunga konduda yayo oshikelelifongubu, opo uha kwatifile ongulu yoye etimba lohonde, umwe ngeenge ta u ko.
9“Moshikokola shomuviinyu ino kuna mo eembuto dopavali, ngeenge to shi ningi eeviinyu adishe, heeno, eembuto doye we di kuna mo naashishe tashi teywa mo, otashi yapulilwa etwali liyapuki.
10“Ino pululifa mefimbo limwe nongobe nondongi, da mangelwa pamwe.
11“Ino djala oshikutu sha tungifwa eengodi di lili nadi lili dolududi nodoliina di li mumwe.
12“Kominghulo nhee doshikutu shoye shokombada ningila ko eenyemba.
Oluhaelo tali handukilwa
13“Umwe ngeenge a hombola omukainhu ndele ta nangala naye, ndelenee te mu tondo, 14ndele te ke mu lundila eendjovo domanyonauno, ndele te ke mu popya nai, ndele ta ti: ‘Ame nda hombola omukainhu, ndele mokunangala naye, inandi mu hanga oukadona waye,’ 15opo nee xe naina yokakadona, ve nokukufa edidiliko loukadona womona wavo, ndele ve noku li twala kovakulunhu voshilando poshivelo shoshilando. 16Xe yokakadona e nokulombwela ovakulunhu: ‘Ame nda yandja omona wange okakadona komulumenhu tuu ou, ndelenee ye te mu tondo. 17Ndele taleni, ye okwe mu lundila omanyonauno mai ta ti: ame inandi mona oukadona waye momona woye okakadona. Ndelenee eli edidiliko loukadona womona wange.’ Ndele vo ve nokunyaneka oshikutu moipafi yovakulunhu voshilando. 18Opo nee ovakulunhu voshilando ve nokukufa omulumenhu winya noku mu handukila, 19noku mu futifa efuto li fike peesekeli doshisiliveli efele limwe noku di pa xe yokakadona, ye eshi a tandavelifa omalundilo molwokakadona komuIsrael. E nokukala naye, omwalikadi waye. Ye ine mu henga fimbo e nomwenyo. 20Ndelenee ondjovo ei ngeenge oyoshili, nokutya oukadona inau monika momona okakadona, 21opo nee ve nokutwala omona okakadona konhu yeumbo laxe novalumenhu vomoshilando shavo ve noku mu dipaa nomamanya, a fye, shaashi ye okwa ninga oshififahoni muIsrael, ye eshi a haelwa meumbo laxe. Osho ngaha mu nokudima po owii mokati keni.
22“Omulumenhu ngeenge ta hangika ta nangala nomwalikadi a hombolwa, vo aveshe vavali ve nokufya: omulumenhu ou a nangala nomwalikadi, nomwalikadi yo. Osho ngaha mu nokudima po owii muIsrael.
23“Omona okakadona ngeenge ka valekwa komulumenhu, ndele umwe te mu kwata moshilando ndele ta nangala naye, 24opo nee vo aveshe vavali ve nokweetwa koshivelo shoshilando noku va dipaa nomamanya. Okakadona, shaashi ko inaka kuwa onghuwo nande ka kala moshilando, nomulumenhu shaashi ye a fifa ohoni omukainhu wamukwao. Osho ngaha hano mu nokudima po owii mokati keni. 25Ndelenee omulumenhu ngeenge ta hange omona omuvalekwa moixwa ndele te mu kwata onghonga, omulumenhu ou a nangala naye, oye aeke ta ka fya. 26Ndelenee kakadona ino mu ninga sha. Osheshi okakadona kake netimba lokufya. Osheshi oshilonga eshi osha faafana nomunhu, ou a nangela omunhu, nde te mu dipaa. 27Osheshi ye okwe mu hangele moixwa. Omona okakadona ka kuwa onghuwo, ndelenee inapa kala nande umwe e mu kwafa.
28“Omulumenhu ngeenge ta hange okakadona inaka valekwa, ndele te mu kwata, ndele ta nangala naye, ndele vo tava hangika, 29opo nee omulumenhu ou a nangala naye, e nokufuta xe yokakadona eesekeli doshisiliveli omilongo nhano, ndele ye e noku mu hombola, shaashi ye e mu fifa ohoni. Na kale ite mu henge po fimbo e nomwenyo.
30“Omulumenhu aha hombole omwalikadi waxe, aha tuvukulule oshituvikwa shaxe.
Currently Selected:
DEUTERONOMION 22: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.