OVAKOLOSSI 1
1
1Paulus omuyapostoli waKristus Jesus okehalo laKalunga, nomumwatate Timoteus, 2kovamwatate muKristus, ovayapuki novaitaveli vomuKolossi.
Efilonghenda kunye nombili yaKalunga Tate yetu.
Epandulo neilikano omolweitavelo lOvakolossi
3Ohatu pandula Kalunga Xe yOmwene wetu Jesus Kristus alushe ngeenge hatu mu ilikanene, 4osheshi eitavelo leni lomuKristus Jesus, nohole yeni yokuhola ovayapuki aveshe, otwe i uda 5nomolweteelelo leni, mwe li tuvikililwa meulu nomwe li uda nale meendjovo doshili yevaengeli, 6la fika kunye nongaashi li li mounyuni aushe ndele tali imi oiimati, ngaashi mokati keni yo, okefiku olo mwa uda ndele mwa shiiva onghenda yaKalunga yomoshili, 7nongaashi mwe shi longwa kuEpafras, omulongi omukwetu omuholike, omuyakuli omudiinini waKristus molweni, 8ndele oye e tu hepaululila yo ohole yeni yomOmhepo.
9Onghee nafye yo, kokudja kefiku olo twe shi uda, inatu efa oku mu ilikanena noku mu indilila mu yadifwe okushiiva ehalo laye meendunge adishe nomounongo wopamhepo, 10okweenda kweni opo ku wapalele Omwene, mu mu hafife mwaaishe shili nokwiimika oiimati moshilonga keshe shiwa, nokukula mokushiiva Kalunga, 11nokunghonopalekwa neenghono adishe paenghono defimano laye mu shiive okulididimikila moudjuu keshe nokutalonheni 12nokupandula nehafo Tate, ou e tu wapaleka tu pewe oshitukulwa shefyuululo lovayapuki mouyelele. 13Ou e tu xupifa mo mepangelo lomulaulu nokwe tu tembulila mouhamba wOmona waye omuholike. 14Muye otu nekulilo nekufilo lomatimba omohonde yaye.
Kristus Oye omutwe weongalo
15Oye olupe laKalunga iha monika, Omudalwa wotete woishitwa aishe. 16Osheshi muye omo mwa shitilwa aishe inya yomeulu naai yokombada yedu, ei i wetike naai ihe wetike, omalukalwapangelo ile ouhamba, nomapangelo ile omapangelonghono a pama, aishe ya shitilwa muye noye mu shitilwa, 17ndele Oye wotete kwaaishe, nomuye aishe oya pamenena mo. 18Ndele Oye omutwe wolutu nokutya, weongalo, Oye tuu ou ehovelo, Omudalwa wotete ou a nyumuka kovafi, opo a kale omukomesho moinima aishe; 19osheshi osho sha wapalela Xe, muye mu kale ouyadi aushe, 20ndele mokuninga ombili omolwohonde yomushiyakano waye ohandi ti: molwaye a hanganife aishe muye naai yokombada yedu naainya yomeulu.
21Nanye yo ava mwa li nale ovaliteeki novatondadi vaye momadilongo eni nomolwoilonga ii, 22Ye e mu hanganifa paife molutu lombelela yaye omolwefyo laye, opo e mu tule koshipala shaye ovayapuki, muhe noshipo nomuhe noushima, 23ngeenge tamu kala meitavelo, mwe likanghameka mulo, mwa pamenena mo, muha tengauke meteelelo levaengeli eli mwe li uda nola udifilwa ovashitwa aveshe vokoshi yeulu, olo tuu eli ame Paulus nda ninga omuyakuli walo.
Omuyakuli waKristus meongalo
24Paife ohandi hafe mokuhepekwa omolweni, noixupe youyehame waKristus ohandi i wanifa mombelela yange omolwolutu laye, nokutya eongalo, 25oleli nda ninga omuyakuli walo, omolwoutekuumbo waKalunga oo nde u pewa molweni ndi udife eendjovo daKalunga noku di wanifa, 26nokutya, oshiholekwa osho sha li sha holekwa omafimbo nomapupi ndelenee paife osha hololelwa ovayapuki vaye, 27ovo Kalunga a hala oku va shiivifila oupuna wefimano loshiholekwa eshi shi li mokati kovapaani, osho Kristus munye, eteelelo lefimano. 28Oye hatu mu udifa nokukumaida nokulonga omunhu keshe mounongo aushe, opo tu kaleke omunhu keshe poluhaela a wana muKristus. 29Osho tuu eshi handi shi lihepekele nokukondja pakulonga kwaye oko taku longo mwaame neenghono.
Currently Selected:
OVAKOLOSSI 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.