2 EEHAMBA 1
1
Oshilongo shaIsrael Oudu waAhasia nefyo laye
1Ndele konima yefyo laAhab, Moab she liteeka po Israel. 2Ndele Ahasia okwa wa mombululu yekende lomondjuwo yaye yopombada muSamaria ndele ta vele. Opo nee ta tumu ovatumwa ndele ta ti kuvo: “Indeni mu ka pule Baal-Sebub, oshikalunga shaEkron, ngeenge handi ka veluka tuu koudu tuu ou?” 3Ndelenee omweengeli wOmwene okwa lombwela Elia, Omutisbi, ta ti: “Fikama, u ka shakene novatumwa vohamba yaSamaria, ndele va lombwela: ‘Kape naKalunga muIsrael mbela, nye eshi tamu i mu ka pule kuBaal-Sebub, oshikalunga shaEkron?’ 4Onghee hano Omwene ta ti ngaha: ‘Kombete oko wa londa ko, ito londoloka vali, osheshi ove u nokufya shili.’ ” Ndele Elia okwa ya. 5Novatumwa eshi va aluka, ye ote va pula: “Omolwashike tamu aluka divadiva?” 6Ndele vo otave mu nyamukula: “Omulumenhu umwe e tu shakeneka nokwe tu lombwela: ‘Shuneni komwene weni, ou e mu tuma, ndele mu lombweleni: Omwene ta ti ngaha: “Shaashi kape naKalunga muIsrael mbela, ove to tumu kuBaal-Sebub, u pule oshikalunga shaEkron? Onghee hano kombete oko wa londa ko, ito ka londoloka ko vali, osheshi to ka fya shili.” ’ ” 7Opo nee ta ti kuvo: “Olupe lomulumenhu winya e uya oku mu shakeneka nokwa popya eendjovo edi, ola li la tya ngahelipi?” 8Ndele vo ve mu nyamukula: “Omulumenhu e nelwakani lolududi nomwiya moshiya shaye.” Opo nee ye ta ti: “Oye Elia, Omutisbi.”
9Okwa tuma ko kuye omukulunhu womilongo nhano pamwe novalumenhu vaye omilongo nhano va ka tale Elia. Ndele ye eshi ta londo a ye kuye fimbo ye a li omutumba koxulo yomhunda, ye ta ti kuElia: “Omulumenhu waKalunga, ohamba tai ti: ‘Ila, dja ko!’ ” 10Opo nee Elia ta nyamukula ndele ta ti komukulunhu womilongo nhano: “Ame ngeenge omulumenhu waKalunga, omundilo nau dje keulu, nau ku lungwinife po pamwe navoye omilongo nhano!” Nomundilo wa kuluka wa dja keulu ndele tau mu lungwinifa pamwe novaye omilongo nhano. 11Ndele ye okwa tuma ko kuye vali omukulunhu umwe womilongo nhano pamwe novaye omilongo nhano. Ndele ou a hovela okupopya ndele te mu lombwele: “Omulumenhu waKalunga, ohamba tai ti ngaha: ‘Ila, dja ko diva!’ ” 12Opo nee Elia ta nyamukula ndele ta ti kuvo: “Ame ngeenge omulumenhu waKalunga, omundilo nau kuluke poshi nau dje keulu, ndele nau ku lungwinifa po pamwe navoye omilongo nhano.” Nomundilo waKalunga wa kuluka poshi, wa dja keulu, ndele tau mu lungwinifa po pamwe navaye omilongo nhano. 13Nokwa tuma ko kuye vali omukulunhu omutitatu womilongo nhano pamwe navaye omilongo nhano. Nomukulunhu omutitatu womilongo nhano okwa londa nokwe uya ndele ta tu eengolo daye koshipala shaElia, ndele ta ilikana te mu lombwele: “Omulumenhu oove waKalunga, okukalamwenyo kwovapiya voye ava omilongo nhano naku kale ku nondilo momesho oye. 14Tala, omundilo wa kuluka poshi, wa dja keulu, ndele wa lungwinifa ovakulunhu venya vavali votete vomilongo nhano pamwe navo omilongo nhano. Ndelenee okukalamwenyo kwange naku kale ku nondilo momesho oye!” 15Opo nee omweengeli wOmwene ta ti kuElia: “Inda pamwe naye. Ino mu tila.” Nokwa fikama, ndele ta i pamwe naye kohamba, 16ndele te i lombwele: “Omwene ta ti ngaha: ‘Ove eshi wa tuma ovatumwa kuBaal-Sebub oshikalunga shaEkron u mu pule, owe shi ninga ngeno shaashi kape na Kalunga mbela muIsrael u pule ondjovo yaye? Onghee hano ito ka penduka vali mombete muyo wa londa ko, osheshi ove oto ka fya shili.’ ” 17Nokwa fya pandjovo yOmwene, Elia e i popya. Ndele Jehoram okwa ninga ohamba ponhele yaye momudo omutivali waJoram yaJosafat, ohamba yaJuda, osheshi winya okwa li ehe nomona omumati.
18Noinima imwe tai hepaulula Ahasia, ye eshi a ninga, inai shangelwa mbela membo lefimbo leehamba daIsrael?
Currently Selected:
2 EEHAMBA 1: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.