Matayo 6
6
Makangɨrɨtsya bʉshana n'iwathikya abatsene
1«Muyitheye, mʉthagenda omʉkola bɨbʉya embere s'abandʉ bʉshana muyikanganie kʉbo. Kʉshangwa mwamakola muthyo nɨmʉthɨndahembwe na Thatha wenyu yo ʉlɨ elʉbʉla. 2Wamawathikya mʉtsene nɨʉthabanda kʉ ngoma ng'abayimbya ko banakola mo sosinakoki na mo mɨhengere, bʉshana abandʉ basingyebo. Kwenene enyɨbabwɨra, abo bamalire ɨbona olʉhembo lwabo. 3H'ɨwe, ʉlɨ ouwathikya mʉtsene, okʉboko kwawe kw'amalembe nɨkʉthamɨnya eby'okʉboko kwawe kw'amalyo okʉkola. 4Aho, uwathikye mo bubisho-bisho, na Sho yo ʉnalola ko byo ʉnakola mo bubisho-bisho andakʉhemba.»
Makangɨrɨtsya bʉshana n'emɨshabe
(Luk 11:2-4)
5Mo ndambi omʉshaba, mʉthagenda omubya ng'abayimbya bo atsiire ɨshaba nibimene mo sosinakoki na mo mashanganzɨra bʉshana balolweko n'abandʉ. Enyɨbabwɨra ekwenene, bamalire ɨbona olʉhembo lwabo. 6H'ɨwe washondya ɨshaba, nɨwɨngɨra mo kɨshenge kyawe mw'emwishi, kɨnga oluyi lwawe, ʉshabe Sho yo ʉlɨ ahabishamire. Aho, na Sho yo ʉlola kw'ebyo ʉkola mo bubisho-bisho akʉhemba.
7«Mʉlɨ omʉshaba mʉthagenda omʉshʉbɨrɨra bɨnwa bɨgʉmerera nga bandʉ bathɨkɨrɨtsye, abo banaganɨtsya bathɨ Gongo and'onvwabo bʉshana n'obʉngɨ bw'ebɨnwa byabo. 8Muthabyaga ngabo, kʉshangwa Thatha wenyu etsi ebyoshi ebyo mulayireko embere mʉmʉshabe. 9Muthya ko mwandagenda omʉshaba:
“Thatha wethʉ ʉlɨ mo lʉbʉla,
erɨtsɨna lyawe lisingibwe,
10Obuthegeki bwawe buhike,
erishondya lyawe lɨkoleke mo kɨhʉgo ng'omo lʉbʉla.
11Ʉthʉhe munobwire akalyo kethʉ k'ebɨro byoshi.
12Ʉthʉganyɨre ebɨtsɨbʉ byethʉ,
nga ko nethwe othʉnaganyɨra abo banathʉhabɨra.
13Uthathumikaga ɨremwa mw'ɨlengwako,
he ʉthʉshabʉle n'omubihya Sitani.
[Kʉshangwa obwamɨ nɨ bʉwawe, n'akagala, n'olʉkengerwa, kera na kera. Bibye bithyo.]”
14«Mwamaganyɨra abandʉ bw'ebɨbɨ byabo, na Thatha wenyu w'elʉbʉla kuthyo andabaganyɨra ebɨbɨ byenyu. 15Hewetuwe muthaganyire abandɨ bw'ebɨbɨ byabo, na Thatha wenyu naye athɨndabaganyɨre ebɨbɨ byenyu.»
Makangɨrɨtsya bʉshana n'iyima kalyo
16«Mo ndambi omuyima akalyo, mʉthabyaga ng'abayimbya bo banayɨyɨramo bandʉ babuliye, abanahingya amʉsʉ wabo, bʉshana bamɨnywe ko abayima akalyo. Kwenene enyɨbabwɨra, abo bamalire ɨbona olʉhembo lwabo. 17H'ɨwe ʉlɨ ouyima akalyo, ʉnabe mo bʉsʉ, haka marasi ko muthwe awe, 18bʉshana abandʉ bathamɨnyaga ko ouyima akalyo. He Sho mʉsha yo ʉlɨ ahabishamire, yo ʉlola kw'ebyo oʉkola mo bubisho-bisho andakʉhemba.»
Obushoki mo lʉbʉla
(Luk 12:33-34)
19«Mʉthagenda omʉbɨka obushoki by'enyu bo hano ishi, aho esonʉndʉ n'amakenge ebinabihya, aho abɨtsɨ abanathobola n'iba. 20Mʉgende omʉbɨka obushoki bwenyu mo lʉbʉla, aho esonʉndʉ n'amakenge bithangabihya, n'aho abɨtsɨ bathangathobola n'iba. 21Kʉshangwa ahalɨ obushoki bwawe nɨ aho h'omʉthɨma awe anabya.
Amesho wo kyakakala ky'omʉbɨrɨ
(Luk 11:34-36)
22«Erisho lyo tara y'omʉbɨrɨ. Erisho lyawe lyamabya likwirire omʉbɨrɨ woshi nɨalɨ mo kyakakala. 23Hewethuwe erisho lyawe lyamabya lithakwirire omʉbɨrɨ awe woshi nɨalɨ mo mwitsimya. Aho, ekyakakala kɨrɨ mw'ɨwe kyamahɨndʉka mwitsimya, omwitsimya oyo angabya mʉnene kʉtsɨbʉ!»
Ɨkolera Gongo kʉtse faranga
(Luk 16:13)
24«Hathalɨ yo wangakolera bo nyinya-kowabo babɨrɨ. Kʉshangwa andabaga omʉgʉma n'ɨtsɨɨra ogʉndɨ. Kʉtse andayihira kʉ mʉgʉma, n'ɨsʉnzʉgʉra ogʉndɨ. Muthangakotsya ɨkolera Gongo n'ɨkolera sofaranga.»
Iyinihira Gongo
(Luk 12:22-31)
25Bʉshana n'ebyo enyɨbabwɨra nyɨthɨ: Mʉthaganga-gangyaga emɨthɨma enyu bʉshana n'obʉyɨngo bwenyu nga mwalya ki, kʉtse nga mwashoma ki na bʉshana n'emɨbɨrɨ enyu nga mwambala ki. Ewono obʉyɨngo buthalengitsye akalyo, n'omʉbɨrɨ athalengitsye esongɨmba? 26Mʉlole ko bɨronge, bɨthahɨnga na bɨthahʉlʉla, kandɨ bɨthabɨka mʉ mbʉpʉ, na Thatha wenyu w'elʉbʉla analɨsabyo. Ewono imwe muthalengitsye ebɨronge byo kɨtsɨro? 27Ɨndɨ mo kathi kenyu mw'iganga-gangya omʉthɨma ʉwe angayongerera kathambi kake ko bʉyɨngo bʉwe?
28Na bʉshana na ki omuganga-gangya emɨthɨma enyu bʉshana n'esongɨmba? Mʉyɨthegeretsye omʉshanga w'omo mashwa kw'analasha, athakola mʉlɨmo kandɨ athayɨlandɨra ngɨmba. 29Namo bɨne bityo, enyɨbabwɨra nyɨthɨ n'omwamɨ Solomona#6:29 Soma 1Bamɨ 10. mo lʉkengerwa lʉwe loshi, mwathathanga ambala kʉbʉya nga mʉgʉma wa kʉwo. 30Aho Gongo amabya nianambikya athya ebɨthɨ by'omo mashwa, ebyo binabyaho munobwire na mungya nɨbyagʉshwa mo mʉtsanwa, athɨndagende abambikya kalengyo kw'aho, imwe bandʉ b'olwɨkɨrɨtsyo lʉke? 31Bʉshana n'ekyo, mʉthagenda omuganga-gangya emɨthɨma enyu nga mwalya ki, mwashoma ki, na nga mwambala ki. 32Kʉshangwa nɨ abandʉ b'omo kɨhʉgo, bo bathetsi Gongo n'ɨbo bo banashondya ebɨndʉ byoshi ebyo bʉthalʉha. H'imwe ye Sho etsi ko mulayire ko bɨndʉ ebyo. 33Mʉthange mwashondya embere w'ebyoshi oBwamɨ bwa Gongo n'obʉthʉnganane bʉwe, naye andabongerera ebɨndɨ bɨndʉ byoshi. 34Mʉthaganga-gangyaga emɨthɨma enyu bʉshana n'ebya mungya, kʉshangwa mungya yandayɨshondetsya yo yene. Obʉlɨ kɨro kiwithe mɨnʉbo yakyo.
Currently Selected:
Matayo 6: ver
Highlight
Share
Copy
Want to have your highlights saved across all your devices? Sign up or sign in
2025 Group of Associations for the Promotion of Languages, Cultures for Integral Development