Luki 15
15
Ə̈bə̈ koshe sɔtə̂ ndalimi nə̂ ye ə̂në tshə yû kɔ
(Matiɔ 18.12-14)
1Tə̂ alɔ nə səkɔ, aaworɔ ngendja lapɔ də alayïnyaka nɔ̂ nâ trö də Jezu ndə kə dji əpʉ nə̂ ye. 2Afariza də aawoyisə̂ âgbɔ̂ əpʉ nə̂ Mayïzə sə̂ kə pa tə̂ ye lə wâyâ ə pa: «Koshe səye wəra alayïnyaka tə ə̂rɔ̂nə â əndje də aəndje sə kə zɨ rəgo!»
3Bale Jezu pâ əpʉ kəwû səye kə əndje ə pa: 4«Əde lə takpa tə̂ e də̂ tshə â sə də andalimi ngbangbo bale (100) â ə̈bə̈ nə bale lə takpa tə̂ əndje kə yu, â tshə sə sə kə katə̂ ə̂dû əndje zazü vəna də grʉvəta amanə vəna (99) lə ngbûndû tʉ ndə kə na na ye ə pra ətshə nə ə̂në tshə yû kɔ ʉrrr ndjɔ ə sɔtə̂ ye gâ ye kane ne a? 5Alɔ ə̂në tshə â sɔ̂tə̂ ye gâ ye, tshə sə kə za ətshə gâ pâ əgʉ ye də amɔ tshelə ye 6ə do tə̂ ye gu nə gâ lə manda ə sə kə e agbɔbəngâ nə də azü tshe ngotə̂ ye ndə kə pa kə əndje ə pa: “E nä gâ əmə, a dü ə̂rû mbrə ə̂në mə sɔ̂tə̂ ndalimi nə̂ əmə ə̂në tshə yû kɔ gâ ye!” 7Äwä bale ndje, mə pa kə e: ə̂rû sə kə sə mâ lafɔ mbrə əyïnyaka kpiabale ə̂në tshə tshi äwä angbrɔ kə mbrə tə̂ ye tʉ, ə rô ə̂rû mbrə aə̂rɔ̂ azü zazü vəna də grʉvəta amanə vəna (99) ə̂në ə sə sə ndə kə pa əndje tshi äwä angbrɔ kə mbrə tə̂ əndje nə tʉ ne kɔ.»
Ə̈bə̈ yashe sɔtə̂ ngbengewle ngendja nə̂ ye ə̂në ə yû kɔ
8«Wala yashe əde də̂ tshə â sə də ngbengewle ngendja#15.8 Tə̂ alɔ Jezu, ngbengewle ngendja sə̂ mata ngendja kosəra nə̂ ə̈bə̈ əzü lə əlo bale. morofo â ə̈bə̈ nə bale kə yu, â tshə sə sə kə za əwo gâ lə lamba ə ngbo tshelə anda nə ə pra tshelə anda nə timənə ʉrrr ə sɔtə̂ nə gâ ye kane ne? 9Alɔ ə̂në tshə sɔ̂tə̂ nə gâ ye, tshə sə kə e agbɔbəngâ nə də azü tshe ngotə̂ ye ə pa kə əndje ə pa: “E nä gâ əmə, a dü ə̂rû mbrə ə̂në mə sɔ̂tə̂ ngbengewle ngendja nə̂ əmə nə ə̂në ə yû kɔ gâ ye!” 10Äwä bale ndje, mə pa kə e: ə̂rû sə kə sə lə takpa tə̂ atrawaya nə̂ Ndjapä mbrə əyïnyaka kpiabale ə̂në tshə tshi äwä angbrɔ kə mbrə tə̂ ye tʉ kɔ.»
Ə̈bə̈ abä sɔtə̂ əgblə nə̂ ye ə̂në tshə yû kɔ
11Jezu kwâtə̂ye ə pâ: «Ə̈bə̈ koshe sə̂ də aneshe koshe bishi. 12Rədɔngɔ nə pâ kə abä nə ə pa: “Abä, krü tshelə aərə nə̂ zə ə kö ə̂sə̂ ənə̂ əmə kə əmə.” Bale, abä nə krû tshelə aərə nə̂ ye nə lə takpa tə̂ əndje. 13Tə̂ ə̈ndö əlo mandânə, rədɔngɔ nə kâ aərə nə̂ ye nɔ̂ ə kô ngendja nə ə rô də nə ngrʉ̂ lə ə̈bə̈ əgɔ. Mâ je, tshə ndɨ̂ ngendja nə̂ ye nə nɔ̂ tə̂ äwä aəmbrʉ aərə. 14Alɔ ə̂në tshə ndɨ̂ ngendja nə̂ ye nə nɔ̂ gâ ye kɔ, ə̈bə̈ əgerə əgo tê lə əgɔ nə səkɔ, ə̈bə̈ äwä kə sɔtə̂ rəgo tə̂ ye gûta gû ne. 15Tshə nâ ə zâ kosəra mâ ndə ə̈bə̈ əzü tshelagɔ nə â tshə wlâ ətshə mâ lə kəndɨ nə̂ ye ndə kə pa tshə bata akɔsɔ. 16Tshə sə̂ də əgo kə zɨ arəgo ə̂në akɔsɔ nə sə̂ kə zɨ nə kɔ, əzü kə ko rəgo nə kə ətshə gûta gû ne. 17Bale, tshə lî tshelə ye â pâ: “Alayïkosəra nə̂ abä nɔ̂ sə də rəgo ə rô pâ nə â əmə, mə sə kə tshu də əgo mâtəye! 18Mə sə kə afɔ ə gu na ye mâ ndə abä əmə ə pa kə ətshə ə pa: Abä, mə mâ nyaka kə Ndjapä ə mâ kə ə̈bə̈ ndje. 19Mə lï lï ndə kə pa bə e əmə mandânə səye tə ɨrɨ zə ne, wü əmə mata ə̈bə̈ əyïkosəra nə̂ zə.” 20Bale, tshə âfɔ ə gû na ye mâ ndə abä nə je.
«Alɔ ə̂në tshə sə̂ pə ngrʉ̂, tə̂ tshelə manda nə, abä nə wû ətshə, əyo ye mbrə̂ ətshə, tshə kpê pra tshitshi ye ə têgbɔ ətshə lə əkro ye ə ɔ̂ ama ye. 21Əgblə nə pâ kə ətshə ə pa: “Abä, mə mâ nyaka kə Ndjapä ə mâ kə əbə ndje, mə lï lï ndə kə pa bə kwatə̂zə ə e əmə tə ɨrɨ zə ne.” 22Bale, abä nə pâ kə alayïkosəra nə̂ ye ə pa: “E nä katshä də ləba ə̂në ə fʉ wââ kɔ ə yï gâ tə̂ ye. E yï bingi gâ tə̂ yana kəna ye ə yï tama gâ tə̂ ə̈nü ye. 23E zä pagra əjerɔ ə wö ətshə, a zɨ̈ rəgo ə dü ə̂rû. 24Mbrə ə̂në ɨrɨ əmə səye, tshə tshû gâ ye â shê kɔ. Tshə yû gâ ye â mə sɔ̂tə̂ ye kɔ!” Bale, əndje vɔ̂tə̂ kə du ə̂rû.
25«Kandää, yiya əgblə koshe nə sə̂ pə mâ lə kəndɨ. Alɔ ə̂në tshə sə̂ kə gu nə ə ndô trö də anda nə kɔ, tshə sə̂ kə dji azü ə̂në əndje sə̂ kə vi ətshi ə sə̂ kə vi tə̂ əndje kɔ. 26Tshə ê ə̈bə̈ əyïkosəra bale ə yû ətshə ə pa: “Ərə yekɔ kə mbrə̂?” 27Əyïkosəra nə pâ kə ətshə ə pa: “Aye zə kə do tə̂ ye â gû â abä zə wô pagra əjerɔ mbrə ətshə, mbrə ə̂në tshə sɔ̂tə̂ ye də ə̂rɔ̂ akwa ye.” 28Yiya əgblə koshe nə mâ əkɔ ə wə̂ra tə̂ ye ndə kə li gâ lə anda nə. Abä nə wûtu ə pâ kə ətshə ə pa tshə li gâ lə anda. 29Bale, tshə kîrə əpʉ kə abä nə ə pa: “Wü-a! Lə ə̂ngû ngbatshe də̂ mə sə kə wu əyo ə sə kə ma kosəra kə əbə. Alɔ bale, mə wə̂ra tə̂ əmə wə̂ra tə̂ əpʉ ama zə bale ne. Ə̈bə̈ alɔ bale, bə zâ ə̈bə̈ aya yabru zâ kə əmə ndə kə pa mə wo ətshə ä də agbɔbəngâ əmə du ə̂rû ne. 30Bale, alɔ ə̂në ɨrɨ zə səye yî kumu ye, ətshə ə̂në tshə ndɨ̂ aərə nə̂ zə nɔ̂ tə̂ äwä aəmbrʉ ayashe kɔ, bə wô pagra əjerɔ mbrə ətshə!” 31Abä nə pâ kə ətshə ə pa: “Əgblə nə̂ əmə, a də aəmə kə sə koye alɔnɔ̂, aərə nə̂ əmə nɔ̂ sə tə ənə̂ zə. 32Bale, ə lï ndə kə pa a mbrə sandaga ə du ə̂rû, mbrə ə̂në aye zə səye, tshə tshû gâ ye â she kɔ, tshə yû gâ ye â a sɔ̂tə̂ ye kɔ.”»
Currently Selected:
Luki 15: liy
Highlight
Share
Copy
Want to have your highlights saved across all your devices? Sign up or sign in
2025 Association Centrafricaine pour la Traduction de la Bible et l'Alphabétisation