ᔨᐸᓁᐊᐅᑉ ᐊᒡᓚᖏᑦ 1
1
1 #
ᐊᑕᓃᑦ ᐂᑉᐸᖏᑦ 22:1—23:30; ᑯᕉᓂᑲ ᐂᑉᐸᖏᑦ 34:1—35:27. ᐊᑕᓂᐅᑉ ᐅᖃᐅᓯᖓ ᔨᐸᓁᐊᒧᑦ ᑎᑭᑉᐳᑦ ᑯᓯᐅᑉ ᐃᕐᖕᓂᖓᓄᑦ, ᑯᔅ ᐊᑖᑕᖃᖅᐳᖅ ᒋᑕᓔᐊᒥᒃ, ᒋᑎᓔᐊᓗ ᐊᑖᑕᖃᖅᐳᖅ ᐊᒪᕅᔭᒥᒃ, ᐊᒪᕅᐊᓗ ᐊᑖᑕᖃᖅᐳᖅ ᕼᐃᓯᑬᐊᒥᒃ, ᑍᑦᓱᒪᓂ ᔫᓮᐊ ᐋᒪᓐᓇᐅᑉ ᐃᕐᖕᓂᖓ ᐊᖓᔪᖅᑳᕐᔪᐊᖑᑎᓪᓗᒍ ᔫᑕᒥ.
ᐅᓪᓗᖅ ᐊᑕᓂᐅᑉ ᐃᖅᑲᖅᑐᐃᓂᖓ
2ᐊᑕᓂᖅ ᐅᖃᖅᐳᖅ, “ᐃᓘᓐᓇᑦᓯᐊᑎᒃ ᓄᖑᓪᓗᒋᑦ ᓄᓇᒦᑦᑐᑦ ᐊᓯᕈᕈᒫᖅᐸᒃᑲ. 3ᐃᓄᓕᒫᑦ ᐆᒪᔪᓕᒫᓪᓗ ᓄᖑᑦᓱᒫᖅᐸᒃᑲ; ᑎᖕᒥᐊᑉ ᕿᓚᐅᑉ ᐊᑖᓃᑦᑐᑦ, ᐃᖃᓗᐃᓪᓗ ᑕᕆᐅᕐᖕᒦᑦᑐᑦ ᓄᖑᑦᓱᒫᕆᕙᒃᑲ. ᐊᔪᖅᑐᓕᔪᖅ ᓵᓚᒋᔪᒫᖅᐸᒃᑲ; ᐃᓄᐃᑦ ᓄᓇᕐᔪᐊᕐᖕᒦᑦᑐᓕᒫᑦ ᓄᖑᑦᓱᒫᖅᐸᒃᑲ.” ᐊᑕᓂᖅ ᐅᖃᖅᐳᖅ.
4“ᐊᒡᒐᓐᓄ ᓱᒋᐊᕈᒫᖅᐸᒃᑲ ᔫᑕᒥᐅᑦ, ᔨᕉᓴᓕᒥᐅᓕᒫᓪᓗ; ᐰᓕᐅᓪᓗ ᐊᒥᐊᒃᑯᓕᒫᖏᑦ ᓄᖑᑦᓱᒫᖅᐸᒃᑲ ᑕᒫᓐᖓᑦ, ᒎᑎᓐᖑᐊᓖᓪᓗ ᑐᓂᕐᕈᓯᖅᑎᑦᓯᖏᑦ ᐊᑎᖏᑦ ᓄᖑᑎᑦᓱᒫᖅᐸᒃᑲ. 5ᑐᒃᓯᐊᖅᐸᒃᑐᓪᓗ ᕿᓚᐅᑉ ᐊᑖᓃᑦᑐᓄᑦ ᐃᒡᓗᒥᑦᑕ ᖄᖏᓐᓂ; ᐹᒻᒪᒃᑎᖅᐸᒃᑐᓪᓗ ᐅᖃᕕᒃᓗᑎᒃ ᐊᑕᓂᕐᖕᒧᑦ ᒧᓛᒃᒥᒃ ᒎᑎᓐᖑᐊᒥᒃ ᐱᖃᓯᐅᑦᔨᓪᓗᑎᒃ. 6ᐊᑕᓂᖕᒥᒡᓗ ᕿᒤᓯᒪᔪᑦ ᒪᓕᒃᑐᕕᓂᐅᒐᓗᐊᖅᓗᑎᒃ, ᐊᑕᓂᕐᖕᒥᒡᓗ ᕿᓂᖏᑦᑐᑦ ᖃᐅᔨᓇᓱᐊᖏᑦᑐᓪᓗ.”
7ᓂᐰᓕᕆᑦᓯ ᐊᑕᓂᐅᑉ ᒎᑎᐅᑉ ᓵᖓᓂ! ᐊᑕᓂᐅᑉ ᐅᓪᓗᖓ ᑎᑭᓕᕐᖕᒪᑦ; ᐊᑕᓂᖅ ᑐᓂᕐᕈᑎᒃᓴᒥᓂᒃ ᐊᑐᐃᓐᓇᕈᐃᓯᒪᓕᕐᖕᒪᑦ ᕾᖁᓯᒪᔭᓂᓗ ᐃᑦᔪᕐᖕᓁᑎᑉᐰᑦ. 8“ᐅᓪᓗᕐᓗ ᓇᓪᓕᐅᑎᒃᐸᑦ ᐊᑕᓂᐅᑉ ᑐᓂᕐᕈᓯᕐᕕᐊ, ᐊᖓᔪᖅᑳᑦ ᐊᖓᔪᖅᑳᕐᔪᐊᓪᓗ ᐃᕐᖕᓂᖏᑦ ᓱᒋᐊᕈᒫᖅᐸᒃᑲ, ᐊᑐᖅᑐᓪᓗ ᐃᓅᖃᑎᒃᓴᔭᕆᓐᖏᑕᖏᑕ ᒎᑎᓐᖑᐊᓖᑦ ᐊᓐᓄᕌᖏᓐᓂᒃ. 9ᐅᓪᓗᖅ ᓇᓪᓕᐅᑎᒃᐸᑦ ᐃᑎᖅᑕᕐᕕᒃᑯᑦ ᐊᓪᓗᖅᑐᓕᒫᑦ ᓱᒋᐊᕈᒫᖅᐸᒃᑲ, ᐊᖓᔪᖅᑳᒥᓗ ᐃᒡᓗᖓᓄᐊᖅᑬᔪᑦ ᐱᕋᔭᖕᓂᕐᖕᒥᒃ ᐅᐃᕕᕆᒃᓯᓂᕐᖕᒥᒡᓗ.
10“ᐅᓪᓗᖅ ᓇᓪᓕᐅᑎᒃᐸᑦ,” ᐊᑕᓂᖅ ᐅᖃᖅᐳᖅ, “ᕿᐊᓂᖅ ᑐᓴᖅᓴᐅᔪᒫᖅᐳᖅ ᐃᑎᖅᑕᕐᕕᖕᒥᑦ ᐃᖃᓗᖕᒥᒃ ᐊᑎᓕᖕᒥᑦ, ᐅᒡᒍᐊᕐᖕᓂᕐᖕᒧᓪᓗ ᕿᐊᓂᖅ ᑐᓴᖅᓴᐅᔪᒫᖅᐳᖅ ᐃᒡᓗᒐᓮᑦ ᓄᑖᕕᓂᐅᓂᖓᓂᑦ, ᑲᑕᒐᕐᕙᓗᐃᓪᓗ ᐱᖑᕐᖕᓂᑦ ᓂᐱᖅᑯᑐᔪᐊᓘᔪᒫᖅᐳᑦ. 11ᐅᒡᒍᐊᕐᖕᓂᕐᖕᒧᑦ ᕿᐊᓕᕆᑦᓯ ᒧᐊᕐᑖᒥᐅᖑᔪᓯ, ᑕᐅᖅᓯᔨᓕᒫᑦ ᓄᖑᑕᐅᖕᒪᑕ; ᓯᐅᓪᕙᓂᒡᓗ ᐅᖁᒤᓐᓂᖅᓯᐅᖅᑎᓕᒫᑦ ᓄᖑᑕᐅᖕᒪᑕ.
12“ᑕᒪᓐᓇ ᐊᑐᓕᖅᐸᑦ ᔨᕉᓴᓕᒻ ᕿᓂᕐᕕᒋᔪᒫᖅᐸᕋ ᓇᓂᕈᐊᓄᑦ, ᓱᒋᐊᕈᒫᖅᐸᒃᑲᓗ ᐃᒻᒥᖕᓂᒃ ᓈᒻᒪᒐᓱᒋᔪᑦ ᐱᔪᓐᓇᕋᓱᒋᔪᓪᓗ, ᐆᒻᒪᑎᒥᒍᓪᓗ ᐃᓱᒪᔪᑦ, ‘ᐊᑕᓂᖅ ᐱᐅᔪᓂᒃ ᐱᐅᖏᑦᑐᓂᒡᓘᓐᓃᑦ ᐱᓇᓱᐊᕐᖕᓂᐊᓐᖏᓚᖅ.’ 13ᑍᒤᒻᒪᑦ ᐱᖁᑎᖏᑦ ᐊᖅᓵᕐᖕᓂᒐᐅᔪᒫᖅᐳᑦ, ᐃᒡᓗᖏᓪᓗ ᓯᖁᑦᑎᖅᑕᐅᔪᒫᖅᐳᑦ ᓱᓇᐅᔪᓐᓁᖅᓗᑎᒃ. ᐃᒡᓗᓕᐅᕈᒫᖅᐳᑦ ᐃᓂᒋᓂᐊᓐᖏᑕᒥᖕᓂᒃ; ᕔᓂᒃᓴᓕᐅᕈᒫᖅᐳᑦ ᐃᒥᕐᖕᓂᐊᓐᖏᑕᒥᖕᓂᒃ.”
14ᐊᑕᓂᐅᑉ ᐅᓪᓗᕐᔪᐊᖓ ᖃᒡᓕᓕᖅᐳᖅ, ᖃᓪᓕᕗᖅ ᑎᑭᑦᓴᐅᑎᒋᓕᖅᓗᓂᓗ; ᐊᑕᓂᐅᑉ ᐅᓪᓗᖓᑕ ᓂᐱᖓ ᖃᓯᓕᓇᖅᐳᖅ, ᑕᕝᕙᓂ ᐊᖑᑏᑦ ᐊᔪᖏᑦᑐᐊᓗᐃᑦ ᓂᐱᓕᐊᓘᔪᒫᖅᐳᑦ. 15ᐅᓪᓗᖅ ᓂᓐᖓᐅᓯᕐᖕᒧᑦ ᐅᓪᓗᕆᔭᐅᔪᒫᖅᐳᖅ, ᐅᖁᒤᑦᑑᓗᓂ ᐃᓱᒪᔮᕐᖕᓇᖅᓗᓂᓗ, ᓯᖁᑦᑎᖅᑕᐅᓂᖅᑕᖃᕈᒫᖅᐳᖅ ᓄᖑᕈᑦᔭᐅᓂᖅᑕᖃᖅᓗᓂᓗ, ᑖᖅᑑᔪᒫᖅᐳᖅ ᖁᕕᐊᓇᖏᓪᓗᓂᓗ, ᓄᕗᔭᖃᕈᒫᖅᐳᖅ ᑖᕐᔪᖓᓗᓂᓗ. 16ᐅᓪᓘᔪᒫᖅᐳᖅ ᓂᓪᓕᐊᕕᐅᓗᓂ ᑎᑦᑐᓚᐅᑎᓄᑦ ᐅᓇᑕᖅᑐᓪᓗ ᓂᐱᖏᓐᓄᑦ, ᐅᓇᑕᕐᖕᓂᐅᔪᒫᖅᐳᖅ ᐃᒡᓗᒐᓴᖕᓂᒃ ᐊᕙᓗᕐᔪᐊᓕᖕᓂᒃ ᐳᖅᑐᔪᓂᒡᓗ ᓇᐸᔪᓂᒃ.
17ᐃᓄᐃᑦ ᐃᓱᒪᔮᕐᖕᓇᖅᑐᓄᑦ ᑎᑭᑕᐅᑎᑦᓱᒫᖅᐸᒃᑲ, ᐱᓱᓕᕈᒫᖅᐳᑦ ᑕᐅᑐᖏᑦᑐᑎᑐᑦ, ᐊᔪᖅᑐᓕᓚᐅᕐᖕᒪᑕ ᐊᑕᓂᕐᖕᒧᑦ; ᐊᐅᖏᑦ ᑯᕕᔭᐅᔪᒫᖅᐳᑦ ᐃᒥᖅᑎᑐᑦ, ᑎᒥᖏᓪᓗ ᐊᓇᖅᑎᑐᑦ ᑍᒤᓕᕈᒫᖅᐳᑦ.
18ᓯᐅᓪᕕᕆᖁᑎᖏᑕ ᒎᓗᖁᑎᖏᑕᓘᓐᓃᑦ ᐱᐅᓕᔭᐅᔪᓐᓇᕈᒫᓐᖏᓔᑦ ᐊᑕᓂᐅᑉ ᓂᓐᖓᐅᓯᖓᑕ ᐅᓪᓗᖓᓂ. ᓄᓇᕐᔪᐊᓕᒫᖅ ᓄᖑᑕᐅᔪᒫᖅᐳᖅ ᓯᒡᒐᑦᔨᓂᕐᖕᒥᓄᑦ ᓂᓐᖓᐅᒪᓂᖓᑕ ᐃᑯᐊᓚᓂᖓᓄᑦ; ᑲᑉᐱᐊᓇᒃᑲᓐᓂᕐᕕᖃᖏᑦᑐᒧᑦ ᑕᕝᕔᓐᓇᖅ ᓄᖑᑦᓱᒫᖅᐰᑦ ᓄᓇᕐᔪᐊᕐᖕᒥᐅᓕᒫᑦ.
Currently Selected:
ᔨᐸᓁᐊᐅᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.