ᐅᐸᑍᐊᑉ ᐊᒡᓚᖏᑦ 1
1
1ᐅᑯᐊ ᑕᕝᕙ ᐅᐸᑍᐊᐅᑉ ᑕᑯᑎᑕᐅᑦᔪᑎᖏᑦ. ᐃᒫᒃ ᐊᑕᓂᖅ ᒎᑎ ᐅᖃᖅᐳᖅ ᐄᑐᒥ ᐱᓪᓗᒍ.
ᐊᑕᓂᐅᑉ ᓱᒋᐊᕈᒫᖅᐹ ᐄᑐᒥ
ᑐᓴᖅᓯᒪᕗᒍᑦ ᐅᖃᐅᓯᕐᖕᒥᒃ ᐊᑕᓂᕐᖕᒥᑦ ᐱᔪᒥᒃ,
ᐅᖃᕆᐊᖅᑐᖅᑐᒃᓴᖅ ᑎᓕᔭᐅᕗᖅ ᐃᓅᖃᑎᒌᒡᔪᐊᑦ ᐊᑯᕐᖓᓐᓄᑦ ᐅᖃᐅᑦᔭᐅᓪᓗᓂᓗ:
“ᒪᑭᓕᕆᑦᓯ! ᐅᓇᑕᕆᐊᖅᓚᕗᑦ ᐄᑐᒥ!”
2“ᑕᑯᒋᑦ ᒥᑭᓐᓂᖅᐸᐅᓕᖅᑎᑦᓱᒫᖅᐸᒋᑦ ᐃᓅᖃᑎᒌᒡᔪᐊᑦ ᐊᑯᕐᖓᓐᓂ;
ᑕᒤᓐᓄᑦ ᓇᕐᕈᒋᔭᐅᕕᒃᔪᐊᓕᕈᒫᖅᐳᑎᑦ.
3ᐆᒻᒪᑎᕕᑦ ᐱᐅᔪᕆᓂᖓᑕ ᐅᐃᕕᕆᕚᑎᑦ,
ᐃᕝᕕᑦ ᐃᓂᖃᖅᑐᑎᑦ ᕾᖅᑑᑉ ᖁᖕᓇᔪᖏᓐᓂ;
ᐳᖅᑐᔪᒥ ᐃᓂᖃᖅᑐᑎᑦ;
ᐆᒻᒪᑎᖕᓂ ᐅᖃᖅᑐᑎᑦ: ‘ᑭᐊ ᓄᓇᒧᑦ ᑲᑕᒃᑎᑦᓱᓐᓇᖅᐹᖔ?’
4ᓇᒃᑐᕋᓕᒃᑎᑐᑦ ᖁᒻᒧᐊᒃᑲᓗᐊᕈᕕᑦ,
ᐃᕙᕕᖃᕋᓗᐊᕈᕕᓪᓗ ᐅᓪᓗᕆᑦᔭᑦ ᐊᑯᕐᖓᓐᓂ,
ᑕᕝᕙᓐᖓᑦ ᑲᑕᒃᑎᑦᓱᒫᖅᐸᒋᑦ,” ᐊᑕᓂᖅ ᐅᖃᖅᐳᖅ.
5“ᑎᒡᓕᒃᑏᑦ ᑎᑭᓐᓂᐊᖅᐹᑎᑦ,
ᑎᒡᓕᒐᕐᕕᒋᓗᑎᓪᓗ ᐅᓐᓄᐊᒥ,
ᑕᕝᕙ ᓇᑲᑕᐅᔪᒫᖅᐳᑎᑦ!
ᑎᒡᓕᒃᑏᑦ ᐱᔪᒪᔭᓕᒫᒥᖕᓂᒃ ᐱᑐᐃᓐᓇᕐᖕᓂᐊᓐᖏᓚᑦ?
ᕔᓂᓕᒃᓴᓂᒃ ᑲᑎᖅᓱᐃᔪᑦ ᑎᑭᓐᓇᔭᖅᐹᑎᑦ,
ᕔᓂᓕᒃᓴᑦ ᐱᐅᖏᓐᓂᖅᓗᑯᖏᓐᓂᒃ ᐱᒃᓴᓂᒃ ᕿᒤᒐᔭᓐᖏᓛᑦ?
6ᐄᓴᐅᑉ ᐱᖁᑎᖏᑦ ᑎᒡᓕᒐᖅᑕᐅᕗᑦ,
ᐱᕕᐊᕐᖕᓇᖅᑐᖁᑎᖏᑦ ᐃᔨᖅᑐᐊᖏᑦ ᓇᓂᔭᐅᕗᑦ.
7ᐊᖏᖃᑎᒋᓚᐅᖅᑕᓕᒫᕕᑦ ᓯᓔᕐᕆᕚᑎᑦ ᓄᓇᐅᑉ ᑭᒡᓕᖓᓄᑦ ᐊᐅᓪᓚᖅᑎᓪᓗᑎᑦ;
ᐃᓕᖕᓄᑦ ᐱᑦᓯᐊᓚᐅᖅᑐᑦ ᓵᓚᒋᕚᑎᑦ;
ᓂᕆᖃᑎᒋᔭᑎᑦ ᒥᑭᒋᑦᔨᖅᐳᑦ ᐃᓕᖕᓄᑦ;
ᓇᓪᓕᐊᓐᓂᒡᓘᓐᓃᑦ ᒪᓗᒍᓱᒃᑐᖃᓐᖏᓚᖅ.”
8ᐊᑕᓂᖅ ᐅᖃᖅᐳᖅ, “ᐅᓪᓗᒥ ᑖᑦᓱᒪᓂ ᐃᓕᓯᒪᔪᑦ ᐲᔭᕐᖕᓂᐊᓐᖏᓚᒃᑳ? ᐄᑐᒥᒥᑦ,
ᓯᓚᑐᔪᓪᓗ ᐄᓴᐅᑉ ᖃᖅᑲᖏᓐᓃᑦ?
9ᐱᒃᓴᖅᑐᔪᖁᑎᑎᓪᓗ ᓯᐊᒻᒪᖅᑎᑕᐅᔪᒫᖅᐳᑦ,
ᐆ ᑏᒪᓐ, ᑲᑉᐱᐊᓱᒃᑐᐊᓘᔪᒫᖅᐳᑦ,
ᑕᒪᕐᖕᒥᒃ ᑐᖁᑕᐅᔪᒫᖅᐳᑦ ᐄᓴᐅᑉ ᖃᖅᑲᖓᓂ, ᐃᓄᐊᖅᑕᐅᓗᑎᒃ.”
ᐄᑐᒥᐅᑉ ᓱᒋᐊᖅᑕᐅᑦᔪᑎᖏᑦ
10“ᐊᑲᐅᖏᑦᑐᓕᓂᕆᓚᐅᖅᑕᑎᑦ ᓄᑲᕐᖕᓄᑦ ᔧᑯᒧᑦ ᐱᑦᔪᑎᒋᓪᓗᒋᑦ,
ᑲᓐᖑᓱᖕᓂᕐᖕᒧᑦ ᐅᓕᒃᑕᐅᔪᒫᖅᐳᑎᑦ,
ᓄᖑᑕᐅᓗᑎᓪᓗ ᐃᓱᖃᖏᑦᑐᒧᑦ.
11ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᕿᒫᑦᑍᓕᓗᑎᑦ ᓇᖏᕈᒫᖅᐳᑎᑦ,
ᓄᓇᓕᑐᖃᐅᖏᑦᑐᑦ ᐊᒃᓗᐃᑦᔪᑎᑦᓯᓐᓂᒃ ᐊᐅᓪᓚᕈᑦᔨᔪᒫᕐᖕᒪᑕ,
ᓄᓇᓕᑐᖃᐅᖏᑦᑐᓪᓗ ᐃᑎᕈᑎᒃ ᐃᑎᖅᑕᕐᕕᖏᑎᒍᑦ,
ᔨᕉᓴᓕᒻᓗ ᐃᒻᒥᕋᐅᑎᒋᔪᒫᖅᐹᑦ ᓇᓚᐅᑦᑖᕈᑎᒃᑯᑦ,
ᐃᕝᕕᓪᓗ ᑍᒃᑯᑎᑐᓇᖅ ᑍᒤᖃᑕᐅᔪᒫᖅᐳᑎᑦ.
12ᓄᑬᓪᓗ ᖁᕕᐊᓲᑎᒋᔭᒃᓴᕆᓚᐅᓐᖏᓚᑦ ᐱᓂᖅᓗᒃᑕᐅᕕᐊᓂ;
ᔫᑕᐅᑉ ᑭᖑᕚᖏᑦ ᖁᕕᐊᓲᑎᒋᓂᐊᕐᖕᓇᒋᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ;
ᐱᐅᔪᕆᔪᒃᓴᐅᓚᐅᓐᖏᓚᑎᑦ ᐅᓪᓗᖏᑕ ᑲᑉᐱᐊᓱᒃᑎᑕᐅᕕᖏᓐᓂ.
13ᐃᓄᖁᑎᒪ ᐃᑎᖅᑕᕐᕕᖓᓄᑦ ᐃᑎᖅᑐᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ,
ᐃᓛᒃ ᑲᑉᐱᐊᓱᖕᓂᖏᓐᓂᒃ ᒥᑕᐅᑎᒃᓴᖃᑕᐅᔪᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ,
ᐱᖁᑎᖏᓐᓂᒡᓗ ᐱᓇᓱᒃᑐᒃᓴᐅᓚᐅᓐᖏᓚᑎᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ.
14 #
ᐂᓮᐊᓯ 34:5-17; 63:1-6; ᔨᕆᒤᐊ 49:7-22; ᐃᓯᑭᐊᓕ 25:12-14; 35:1-15; ᐂᒨᓯ 1:11,12; ᒪᓚᑬ 1:2-5. ᓇᖏᕐᖕᓂᐊᕐᖕᓇᒃ ᐊᖅᑯᓯᓂᕐᖕᓂ ᑭᐳᓐᖓᔫᖕᓂ ᕿᒫᔪᑦ ᑭᐱᔪᒪᓗᒋᑦ;
ᑎᒍᔭᐅᑎᓐᓂᐊᕐᖕᓇᒋᓪᓗ ᑖᒃᑯᐊ ᐊᒥᐊᒃᑯᒋᔭᖏᑦ ᑲᑉᐱᐊᓱᖕᓂᖏᑕ ᐅᓪᓗᖏᓐᓂ.”
ᒎᑎᐅᑉ ᐃᓅᖃᑎᒌᒡᔪᐊᓕᒫᑦ ᐃᖅᑲᖅᑐᕈᒫᖅᐰᑦ
15“ᐊᑕᓂᐅᑉ ᐅᓪᓗᖓ ᖃᒡᓕᖕᒪᑦ ᐃᓅᖃᑎᒌᒡᔪᐊᓕᒫᓄᑦ;
ᐃᕝᕕᑦ ᐱᓂᐊᓚᐅᕋᕕᑦ, ᑍᒫᒃ ᐱᓂᐊᕐᕕᐅᔪᒫᖅᐳᑎᑦ;
ᐱᓂᐊᕐᖕᓂᑎᑦ ᐅᑎᕈᒫᖅᐳᑦ ᓂᐊᖁᕐᖕᓄᑦ.
16ᐃᒥᓚᐅᕋᕕᑦ ᖃᖅᑲᖁᑎᓐᓂᑦ ᐃᑦᔪᕐᖕᓁᑦᑐᒥᑦ,
ᑍᒫᒃ ᐃᓅᖃᑎᒌᒡᔪᐊᓕᒫᑦ ᐊᕙᑎᑦᓯᓐᓃᑦᑐᑦ ᐃᒥᕈᒫᕆᕗᑦ;
ᐃᓛᒃ ᐃᒥᕈᒫᖅᐳᑦ ᑐᐊᕕᖅᓗᑎᒃ ᐄᓗᒍᓗ,
ᑍᒤᓚᐅᖅᓯᒪᖏᑦᑐᑎᑐᓪᓗ ᐃᓕᖓᔪᒫᖅᐳᑦ.”
ᐃᓴᕆᐊᓕᒥᐅᑦ ᓵᓚᖃᕐᖕᓂᖓ
17“ᖃᖅᑲᒥ ᓮᐅᓂᒥ ᕿᒫᓯᒪᔪᖃᕈᒫᖅᐳᖅ,
ᐃᑦᔪᕐᖕᓁᑦᑑᔪᒫᖅᐳᕐᓗ ᑖᓐᓇ ᖃᖅᑲᖅ;
ᔧᑰᓪᓗ ᑭᖑᕚᖏᑕ ᓄᓇᒋᓚᐅᖅᑕᑎᒃ ᐅᑎᖅᑎᑦᓱᒫᕆᕔᑦ.
18ᔧᑰᑉ ᑭᖑᕚᖏᑦ ᐃᑯᐊᓚᔪᒫᖅᐳᑦ,
ᔫᓯᐱᐅᓪᓗ ᑭᖑᕚᖏᑦ ᐃᑯᒪᐅᔪᒫᖅᓗᑎᒃ;
ᐄᓴᐅᓪᓗ ᑭᖑᕚᖏᑦ ᑭᑉᐸᑯᑎᑐᑦ ᑍᒤᑦᓱᒫᖅᐳᑦ;
ᐊᒥᐊᒃᑯᖃᕈᒫᓐᖏᓚᓪᓗ ᐄᓴᐅᑉ ᑭᖑᕚᖏᑦ;
ᐊᑕᓂᖅ ᑍᒫᒃ ᐅᖃᕐᖕᒪᑦ.
19ᔫᑕᐅᑉ ᓯᕿᓂᖓᑕ ᓇᓛᓂᒥᐅᑦ ᐄᓴᐅᑉ ᖃᖅᑲᖓ ᐱᑖᕆᔪᒫᖅᐹᑦ,
ᐱᓕᔅᑍᓂᒥᐅᓪᓗ ᐱᑖᕆᔭᐅᔪᒫᖅᐳᖅ ᓯᕿᓂᐅᑉ ᓂᐱᕕᐊᑕ ᓇᓛᓂᒥᐅᑕᕐᖕᓄᑦ;
ᐃᓴᕆᐊᓕᒃᑯᓪᓗ ᓄᓇᑖᕈᒫᖅᐳᑦ ᐃᕗᕅᒥᒃ ᓴᒥᐊᕆᐊᒥᒡᓗ;
ᐱᓐᔭᒥᓂᑯᑦ ᐃᓄᖏᑕ ᓄᓇᑖᕆᔪᒫᖅᐹᑦ ᒋᓕᐊᑎ.
20ᕼᐋᓚᒧᑦ ᐊᐅᓪᓚᕈᑦᔭᐅᓯᒪᔪᑦ ᐃᓴᕆᐊᓕᐅᑉ ᑭᖑᕚᖏᑦ ᓄᓇᑖᕈᒫᖅᐳᑦ
ᑬᓇᓂᒥᐅᑦ ᐊᑯᕐᖓᓐᓃᑦᑐᓂᒃ ᔨᕆᐸᑦ ᑎᑭᓪᓗᒍ,
ᔨᕉᓴᓕᒥᓪᓗ ᐊᐅᓪᓚᕈᑦᔭᐅᓯᒪᔪᑦ ᓯᑉᕼᐊᕋᒦᑦᑐᑦ
ᓄᓇᑖᕈᒫᖅᐳᑦ ᐃᒡᓗᒐᓴᖕᓂᒃ ᓯᕿᓂᐅᑉ ᓇᓛᓃᑦᑐᓂᒃ ᓂᒋᑉᒥ.
21ᓴᐳᑦᔨᔨᒃᓴᑦ ᒪᔪᐊᕈᒫᖅᐳᑦ ᓮᐅᓂᐅᑉ ᖃᖅᑲᖓᓄᑦ
ᐄᓴᐅᑉ ᖃᖅᑲᖓᓃᑦᑐᑦ ᐊᐅᓚᓐᓂᐊᖅᓗᒋᑦ,
ᐊᑕᓂᐅᕕᒡᓗ ᑖᓐᓇ ᐊᑕᓂᐅᑉ ᐱᒋᔪᒫᖅᐹ.”
Currently Selected:
ᐅᐸᑍᐊᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.