ᔪᐊᓇᓯᐅᑉ ᐊᒡᓚᖏᑦ 20
20
ᐃᓗᕕᐅᑉ ᐃᓄᖃᕈᓐᓃᕐᖕᓂᖓ
ᒫᑎᐅᓯ 28:1-8; ᒫᑯᓯ 16:1-8; ᓘᑲᓯ 24:1-12
1ᐅᓪᓛᒪᕆᒃᑯᑦ ᐱᓇᓱᐊᕈᓯᐅᑉ ᐅᓪᓗᖏᑕ ᓯᕗᓪᓕᖅᐹᖓᓂ, ᓱᓕ ᑖᖅᑎᓪᓗᒍ, ᒥᐊᕆ ᒫᒃᑕᓖᓂ ᐃᓗᕕᕐᖕᒧᐊᖅᐳᖅ, ᑕᑯᓪᓗᓂᓗ ᐅᔭᕌᓗᒃ ᐃᓗᕕᐅᑉ ᐹᖓᓂᑦ ᐲᖅᑕᐅᓯᒪᓂᖓᓂᒃ. 2ᑕᕝᕙ ᐅᓪᓚᒃᓯᕗᖅ ᓮᒨᓂ ᐲᑦᑐᕉᓯᒧᑦ ᐃᓕᓐᓂᐊᖅᑎᒧᓪᓗ ᐂᓪᓗᓂ, ᔩᓱᓯᐅᑉ ᓇᒡᓕᒋᔭᖓᓄᑦ, ᐅᖃᐅᑎᓪᓗᒋᒃ, “ᐊᑕᓂᖅ ᐊᓐᓂᑦᔭᐅᓐᓂᕐᖕᒪᑦ ᐃᓗᕕᕐᖕᒥᑦ, ᖃᐅᔨᒪᓐᖏᓚᕗᑦ ᓇᒧᓐᖓᖅᑕᐅᓐᓂᕐᖕᒪᖔᑦ.”
3ᑕᕝᕙ ᐲᑦᑐᕉᓯ ᐃᓕᓐᓂᐊᖅᑎᓗ ᐊᓂᕘᒃ, ᐃᓗᕕᕐᖕᒧᑦ ᐂᓕᕐᓗᑎᒃ. 4ᐅᓪᓚᒡᓗᑎᒃ ᐃᓗᕕᕐᖕᒧᑦ, ᐃᓕᓐᓂᐊᖅᑎᓕ ᐲᑦᑐᕉᓯᒥᑦ ᓱᒃᑲᓂᖅᓴᐅᒐᒥ ᓯᕗᓪᓕᐅᓪᓗᓂ ᐃᓗᕕᕐᖕᒧᑦ ᑎᑭᑉᐳᖅ; 5ᐃᓗᐊᓄᑦ ᐃᑦᓱᐊᕋᒥ, ᑕᑯᕗᖅ ᖃᓪᓗᓈᖅᑕᓂᒃ ᓵᑦᑐᓂᒃ ᑕᒫᓃᕐᕆᔪᓂᒃ, ᐃᑎᕋᓂᓕ ᐃᓗᐊᓄᑦ. 6ᓮᒨᓂ ᐲᑦᑐᕉᓯᓕ ᑭᖑᓪᓕᐅᓪᓗᓂ ᑎᑭᓐᓇᒥ, ᑲᑦᑐᕋᓂ ᐃᓗᕕᕐᖕᒧᑦ ᐃᑎᖅᐳᖅ; ᑕᑯᓪᓗᓂᓗ ᖃᓪᓗᓈᖅᑕᓂᒃ ᓵᑦᑐᓂᒃ ᑕᒫᓃᕐᕆᔪᓂᒃ. 7ᖃᓪᓗᓈᖅᑕᖅ ᔩᓱᓯᐅᑉ ᓂᐊᖁᐊᓄᑦ ᐃᒻᒧᑎᐅᓚᐅᖅᑐᖅ, ᑖᒃᑯᓄᖓ ᖃᓪᓗᓈᖅᑕᓄᑦ ᐃᒻᒧᑎᕕᓂᕐᖕᓄᑦ ᐃᓚᒋᔭᐅᓇᓂ, ᐃᒻᒥᒍᓪᓕ ᐃᒧᓯᒪᕗᖅ ᑲᑎᒪᔭᐅᓇᓂ. 8ᑕᕝᕙ ᐃᓕᓐᓂᐊᖅᑎ, ᐃᓗᕕᕐᖕᒧᑦ ᑎᑭᖅᑳᓚᐅᖅᑐᖅ, ᐃᑎᕆᕗᖅ; ᑕᑯᓪᓗᓂᓗ ᐅᒃᐱᖅᐳᖅ; 9ᐊᒡᓔᑦ ᓱᓕ ᖃᐅᔨᒪᖏᓐᓇᒥᒋᑦ ᐅᖃᖅᑐᑦ, ᑐᖁᖓᔪᓂᑦ ᒪᑭᑦᑕᕆᐊᖃᕐᓂᖓᓂᒃ. 10ᑕᕝᕙ ᐃᓕᓐᓂᐊᖅᑏᒃ ᐅᑎᕐᓗᑎᒃ ᐊᖏᕐᕋᖅᐴᒃ.
ᔩᓱᓯᐅᑉ ᓴᖅᑭᓐᓂᖓ ᒥᐊᕆ ᒫᒃᑕᓖᓂᒧᑦ
ᒫᑎᐅᓯ 28:9-10; ᒫᑯᓯ 16:9-11
11ᒥᐊᕆ ᐃᓗᕕᐅᑉ ᓯᓚᑖᓂ ᓇᖏᕐᓗᓂ ᕿᐊᕗᖅ, ᓱᓕᓕ ᕿᐊᓪᓗᓂ, ᐃᓗᕕᕐᖕᒧᑦ ᐃᑦᑐᐊᖅᐳᖅ. 12ᑕᑯᓪᓗᓂᓗ ᐂᖏᓖᖕᓂᒃ ᒪᕐᕉᖕᓂᒃ ᖃᑯᖅᑖᖕᓂᒃ ᐊᓐᓄᕌᖅᓯᒪᔫᖕᓂᒃ, ᔩᓱᓯᐅᑉ ᑎᒥᖓᑕ ᐃᓂᒋᓚᐅᖅᑕᖓᓂ ᐃᒃᓯᕙᔫᖕᓂᒃ, ᐂᑉᐹ ᓂᐊᖁᐊᑕ ᓇᓛᓃᑦᑐᖅ, ᐂᑉᐸᖓᓗ ᐃᑎᒐᖏᑕ ᓇᓛᓃᓪᓗᓂ. 13ᑖᒃᑯᐊᒃ ᒥᐊᕆ ᐊᐱᕆᕚᒃ, “ᐊᕐᖕᓈᖅ ᓱᖕᒪᑦ ᕿᐊᕕᑦ?”
ᒥᐊᕆ ᑭᐅᕗᖅ, “ᐊᑕᓂᕋ ᐊᓐᓂᑦᔭᐅᓐᓂᕐᖕᒪᑦ, ᖃᐅᔨᒪᓐᖏᓚᖓᓗ ᓇᒧᓐᖓᖅᑕᐅᓐᓂᕐᖕᒪᖔᑦ.”
14ᑍᒫᒡᓗ ᐅᖃᕇᕋᒥ ᑐᓄᒻᒧᑦ ᕿᕕᐊᖅᐳᖅ; ᔩᓱᓯ ᑕᑯᕚ ᓇᖏᖅᑐᖅ, ᖃᐅᔨᒪᓐᖏᓛ ᔩᓱᓯᐅᖕᒪᖔᑦ. 15ᔩᓱᓯᐅᑉ ᐊᐱᕆᕚ, “ᐊᕐᖕᓈᖅ ᓱᖕᒪᑦ ᕿᐊᕕᑦ? ᑭᓇᒥᒡᓗ ᕿᓂᖅᐲᑦ?”
ᒥᐊᕆᐅᑉ ᐱᕈᖅᓰᕕᓕᕆᔨᐅᓇᓱᒋᒐᒥᐅᒃ, ᐅᖃᐅᑎᕚ, “ᑕᕝᕙᓐᖓᑦ ᐊᓐᓂᓯᓐᓂᕈᕕᐅᒃ,#20:15 ᐅᕝᕙᓘᓐᓃᑦ ᑎᒍᓪᓗᒍ ᐊᓂᒍᑎᓐᓂᕈᕕᐅᒃ ᐅᖃᐅᑎᓚᐅᓐᖓ ᓇᒧᓐᖓᕐᖕᓂᕐᖕᒪᖔᖅᐱᐅᒃ, ᐂᓂᐊᕋᒃᑯ.”
16ᔩᓱᓯᐅᑉ ᐅᖃᐅᑎᕚ, “ᒥᐊᕆ.”
ᕿᕕᐊᕐᓗᓂᐅᒡᓗ ᐅᖃᖅᐳᖅ ᐄᑉᕉᑎᑐᑦ, “ᕌᐳᓁ!” ᑐᑭᓕᒃ: “ᐊᔪᕆᖅᑐᐃᔩ!”
17ᔩᓱᓯᐅᑉ ᐅᖃᐅᑎᕚ, “ᐊᒃᑐᕐᖕᓂᐊᕐᖕᓇᖓ, ᓱᓕ ᑕᑉᐸᐅᓐᖓᓚᐅᖏᓐᓇᒪ ᐊᑖᑕᓐᓄᑦ; ᐃᓅᖃᑎᒃᑲᓕ ᐅᐸᓕᒃᑭᑦ ᐅᖃᐅᑎᓗᒋᑦ, ᑕᑉᐸᐅᓐᖓᕐᖕᓂᐊᖅᐳᖓ ᐊᑖᑕᓐᓄᑦ ᐊᑖᑕᑦᓯᓐᓄᓪᓗ, ᒎᑎᓐᓄᑦ ᒎᑎᑦᓯᓐᓄᓪᓗ.”
18ᑕᕝᕙ ᒥᐊᕆ ᒫᒃᑕᓖᓂ ᐅᑎᓕᖅᐳᖅ; ᐃᓕᓐᓂᐊᖅᑏᓪᓗ ᐅᖃᐅᑎᕔᑦ, “ᐊᑕᓂᖅ ᑕᑯᓚᐅᖅᐸᕋ”; ᐅᖃᐅᑎᓪᓗᒋᑦ ᐅᖃᐅᓯᕆᓚᐅᖅᑕᖏᓐᓂᒃ.
ᔩᓱᓯ ᓴᖅᑭᓐᓂᖓ ᐃᓕᓐᓂᐊᖅᑎᒥᓄᑦ
ᒫᑎᐅᓯ 28:16-20; ᒫᑯᓯ 16:14-18; ᓘᑲᓯ 24:36-49
19ᐅᓪᓗᒥ ᑕᕝᕙᓂ ᐅᓐᓄᓕᖅᑎᓪᓗᒍ, ᐱᓇᓱᐊᕈᓯᐅᑉ ᓯᕗᓪᓕᖅᐹᖓᓂ, ᐃᓕᓐᓂᐊᖅᑏᑦ ᑲᑎᒪᓪᓗᑎᒃ ᐅᒃᑯᐊᑦ ᐊᑦᑐᖏᖅᓯᒪᓚᐅᖅᐳᑦ, ᔫᑎᓂᒃ ᓯᕘᕋᒐᒥᒃ, ᔩᓱᓯ ᓴᖅᑭᑉᐳᖅ ᐊᑯᕐᖓᓐᓂᓗ ᓇᖏᕐᓗᓂ, ᐅᖃᖅᐳᖅ, “ᓮᒪᓂᐅᑉ ᐃᓚᒋᓕᓯ.” 20ᑍᒫᒡᓕ ᐅᖃᕇᕋᒥ, ᐊᒡᒐᓂ ᓴᓂᕋᓂᓗ ᑕᑯᔭᐅᑎᑉᐰᑦ ᑖᒃᑯᓄᖓ. ᐃᓕᓐᓂᐊᖅᑏᓪᓗ ᖁᕕᐊᓱᓕᖅᐳᑦ ᐊᑕᓂᖅ ᑕᑯᒐᒥᑦᔪᒃ. 21ᔩᓱᓯᐅᑉ ᐅᖃᐅᑎᒃᑲᓐᓂᖅᐰᑦ, “ᓮᒪᓂᐅᑉ ᐃᓚᒋᓕᓯ. ᓲᕐᓗ ᐊᑖᑕᐅᑉ ᑎᓕᓚᐅᕐᖕᒪᖓ, ᑍᒫᒃᑕᐅᖅ ᑎᓕᒋᕙᑦᓯ.” 22ᑍᒫᒡᓗ ᐅᖃᕇᕋᒥ, ᓱᐴᕐᕕᒋᕔᑦ, ᐅᖃᐅᑎᓪᓗᒋᓪᓗ, “ᐊᓂᕐᖕᓂᖅ ᐃᑦᔪᕐᖕᓁᑦᑐᖅ ᐱᒋᓕᖅᓯᐅᒃ. 23#ᒫᑎᐅᓯ 16:19; 18:18.ᓇᓪᓕᐊᑦᑕ ᐊᔪᕐᖕᓂᖏᑦ ᐃᓱᒪᒋᔪᓐᓁᖅᑕᓯ, ᑖᒃᑯᐊ ᐃᓱᒪᒋᔪᓐᓁᖅᑕᐅᕗᑦ; ᓇᓪᓕᐊᑦᑕᓕ ᐊᔪᕐᖕᓂᖏᑦ ᐃᓱᒪᒋᔪᓐᓁᓐᖏᑕᓯ, ᑖᒃᑯᐊ ᐃᓱᒪᒋᔪᓐᓁᖅᑕᐅᓐᖏᓚᑦ.”
ᔩᓱᓯ ᑑᒪᓯᓗ
24ᑑᒪᓯᐅᓪᓕ 12 ᐃᓚᖓᑦᑕ, ᒪᕐᕈᓕᐊᕕᓂᕐᖕᒥᒃ ᑍᔭᐅᔫᑉ ᐃᓚᒋᓚᐅᓐᖏᓔᑦ ᔩᓱᓯ ᑎᑭᑎᓪᓗᒍ. 25ᑕᕝᕙ ᐃᓕᓐᓂᐊᖅᑏᑦ ᑑᒪᓯ ᐅᖃᐅᑎᕚᑦ, “ᐊᑕᓂᖅ ᑕᑯᓚᐅᖅᐸᕗᑦ.”
ᑑᒪᓯᐅᓪᓕ ᐅᖃᐅᑎᕔᑦ, “ᐊᒡᒐᖏᓐᓂ ᑭᑭᐊᒃᑐᖅᑕᐅᓂᖏᑦ ᑕᑯᖏᒃᑯᒃᑭᑦ, ᑎᑭᕋᓗ ᑭᑭᐊᒃᑐᖅᑕᐅᓂᖏᓐᓄᑦ ᐃᓕᖏᒃᑯᒃᑯ, ᓴᓂᕋᖓᓗ ᐊᒃᑐᖏᒃᑯᒃᑯ ᐅᐱᕈᓱᓕᑦᔮᓐᖏᓚᖓ.”
26ᐅᓪᓗᐃᑦ ᓯᑕᒪᐅᔪᖅᑐᑦ ᐊᓂᒍᖅᑎᓪᓗᒋᑦ, ᐃᓕᓐᓂᐊᖅᑏᑦ ᑲᑎᒪᓕᕆᕗᑦ ᐃᒡᓗᒥ, ᑑᒪᓯᐅᑉ ᐃᓚᒋᕔᑦ. ᐅᒃᑯᐊᑦ ᐊᑦᑐᖏᖅᓯᒪᑎᓪᓗᒋᑦ, ᔩᓱᓯ ᓇᔪᖅᑕᖓᓐᓄᐊᖅᐳᖅ ᐊᑯᕐᖓᓂᓗ ᓇᖏᕐᓗᓂ ᐅᖃᖅᐳᖅ, “ᓮᒪᓂᐅᑉ ᐃᓚᒋᓕᓯ.” 27ᑕᕝᕙ ᑑᒪᓯᒧᑦ ᐅᖃᖅᐳᖅ, “ᑎᑮᑦ ᐅᕗᖓ ᐃᓕᒍᒃ, ᐊᒡᒐᒃᑲᓗ ᑕᑯᓕᒃᑭᑦ; ᐊᒡᒐᑎᓪᓗ ᐃᓴᒃᓗᒋᑦ ᓴᓂᕋᕋ ᐊᒃᑐᓕᕈᒃ; ᐅᒃᐱᖏᓐᓇᒃ, ᐅᒃᐱᕆᓪᓕ.”
28ᑑᒪᓯᐅᑉ ᑭᐅᕚ, “ᐊᑕᓂᕋ, ᒎᑎᒐᓗ!”
29ᔩᓱᓯᐅᑉ ᐅᖃᐅᑎᕚ, “ᐅᒃᐱᓕᖅᐲᑦ ᑕᑯᒐᕕᖓ ᑭᓯᐊᓂ? ᓮᒪᓇᖅᑐᒦᐳᑦ ᑕᑯᓚᐅᕋᑎᒃ ᐅᒃᐱᖅᑐᑦ.”
ᑎᑎᕋᖅᑕᐅᑦᔪᑎᒋᔭᖏᑦ ᑖᒃᑯᐊ ᐊᒡᓚᒃᓯᒪᔪᑦ
30ᐃᓕᓐᓂᐊᖅᑎᖏᑕᓕ ᑕᒃᑯᐊᓂ ᔩᓱᓯ ᓱᓕ ᐊᒥᓱᓂᒃ ᓇᓗᓁᒃᑯᑕᕐᖕᓂᒃ ᐱᓇᓱᐊᖃᑦᑕᓚᐅᖅᐳᖅ, ᐅᑯᓇᓂ ᐊᒡᓚᖕᓂ ᑎᑎᕋᖅᓯᒪᖏᑦᑐᓂᒃ. 31ᑖᒃᑯᐊ ᑎᑎᕋᖅᓯᒪᕗᑦ ᐅᒃᐱᓕᖁᓪᓗᓯ ᔩᓱᓯ ᙭ᔅᑑᓯᐅᖕᒪᑦ, ᒎᑎᐅᑉ ᐃᕐᖕᓂᖓ. ᐅᒃᐱᕐᖕᓂᑦᓯᒍᑦ ᐃᓅᓯᖃᖁᓪᓗᓯ ᑖᑦᓱᒨᓇ.
Currently Selected:
ᔪᐊᓇᓯᐅᑉ ᐊᒡᓚᖏᑦ 20: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.