ᔪᐊᓇᓯᐅᑉ ᐊᒡᓚᖏᑦ 15
15
ᔩᓱᓯᐅᑉ ᐃᒻᒥᓂᒃ ᐊᑦᔨᐅᑎᓐᓂᖓ ᓇᐹᖅᑐᒧᑦ
1“ᐅᕙᖓ ᓱᓕᔪᒥᒃ ᓇᐹᖅᑑᕗᖓ ᐅᐂᓂᒃᓴᓕᒃ, ᐊᑖᑕᒐᓗ ᐸᐅᕐᖓᓕᒃᓴᓂᒃ ᐱᕈᖅᓰᕕᓕᕆᔨᐅᕗᖅ. 2ᐊᕙᓚᖓᔪᓕᒫᓪᓗ ᐅᕙᓐᓃᑦᑐᑦ ᐸᐅᕐᖓᖃᕈᓐᓇᖏᑦᑐᑦ, ᐲᔭᕐᖕᓂᐊᖅᐰᑦ, ᐸᐅᕐᖓᖃᖃᑦᑕᖅᑐᓕᒫᓪᓗ ᓴᓗᒻᒪᖅᓴᕐᓗᖏᑦ ᐲᔧᕕᒋᓂᐊᖅᐰᑦ, ᓴᓗᒪᑦᓯᐊᕐᓗᑎᒃ ᐸᐅᕐᖓᓂᑦ ᐱᕈᕐᕕᐅᒃᑲᓐᓂᖁᓪᓗᒋᑦ. 3ᐃᓕᑦᓯᓕ ᓴᓗᒻᒪᖅᓴᖅᑕᐅᔭᕇᖅᐳᓯ ᐃᓕᑦᓯᓐᓄᑦ ᐅᖃᐅᓯᕆᔭᒃᑲ ᐱᓪᓗᒋᑦ. 4ᐃᓗᓐᓃᑦᓮᓐᓇᕆᑦᓯ, ᐅᕙᖓᓗ ᐃᓗᑦᓯᓐᓃᓪᓗᖓ. ᓲᕐᓗ ᓇᐹᖅᑐᑉ ᐊᕙᓚᖓᔪᐊ ᐃᒻᒥᓃᓐᓇᖅ ᐸᐅᕐᖓᖃᕈᓐᓇᖏᒻᒪᑦ, ᓇᐹᖅᑐᒦᒃᑯᓂ ᑭᓯᐊᓂ ᐱᕈᖅᑎᑦᓯᔪᓐᓇᖅᐳᖅ, ᑍᒤᒃᑭᕗᓯᑦᑕᐅᖅ ᐅᕙᓐᓃᓪᓗᓯ ᑭᓯᐊᓂ.
5“ᐅᕙᖓ ᓇᐹᖅᑑᕗᖓ ᐸᐅᕐᖓᓕᒃᓴᖅ, ᐃᓕᑦᓯ ᐊᕙᓚᖓᔫᕗᓯ. ᐅᕙᓐᓃᑦᑐᖅ, ᐅᕙᖓᓗ ᑖᑦᓱᒪᓃᓪᓗᖓ, ᐸᐅᕐᖓᖃᕐᖕᓂᐊᖅᐳᖅ ᐊᒥᓱᓂᒃ, ᐱᒋᓇᖓ ᓱᓇᒥᒡᓘᓐᓃᑦ ᐱᓇᓱᐊᕈᓐᓇᖏᓐᓇᑦᓯ. 6ᐅᕙᓐᓃᖏᓐᓇᖏᑦᑐᖅ, ᐃᒋᑕᐅᓂᐊᖅᐳᖅ ᓇᐹᖅᑑᑉ ᐊᕙᓚᖓᔪᖏᑎᑐᑦ ᐸᓂᖅᑐᑎᑐᑦ; ᐊᕙᓚᖓᔪᑦ ᑲᑎᑕᐅᓪᓗᑎᒃ, ᐃᒋᑕᐅᕙᖕᒪᑕ ᐃᑯᒪᒧᑦ, ᐃᑯᐊᓪᓚᒃᑕᐅᓪᓗᑎᒃ. 7ᐅᕙᓐᓃᓐᖏᓇᕈᑦᓯ, ᐅᖃᐅᓯᒃᑲᓗ ᐃᓗᑦᓯᓐᓃᖏᓐᓇᖅᐸᑕ, ᐱᔪᒪᔭᑦᓯᓐᓂᒃ ᓱᓇᑐᐃᓐᓇᒥᒃ ᑐᒃᓯᐊᕈᑦᓯ, ᑕᕝᕙ ᑐᓂᓯᕕᐅᓂᐊᖅᐳᓯ. 8ᑕᒪᒃᑯᑎᒎᓇᖅ ᐊᑖᑕᒐ ᓂᖅᑐᕐᖕᓇᖅᑎᑕᐅᓂᐊᖅᐳᖅ, ᐸᐅᕐᖓᖃᓕᕈᑦᓯ ᐊᒥᓱᓂᒃ; ᐃᓕᓐᓂᐊᖅᑎᐅᓂᓯᓗ ᐅᕙᓐᓄᑦ ᓇᓗᓁᕐᓗᓂ. 9ᐊᑖᑕᐅᑉ ᐅᕙᓐᓂᒃ ᓇᒡᓕᒍᓱᖕᓂᖓᑐᑦ, ᑍᒫᒃ ᓇᒡᓕᒋᕙᑦᓯ; ᓇᒡᓕᖕᓂᓐᓃᑦᓮᓐᓇᕆᑦᓯ. 10ᐱᖁᔭᒃᑲ ᒪᓕᒃᑯᑦᓯᒋᑦ, ᓇᒡᓕᓐᓂᓐᓃᑦᓮᓐᓇᕐᖕᓂᐊᖅᐳᓯ; ᐊᑖᑕᒪᑦᑕᐅᖅ ᐱᖁᔭᖏᑦ ᒪᓕᓚᐅᕋᒃᑭᑦ, ᓇᒡᓕᖕᓂᖓᓃᑦᓮᓐᓇᕐᓗᖓᓗ.
11“ᑕᒪᒃᑯᓂᖓ ᐅᖃᕐᕕᒋᕙᑦᓯ, ᖁᕕᐊᓱᖕᓂᕋ ᐃᓕᑦᓯᓐᓃᖁᓪᓗᒍ, ᖁᕕᐊᓱᖕᓂᓯ ᓈᒻᒪᒃᓯᑦᓯᐊᖁᓪᓗᒍ. 12#ᔪᐊᓇᓯ 13:34; 15:17; 1 ᔪᐊᓇᓯ 3:23; 2 ᔪᐊᓇᓯ 1:5.ᐅᓇ ᑕᕝᕙ ᐱᖁᔭᕋ, ᓇᒡᓕᒋᖃᑦᑕᐅᑎᖁᓪᓗᓯ ᓲᕐᓗ ᓇᒡᓕᒋᒐᑦᓯ. 13ᓇᒡᓕᒍᓱᖕᓂᖅᓴᐅᔪᖃᓐᖏᓚᖅ ᐃᒤᑦᑐᒥᒃ, ᐃᓅᓯᕐᖕᒥᓂᒃ ᑐᓂᓯᔪᒥᒃ ᐃᓚᓐᓇᕆᔭᓂ ᐱᓪᓗᒋᑦ. 14ᐃᓚᓐᓇᕆᕙᑦᓯ ᐱᖁᔭᓐᓂᒃ ᒪᓕᒃᑯᑦᓯ. 15ᒪᑐᒪ ᑭᖑᕐᖓᓂ ᐱᔨᒥᒃ ᑍᓂᐊᕈᓐᓃᖅᐸᑦᓯ, ᐱᔨ ᖃᐅᔨᒪᖏᒻᒪᑦ ᐊᖓᔪᖅᑳᖓᑕ ᐱᓂᐊᕐᖕᓂᖏᓐᓂᒃ; ᐃᓕᑦᓯᓕ ᐃᓚᓐᓇᕆᔭᓐᓂᒃ ᑍᓚᐅᖅᐸᑦᓯ, ᐊᑖᑕᓐᓂᑦ ᑐᓴᓚᐅᖅᑕᓕᒫᓐᓂᒃ ᓇᓗᓁᖅᓯᕕᒋᓚᐅᕋᑦᓯ. 16ᓂᕈᐊᓚᐅᓐᖏᓚᑦᓯᓐᖓ, ᓂᕈᐊᓚᐅᖅᐸᑦᓯᓕ ᑎᓕᓪᓗᓯᓗ ᐸᐅᕐᖓᑲᕆᐊᖅᑐᖁᓪᓗᓯ ᐸᐅᕐᖓᖃᕐᖕᓂᓯ ᑲᔪᓯᖁᓪᓗᒍ; ᓱᓇᑐᐃᓐᓇᕐᖕᒥᒃ ᐊᑖᑕ ᑐᒃᓯᐊᕐᕕᒋᒍᑦᓯᐅᒃ ᐊᑎᓐᓂ, ᑐᓂᓯᓂᐊᖅᐳᖅ ᐃᓕᑦᓯᓐᓄᑦ. 17ᒪᑐᒥᖓ ᐱᖁᕙᑦᓯ, ᓇᒡᓕᒋᖃᑦᑕᐅᑎᖁᓪᓗᓯ.”
ᓯᓚᕐᔪᐊᕐᖕᒥᐅᑦ ᐆᒥᓱᖕᓂᖓᑦ
18“ᓯᓚᕐᔪᐊᕐᖕᒥᐅᑦ ᐆᒥᒋᒃᐸᓯ, ᖃᐅᔨᒪᒋᑦᓯ ᐆᒥᒋᖅᑳᕐᖕᒪᖓ ᐃᓕᑦᓯᓐᓂᑦ. 19ᓯᓚᕐᔪᐊᕐᖕᒥᐅᑕᐅᖏᓐᓇᑦᓯ, ᓯᓚᕐᔪᐊᕐᖕᒥᐅᑦ ᓇᖕᒥᓂᕐᖕᒥᖕᓂᒃ ᓇᒡᓕᒍᓱᒃᑲᔭᖅᐳᑦ; ᓯᓚᕐᔪᐊᕐᖕᒥᐅᓪᓕ ᐃᓚᒋᖏᓐᓇᑦᓯᒋᒃ, ᓯᓚᕐᔪᐊᕐᖕᒥᐅᓂᑦ ᓂᕈᐊᓚᐅᖅᐸᑦᓯ, ᑍᒤᒻᒪᑦ ᓯᓚᕐᔪᐊᕐᖕᒥᐅᑦ ᐆᒥᒋᕚᓯ. 20#ᒫᑎᐅᓯ 10:24; ᓘᑲᓯ 6:40; ᔪᐊᓇᓯ 13:16.ᐃᓕᑦᓯᓐᓄᑦ ᐅᖃᐅᓯᕆᓚᐅᖅᑕᒃᑲ ᐃᖅᑲᐅᒪᓯᒋᒃ, ‘ᐱᔨ ᐊᖏᓂᖅᓴᐅᓐᖏᓚᖅ ᐊᖓᔪᖅᑳᒥᓂᑦ.’ ᐊᑭᕋᖅᑐᕈᓂᖓ, ᑕᕝᕙ ᐊᑭᕋᖅᑐᕐᖕᓂᐊᕆᕚᓯ; ᐅᖃᐅᓯᒃᑲ ᒪᓕᒃᑯᓂᒋᑦ ᐅᖃᐅᓯᓯᑦᑕᐅᖅ ᒪᓕᖕᓂᐊᕆᕔᑦ. 21ᑕᒪᒃᑯᓂᖓᓕᒫᖅ ᐱᓂᐊᕐᕕᒋᔪᒫᖅᐹᓯ ᐅᕙᓐᓂᒃ ᐱᑦᔪᑎᖃᕐᓗᑎᒃ, ᐅᕙᓐᓂᒃ ᑎᓕᓯᔪᖅ ᖃᐅᔨᒪᖏᓐᓇᒥᑦᔪᒃ. 22ᑎᑭᓚᐅᖏᒃᑯᒪ ᐅᖃᐅᑎᔭᖅᑐᕐᓗᒋᑦ, ᐊᔪᕐᖕᓂᖃᕋᔭᓐᖏᓚᑦ; ᒫᓐᓇᓕ ᐸᓯᔭᒃᓴᐅᔪᓐᓃᕈᓐᓇᓐᖏᓚᑦ ᐊᔪᕐᖕᓂᕐᖕᒥᖕᓄᑦ. 23ᐅᕙᓐᓂᒃ ᐆᒥᓱᒃᑑᑉ ᐊᑖᑕᒐᑦᑕᐅᖅ ᐆᒥᒋᒋᕚ. 24ᐱᓂᐊᕐᖕᓂᖃᓚᐅᖏᒃᑯᒪ ᐱᓂᐊᕐᖕᓂᕆᔭᐅᓚᐅᖅᓯᒪᖏᑦᑐᒥᒃ ᑖᒃᑯᓄᖓ, ᐊᔪᕐᖕᓂᖃᕋᔭᓐᖏᓚᑦ; ᒫᓐᓇᓕ ᑕᑯᓯᒪᕗᑦ ᐊᑖᑕᒐᓗ ᑕᒪᓐᓄᒃ ᐆᒥᒋᕚᑎᒃᑯᒃ. 25#ᐃᓐᖏᕈᑦ 35:19; 69:4.ᑕᒪᓐᓇᓕ ᑍᒤᑉᐳᖅ ᐱᖁᔭᖏᓐᓂ ᐅᖃᖅᓯᒪᔪᑦ ᓇᓚᐅᑦᓯᖁᓪᓗᒋᑦ ᐃᒤᓕᔪᑦ: ‘ᐱᑦᔪᑎᒃᓴᖃᕋᑎᒃ ᐆᒥᒋᕚᖓ.’
26“ᐃᑲᔪᖅᑎᒃᓴᕐᓕ ᑎᑭᒍᓂ, ᐊᑖᑕᓐᓂᑦ ᑎᓕᔪᒫᖅᑕᕋ ᐃᓕᑦᓯᓐᓄᑦ, ᓱᓕᔫᑉ ᐊᓂᕐᖕᓂᖓ ᐊᑖᑕᒥᓐᖔᖅᑐᖅ, ᑖᓐᓇ ᐅᕙᓐᓂᒃ ᓇᓗᓁᖅᓯᔪᒫᖅᐳᖅ; 27ᐃᓕᑦᓯᓗ ᓇᓗᓁᖅᓯᔪᒫᕆᕗᓯ, ᐱᒋᐊᕐᖕᓂᕐᖕᒥᑦ ᓇᔪᖅᓯᒪᒐᑦᓯᓐᖓ.”
Currently Selected:
ᔪᐊᓇᓯᐅᑉ ᐊᒡᓚᖏᑦ 15: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.