ᔧᒥᓯᐅᑉ ᐊᒡᓚᖏᑦ 1
1
ᓇᓗᓁᖅᓯᑦᔪᑏᑦ
1 #
ᒫᑎᐅᓯ 13:55; ᒫᑯᓯ 6:3; ᐋᐴᓯᑕᓖᑦ 15:13; ᒐᓔᑎ 1:19. ᔧᒥᓯ, ᒎᑎᐅᑉ ᐊᑕᓂᑦᑕᓗ ᔩᓱᓯᐅᑉ ᙭ᔅᑑᓯᐅᑉ ᐱᔨᖓ,
ᑭᖑᕚᕇᓄᑦ 12ᓄᑦ ᓯᓚᕐᔪᐊᕐᖕᒥ ᓇᓂᑐᐃᓐᓈᖅᑐᓄᑦ; ᑐᓐᖓᓱᒋᑦᓯ.
ᐅᒃᐱᕐᖕᓂᖅ ᓯᓚᑐᓂᕐᓗ
2ᐅᒃᐱᖅᑑᖃᑎᒃᑲ ᖁᕕᐊᓱᒪᕆᒋᑦᓯ, ᓱᓇᑐᐃᓐᓇᕐᖕᓄᑦ ᐊᑦᔨᒌᖏᑦᑐᓄᑦ ᐆᖁᒤᑐᒦᑎᑕᐅᓕᕈᑦᓯ, 3ᖃᐅᔨᒪᒐᑦᓯ ᐅᒃᐱᕐᖕᓂᑦᓯ ᐆᒃᑐᖅᑕᐅᓂᖓ ᕿᓄᐃᓵᕈᓐᓇᖅᓯᓂᕐᖕᒥᒃ ᐱᑎᑦᓯᖕᒪᑦ. 4ᕿᓄᐃᓵᕐᖕᓂᖅ ᑲᔪᓯᑦᓯᐊᖅᑐᒃᓴᐅᕗᖅ, ᓈᒻᒪᒃᓯᑦᓯᐊᖁᓪᓗᓯ ᐱᔭᕇᑦᓯᐊᕐᓗᓯᓗ, ᓱᓇᒥᒡᓗ ᑭᓐᖒᒪᔭᖃᕈᓐᓃᖁᓪᓗᓯ. 5ᓇᓪᓕᖅᓯᓕ ᓯᓚᑐᓂᕐᖕᒥᒃ ᐊᔪᖅᓴᕈᓂ, ᒎᑎᒧᑦ ᑐᒃᓯᐊᖅᑐᒃᓴᐅᕗᖅ, ᑖᑦᓱᒪ ᑕᑉᕙ ᑐᓂᓯᕕᒋᓂᐊᖅᐹ ᐱᔪᒪᔭᖓᓂᒃ. ᐃᓄᓕᒫᑦ ᑐᓂᓯᕕᒋᕙᖕᒪᒋᑦ ᖁᕕᐊᒋᓪᓗᒋᑦ ᐊᓐᓂᕈᓱᒐᓂᓗ. 6ᐅᒃᐱᑦᓯᐊᕐᓗᓂ ᑐᒃᓯᐊᕐᓕ, ᖁᓚᖏᑦᓯᐊᕐᓗᓂ, ᓇᓪᓕᐊᑦ ᖁᓚᖅᑐᖅ ᐃᒪᕕᐅᑉ ᒪᓕᖏᑎᑐᑦ ᐊᓄᕆᒧᑦ ᐊᐅᓚᑕᐅᔪᑎᑐᑦ ᑍᒤᒻᒪᑦ. 7ᐃᓄᒃ ᑍᒤᑦᑐᖅ ᐊᑕᓂᕐᖕᒧᑦ ᑐᓂᓯᕕᐅᓂᐊᕋᓱᒋᓗᓂ ᐃᓱᒪᔪᒃᓴᐅᓐᖏᓚᖅ; 8ᖁᓚᖅᑐᖅ ᒪᕐᕉᖕᓂᒃ ᐃᓱᒪᖃᕋᒥ, ᓴᖑᓴᕅᑉᐳᖅ ᐱᓂᐊᕐᖕᓂᕐᖕᒥᓂ ᑕᒤᓐᓂ.
ᐊᔪᖅᓴᕐᖕᓂᖅ ᐊᔪᖅᓴᓐᖏᓐᓂᖅᓗ
9ᐅᒃᐱᖅᑑᖃᑎᓕ ᐊᔪᖅᓴᖅᑐᖅ ᒪᑭᑎᑕᐅᒍᓂ ᐅᐱᒍᓱᒃᑐᒃᓴᐅᕗᖅ, 10#ᐂᓮᐊᓯ 40:6,7.ᐅᒃᐱᖅᑑᖃᑎᑦᑕᐅᖅ ᐊᔪᖅᓴᓐᖏᑦᑐᖅ ᐊᔪᖅᓴᓕᕈᓂ ᖁᕕᐊᓱᒃᑐᒃᓴᐅᒋᕗᖅ, ᐊᔪᖅᓴᕐᖕᓂᖅ ᓄᖑᑦᓱᒫᕐᖕᒪᑦ ᓄᓇᒥ ᐱᕈᖅᑐᑦ ᑐᖁᓕᕙᖕᓂᖏᑎᑐᑦ. 11ᓯᕿᓂᖅ ᓴᖅᑭᒻᒪᑦ ᑭᐊᒃᐸᓗᒻᒪᕆᒡᓗᓂ ᐱᕈᖅᑐᑦ ᐆᑕᐅᕗᑦ; ᓄᓇᕋᖏᓪᓗ ᓄᕗᖏᓐᓃᑦᑐᑦ ᑲᑕᒐᖅᐳᑦ, ᑕᑯᒥᓇᕐᖕᓂᖏᓪᓗ ᓄᖑᑕᐅᕗᑦ. ᑍᒫᒃᑕᐅᖅ ᐃᓄᒃ ᐊᔪᖅᓴᓐᖏᑦᑐᖅ ᐱᓇᓱᐊᒐᕐᖕᒥᓂᒃ ᐱᓇᓱᐊᖅᑎᓪᓗᒍ ᑐᖁᓕᔪᒫᕆᕗᖅ.
ᐆᒃᑐᖅᑕᐅᓂᖅ ᐱᔪᒥᓵᖅᑕᐅᓂᕐᓗ
12ᐃᓄᒃ ᓮᒻᒪᖅᑎᑕᐅᑦᔪᑎᒃᓴᖃᖅᐳᖅ ᐱᐅᓐᖏᑦᑐᒧᑦ ᐱᔪᒥᓵᖅᑕᐅᓂᕐᖕᒥᒃ ᕿᓄᐃᓵᕐᓗᓂ ᐊᓂᒍᐃᔪᖅ, ᐱᐅᖏᑦᑐᒥᒃ ᐱᔪᒥᓵᖅᑕᐅᓂᕐᖕᒥᒃ ᐊᓂᒍᐃᒍᓂ ᑕᕝᕙ ᓂᐊᖂᓯᖅᑕᐅᔪᒫᖅᐳᖅ ᐃᓅᓯᕐᖕᒥᒃ ᒎᑎᐅᑉ ᐊᖏᕈᑎᒋᓯᒪᔭᖓᓂᒃ ᓇᒡᓕᒋᔨᒥᓄᑦ. 13ᐃᓄᒃ ᐱᐅᖏᑦᑐᒥᒃ ᐱᔪᒥᓵᖅᑕᐅᓕᕈᓂ ᐅᖃᖅᑐᒃᓴᐅᓐᖏᓚᖅ, “ᒎᑎᒧᑦ ᐱᐅᖏᑦᑐᒥᒃ ᐱᔪᒥᓵᖅᑕᐅᓕᖅᐳᖓ”; ᒎᑎ ᐱᐅᖏᑦᑐᒥᒃ ᐱᔪᒥᓵᕆᔨᐅᓐᖏᓇᒥ ᐱᐅᖏᑦᑐᒧᑦ ᐱᔪᒥᓵᕆᓂᐊᓐᖏᓚᖅ ᑭᓇᒥᒡᓘᓐᓃᑦ. 14ᐃᓄᒡᓕ ᐱᔪᒥᓵᖅᑕᐅᓕᖅᐳᖅ ᐃᒃᖠᒎᕐᖕᓂᕐᖕᒥᓄᑦ ᑲᔪᖏᖅᓴᖅᑕᐅᓪᓗᓂ ᓇᖕᒥᓂᖅ ᐱᔪᒪᓂᐊᓗᖕᒥᓄᑦ. 15ᑭᖑᕐᖓᒍᑦ ᐱᔪᒪᓂᐊᓗᒃ ᓄᑕᕋᒃᓴᕆᔭᐅᓕᕋᒥ ᐊᔪᖅᑐᓕᓂᕐᖕᒥᒃ ᐃᕐᖕᓂᐊᖃᖅᐳᖅ; ᐊᔪᕐᖕᓂᖅ ᐱᕈᕇᕋᒥ ᑐᖁᒥᒃ ᐃᕐᖕᓂᐊᖃᖅᐳᖅ.
16ᐅᐃᕕᕆᔭᐅᓂᐊᕋᓯ, ᓇᒡᓕᒋᔭᒃᑲ ᐅᒃᐱᖅᑑᖃᑎᒃᑲ. 17ᑐᓂᕐᕈᑏᑦ ᐱᐅᔪᑦ ᑐᓂᕐᕈᑎᓪᓗ ᓈᒻᒪᑦᓯᐊᖅᑐᑦ ᑕᒪᕐᖕᒥᒃ ᕿᓚᖕᒥᑦ ᐱᕗᑦ, ᖃᐅᒪᔪᒥᑦ ᐊᑖᑕᒥᑦ ᐱᕗᑦ ᑖᑦᓱᒪᓂ ᑕᕐᕋᕐᖕᒥᒃ ᐊᓯᑦᔨᖅᐸᓪᓕᐊᔪᖃᓐᖏᓚᖅ ᐊᓯᓐᖑᖅᐸᓪᓕᐊᔪᖃᕋᓂᓗ. 18ᑖᑦᓱᒪ ᐱᔪᒪᔭᓂ ᒪᓕᒡᓗᒍ ᐱᓐᖑᖅᑎᓚᐅᖅᐹᑎᒍᑦ ᐅᖃᐅᓯᕐᖕᒧᑦ ᓱᓕᔪᒧᑦ ᓯᕗᓪᓕᖅᐸᐅᓗᑕ ᐱᕈᖁᓪᓗᑕ ᐱᓐᖑᖅᑎᑕᖏᓐᓂᑦ.
ᑐᓴᖅᑕᒥᒃ ᐱᓇᓱᐊᕈᑎᖃᕐᖕᓂᖅ
19᙭ᔅᑑᓯᒥᐅᖑᖃᑎᒃᑲ ᓇᒡᓕᖕᓇᖅᑐᓯ, ᐅᓇ ᖃᐅᔨᒪᓯᐅᒃ. ᐃᓄᐃᑦ ᑕᒪᕐᖕᒥᒃ ᑐᓴᖅᓴᕅᓪᓕᑦ, ᐅᖃᖅᓴᕅᓐᖏᓪᓗᑎᒃ, ᓂᓐᖓᒃᓴᕅᖏᓪᓗᑎᒡᓗ. 20ᐃᓅᑉ ᓂᓐᖓᐅᒪᓂᖓ ᒎᑎᐅᑉ ᐃᓗᐊᖅᑐᓕᓂᖓᓂᑦ ᐱᖏᒻᒪᑦ. 21ᑍᒤᒻᒪᑦ ᐱᓂᐊᕐᖕᓂᕐᓗᖕᓂᓕᒫᑦ ᓈᒻᒪᖏᑦᑐᓂᒃᓗ ᐱᓇᓱᐊᕐᖕᓃᑦ ᐊᑐᕈᓐᓁᖅᓯᒋᒃ ᐱᐅᔪᕆᖏᓪᓗᓯᓗ ᐃᓚᓕᐅᖅᓯᐅᒃ ᐅᖃᐅᓯᖓ ᐃᓗᑦᓯᓐᓄᑦ ᑲᓐᖓᖅᓲᑎᒋᔭᖓ, ᑕᒪᓐᓇ ᐃᓕᑦᓯᓐᓂᒃ ᐱᐅᓕᓯᔪᓐᓇᕐᖕᒪᑦ.
22ᐅᖃᐅᓯᕐᓕ ᐱᓇᓱᐊᕈᑎᒋᓯᐅᒃ, ᑐᓵᑐᐃᓐᓇᖏᓪᓗᒍ, ᑐᓵᑐᐃᓐᓇᕈᑦᓯ ᓇᖕᒥᓂᖅ ᐅᐃᕕᕆᒐᑦᓯ. 23ᑭᓇᑐᐃᓐᓇᖅ ᐅᖃᐅᓯᕐᖕᒥᒃ ᑐᓴᑐᐃᓐᓇᖅᑎ ᐱᓇᓱᐊᕈᑎᖃᖅᐸᖏᑦᑐᖅ, ᑖᑦᓱᒪ ᐊᑦᔨᒋᕚ ᐃᓄᒃ ᑕᕐᕋᖅᑑᑎᒃᑯᑦ ᑮᓇᕐᖕᒥᓂᒃ ᕿᒥᕐᕈᔪᖅ; 24ᐃᒻᒥᓂᒃ ᕿᒥᕐᕈᐊᓚᐅᕐᓗᓂ ᑕᕝᕙᓐᖓᑦ ᓅᓐᓇᒥ ᑮᓇᕐᖕᒥ ᖃᓄᐃᓕᖓᓂᖓ ᑕᕝᕔᓐᓇᖅ ᐳᐃᒍᖅᐹ. 25ᑭᓇᑐᐃᓐᓇᖅ ᑕᑯᑦᓯᐊᖅᑐᖅ ᐱᖁᔭᓂᒃ ᕿᓚᕈᑦᔮᖅᓯᔪᓂᒃ, ᐃᓄᖕᓂᒃ, ᐊᑕᕕᒌᓐᓇᓕᕐᓗᒋᓪᓗ, ᑖᓐᓇ ᓈᓚᑐᐃᓐᓇᓐᖏᓚᖅ ᐳᐃᒍᑐᐃᓐᓇᕋᓂᓗ ᐱᓂᐊᕈᑎᒋᓪᓗᒋᓪᓕ ᐊᑐᓕᖅᐰᑦ, ᐃᓄᒃ ᑍᒤᓕᐅᖅᑐᖅ ᓮᒻᒪᖅᑎᑕᐅᓂᐊᖅᐳᖅ ᐱᓇᓱᐊᕐᖕᓂᕆᔭᒥᓂ.
26ᐅᒃᐱᕋᓱᒋᔪᒥᒃ ᐃᓕᑦᓯᓐᓃᑦᑐᖃᖅᐸᑦ, ᐅᖃᓂᓗ ᐊᑐᕐᖕᓂᕐᓗᒃᑍᓕᓂᕐᖕᒧᑦ ᐱᓯᒪᔪᓐᓇᖏᒃᑯᓂᐅᒃ ᐆᒻᒪᑎᓂ ᐅᐃᕕᕆᕚ, ᑕᑉᕙ ᐅᒃᐱᕐᖕᓂᖓ ᐊᑑᑎᖃᓐᖏᓚᖅ. 27ᐅᒃᐱᕐᖕᓂᖅ ᐸᓯᔭᒃᓴᐅᓂᖃᖏᑦᑐᖅ ᓱᓕᔪᕐᓗ ᒎᑎᐅᑉ ᐊᑖᑕᐅᑉ ᓈᒻᒪᒋᔭᖓ ᐃᒤᑦᑑᕗᖅ; ᐃᓕᐊᕐᔪᐃᑦ ᐳᓛᕆᐊᖃᑦᑕᕐᓗᒋᑦ ᐅᐃᒡᒐᕐᖕᓃᓪᓗ ᐅᖁᒤᒃᓴᕐᖕᓂᖏᓐᓂᒃ ᐃᑲᔪᕐᓗᒋᑦ, ᓇᖕᒥᓂᕐᓗ ᐃᑦᔪᕐᖕᓇᖅᓯᑎᑕᐅᑦᑍᓕᓗᓂ ᓯᓚᕐᔪᐊᕐᖕᒥᐅᑦ ᐱᐅᓯᖏᓐᓄᑦ.
Currently Selected:
ᔧᒥᓯᐅᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.