ᕼᐊᒊᑉ ᐊᒡᓚᖏᑦ 1
1
ᐊᑕᓂᐅᑉ ᑎᓕᓯᓂᖏᑦ ᑐᒃᓯᐊᕐᕕᒡᔪᐊᖅ ᓴᓇᔭᐅᒃᑲᓐᓂᖁᓪᓗᒍ
1 #
ᐄᓱᕋ 4:24—5:2; 6:14. ᐊᖓᔪᖅᑳᕐᔪᐊᖅ ᑍᕉᓯ ᐴᕐᓯᐊᒥᐅᑕᖅ ᐊᐅᓚᑦᓯᓕᖅᑎᓪᓗᒍ, ᐊᕐᕌᒎᑉ ᐂᑉᐸᖓᓂ ᑕᖅᑮᑦ ᐱᖓᓲᔪᖅᑐᖓᓐᓂ, ᑕᖅᑭᐅᑉ ᐱᒋᐊᕐᖕᓂᖓᑕ ᐅᓪᓗᖏᑕ ᓯᕗᓪᓕᖅᐹᖓᓂ, ᐊᑕᓂᐅᑉ ᐅᖃᐅᓯᖓ ᐅᖃᖅᑎᖓᒍᑦ ᕼᐊᒊᒃᑰᖅᐳᖅ ᔨᕈᐸᐱᐅᓪᒧᑦ ᓯᐅᓪᑎᐅᑉ ᐃᕐᖕᓂᖓᓄᑦ, ᐊᐅᓚᑦᓯᔨᒧᑦ ᔫᑕᒥ, ᔮᓱᐊᒧᓪᓗ ᔨᕼᐅᔭᑕᐅᑉ ᐃᕐᖕᓂᖓᓄᑦ, ᑐᓂᕐᕈᓯᖅᑎᑦᔨᓰᑦ ᐊᖓᔪᖅᑳᖓᓐᓄᑦ.
2ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᒫ ᐅᖃᖅᐳᖅ, “ᐅᑯᐊ ᐃᓄᐃᑦ ᐃᒫᒃ ᐅᖃᖅᐸᒃᐳᑦ, ‘ᓇᓪᓕᐅᑎᓐᖏᓚᖅ, ᐊᑕᓂᐅᑉ ᓴᓇᒋᐊᖁᔨᓂᖓ ᐃᒡᓗᖁᑎᒥᓂᒃ.’” 3ᑕᕝᕙ ᐊᑕᓂᖅ ᕼᐊᒊᒧᑦ ᐅᖃᖅᐳᖅ, ᐃᒫᒃ ᐅᖃᖅᓗᓂ: 4“ᐊᑲᐅᓈᖅᓯᒪᕚ ᐃᓕᑦᓯ ᐃᒡᓗᖃᑦᓯᐊᖅᑐᐊᓘᑎᓪᓗᓯ, ᐊᑕᓂᐅᑉ ᐃᒡᓗᖓ ᓱᕋᒃᓯᒪᑎᓪᓗᒎ? 5ᑍᒤᒻᒪᑦ ᒫᓐᓇ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ: ‘ᐃᓱᒪᒋᓚᐅᖅᓯᐅᒃ ᖃᓄᐃᓕᐅᖅᓯᒪᓂᓯ! 6ᑲᓐᖓᖅᓱᐃᓚᐅᖅᐳᓯ ᐊᖏᔪᓂᒃ, ᑲᑎᖅᓱᖅᑕᓯ ᒥᑭᔫᑎᓪᓗᒋᑦ; ᓂᕆᕗᓯ, ᐊᕿᐊᑦᑐᕈᓐᓇᕋᓯ; ᐃᒥᖅᐳᓯ, ᐃᒥᕈᐃᕈᓐᓇᕋᓯ, ᐊᓐᓄᕌᕋᓗᐊᖅᐳᓯ ᐅᖅᑰᓯᓇᓯᓕ, ᑮᓇᐅᔭᓕᐅᖅᑐᕐᓗ, ᐴᖅᑬᕗᖅ ᑮᓇᐅᔭᒥᓂᒃ ᐃᒃᐱᐊᕐᔪᖕᒧᑦ ᐊᖕᒪᔪᓕᖕᒧᑦ.’ 7ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ: ‘ᐃᓱᒪᒋᓚᐅᖅᓯᐅᒃ ᖃᓄᐃᓕᐅᖅᓯᒪᓂᓯ! 8ᖃᖅᑲᒧᐊᓕᕆᑦᓯ ᐂᒃᓯᖅᓗᓯ ᕿᔪᖕᓂᒃ ᑐᒃᓯᐊᕐᕕᒡᔪᐊᕐᓗ ᓴᓇᔭᖅᑐᓕᖅᓯᐅᒃ, ᖁᕕᐊᒋᓕᕐᖕᓂᐊᕋᒃᑯ ᐱᓐᓇᕐᖕᓇᖅᓗᖓᓗ ᓴᖅᑭᓐᓂᐊᕋᒪ.’ ᐊᑕᓂᖅ ᐅᖃᖅᐳᖅ.
9“ᑕᑯᔪᒪᓚᐅᖅᐳᓯ ᐊᖏᔪᒥᒃ, ᒥᑭᔪᒥᒡᓕ ᑕᑯᕗᓯ, ᐊᖏᕐᕋᐅᑎᔭᓯᓗ ᑎᒃᑕᐅᑎᓚᐅᖅᐸᒃᑲ, ᓱᖕᒫᑦ? ᐊᑕᓂᖅ ᐅᖃᖅᐳᖅ, ‘ᐃᒡᓗᒐ ᓱᕋᒃᓯᒪᖕᒪᑦ, ᐃᓕᑦᓯ ᐊᑐᓂᑦ ᐃᒡᓗᑦᓯᓐᓂᒃ ᓴᓇᑐᐃᓐᓇᖅᑎᓪᓗᓯ,’ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ. 10‘ᑍᒤᒻᒪᑦ, ᕿᓚᐅᑉ ᓯᓚᓗᒃ ᓄᖅᑲᖓᑎᑉᐹ ᓱᓇᒥᒡᓘᓐᓃᑦ ᓄᓇᕐᔪᐊᕐᖕᒥ ᐱᕈᖅᑐᖃᕈᓐᓇᕋᓂ. 11ᓄᓇ ᐸᓂᖅᑎᓚᐅᖅᐸᕋ ᐱᕈᖅᓰᕖᑦ ᖃᖅᑬᓪᓗ, ᓂᐊᖂᔭᒃᓮᓪᓗ, ᕔᓂᒃᓮᓪᓗ, ᐱᕈᖅᑐᐃᓪᓗ ᐅᖅᓱᖏᑦ ᓱᓇᑐᐃᓐᓁᓪᓗ ᓄᓇᐅᑉ ᐱᕈᖅᑎᑕᖏᑦ, ᐃᓄᖕᓄᑦ ᐆᒪᔪᖁᑎᑦᓯᓐᓄᓪᓗ, ᐊᒡᒐᑦᓯᓗ ᓴᓇᔭᓕᒫᖏᑦ.’”
ᐃᓄᐃᑦ ᓈᓚᖕᓂᖏᑦ ᐊᑕᓂᐅᑉ ᐱᖁᔨᓂᖓᓂᒃ
12ᑕᕝᕙ ᔨᕈᐸᐱᐅᓪ ᓯᐅᓪᑎᐅᑉ ᐃᕐᖕᓂᖓ, ᔮᓱᐊᓗ ᔨᕼᐅᔭᑕᐅᑉ ᐃᕐᖕᓂᖓ ᑐᓂᕐᕈᓯᖅᑎᑦᓯᔨᓄᑦ ᐊᖓᔪᖅᑳᖅ, ᐃᓄᐃᓪᓗ ᐊᒥᐊᒃᑯᐃᑦ ᓈᓚᓚᐅᖅᐳᑦ ᐊᑕᓂᐅᑉ ᒎᑎᖓᑦᑕ ᓂᐱᖓᓂᒃ, ᕼᐊᒊᓪᓗ ᒎᑎᐅᑉ ᐱᔪᖃᓛᖅᑐᒥᒃ ᐅᖃᖅᑎᖓᑕ ᐅᖃᐅᓯᖏᓐᓂᒃ, ᐊᑕᓂᐅᑉ ᑖᓐᓇ ᑎᓕᓚᐅᕐᖕᒪᒍ, ᐃᓄᐃᓪᓗ ᓯᕘᕋᓕᖅᐳᑦ ᐊᑕᓂᐅᑉ ᓇᔫᑎᓂᖓᓂᒃ. 13ᑕᕝᕙ ᕼᐊᒊ, ᐊᑕᓂᐅᑉ ᐅᖃᖅᑎᖓ, ᐊᑕᓂᐅᑉ ᐅᖃᐅᓯᖏᓐᓂᒃ ᐃᓄᖕᓄᑦ ᐅᖃᖅᐳᖅ: “ᐃᓚᒋᕙᑦᓯ, ᐊᑕᓂᖅ ᐅᖃᖅᐳᖅ.” 14ᐊᑕᓂᐅᑉ ᔨᕈᐸᐱᐅᓪ ᓯᐅᓪᑎᐅᑉ ᐃᕐᖕᓂᖓᑕ ᐊᓂᕐᖕᓂᖓ ᐊᐅᓚᑦᔭᒃᑎᓚᐅᖅᐹ, ᑖᓐᓇ ᐊᐅᓚᑦᓯᔨᐅᔪᖅ ᔫᑕᒥᐅᓄᑦ, ᔮᓱᐊᓪᓗ ᔨᕼᐅᔭᑕᐅᑉ ᐃᕐᖕᓂᖓᑕ ᐊᓂᕐᖕᓂᖓ ᐊᐅᓚᑦᔭᒃᑎᓚᐅᖅᐹ ᑐᓂᕐᕈᓯᖅᑎᑦᓯᔨᓄᑦ ᐊᖓᔪᖅᑳᖅ, ᐃᓄᐃᓪᓗ ᐊᒥᐊᒃᑯᓕᒫᑦ ᐊᓂᕐᖕᓂᖏᑦ, ᑕᕝᕙ ᑲᑎᕗᑦ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑕ ᒎᑎᒥᒃᑕ ᐃᒡᓗᖓᓂᒃ ᓴᓇᔭᖅᑐᓕᖅᓗᑎᒃ, 15ᐅᓪᓗᐃᑦ 24ᖓᓂ, ᑕᖅᑮᑦ ᐱᖓᓲᔪᖅᑐᖓᓂ, ᑍᕉᓯ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒎᑉ ᐂᑉᐸᖓᓂ.
Currently Selected:
ᕼᐊᒊᑉ ᐊᒡᓚᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.