ᑯᕉᓂᑲ ᐂᑉᐸᖏᑦ 1
1
ᓲᓗᒨᓂᐅᑉ ᑐᒃᓯᐊᕐᖕᓂᖓ ᓯᓚᑐᓂᖃᕈᒪᓪᓗᓂ
ᐊᑕᓃᑦ ᓯᕗᓪᓖᑦ 3:1-15
1ᓲᓗᒨᓂ ᑍᕕᑎᐅᑉ ᐃᕐᖕᓂᖓ ᐊᐅᓚᑦᓯᓕᓚᐅᖅᐳᖅ ᐊᑕᓂᐅᕕᖕᒥᓂ, ᐊᑕᓂᐅᓪᓗ ᓲᓗᒨᓂᐅᑉ ᒎᑎᖓᑕ ᓇᔪᓚᐅᖅᐹ ᐊᔪᖏᑦᑐᕐᔪᐊᓐᖑᖅᑎᓪᓗᒍᓗ.
2ᓲᓗᒨᓂ ᐃᓴᕆᐊᓕᒥᐅᓕᒫᓄᑦ ᐅᖃᓪᓚᓚᐅᖅᐳᖅ ᐊᖓᔪᖅᑳᐅᑎᓄᑦ 1,000ᓄᑦ 100ᓄᓪᓗ, ᐃᓱᐊᖅᓮᔨᓄᑦ, ᓯᕗᓕᖅᑎᓕᒫᓄᓪᓗ ᐃᓴᕆᐊᓕᒦᑦᑐᓄᑦ, ᐊᖓᔪᖅᑳᖑᔪᓄᓪᓗ ᐃᓚᒌᓄᑦ. 3ᓲᓗᒨᓂᓗ, ᑲᑎᒪᔪᓕᒫᓪᓗ ᐃᓚᒋᓪᓗᒋᑦ ᒋᐱᐅᓂᒧᑦ ᐂᕗᑦ ᐱᓪᓗᐊᑕᕆᔭᐅᔪᒧᑦ; ᑐᐱᕐᖕᒧᑦ ᒎᑎᒧᑦ ᑐᒃᓯᐊᕐᕕᐅᕙᒃᑐᒧᑦ, ᐊᑕᓂᐅᑉ ᐱᔨᖓᑕ ᒨᓯᓯᐅᑉ ᓴᓇᓚᐅᖅᑕᖓᓄᑦ ᐃᓄᖃᔪᐃᑦᑐᒥ. 4#ᓴᒧᐃᓕ ᐂᑉᐸᖏᑦ 6:1-17; ᑯᕉᓂᑲ ᓯᕗᓪᓖᑦ 13:5-14; 15:25—16:1.(ᑍᕕᑎᐅᑉ ᑕᒪᐅᓐᖓᓚᐅᕐᖕᒪᒍ ᒎᑎᐅᑉ ᐊᖏᖃᑎᒌᖕᓂᖓᑕ ᐃᒃᓯᕐᕕᖓ ᑭᕆᐊᑦ-ᔨᕆᒻᒥᑦ ᐃᓂᒃᓴᓕᐅᖅᓗᒍ ᑐᐱᓕᐅᓚᐅᕐᖕᒪᑦ ᑖᑦᓱᒪ ᐃᓂᒃᓴᖓᓂᒃ ᔨᕉᓴᓕᒥ.) 5#ᒨᓯᓯ ᐂᑉᐸᖏᑦ 38:1-7.ᑐᓂᕐᕈᓯᕐᕕᒃ ᑲᓐᓄᔭ ᐱᔭᓕᐅᑉ ᐅᕆᐅᑉ ᐃᕐᖕᓂᖓᑕ, ᕼᐊᕆᐅᑉ ᐃᕐᖑᑕᖓᑕ ᓴᓇᓚᐅᖅᑕᖓ, ᑕᕝᕙᓃᑉᐳᖅ ᐊᑕᓂᐅᑉ ᑐᐱᖓᓂ. ᓲᓗᒨᓂᓗ ᑲᑎᒪᔪᓕᒫᓪᓗ ᑕᕝᕙᓂ ᑐᒃᓯᐊᖅᓗᑎᒃ ᐊᑕᓂᖅ ᐊᐱᖅᓱᖅᐹᑦ. 6ᓲᓗᒨᓂᓗ ᒪᔪᕋᖅᐳᖅ ᑐᓂᕐᕈᓯᕐᕕᖕᒧᑦ ᑲᓐᓄᔭᒧᑦ ᐊᑕᓂᐅᑉ ᓵᖓᓄᑦ, ᑐᐱᕐᖕᒥ ᑐᒃᓯᐊᕐᕕᐅᖃᑦᑕᖅᑐᒥ, ᑕᕝᕙᓂᓗ ᑐᓂᕐᕈᓯᖅᐳᖅ 1,000ᓂᒃ ᐃᑯᐊᓚᑦᓯᓂᒃᑯᑦ ᑐᓂᕐᕈᑎᒃᓴᓂᒃ.
7ᑕᒪᑐᒪᓂᓗ ᐅᓐᓄᐊᒥ ᒎᑎ ᓴᖅᑭᑉᐳᖅ ᓲᓗᒨᓂᒧᑦ, ᐅᖃᐅᑎᓪᓗᒍᓗ, “ᑐᒃᓯᐊᓚᐅᕆᑦ ᓱᓇᒥᒃ ᐅᕙᓐᓄᑦ ᑐᓂᓯᕕᐅᔪᒪᖕᒪᖔᖅᐱᑦ.”
8ᓲᓗᒨᓂᐅᓪᓗ ᒎᑎ ᐅᖃᐅᑎᕚ, “ᓈᒃᑭᒍᓱᕕᒡᔪᐊᖅᓯᒪᒐᕕᑦ ᓇᒡᓕᒍᓱᒃᓗᑎᓪᓗ ᐊᑖᑕᓐᓂᒃ ᑍᕕᑎᒥᒃ, ᐊᖓᔪᖅᑳᕐᔪᐊᓐᖑᖅᑎᓯᒪᕙᕐᖕᒪᓗ ᑖᑦᓱᒥᖓ ᐃᓇᖐᑎᓪᓗᖓ. 9#ᒨᓯᓯ ᓯᕗᓪᓖᑦ 13:16; 28:14.ᐊᑕᓃᕐᓕ ᒎᑏ, ᐊᖏᕈᑎᒋᓚᐅᖅᑍᑦ ᑍᕕᑎᒧᑦ ᐊᑖᑕᓐᓄᑦ ᑲᔪᓯᑎᓕᕈᒃ, ᐊᖓᔪᖅᑳᕐᔪᐊᓐᖑᖅᑎᓚᐅᕋᕕᓐᖓ ᐃᓄᖕᓄᑦ ᐃᓄᒋᐊᒃᑐᕐᔪᐊᓄᑦ ᐳᔪᕋᖅᑎᑐᑦ ᐅᓄᖅᑎᒋᔪᓄᑦ ᓄᓇᕐᔪᐊᒥ. 10ᒫᓐᓇᓕ ᓯᓚᑐᓂᕐᖕᒥᒃ ᖃᐅᔨᒪᓂᕐᖕᒥᒡᓗ ᑐᓂᓯᕕᒋᓚᐅᓐᖓ ᐃᓄᐃᑦ ᓵᖓᓄᐊᖃᑦᑕᖁᓪᓗᖓ, ᑭᐊᓕ ᐊᐅᓚᑦᓯᐊᕈᓐᓇᖅᐰᑦ ᐃᓄᖁᑎᑎᑦ, ᐃᓄᒋᐊᒃᑐᕐᔪᐊᖑᖕᒪᑕ?”
11ᒎᑎᐅᑉ ᓲᓗᒨᓂ ᑭᐅᕚ, “ᑕᒪᓐᓇ ᐆᒻᒪᒻᒥᐅᑕᕆᒐᕕᐅᒃ, ᑐᒃᓯᐊᕈᑎᖃᕐᖕᓇᒡᓗ ᐱᖁᑎᖃᕐᖕᓂᕐᖕᒥᒃ, ᐊᒃᓗᐃᓐᓂᕐᖕᒥᒃ, ᐅᐱᒋᔭᐅᓂᕐᖕᒥᒃ, ᐊᑭᕋᑎᓪᓘᓐᓃᑦ ᓄᖑᑕᐅᖁᓗᒋᑦ, ᐅᕝᕙᓘᓐᓃᑦ ᐃᓅᑯᑖᒍᒪᓂᕐᖕᒥᒃ, ᓯᓚᑐᓂᕐᖕᒥᒡᓕ ᖃᐅᔨᒪᓂᕐᖕᒥᒡᓗ ᑐᒃᓯᐊᕈᑎᖃᕋᕕᑦ ᐊᐅᓚᑦᓯᑦᓯᐊᕈᒪᓪᓗᑎᑦ ᐃᓄᖁᑎᓐᓂᒃ ᐊᖓᔪᖅᑳᕐᔪᐊᓐᖑᖅᑎᑕᐅᕕᒋᔭᕐᖕᓂᒃ, 12ᓯᓚᑐᓂᖅ ᖃᐅᔨᒪᓂᕐᓗ ᐃᓕᖕᓄᑦ ᑐᓂᔭᐅᕗᑦ. ᐊᒃᓗᐃᓐᓂᕐᖕᒥᒃ ᐱᖁᑎᖃᕐᖕᓂᕐᖕᒥᒡᓗ ᐅᐱᒋᔭᐅᓂᕐᖕᒥᒡᓗ ᑐᓂᓯᕕᒋᒋᕙᒋᑦ, ᐊᖓᔪᖅᑳᕐᔪᐊᓄᑦ ᓯᕗᓪᓕᕐᖕᓄᑦ ᑐᓂᔭᐅᓚᐅᖅᓯᒪᖏᑦᑐᒥᒃ, ᑭᖑᓂᕐᖕᓂᓗ ᑍᒤᓪᓗᐊᖅᑐᒥᒃ ᑐᓂᔭᐅᔪᖃᓚᐅᖅᓯᒪᓂᐊᓐᖏᓚᖅ.”
ᐊᖓᔪᖅᑳᕐᔪᐊᑉ ᓲᓗᒨᓂᐅᑉ ᐱᔪᓐᓇᕐᖕᓂᖓ ᐊᔪᖅᓴᖏᓐᓂᖓᓗ
ᐊᑕᓃᑦ ᓯᕗᓪᓖᑦ 10:26-29
13ᑕᕝᕙ ᓲᓗᒨᓂ ᒋᐱᐅᓂᒥᑦ ᐱᓪᓚᕆᐅᑎᑕᐅᔪᒥᓐᖔᖅᓗᓂ, ᑐᐱᕐᖕᒥᑦ ᑲᑎᒪᕕᖕᒥᑦ, ᔨᕉᓴᓕᒧᐊᖅᐳᖅ. ᐃᓴᕆᐊᓕᒥᐅᓂᒡᓗ ᐊᐅᓚᑦᓯᓕᖅᓗᓂ. 14#ᐊᑕᓃᑦ ᓯᕗᓪᓖᑦ 4:26.ᓲᓗᒨᓂᐅᑉ ᑲᑎᖅᓱᖅᐰᑦ ᑲᓕᒊᑦ ᐊᒃᓴᓗᐊᓖᑦ ᕿᒻᒥᕐᔪᐊᒃᑰᖅᑏᓪᓗ; 1,400ᓂᒃ ᑲᓕᒐᖁᑎᖃᓕᖅᐳᖅ ᐊᒃᓴᓗᐊᓕᖕᓂᒃ 12,000ᓂᒡᓗ ᕿᒻᒥᕐᔪᐊᒃᑰᖅᑎᖃᖅᓗᓂᒃ, ᑲᓕᒊᓪᓗ ᐊᒃᓴᓗᐊᓖᑦ ᐃᓂᑖᖅᑎᑉᐰᑦ ᐃᒡᓗᒐᓴᖕᓂ ᐃᓚᖏᓪᓗ ᔨᕉᓴᓕᒥ ᐊᖓᔪᖅᑳᕐᔪᐊᒃᑯᕕᖕᒦᑎᓪᓗᒋᑦ. 15ᐊᖓᔪᖅᑳᕐᔪᐊᕐᓗ ᓴᓇᔭᐅᑎᑦᓯᕗᖅ ᓯᐅᓪᕕᕆᓂᒃ ᒎᓗᓂᒡᓗ ᑕᑯᒃᓴᐅᖏᓐᓇᓕᖅᓗᑎᒃ ᔨᕉᓴᓕᐅᑉ ᐅᔭᕋᖏᑎᑐᑦ, ᕿᔪᐃᓪᓗ ᓰᑕᕇᑦ ᐅᓄᖅᑐᕐᔪᐊᑦ ᐊᑐᐃᓐᓇᐅᑎᑉᐰᑦ ᓇᐹᖅᑐᑎᑐᑦ ᓯᑲᒧᐊᑎᑐᑦ ᓇᑎᕐᖕᓇᒦᑦᑐᑎᑐᑦ. 16#ᒨᓯᓯ ᑕᓪᓕᒪᖏᑦ 17:16.ᓲᓗᒨᓂᓗ ᑎᑭᑎᑦᓯᖃᑦᑕᓚᐅᖅᐳᖅ ᕿᒻᒥᕐᔪᐊᓂᒃ ᐄᑦᔨᑉᑎᒥᑦ ᑭᕕᒥᓪᓗ, ᐊᖓᔪᖅᑳᕐᔪᐊᓪᓗ ᓂᐅᕕᖅᑎᖏᑦ ᑕᒪᒃᑯᓄᖓ ᐊᑭᓖᖃᑦᑕᓚᐅᖅᐳᑦ ᓂᐅᕕᕈᑎᒋᔭᒥᖕᓂᒃ ᑭᕕᒥᒃᑯᓐᓂᒃ. 17ᑎᑭᑎᑦᓯᖃᑦᑕᓚᐅᕆᕗᑦ ᐄᑦᔨᑉᑎᒥᑦ ᑲᓕᒐᕐᖕᓂᒃ ᐊᒃᓴᓗᐊᓕᖕᓂᒃ ᑲᓕᒐᖅ ᐊᒃᓴᓗᐊᓕᒃ ᐊᑕᐅᓯᖅ ᐊᑭᖃᖅᑎᓪᓗᒍ 600ᓂᒃ ᓯᐅᓪᕕᕆᓂᒃ, ᕿᒻᒥᕐᔪᐊᕐᓗ ᐊᑕᐅᓯᖅ ᐊᑭᑲᖅᑎᓪᓗᒍ 150ᓂᒃ; ᑕᒪᒃᑯᐊᑦᑕᐅᖅ ᓂᐅᕕᖅᑕᐅᑎᖃᑦᑕᓚᐅᕆᕔᑦ ᕼᐃᑍᑎᑦ ᐊᖓᔪᖅᑳᕐᔪᐊᖓᓄᑦ ᓯᕆᐊᓪᓗ ᐊᖓᔪᖅᑳᕐᔪᐊᖓᓄᑦ.
Currently Selected:
ᑯᕉᓂᑲ ᐂᑉᐸᖏᑦ 1: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.