UMARKOSI 1
1
UJwanisi umbhabhadisi ulungisa indlela
(Mt 3:1-12; Lk 3:1-18; Jwan 1:19-28)
1Ukuthoma kwevangeli ngoJesu Krestu, iNdodana kaZimu. 2Nakhu okutlolwe encwadini yomphorofidi u-Isaya:
“Ngizokuthumela isithunywa sami ngaphambi kwakho,
esizokulungisa indlelakho;
3iye, ilizwi lorhuwelela erhalawumbeni lisithi,
‘Lungiselani iKosi indlela,
yenzeleni indlela enqophileko!’ ”
4Nje-ke uJwanisi wafika, wabhabhadisa erhalawumbeni bewatjhumayela umbhabhadiso wokutjhuguluka malungana nokucolelwa kwezono. 5Yoke imizana yeJudiya nabo boke abantu beJerusalema baphuma baya kuye. Bavuma izono zabo, wababhabhadisa ngemlanjeni iJordani.
6UJwanisi gade ambatha izambatho ezenziwe ngoboya bekamela, azibophe ngebhande lesikhumba edinini. Gade agoma iintethe neliju lemmangweni. 7Watjhumayela wathi: “Emva kwami kuza onamandla khulu kunami, engingasililitho kobana ngingabe ngiguqe ngitjhaphulule imitjana yamapatlagwanakhe. 8Mina nginibhabhadisa ngamanzi, kodwana yena uzanibhabhadisa ngoMoya oCwengileko.”
Ukubhajadiswa nokulingwa kwakaJesu
(Mt 3:13 – 4:11; Lk 3:21-22; 4:1-13)
9Emihleni leyo kwafika uJesu avela eNazaretha ngeGalile, wabhajadiswa nguJwanisi ngeJordani. 10Kuthe asaphuma ngemanzini, wabona izulu livuleka, uMoya wehlela phezu kwakhe njengezuba. 11Ilizwi lavela ezulwini lithi: “Wena uyiNdodanami ethandekako, ngithabe khulu ngawe.”
12Khonokho uMoya wamusa erhalawumbeni. 13Wahlala lapho amalanga amatjhumi amane, alingwa nguSathana. Bekukhona neembandana, iingilozi zeza zamsiza.
UJesu ubiza ababambi beenhlambi abane
(Mt 4:12-22; Lk 4:14-15; 5:1-11)
14Emva kokubotjhwa kwakaJwanisi, uJesu waya eGalile, watjhumayela ivangeli lakaZimu, 15wathi: “Isikhathi sesifikile! Umbuso kaZimu sewutjhidele! Tjhugulukani, nikholwe ivangeli!”
16Kuthe uJesu asakhamba eqadi kwelwandle leGalile, wabona uSimoni nomfowabo u-Andrisi baphosela inedabo ngelwandle ngombana gade bababambi beenhlambi. 17UJesu wathi kibo: “Ngilandelani, ngizanenza ababambi babantu.” 18Khonokho balisa amanedabo, bamlandela.
19Kwathi sele akhambakhambe ibangana, wabona uJakopo umsa kaZebediya nomfowabo uJwanisi, bebangemkhunjini balungisa amanedabo. 20Msinyazana wababiza, yeke batjhiya uyise uZebediya angemkhunjini kanye neensebenzi bamlandela.
UJesu uqotjha imimoya emimbi
(Lk 4:31-37)
21Baya eKapernawumi, kwathi nakufika iSabatha, uJesu wangena ngesinagogini wathoma ukufundisa. 22Abantu bamangaliswa yindlela uJesu afundisa ngayo ngombana wabafundisa njengomuntu onegunya ingasi ngendlela abavane bafundiswe ngayo bafundisi bomthetho.
23Khonapho gade kunendoda ngesinagogini ebegade inommoya omumbi, yarhuwelela, 24yathi: “Usifunani wena Jesu weNazaretha na? Uze ukuzosibhubhisa na? Ngiyakwazi bona ungubani, ungoCwengileko kaZimu!”
25UJesu wawukhalimela wathi: “Thula, uphume kiyo!”
26Ummoya omumbi warutharutha indoda leyo, waphuma kiyo ngokutlewula okukhulu. 27Abantu barareka khulu kangangobana babuzana babodwa bathi: “Yintobani esiyibonako le? Yifundiso etja nenamandla! Ukhalimela ngitjho nemimoya emimbi, imlalele!”
28Khonokho iindaba ngaye zasabalala nesifunda soke seGalile.
UJesu upholisa abantu abanengi
(Mt 8:14-17; Lk 4:38-41)
29Kuthe bona basuke esinagogini, bakhamba noJakopo noJwanisi baya ekumbeni kaSimoni no-Andrisi. 30Ngesikhatheso umkhwekazi kaSimoni begade alele, aphethwe mgomani. Nje-ke bambika kuJesu khonokho. 31UJesu weza, wambamba ngesandla, wamphakamisa. Umgomani wamlisa, wabenzela ukudla.
32Ngokuhlwa kwamhlokho abantu baletha kuJesu boke ebebagula nabanamadimoni. 33Boke abantu bedorobho babuthelelana emnyango. 34Wapholisa abanengi ebegade bagula baphethwe malwelwe ahlukahlukeneko, bewaqotjha namadimoni amanengi. Azange avumele amadimoni kobana akhulume ngombana bekamazi.
UJesu uthandaza endaweni efihlakeleko
(Lk 4:42-44)
35Ngelanga elilandelako ngesamarimarima, kusese mnyama, uJesu wasikima, waphuma ngekumbeni waya endaweni enganamuntu lapha afika khona wathandaza. 36USimoni nabakhambisani bakhe bakhamba bayomfuna, 37kwathi nabamfunyanako, bakhuza bathi: “Abantu bafunana nawe!”
38Wathi kibo: “Nambani siyeni kwandawo emizini eseduze ukuze ngitjhumayele nakhona. Ngikho lokho engikuphumeleko.”
39Wayikhamba yoke iGalile atjhumayela ngemasinagogini wabo, waqotjha namadimoni.
Indoda enekhwekhwe
(Mt 8:1-4; Lk 5:12-16)
40Indoda enekhwekhwe yeza kuJesu, yamncenga iguqe ngamadolo yathi: “Nakube uyathanda, ungangihlambulula.”
41UJesu wayizwela ubuhlungu, wathabulula isandla sakhe, wayikghwatha wathi: “Ngiyathanda, hlambuluka!” 42Khonokho ikhwekhwe lasuka, yeke yahlambuluka. 43UJesu wayitjhaphulula kobana ikhambe, wayiyalisisa 44wathi kiyo: “Qinisekisa bonyana awutjeli noyedwa ngalokhu. Kodwana khamba uyozibonakalisa kumphristi bese wenza imihlabelo uMosi ayale ngayo mayelana nokuhlanjululwa kwakho, kube bufakazi kibo.”
45Kodwana esikhundleni salokho, indoda leyo yakhamba izikhulumela, irhatjha iindaba zokupholiswa kwayo. Ngebanga lalokho, uJesu azange asakghona ukungena edorobheni bamqalile. Kodwana wahlala ngaphandle kwedorobho eendaweni ezinganabantu. Nanyana kunjalo abantu beza kuye bavela kizo zoke iindawo.
Currently Selected:
UMARKOSI 1: SND12
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 2012. Used with permission. All rights reserved.