KWEBEGALATIYA 1
1
Ukulotjhisa
1UPowula, ompostoli ongaveli ebantwini namkha ongakezi ngabantu kodwana ngoJesu Krestu noZimu uBaba, owavusa uJesu ekufeni, 2kanye nabo boke abazalwana abanami, silotjhisa amabandla aseGalatiya:
3Sithi sinifisela umusa nokuthula okuvela kuZimu uBaba neKosini uJesu Krestu, 4owazinikela ngebanga lezono zethu kobana asihlangule esikhathini lesi sobukhohlakali ukuya ngokwentando kaZimethu nonguBaba. 5Akadunyiswe ngokungapheliko! Amen.
Linye ivangeli
6Ngiyarareka ngombana nimsinyana kangaka ukuhlubuka loyo owanibiza ngomusa kaKrestu, naphendukela evangelini elehlukileko, 7ekhabo lakhona ekungasilivangeli nokuba livangeli. Kuyabonakala bona kunabantu abanihlangahlanganisako, abalinga ukona ivangeli lakaKrestu. 8Kodwana nanyana kungaba ngithi namkha ingilozi evela ezulwini ingatjhumayela elinye ivangeli ngaphandle kwalelo esanitjhumayeza lona, ayithuweleliswe! 9Njengombana besele sitjhwile, ngisabuyelela godu ngithi: Nakube kunomuntu onitjhumayeza ivangeli ngaphandle kwalelo esanitjhumayeza lona, akathuweleliswe loyo.
10Kghani nje-ke ngizifunela ukuthandwa babantu namkha nguZimu na? Kghani ngifuna ukuthabisa abantu? Nakube bengisafuna ukuthabisa abantu, bengingeze ngaba likhoboka lakaKrestu.
Ubupostoli bakaPowula
11Akhese nginitjele bazalwana bona ivangeli engilitjhumayelakweli akusiyinto ethonywe babantu. 12Akhange ngilamukele emuntwini, godu azange ngafundiswa lona. Kodwana ngalifumana ngokwambulelwa nguJesu Krestu.
13Nizwile ngepilo ebengiyiphila phambilini ebuJudeni bona bengilitlhagisa kangangani ibandla lakaZimu, ngilinga ukulitjhabalalisa. 14Besele nginendima ekulu ebuJudeni, sele ngiphala namaJuda amanengi abontanga begodu bengitjhabatjheka khulu ngamasiko wabobaba.
15Kodwana uZimu owangihlukanisela ngingakabelethwa, wangibiza ngomusa wakhe, wakuthabela 16ukubonakalisa iNdodanakhe kimi ukuze ngimtjhumayele kabatjhili. Azange ngikhulumisane nenyama neengazi 17namkha ngiye eJerusalema ukuyokubonana nalabo ebegade babapostoli ngaphambi kwami. Kodwana ngasuka khonokho ngaya e-Arabhiya, kwathi ngemva kwesikhathi ngabuyela eDamaseku. 18Ngemva kweminyaka emithathu, ngakhuphukela eJerusalema kobana ngiyokwazana noPitrosi. Yeke ngahlala naye amalanga alitjhumi nahlanu. 19Akhange ngibabone abanye abapostoli ngaphandle kwakaJakopo, umfowabo leKosi.
20Lokhu enginitlolela khona kuliqiniso phambi kwakaZimu.
21Ngemva kwalokho ngaya eSiriya neSilisiya. 22Bengingaziwa ubuso nobuso emabandleni weJudiya akuKrestu. 23Bebezwe kwaphela umbiko ngami othi: “Umuntu obegade azumana nathi phambilini, kwanjesi sele atjhumayela ukukholwa ebegade alinga ukukutjhabalalisa.” 24Yeke badumisa uZimu ngebanga lami.
Currently Selected:
KWEBEGALATIYA 1: SND12
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 2012. Used with permission. All rights reserved.