Makətūbə̄ ń Pol ndang adə̄ Titə ní 1
1
Pol rāā Titə lápə́ya
1I mā Pol n m-ə́la kə makətūbūú mādə̄sí ní. Mā i nge kəla yā Nə́ɓā ō, ngōmbang kəla yā Jeju *Kərist ō. Əndān̄ dɔḿ tə́ kadə̄ m-ɔ́jə́ ngé gə̄ ń Nə́ɓā gə̄rādə́ ní najə̄ kadə̄ taān̄ kem ō, kadə̄ m-ə́dádə́ najə̄ kə́ rɔ̄kum kə́ əhɔn̄ naā kə yá̰a̰ rāā kə́ kə gō ń Nə́ɓā ndigə ní kadə̄ gerə̄n̄ ō. 2Yā kadə̄ nin̄-əndān̄ kemdə́ dɔ ndi kə kumuú kə́ ngándáńg tə́. Nə́ɓā ń sor̄ aĺ ní, ənī ndūn kété no yá̰a̰ gə̄ tə́ malang yā kadə̄jí ndi kə kumuú kə́ ngándáńg ngeé ń toō. 3Dan ń kum mbang yān asə anī, ni-teē kə najə̄neé kə̄ ndágá kə ta kūl najə̄ yān. Najə̄ ndi kə kumuú ní i tū kəla ń əndān̄ taḿ tə́ ní. Ba i Nə́ɓā nge kajəjí n ɔsə seḿ ta kənī mbērən ní.
4m̄-ndang makətūbə̄ ń toō m-ə́lań m-ādə̄ i ḭ̄ Titə, ngōnə̄ḿ kə́ rɔ̄kum sɔɔ̄ń taā kem kə́ kógə̄ḿ beē kə́ j-əga naā dɔ tə́. Ādə̄ Bɔbə̄jí Nə́ɓā nin̄ kə Jeju Kərist nge kajəjí, rāān̄ kem majə seí ō, sɔlə̄n̄ kemií ō.
Kəla ń əndān̄ dɔ Titə tə́ gō nang kə́ Kəretə tə́ ní
5M-ə́ya̰ī gō nang kə́ Kəretə tə́ i yā kadə̄ ə̄ndā dɔ yá̰a̰ gə̄ ń na̰yn̄ ɓáý ní danaá kə gōó ō, kadə̄ ə̄ndā *kum kɔɔ̄ gə̄ kə dɔ ɓē gə̄ kógə̄ḿ kógə̄ḿ tītə̄ ń m-ə́daīń ní ō. 6Majə kadə̄ najə̄ gətóo dɔ *kum kɔɔ̄ tə́ ō, kadə̄ nə̄yá̰n i kógə̄ḿ beē ō, ngánən gə̄ taān̄ kem najə̄ yā Nə́ɓā ō, deē əndā najə̄ háĺ kə́ gō tə́ aĺ, aláa dum̄ naā dɔdə́ tə́ aĺ ō. 7Nge kɔr no ngé kán̄ naā gə̄ ń i de kə́ əndān̄ dɔn tə́ kadə̄ əndā kumən gír yá̰a̰ gə̄ yā Nə́ɓā tə́ ní, majə kadə̄ ni i de kə́ najə̄ gətóo dɔn tə́. Adə̄ ni i de kə́ nge kídə̄ deē aĺ ō, nge wōn̄g aĺ ō, nge ka̰ȳ yá̰a̰ aĺ ō, de kə́ nge sāā nar kə ta róbə́ kə́ gō tə́ aĺ aĺ ō. 8Majə kadə̄ ni i de kə́ nge kəhɔ de gə̄ mbā ō, de kə́ yá̰á̰ kə́ majə nelə̄n ō. Ni a a̰a̰ i yá̰á̰ kə́ majə tá a rāā ō, i de kə́ nge rāā yá̰á̰ kə́ gōtə́ ō, yá̰á̰ kə́ nel̄ Nə́ɓā ō, de kə́ a əhɔ rɔ̄n dɔ yá̰á̰ tə́ ō. 9Ni i nge kəhɔ najə̄ kə́ to kadə̄ deē taā kem kadə̄ ngan̄g, adə̄ i najə̄ kə́ əhɔn̄ naā kə yá̰á̰ ń ni-ndóō ní. Loo ń noō tə́ ni-asə kadə̄ de gə̄ tɔ́gə kə yá̰á̰ ndóō kə́ rɔ̄kum ō, ni-asə kɔjə kə̄ ndágá kadə̄ najə̄ yā ngé mbātə́ najə̄ gə̄ i rɔ̄kum aĺ ō.
10Tɔdɔ̄ ngé dum̄ naā gə̄ ō, ngé kɔr̄ najə̄ kə́ kanjə̄ kumən gə̄ ō, ngé gól̄ de gə̄ ō i ngá̰ý. Ba mandang ɓáa kə́ ngá̰ý gə̄ i dan ngé *kəja mɔtədə́ gə̄ tə́. 11Majə kadə̄ deē utə̄ tadə́ kɔ̄ɔ́, tām̄ nin̄ i ngé nujə kem de gə̄ kə́ kem gír kojə kə́ kógə̄ḿ beē tə́ gə̄ malang kə yá̰á̰ ndóō kə́ majə kadə̄ deē ndóō de gə̄ aĺ tə́. Nin̄-rāān̄ nge ń nuū i yā kəngeń yá̰a̰ kə ta róbə́ kə́ gō tə́ alé. 12Deē kógə̄ḿ dandə́ tə́ kə́ *nge koō ta yādə́ nin̄ kɔ́ gə̄ əda na: Kəretə gə̄ i ngé sor̄ gə̄ tá dejə. Nin̄ i dā̰ kə́ do̰ gə̄. 13Najə̄ ń deē ń nuū əda ní, i najə̄ kə́ rɔ̄kum. Adə̄ majə kadə̄ ī-ndán̄gdə́ tá kadə̄ taā kem yādə́ i taā kem kə́ gō tə́. 14Ādə̄ nin̄-əhɔn̄ gō gotə najə̄ kə́ tūr̄ gidə kadə̄ majə gə̄ yā *Jipə gə̄ aĺ ō, əhɔn̄ gō yá̰a̰ gə̄ ń ngé tūr̄ gidədə́ kɔ̄ɔ́ ta najə̄ kə́ rɔ̄kum tə́ gə̄ ran̄ kə de gēé ta rāā ní aĺ ō. 15De gə̄ ń nin̄ i de gə̄ kə́ unjə̄n̄ *unjə̄ njáý njáý ní, yá̰a̰ malang i yá̰á̰ kə́ unjə̄ *unjə̄ njáý njáý tām̄ yādə́ tə́, banī de gə̄ ń nin̄ i de kə́ yḛr gə̄ ō, nin̄ i ngé taā kem aĺ gə̄ ō ní, yá̰á̰ kə́ *unjə̄ njáý njáý tām̄ yādə́ nin̄ tə́ gətóo. Tɔdɔ̄ kur̄ dɔdə́ ō, kemdə́ ō, i kə́ yḛr. 16Nin̄-ədan̄ na n-gerə̄n̄ Nə́ɓā, banī yá̰a̰ rāādə́ ɔjə kadə̄ nin̄-gerə̄n̄ Nə́ɓā alé rɔ̄kum. Nin̄ i de kə́ majaĺ ngá̰ý gə̄ ō, de kə́ ngé dɔ ngan̄g gə̄ ō, asən̄ rāā yá̰á̰ kógə̄ḿ kə́ majə aĺ ō.
Currently Selected:
Makətūbə̄ ń Pol ndang adə̄ Titə ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad