Tə́da kutə Ngán Israel gə̄ 1
1
Ngán Israel gə̄ i kem dəla loo kə́ Sinai tə́
(1-9)
Tə́dá kutə ngán Israel gə̄ kə́ ta kəga dɔ
1Kɔ́ɔ̄ɓē ɔr̄ najə̄ kə Moijə kem dəla loo kə́ *Sinai tə́, kə ndɔ̄ kə́ ta kəga dɔ yā nāā kə́ nge ko̰ jōó, kem ɓāl̄ ń utə̄ gō nge ń ngán *Israel gə̄ teēn̄əń kɔ̄ɔ́ kem ɓē kə́ Ejiptə tə́ ní. Ɔr̄ najə̄ ní seneé i kem *kújə kənge naā tə́, ədan na:
2Ḭ̄ ō, *Aaro̰ ō, ī-tə́daī ngán Israel gə̄ malang. Ī-ndangiī rī de kə́ dəngam gə̄ malang makətūbūú kə gō gír kaa yādə́ gēé ō, gír kojə yādə́ gēé ō. 3De kə́ dəngam gə̄ malang kə́ ɓāl̄ kutə jōó ō, kə́ ɓāl̄də́ ḭḭ dɔ kutə jōó tə́ kum kə̄ dɔɔ́ ō ń nin̄ i ngé rɔ̄ɔ̄ gə̄ kə́ Israel tə́ ní, ī-tə́daīdə́ kə gō gír ɓūtə̄ yādə́ gēé. 4Ādī de kə́ bo gə̄ kógə̄ḿ kógə̄ḿ kə dɔ gír ɓē gēé tə́dan̄də́ sesí. 5Rī de gə̄ ní n toó:
Elisur ngōn̄ Sedeur tām̄ yā ngán Ruben gə̄ tə́.
6Selumiel ngōn̄ Surisaday tām̄ yā ngán Simeo̰ gə̄ tə́.
7Nason ngōn̄ Aminadab tām̄ yā ngán *Juda gə̄ tə́.
8Netanel ngōn̄ Suar tām̄ yā ngán Isakar gə̄ tə́.
9Eliab ngōn̄ Helon tām̄ yā ngán Jabulo̰ gə̄ tə́.
10Elisama ngōn̄ Amihud tām̄ yā ngán *Epəraim ngōn̄ Jəjep tə́.
Gamliel ngōn̄ Pedasur tām̄ yā ngán Manase ngōn̄ Jəjep tə́.
11Abidan ngōn̄ Gidoni tām̄ yā ngán Benjamḛ gə̄ tə́.
12Ahiejer ngōn̄ Amisaday tām̄ yā ngán Dan tə́.
13Pagiel ngōn̄ Okəran tām̄ yā ngán Aser gə̄ tə́.
14Eliasap ngōn̄ Dewel tām̄ yā ngán Gad tə́.
15Ahira ngōn̄ Enan tām̄ yā ngán Nepətali gə̄ tə́.
16De gə̄ kə́ dan ngán *Israel gə̄ tə́ ń ɓārə́n̄də́ kadə̄ ndin̄ dɔ gír ɓē yādə́ gə̄ tə́ ní n noó. Nin̄ i ngol ngé rɔ̄ɔ̄ gə̄ kə́ Israel tə́. 17Moijə nin̄ kə *Aaro̰ ɔyn̄ de gə̄ ní adə̄ ərōn̄də́ tə́, 18ba ɔsən̄ dɔ ngán *Israel gə̄ malang naā tə́ kə ndɔ̄ kə́ ta kəga dɔ yā nāā kə́ nge ko̰ jōó. Ndangən̄ rī ngé gə̄ malang ń ɓāl̄də́ əla gír dɔ kutə jōó tə́ kum kə̄ dɔɔ́ ní makətūbūú kə gō gír kaadə́ gēé ō, kə gō gír kojə yādə́ gēé ō. 19Moijə tə́dádə́ kem dəla loo kə́ *Sinai tə́ tītə̄ ń Kɔ́ɔ̄ɓē ədanəń ní.
20-43Tə́dan̄ ngán Israel gə̄ i kə gō gír kaadə́ gēé ō, kə gō gír kojə yādə́ gēé ō. De kə́ dəngam gə̄ malang ń ɓāl̄də́ əla gír dɔ kutə jōó tə́ kum kə̄ dɔɔ́ á nin̄ i ngé rɔ̄ɔ̄ gə̄ ní, ndangən̄ rīdə́ makətūbūú. Əlan̄ gír i dɔ gír ɓē yā Ruben hágə Jakob tə́. Kutə de gə̄ ń tə́dan̄də́ ní n toó:
De gə̄ kə́ gír ɓē yā Ruben tə́ i deē 46 500.
De gə̄ kə́ gír ɓē yā Simeo̰ tə́ i deē 59 300.
De gə̄ kə́ gír ɓē yā Gad tə́ i deē 45 650.
De gə̄ kə́ gír ɓē yā *Juda tə́ i deē 74 600.
De gə̄ kə́ gír ɓē yā Isakar tə́ i deē 54 400.
De gə̄ kə́ gír ɓē yā Jabulo̰ tə́ i deē 57 400.
De gə̄ kə́ gír ɓē yā *Epəraim ngōn̄ Jəjep tə́ i deē 40 500.
De gə̄ kə́ gír ɓē yā Manase ngōn̄ Jəjep tə́ i deē 32 200.
De gə̄ kə́ gír ɓē yā Benjamḛ tə́ i deē 35 400.
De gə̄ kə́ gír ɓē yā Dan tə́ i deē 62 700.
De gə̄ kə́ gír ɓē yā Aser tə́ i deē 41 500.
De gə̄ kə́ gír ɓē yā Nepətali tə́ i deē 53 400.
44De gə̄ ń Moijə ō, *Aaro̰ ō, de gə̄ kə́ gə̄rān̄də́ kə dɔ gír ɓē kə́ kutə gidə i jōó gēé ō tə́dan̄də́ ní, kutədə́ n noó. 45Ngán Israel gə̄ ń tə́dan̄də́ kə gō gír kojə yādə́ gēé á i ngé kə́ ɓāl̄də́ ḭḭ dɔ kutə jōó tə́ kum kə̄ dɔɔ́ ń nin̄ i ngé rɔ̄ɔ̄ gə̄ kə́ Israel tə́ ní, 46kutədə́ malang i deē 603 550.
Kəla kə́ sɔɔ́ dɔ ngán Lebi gə̄
47Tə́dan̄ de gə̄ kə́ gír ɓē yā Lebi tə́ gə̄ naā tə́ kə gotə ngán *Israel gēé alé, 48tām̄ Kɔ́ɔ̄ɓē əda Moijə na:
49Ā ī-tə́da de gə̄ kə́ gír ɓē yā Lebi tə́ ō, ā ī-ndang rīdə́ ō, naā tə́ kə gotə ngán *Israel gēé alé. 50Adə̄də́ kəla kə́ dɔ kújə́ ń *ndū najə̄ yā Nə́ɓā i kemeé tə́ ní ō, kə́ dɔ yá̰a̰ rāā kəla gə̄ malang kə́ tū tə́ tə́ ō. A ətōn̄ kújə yā Nə́ɓā ní ō, yá̰a̰ rāā kəla gə̄ malang kə́ tū tə́ ō. A rāān̄ kəla kə́ tām̄ yā kújə́ ní tə́ ō, a ndin̄ ɓē i kə gō gidií ō. 51Ta ndɔ́tə̄ kə kújə yā Nə́ɓāá anī i *ngán Lebi gə̄ n a tútən̄ ní ō, ta dəba anī i nin̄ n a udən̄ ní ō. De kə́ karī ń a aw̄ rɔ̄ɔ̄ tə́ ní a tɔ̄l̄nən̄ kɔ̄ɔ́. 52Ngán Israel gə̄ a ndin̄ i kə gō ɓūtə̄də́ gēé kem gérger yādə́ gə̄ tə́ kə gō gidə dərapóo rɔ̄ɔ̄ yādə́. 53Banī *ngán Lebi gə̄ a ndin̄ ɓē i kə gō gidə kújə́ ń *ndū najə̄ yā Nə́ɓā i kemeé tə́ ní, yā rāań kəla. Loo ń noō tə́ wōn̄g a rāām̄ kə ngán *Israel gēé alé. 54Ngán Israel gə̄ rāān̄ yá̰a̰ malang ń Kɔ́ɔ̄ɓē əda Moijə ní.
Currently Selected:
Tə́da kutə Ngán Israel gə̄ 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad