Makətūbə̄ yā Ijai 1
1
Gāngə̄n̄ sarya dɔ Juda tə́ ō, Jerusalem tə́ ō
(1-5)
1Yá̰á̰ kə́ dɔ ɓē ko̰o̰ yā *Juda tə́ ō, dɔ ɓē kə́ Jerusalem tə́ ō ń Ijai kə́ ngōn̄ Amots a̰ā̰ ní n toó. Ni-a̰a̰ yá̰a̰ gə̄ ní i dan ń Ojias ō, Yotam ō, Akaj ō, gō tə́ anī i Ejekias ō i mban̄g gə̄ kə́ Juda ní.
Gír de kə́ ger̄ najə̄ aĺ gə̄
2Dɔ rā̰, ōō! Ba ḭ̄ dɔ nang, ī-nēl̄ mbīí!
I Kɔ́ɔ̄ɓē n a ɔr̄ najə̄ ní:
M-ūl̄ ngán gə̄ adə̄ tɔgən̄,
m-ə̄tō ngán gə̄,
banī nin̄ əsōn̄ wōn̄g taḿ tə́ kɔ̄ɔ́.
3Man̄g ger̄ kɔ́ɔ̄n ō,
kərō ger̄ loo ń kɔ́ɔn a adə̄n yá̰a̰ kəsa tū tə́ ní ō.
Banī *Israel ger̄ yá̰á̰ kógə̄ḿ alé,
gír deē yāḿ gə̄ gerə̄n̄ najə̄ alé.
Loo gír deē yāḿ gə̄ kə́ yá̰á̰ kógə̄ḿ rāā aĺ gətóo
4I yá̰á̰ kə́ to kum kaȳ aĺ kə́ ba̰ý beē!
Sḭḭ̄ nápar de gə̄ kə́ najə̄ i dɔdə́ tə́ gə̄,
gír de gə̄ kə́ najə̄ tɔ̄l̄ deē i ngá̰ý dɔdə́ tə́ gə̄!
Sḭḭ̄ i gír de kə́ ngé ngān̄g róbə gə̄,
ngáń kə́ nujə kɔ̄ɔ́ gə̄!
Sḭḭ̄ ə́ya̰ī Kɔ́ɔ̄ɓē kɔ̄ɔ́,
usəsí dɔ Nə́ɓā kə́ *táĺ yā Israel tə́ alé.
Sḭḭ̄ ī-tūrī gidəsí tan tə́ kɔ̄ɔ́.
5I loosí kə́ rá n i yā kənda ní?
Dɔsí i do malang.
Kújə́ mósə́sí kə taá
i kə́ mo̰y rāān.
6Ḭḭ njasí tə́ bátə́ dɔsí tə́ ní,
loosí kógə̄ḿ kə́ yá̰a̰ rāā aĺ gətóo.
Rɔ̄sí malang i do ō, gotə ndéy ō,
do kə́ ta ra kə wōyōó ō.
Deē tə́go ta aĺ ō, deē ndem̄ ta aĺ ō,
deē rāā yibə̄ ta tə́ aĺ ō.
7Ɓē yāsí to i tītə̄ dəla loo kə́ rɔ̄nel̄ gətóo tū tə́ beē,
hor nujəń kɔ̄ɔ́.
Kōō yāsí gə̄ ń ī-sāāī ní, tə̄rā gə̄ əsan̄ ta kumsí tə́.
Ndɔr̄ yāsí gə̄ i kə́ nujəń kɔ̄ɔ́ ō,
yá̰á̰ kə́ tū tə́ kə́ to kə gōó gətóo ō,
tītə̄ loo ń ngé taā loo gə̄ nujənə̄ń beē ní.
8I ɓē kə́ *Siyo̰ ngóy n teē ní.
Ni to tītə̄ dabə kə́ ra kem
ndɔr̄ *kāgə̄ nduú gə̄ tə́ beē,
tītə̄ kújə ngɔm̄ kə́ ra
kem ndɔr̄ kosə́ gə̄ tə́ beē,
tītə̄ ɓē kə́ áskar yā madə̄ ba̰ā̰ gə̄ gīrə̄n̄ gidə beé.
9Ré Kɔ́ɔ̄ɓē kə́ bo kə́ tɔ́gən i ngá̰ý,
əya̰ de kə́rēý gə̄ danjí tə́ adə̄
ndin̄ kə kumdə́ ɓēé loojí aĺ anī,
j-a jə-toī i tītə̄ ɓē kə́ Sodom beé ō,
j-a jə-teēī naā i kə ɓē kə́ Gomor ō.
Rāā kəla kadə̄ Nə́ɓā kə́ nel̄ Nə́ɓā aĺ ngá̰ý
10Sḭḭ̄ ngār gə̄ kə́ Sodom, ōōī najə̄ yā Kɔ́ɔ̄ɓē.
Sḭḭ̄ gír de kə́ Gomor gə̄, ī-nēlī mbīsí ōōiń yá̰á̰ ndóō yā Nə́ɓā yājí.
11Kɔ́ɔ̄ɓē əda na: Yá̰a̰ tun̄ yāsí
kə́ ngá̰ý gə̄ ní, m-ā m̄-rāań i rí?
Sḭḭ̄ ī-róōī batə̄ gə̄ kə taá ādə̄mī ō,
ī-ndējə̄mī yibə̄ ngán man̄g gə̄ ō.
Ba yá̰a̰ gə̄ ń noō malang ní, asəm̄ kɔ̄ɔ́.
Mósə man̄g kə́ bəra gə̄ ō,
mósə́ ngán batə̄ gə̄ ō,
mósə bal bə̄yā̰ gə̄ ō ní, m̄-ndigə to̰ alé.
12Dan ń ī-reē ī-raī ta kumḿ tə́ anī,
sḭḭ̄ ī-taaī ndágə loo gə̄ kə́ gīr̄ gidə kújə yāḿ.
Ní m̄-dəjesí kadə̄ ī-rāāī yá̰á̰ ń noō a?
13Ī-dəbaī ta reē kə *yá̰a̰ ndējə̄ gə̄
kə́ kanjə̄ kumən gēé kadəm̄!
Sa, i yá̰á̰ kə́ nelə̄m̄ aĺ ngá̰ý.
Sḭḭ̄ ī-rāāī nāā kə́ teē kijə ō,
nāā ndɔ̄ *sabat ō,
ə̄ndāī kán̄ naā kə́ bo gə̄ ō,
kum mbang nəkɔ́ ń noō tə́ ɓáa
sḭḭ̄ ī-rāāī yá̰á̰ kə́ majaĺ gə̄ ō.
M-ásə́ tə́gā taḿ dɔ tə́ to̰ alé.
14Pétə nāā kə́ teē kijə yāsí gə̄ ō,
pétə́ yá̰a̰ kūjə́ yāsí gə̄ ō ń ī-rāāī ní,
nelə̄m̄ aĺ ngá̰ý.
Nin̄ ɔȳmə̄n̄ ngá̰ý ō,
kɔr rāām̄ ta tə́gā taḿ gíŕdə́ tə́ kɔ̄ɔ́ ō.
15Loo ń ī-sə́raī jīsí yā ndɔ̄yń anī,
m-ún kumḿ ta tə́ kɔ̄ɔ́.
Ká ré ndɔ̄ȳ yāsí gə̄ i ngá̰ý gə̄gē anī,
mā m-ōō alé, tām̄ jīsí i mósə malang.
16Ī-tə́goī rɔ̄sí, ī-rāāī rɔ̄sí
ādī *unjə̄ njáý njáý.
Yá̰á̰ rāāsí kə́ majaĺ gə̄ ní,
āwīiń sa̰y kɔ̄ɔ́ ta kumḿ tə́.
Ādī asəsí rāā yá̰á̰ kə́ majaĺ.
17Ī-ndóōī rāā yá̰á̰ kə́ majə.
Ī-sāāī ta róbə ɓōĺ gidə yá̰á̰ kə́ súmūú.
Deē ń a rējə̄ madə̄n gə̄
kə yá̰a̰ rāā kə́ gōtə́ aĺ ní,
ī-tél ī-reēī seneé dɔ róbə́ kə́ majə tə́.
Ī-rɔ̄ɔ̄ī dɔ yá̰á̰ kə́ súmūú yā ngán hal gə̄ tə́,
úniī najə̄ yā dəyá̰ kə́ ngaa koy gə̄ kə̄ jīsí tə́.
18Kɔ́ɔ̄ɓē əda na:
Ī-reēī ādə̄ jə-tɔ́tī naā dɔ najə̄ tə́.
Ká ré majaĺ yāsí gə̄ kərēnəń i tītə̄ mósə gə̄gē anī,
a télə́n̄ yā ndaa tītə̄ néjə#1.18 Néjə: Á̰a̰ī 2 Sam 23.20 beé ō,
ré kərēn̄ i tītə̄ hor anī,
a télən̄ yā ndaa tītə̄ búy kūbə̄ beé.
19Ré síī ī-ndigiī kadə̄ dɔsí oō loo anī,
ā ásiī kəsa yá̰á̰ kə́ majə gə̄ kə́ kem ɓēé.
20Ba ré sḭḭ̄ ī-mbātíī anī,
ré ī-na̰yiī kə̄ loo kəsō wōn̄g tə́ taḿ tə́ anī,
ā óyiī yo kaskar.
Najə̄ ń Kɔ́ɔ̄ɓē əda ní n noó.
Tə́gon̄ ɓē kə́ Jerusalem adə̄ unjə̄ njáý njáý
21Ɓē kə́ ra dɔ ndūn tə́ ń toō rāā
i ba̰ý n télń dəyá̰ kə́ nge rāā ájə́ba ní?
Kété ní, de gə̄ ɓōlə́n̄ gidə yá̰á̰ kə́ súmūú
kem ɓē kə́ Jerusalem tə́ ō,
i de kə́ gōtə́ gə̄ n ndin̄ kem ɓēé ní ō.
Ba ngɔlaā ń toō i ngé tɔ̄l̄ de gə̄ n
taān̄ loo kem ɓēé ní.
22Jerusalem, gində̄ arjā̰a̰ yāí tél i yedə̄ ō,
kasə *nduú yāí kə́ majə ní
urən̄ man̄ tū tə́ ō.
23Ngār yāí gə̄ i de kə́ ngé kəsō wōn̄g gə̄ ō,
nin̄ ɓoon̄ rɔ̄də́ tū yā ngé ɓogə gə̄ tə́ ō.
Nel̄də́ kə yá̰á̰ gə̄ kə́ adə̄n̄də́ karī ngá̰ý ō,
nin̄ ndin̄ dɔ rɔ̄də́ tə́ yā rāā yá̰a̰ malang
kə́ tām̄ yā kəngeń yá̰á̰ kə́
kadə̄ karī gə̄ ní ō.
Nin̄ rɔ̄ɔ̄n̄ dɔ yá̰á̰ kə́ súmūú
yā ngán hal gə̄ tə́ aĺ ō,
mbātə́n̄ kun najə̄ yā dəyá̰
kə́ ngaa koy gə̄ kə̄ jīdə́ tə́ ō.
24I tām̄ najə̄ ń toō tə́ ń
Kɔ́ɔ̄ɓē kə́ bo kə́ tɔ́gən i ngá̰ý ō,
ni ń i ngol ō, Nə́ɓā yā *Israel
kə́ tɔ́gən to ō, əda najə̄ ń toó ní:
Yá̰á̰ kə́ to kum kaȳ aĺ kə́ ba̰ý beē!
M-ā m̄-dal ba̰ā̰ rɔ̄ḿ dɔ ngé rɔ̄ɔ̄ seḿ gə̄ tə́,
yá̰á̰ kə́ majaĺ ń madə̄ ba̰ā̰ḿ gə̄ rāān̄ seḿ ní,
m-ā m-ə̄gādə́ kə̄rān!
25Jerusalem, m-ā m̄-tūr̄ rɔ̄ḿ yā rɔ̄ɔ̄ seí.
M-ā m̄-rāāī kadə̄ ā ūnjə̄ njáý njáý
tītə̄ kə́ i kə katāá beē,
m-ā m̄-rāā yedīí kadə̄ a yḛḛ̄ kɔ̄ɔ́,
m-ā m-ɔ́ý yá̰á̰ kə́ yḛr yāí gə̄ kɔ̄ɔ́ malang.
26Ngé sarya yāí gə̄
a ton̄ tītə̄ ngé kə́ kété jóo gə̄ ō,
ngé kadə̄ kɔjə̄ yāí gə̄
a ton̄ tītə̄ ngé kə́ kem
ɓāl̄ gə̄ kə́ mānə̄n̄ kɔ̄ɔ́ tə́ ō,
i kə ta kūlə̄ḿ māá.
Gō tə́ anī, a ɓāríīn̄ na
i ɓē yā yá̰a̰ rāā kə́ gōtə́,
na i ɓē kə́ nge ra dɔ ndūn tə́.
27*Siyo̰ a ajə i kə ta kūl̄
ɓōĺ gidə yá̰á̰ kə́ súmūú.
De kə́ kemeé gə̄ ń a télən̄
yā reē rɔ̄ Nə́ɓā tə́ ní,
a ajən̄də́ i kə ta kūl̄ yá̰a̰ rāā kə́ gōtə́.
28Banī yā ngé kəsō wōn̄g gə̄ ō,
ngé rāā majaĺ gə̄ ō ní,
yādə́ i nujə sák sák kə́
a teē dɔdə́ tə́ i gidə kógə̄ḿ.
Ngé gə̄ ń əya̰n̄ Kɔ́ɔ̄ɓē kɔ̄ɔ́ ní,
gír yādə́ a gān̄g.
29Loo ń noō tə́ rɔ̄sí a sɔl̄sí
najə̄ yā kāgə̄ kə́ yā
ɓōĺ gidə gə̄ ń kété nel̄sí ngá̰ý ní tə́.
Ndɔr̄ gə̄ ń ī-gə̄rāīdə́
yā rāā kəla kemeé kadə̄
nə́ɓā kə́ rɔ̄kum aĺ gə̄ ní
a əlan̄ rɔ̄sɔl̄ dɔsí tə́.
30Ā ī-toī tītə̄ kāgə̄ gə̄
kə́ mbīdə́ ur̄ kɔ̄ɔ́ beē,
aláa ā ī-toī tītə̄ ndɔr̄
kə́ ənge man̄ aĺ beē.
31De kə́ tɔ́gən to a tél
yā kəto tītə̄ mu beé ō,
yá̰a̰ rāān gə̄ a ton̄
tītə̄ hor kə́ kə́rā beé ō.
Hor a o̰o̰də́ jōó mbak ō,
de kə́ yā tɔ̄l̄ hor ní a gətóo ō.
Currently Selected:
Makətūbə̄ yā Ijai 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad