YouVersion Logo
Search Icon

Makətūbə̄ yā Ester 1

1
Mban̄g Jerses rāā yá̰a̰ kəsa kə́ ngá̰ý
1Gotə najə̄ ń toō i yá̰á̰ kə́ rāā yá̰a̰ ɓāl̄ yā mban̄g Jerses tə́. I Jerses ń o̰o̰ ɓē dɔ nang gə̄ kə́ gír i ɓú kə kutə jōó kə kalən kə́ sīrí gə̄ tə́ ní. Ɓē ko̰o̰ yān əla gír i dɔ nang kə́ Ḛndə tə́ bátə́ ugə̄ń dɔ nang kə́ *Etiopi tə́. 2-3Ɓāl̄ ko̰o̰ ɓē yān kə́ nge ko̰ mətá tə́ anī ni-ndi dɔ kōr̄ kāgə̄ mbang yān kə́ kem ɓē kə́ Sujə tə́ ba rāā yá̰a̰ kəsa kə́ ngá̰ý tām̄ yā de kə́ bo yān gə̄ tə́ ō, ngé rāā kəla seneé gə̄ tə́ ō. Ni kán̄ ngol ngé rɔ̄ɔ̄ gə̄ kə́ Persə tə́ ō, Medi tə́ ō, ngé ko̰o̰ ɓē gə̄ ō, ngār dɔ nang gə̄ ō, rɔ̄n tə́. 4Ni ɔjədə́ yá̰a̰ kənge yān kə́ majə ngá̰ý gə̄ ō, yá̰a̰ gə̄ kə́ gātə̄də́ i ngá̰ý tām̄ yā majədə́ tə́ ń ɔjən̄ kadə̄ ko̰o̰ ɓē yān i ko̰o̰ ɓē kə́ to kɔsə gɔn ní ō. Ni ɔjədə́ yá̰a̰ gə̄ ní ndɔ̄ i ngá̰ý, i ndɔ̄ ɓú kə kutə sɔ́sɔ́. 5Dan ń gír ndɔ̄ gə̄ ní gān̄g anī ni-rāā yá̰a̰ kəsa kə́ rang tām̄ yā de gə̄ malang kə́ kem ɓē bo kə́ Sujə tə́, adə̄ i tām̄ yā ngé kənge yá̰a̰ gə̄ tə́ ō, ngé ndoō gə̄ tə́ ō. Əsan̄ yá̰á̰ ní i ndágə looó dan ndɔr̄ kə́ ndogó mbangāá tə́ . 6Tó̰ō̰n̄ kūbə̄ *lḛ́ḛ́ kə́ sɔl̄ lɔ́ḿ lɔ́ḿ ba ndaa ngóńg ngóńg gə̄ ō, kə́ kərē gusə gusə gə̄ ō, dɔɔ́ kə kəlā kə́ kərē bḭḭ gēé tū nə̄ngá gində̄ arjā̰a̰ gə̄ kə́ tə́lan̄ tū mbal̄#1.6 Mbal̄ ní i kə́ tɔ́sə̄n̄ adə̄ ngāl̄ ɓururu kum kə̄ dɔɔ́. máŕbər gə̄ tə́. Tə́ndān̄ yá̰a̰ ndi kə́ ngāl̄ gə̄ kə́ rāān̄ kə lɔ́r ō, kə gində̄ arjā̰a̰ ō dɔ nang kə́ ɓatə̄ tə́. Ɓatə̄n̄ dɔ nang ní i kə mbal̄ kə́ kərēé ō, kə́ ndaá ō, kə́ ndaá put put ō kə́ nduluú ō. 7Adə̄n̄ de gə̄ yá̰a̰ ka̰ȳ i kem kópə kə́ rāā kə lɔ́r gə̄ tə́. Kópə gə̄ ní ton̄ tītə̄ naā malang alé. Kasə *nduú ń mban̄g adə̄ ní i ngá̰ý ō, adə̄n̄ de gə̄ i ngá̰ý tītə̄ ń mban̄g a adə̄ń deē yá̰á̰ ní ō. 8Deē ra kə deé ta ka̰ȳ yá̰a̰ alé, tɔdɔ̄ mban̄g əda ngé rāā kəla yān gə̄ kə́ ndogó mbangāá malang kadə̄ rāān̄ i yá̰á̰ ń kem deē ndigə ní tá.
9Basti ń i nə̄yá̰ mban̄g ní rāā yá̰a̰ kəsa kə́ ngá̰ý tām̄ yā dəyá̰ gə̄ tə́ ō. Ni-rāā yá̰a̰ kəsa ní i kem kújə kə́ majə ngá̰ý yā mban̄g Jerses tə́.
Najə̄ a majaĺ dɔ Basti tə́
10Kə ndɔ̄ kə́ nge ko̰ sīrí anī mban̄g a̰ȳ kasə adə̄ rɔ̄n nelə̄n. Ta anī ni-əda Mehuman ō, Bijta ō, Harbona ō, Bigta ō, Abagta ō Jetar ō, Karkas ō ń nin̄ i *áji mbang yān kə́ sīrí gə̄ ní, 11kadə̄ aw̄ əlan̄ *jākā mbang dɔ nə̄yá̰n Basti tə́ ba kə reēn̄ seneé rɔ̄n tə́, kadə̄ de kə́ bo yān gə̄ ō, kósə de gə̄ ń ndin̄ noó ní ō, kə a̰a̰n̄ mandən. Tá nə̄yá̰n mandə ngá̰ý rɔ̄kum. 12Áji mbang gə̄ aw̄ ədan̄ Basti kəla ń mban̄g əndā tadə́ tə́ ní, banī ni-mbātə́ reē kɔ̄ɔ́. Loo ń noō tə́ wōn̄g rāā mban̄g ngá̰ý. 13Mban̄g dəje gír̄ kə kem ngé ger̄ *ndū najə̄ gə̄ tə́ ō jī bēl̄ loo rāā yá̰a̰ gə̄ tə́ ō, tɔdɔ̄ aw̄n̄ kə najə̄ yān malang i nodə́ nin̄ tə́. 14Ba ngé ger̄ yá̰a̰ gə̄ ngeé ń toō kə́ kadə mban̄g tə́ ngɔr gə̄ ní i Karsena ō Setar ō Adəmata ō Tarsis ō Meres o Marsena ō Memukan ō. Nin̄ i ngé rāā kəla kə́ bo gə̄ yā ɓē kə́ Persə ō, kə́ Medi ō. I nin̄ n i ngé kaw̄ rɔ̄ mban̄g tə́ gə̄ ō, ngé ndi loo kə́ kété tə́ kə́ kem ɓē ko̰o̰ malang yā mban̄g tə́ ō ní. 15Mban̄g ədadə́ na: Mā mban̄g Jerses, m-ə̄ndā kəla ta *áji mbang yāḿ gə̄ tə́ adə̄ aw̄ ədan̄ nə̄yá̰ḿ Basti anī ni-mbātə́ rāā yá̰á̰ ń m-ə́da ní, ní yá̰á̰ ń *ndū najə̄ əda kadə̄ yā rāā seneé ní i rí?
16Anī Memukan əda mban̄g ō, de kə́ bo yān gə̄ ō na: Basti nə̄yá̰ mban̄g rāā majaĺ i kə mbangāá ngóy alé, ba i kə de kə́ bo yān gēé ō, kə de kə́ dəngam gə̄ malang ń ndin̄ gō nang yā mban̄g tə́ ní ō. 17Tɔdɔ̄ dəyá̰ gə̄ malang a oōn̄ yá̰á̰ ń ni-rāā ní, adə̄ a mbātə́n̄ koō ta ngaadə́ gə̄ ba a ədan̄ na mban̄g Jerses na mēr̄ kadə̄ reēn̄ kə nə̄yá̰n Bastīií rɔ̄n tə́ ɓáa na mbātə́ reē! 18Ɓōólaā nəkɔ́ ń toō nə̄yá̰ de kə́ bo kə́ Persə tə́ gə̄ ō, kə́ Medi tə́ gə̄ ō a oōn̄ háĺ ń nə̄yá̰ mban̄g rāā ní, ba yā kɔsə najə̄ ta ngaadə́ gə̄ tə́ ō, wōn̄g a rāā ngaadə́ gə̄ najə̄ ɓōĺ kə́ nin̄ ɓōlə́n̄ ndíĺdə́ aĺ tə́ ō. 19Ré mban̄g ndigə anī ādə̄ ni teē kə *ndū najə̄ kə́ ɔgə Basti kaw̄ ta kumən tə́ i kə́ bátə́ gə̄ tə́ ō, kadə̄ i dəyá̰ kə́ rang na ɓāŕnən̄ na i nə̄yá̰ mban̄g kum gotən ō. A əlan̄ *ndū najə̄ ngeé ń toō dan ngé kə́ Persə tə́ ō, Medi tə́ ō kanjə̄ kadə̄ deē a tūr̄. 20Yá̰a̰ gə̄ ń mban̄g ndang kadə̄ yā rāā ní a ɓār̄ kadə̄ de kə́ kem ɓē ko̰o̰ yān n bo ngá̰ý tə́ ní a oōn̄ malang. Adə̄ dəyá̰ gə̄ malang a rɔȳn̄ ngaadə́ gə̄ ń i de kə́ bo gə̄ ō, ngé ndoō gə̄ ō ní.
21Najə̄ ní nel̄ mban̄g ō, nel̄ de kə́ bo yān gə̄ ō. Adə̄ mban̄g rāā yá̰á̰ ń Memukan ədan ní. 22Ni ndang makətūbə̄ əlań kə gō ɓē gə̄ malang ń ni-ndi dɔ tə́ ní. Ndangən̄ makətūbə̄ gə̄ ní i kə jī loo ndangən kə́ kem ɓē gə̄ ní tə́ ō, i kə ta ɓē yādə́ kə́ kemeé gə̄ ō. Ədan̄ kem makətūbə̄ gə̄ ní tə́ na i de kə́ dəngam gə̄ malang n i kɔ́ɔ̄ loo gə̄ kə́ ta kújə yādə́ gə̄ tə́ ō, kadə̄ nin̄ kə ɔrə̄n̄ ta ɓē yā gír deē yādə́ gə̄ ō ní.

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy