Makətūbə̄ ń Pol ndang adə̄ Epejə gə̄ ní 1
1
Pol rāā Epejə gə̄ lápə́ya
1I mā Pol ń i ngōmbang kəla yā Jeju *Kərist kə gō kem ndigə yā Nə́ɓāá ní n m-ə́la kə makətūbə̄ ń toó m-ādə̄sí, sḭḭ̄ de gə̄ yā Nə́ɓā ń ī-ndiī Epejə ba ī-taāī kem Jeju *Kərist ní. 2Ādə̄ Bɔbə̄jí Nə́ɓā, nin̄ kə Kɔ́ɔ̄ɓē Jeju Kərist, rāān̄ kem majə sesí ō, sɔlə̄n̄ kemsí ō.
Yá̰á̰ ń Nə́ɓā adə̄jí kə gō ɓoo naā yājí kə Kərist ní
3Jə-tɔ̄yī Nə́ɓā, Bɔbə̄ Kɔ́ɔ̄ɓē yājí Jeju *Kərist. Tɔdɔ̄ ni-adə̄jí yá̰a̰ malang kə́ dɔ rā̰ tə́ yā Ndíl kə ta kūl̄ Jeju Kərist. 4Tɔdɔ̄ kété pá tá kadə̄ Nə́ɓā rāā dɔ rā̰ ō, dɔ nang ō ní, ni-gə̄rājí kɔ̄kə́ yā kadə̄ jḭḭ̄ i deē yān gə̄, kə gō ɓoo kə́ jə-ɓooī naā kə Kərist, yā kadə̄ jḭḭ̄ i de kə́ *táĺ gə̄ ō, de kə́ kanjə̄ najə̄ dɔjí tə́ gə̄ ō, kə̄ ta kumən tə́.
5Sɔɔ̄ń táŕ kə́ kemən tə́ ní, nəkɔ́ əndā dɔjí danaá kété kadə̄ jə-téliī ngánən gə̄ kə ta kūl̄ Jeju *Kərist. Ni-gḛy kadə̄ i tītə̄ ń noō, tɔdɔ̄ nelə̄n. 6I beé ní ādə̄ jə-tɔ̄yī Nə́ɓā najə̄ yá̰á̰ kə́ majə ngá̰ý ń ni-rāā adə̄jí kə ta kūl̄ Ngōn̄ kó tár yānneé ní.
7Ngōnən gān̄g dɔjí kə mósəneé ō, j-əngeī mā̰ȳ rɔ̄ i kə ta kūl̄neé ō. 8Ni-rāā adə̄ kumjí edə̄ ngá̰ý ō, jə-gerī kum najə̄ ngá̰ý ō, i kə ta kūl̄ kem majə yān kə́ ngá̰ý ngeé ń toō. 9I tītə̄ ń noō n ni-rāā adə̄ kumjí teē dɔ yá̰á̰ kə́ yáā ń kem majə yān sāā rāā tə́, adə̄ i yá̰á̰ ń ni núm̄ rāā kə ta kūl̄ *Kərist, 10dan ń ndɔ̄ gə̄ a asən̄neé ní. Loo ń noō tə́ ni a əla dɔ yá̰a̰ malang, kə́ dɔ rā̰ tə́ gə̄gē, kə́ dɔ nang tə́ gə̄gē, gíŕ tɔ́gə yā *Kərist tə́.
11J-əngeī yá̰á̰ ń Nə́ɓā ənī míndən yā kadə̄jí ní, i kə ta kūl̄ ɓoo kə́ jə-ɓooī naā kə Kərist. Tām̄ Nə́ɓā gə̄rājí kété i kə gō ń ni-núməń ní. Ba ni a rāā yá̰a̰ malang i tītə̄ ń ni-gḛyń ní. 12I beé ní, jḭḭ̄ ń j-əndāī kemjí dɔ *Kərist tə́ ta kəga dɔ ní, ādə̄ jə-tɔ̄yī Nə́ɓā ń i de kə́ bo ní.
13Dan ń sḭḭ̄ ōōī najə̄ kə́ rɔ̄kum, adə̄ i Najə̄ kə́ Majə ń ajəsí ní anī, sḭḭ̄ ī-taāī kem Kərist ō. Loo ń noō tə́ Nə́ɓā əndā tə́ré yá̰á̰ kə́ ɔjə kadə̄ sḭḭ̄ i deē yān gə̄ rɔ̄sí tə́, ba tə́ré yá̰á̰ ní i *Ndíĺ kə́ Táĺ ń ni-adə̄sí kə gō ń ni-ənīń ndūn ní. 14Ndíĺ kə́ Táĺ i yá̰á̰ kə́ ɔjə kadə̄ Nə́ɓā a adə̄jí yá̰á̰ kə́ majə gə̄ ń ni-ngɔ̄m̄ tām̄ yā deē yān gə̄ tə́ ní rɔ̄kum. Ni-ɔjəjí kadə̄ j-a j-əngeī yá̰a̰ gə̄ ni rɔ̄kum, loo ń Nə́ɓā a gān̄g dɔjí kadə̄ ɔtə̄ kə taá mámák ní. Ādə̄ jə-tɔ̄yī Nə́ɓā ń i de kə́ bo ní.
Pol ndɔ̄ȳ Nə́ɓā tām̄ yā ngé taā kem gə̄ tə́
15I tām̄ najə̄ ń toō tə́ n, dan ń m-ōō na ī-taāī kem Kɔ́ɔ̄ɓē Jeju ō, na ī-táriī de gə̄ yā Nə́ɓā malang ō ní, 16m̄-lōō gír ndadə̄ Nə́ɓā tə́ tām̄ yāsí tə́ aĺ ní. Dan ń m-ā m̄-ndɔ̄ȳ Nə́ɓā anī əga kemḿ dɔsí tə́. 17Kadə̄ ni ń i Bɔbə̄ Kɔ́ɔ̄ɓē yājí Jeju *Kərist ní, ni ń i Bɔbə̄jí kə́ *kɔsə gɔn i yān ní, adə̄sí Ndíĺ kə́ nge kadə̄ deē kum kedə̄ ō, kə́ nge teē kum deē dɔn tə́ ō, kadə̄ ī-gerīin̄neé. 18Ādə̄ ni teē kumsí ādə̄ á̰a̰ī loo kə́ unjə̄ kow yān, yā kadə̄ ī-gerīneé yá̰á̰ ń ni ɓāŕsí kadə̄ ə̄ndāī kemsí dɔ tə́ ní ō, yā kadə̄ ī-gerīneé yá̰a̰ kənge kə́ to kɔsə gɔn yān ō, yá̰a̰ ndəbā ń ni-adə̄ ngé yān gə̄ ní ō, 19yā kadə̄ ī-gerīneé tɔ́gə́ kə́ ngá̰ý ń ni a rāań kəla tām̄ yājí jḭḭ̄ ngé taā kem gə̄ tə́ ní ō. I tɔ́gə ngeé ń toō n 20ni-ɔjə kə̄ ndágá dan ń ndóləń Jeju *Kərist dan de kə́ koy gə̄ tə́, ba aw̄ń seneé aw̄ əndān dɔ jī ko̰n tə́ dɔ rā̰ tə́ ní. 21Ni-əndān dɔ ngé ko̰o̰ ɓē gə̄ tə́ ō, dɔ tɔ́gə gə̄ tə́ ō, dɔ kɔ́ɔ̄ ɓē gə̄ tə́ ō, dɔ rī gə̄ tə́ malang ō, adə̄ i rī gə̄ kə́ dɔ nang ń toō tə́ ō, kə́ dɔ nang kə́ kijə kə́ ndɔ̄ń tə́ tə́ ō. 22Rɔ̄kum,
ni-əla yá̰a̰ gə̄ malang gír njan tə́,
ba əndān dɔɔ́ dɔ yá̰a̰ gə̄ tə́ malang#1.22 K. 22: Á̰a̰ī Pā 8.7,
dɔ Egəlijə 23ń rāā rɔ̄n i dā̰ rɔ̄n tə́ ní. Kərist ń ni i kə̄ loo gə̄ tə́ malang ní, i Egəlijə n ni-ndi kemən tə́ kə taá ní.
Currently Selected:
Makətūbə̄ ń Pol ndang adə̄ Epejə gə̄ ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad