Ndū Najə̄ kə́ nge ko̰ jōó 1
1
Najə̄ kɔr̄ Moijə kə́ ta kəga dɔ
(1-4)
1Najə̄ ń Moijə ɔr̄ kə ngán *Israel gə̄ malang gidə bā Jurdḛ tə́, kem dəla loo kə́ Araba tə́, loo ń ra sɔɔ̄n̄ ta naā kə ɓē kə́ Supə, dɔ dán Paran nin̄ kə Topel ō, Laban ō Haserot ō, Dijahab ō, tə́ ní n toó. 2Ré ḭ́ḭ mbal̄ *Horeb tə́ ba ā āw̄ kə̄ Kades Barnea kə róbə́ kə́ ta kaw̄ kə̄ mbal̄ Seir tə́ anī, ā ī-njə̄rā ndɔ̄í kutə gidə i kógə̄ḿ. 3Kem ɓāl̄ kə́ nge ko̰ kutə sɔ́ tə́, kə ndɔ̄ kə́ ta kəga dɔ yā nāā kə́ nge ko̰ kutə gidə i kógə̄ḿ#1.3 Nāā kə́ nge ko̰ kutə gidə i kógə̄ḿ: Á̰a̰ī Rī Nāā gə̄ tū «Kum Najə̄ kə́ Ngón̄g Ngón̄g gə̄» tə́. gō teē ngán *Israel gə̄ tə́ kɔ̄ɔ́ kem ɓē kə́ Ejiptə tə́ anī, Moijə əda ngán Israel gə̄ yá̰a̰ malang ń Kɔ́ɔ̄ɓē əndā tan tə́ kadə̄ ədadə́ ní. 4-5Moijə tetə Sihon mban̄g yā *Amor gə̄ ń ndi Hesəbon ní rɔ̄ɔ̄ ō, tetə Og, mban̄g kə́ Basan ń ndi Asətarot ní rɔ̄ɔ̄ kem ɓē kə́ Edrey tə́ ō, pá tá əla gír kɔjə ngán Israel gə̄ *ndū najə̄ ń toō gidə bā Jurdḛ tə́, dɔ nang kə́ Moab tə́ ɓáý.
Nə́ɓā adə̄ ndūn kadə̄ ngán Israel gə̄ ɔrə̄n̄ dɔɔ́
6Dan ń jḭḭ̄ i mbal̄ *Horeb tə́ ní, Kɔ́ɔ̄ɓē Nə́ɓā yājí ɔr̄ najə̄ sejí i beé əda na:
Ī-ndiī nja mbal̄ ń toō tə́ i jóó ngá̰ý, 7ní ɔ̄rī dɔɔ́ tā. Āwī nang kə́ mbalá tə́, loo ń *Amor gə̄ ndin̄ tū tə́ ní ō, āwī dɔ nang kə́ kadə tə́ gə̄ ń Kanaan gə̄ ndin̄ tū tə́ ní ō, adə̄ i dɔ nang kə́ Araba ō, nang kə́ mbalá ō, nang kə́ mbal̄ bo gətóo tū tə́ tə́ ō, dɔ nang kə́ Negeb tə́ ō, gō nang kə́ kadə bā bo tə́ ō. Āwī bátə́ ūgī mbal̄ gə̄ kə́ Liban tə́ ō, ta bā Opəratə ń i bā kə́ bo ní tə́ ō. 8Á̰a̰ī m-ādə̄sí do nang ń noō. Āw̄ ī-taāī tām̄ i dɔ nang kə́ mā Kɔ́ɔ̄ɓē m-ə̄nī ndūḿ kadə̄ m-ādə̄ kaasí gə̄ Abəraham ō, Isaak ō, Jakob ō, kadə̄ m-ādə̄ ngán kaadə́ gə̄ gotədə́ tə́ ō.
Moijə tə́ndā ngé gān̄g sarya gə̄
9Loo ń noō tə́ mā Moijə m-ə́dásí na m-ásə kɔr nosí kə kérə́ḿ alé. 10Kɔ́ɔ̄ɓē Nə́ɓā yāsí rāā adə̄ ójiī naā ngá̰ý, adə̄ ɓōólaā kutəsí i ngá̰ý tītə̄ yā tə́yō̰ gə̄ kə́ dɔ rā̰ tə́. 11m̄-ndə̄ngā kadə̄ Kɔ́ɔ̄ɓē ń i Nə́ɓā yā kaasí gə̄ ní rāā adə̄ kutəsí tɔȳ nge ń toō nja dūbú ō, kadə̄ ni-rāā majə sesí tītə̄ ń nəkɔ́ ənīń ndūn yā rāań majə sesí ní ō. 12Ba loo kadə̄ mə̄kɔ́ kə kérə́ḿ m-ōō ɓur̄ yāsí gə̄ ō, nōō yāsí gə̄ ō, mbātə́ najə̄ ta naā tə́ yāsí gə̄ ō, ba kə m-ə́da najə̄ kə́ dɔ tə́ majə ní i ba̰ý? 13Ī-gə̄rāī de kə́ kumdə́ edə̄ gə̄ ō, gerə̄n̄ yá̰a̰ ō, kə́ ī-gerī háĺdə́ majə ō, dan gír ɓē yāsí gə̄ tə́ kógə̄ḿ kógə̄ḿ ī-reēī sedə́ ādə̄mī, ādə̄ m-ə̄ndādə́ dɔsí tə́. 14Anī sḭḭ̄ ī-téĺ ə́damī na yá̰á̰ ń m-ə́dásí kadə̄ ī-rāāī ní na i yá̰á̰ kə́ majə. 15Adə̄ m-ɔ́y ngār gə̄ kə́ dɔ gír ɓē yāsí gə̄ tə́ ń i de kə́ kumdə́ edə̄ gə̄ ō, kə́ ī-gerī háĺdə́ majə gə̄ ō ní m̄-tə́ndādə́ dɔsí tə́. M-ə̄ndā kə́rēý i ngār gə̄ kə́ dɔ de kə́ dūbú gə̄ tə́ ō, kə́ dɔ de kə́ ɓú gə̄ tə́ ō, kə́ dɔ de kə́ kutə mí gə̄ tə́ ō, kə́ dɔ de kə́ kutə kógə̄ḿ gə̄ tə́ ō. M-ə̄ndā kə́rēý gə̄ i ngé ndóō de gə̄ *ndū najə̄ kə́ tām̄ yā gír ɓē yāsí gə̄ tə́. 16Tā anī m-ə́dá ngé gān̄g sarya yāsí gə̄ na:
Ī-nēlī mbīsí majə ōōīneé najə gə̄ ń ngákó̰ó̰sí gə̄ a reēn̄neé rɔ̄sí tə́ ní. Ī-gāngī sarya kə́ dɔ dáń ngán *Israel gə̄ tə́ kə naá, aké i kə́ dɔ dáńdə́ tə́ kə tə̄rā gə̄ ń ndin̄ ɓēé loodə́ ní kə gōó. 17A ī-gāngī sarya tām̄ ta kum deē alé. Ōōī najə̄ yā nge ndoō ō, yā de kə́ bo ō. Ī-lōōī ɓōĺ ta kum deē kógə̄ḿ, tɔdɔ̄ sarya ń ā ī-gāngī ní i kə rī Nə́ɓāá. Ré najə̄ kə́rēý tɔȳ dɔsí anī, ī-reēīneé rɔ̄ḿ tə́ ādə̄ m-ə̄ndā ma̰ȳ sesí. 18Dan ngeé ń noō tə́ ní m-ɔ́jə́sí yá̰a̰ malang ń kadə̄ ī-rāāī ní.
Israel gə̄ mbātə́n̄ kaw̄ dɔ nang ń Nə́ɓā adə̄də́ tə́ ní
19Gō tə́ anī j-ḭḭī mbal̄ *Horeb tə́ kə gō ndū Kɔ́ɔ̄ɓē Nə́ɓā yājí, ba j-əndaī kem dəla loo kə́ bo ngá̰ý ō, to ɓōĺ ngá̰ý ō ń á̰a̰ī kə kumsí ní jə-gāngī. J-uniī i róbə́ kə́ teē mbal̄ ń *Amor gə̄ ndin̄ tū tə́ ní n jə-reē j-ugīneé Kades Barnea ní. 20Dan ń j-ugī Kades Barnea ní, m-ə́dásí na ūgī mbal̄ yā Amor gə̄ ń Kɔ́ɔ̄ɓē Nə́ɓā yājí adə̄jí tə́ ní, 21ba kə á̰a̰ī, Kɔ́ɔ̄ɓē Nə́ɓā yāsí na adə̄sí dɔ nang ń ra nosí tə́ noō. Ní kə āwī kə ī-taāī dɔ nang ní tītə̄ ń Kɔ́ɔ̄ɓē Nə́ɓā yā kaasí gə̄ ənīń míndən adə̄sí ní. Kə ī-lōōī ɓōĺ ō, kə ī-lōōī kadə̄ tɔ́gə́sí ur̄ wak ō.
22Anī sḭḭ̄ malang ī-reēī rɔ̄ḿ tə́ ba ī-dəjemī kadə̄ j-əlaī de gə̄ kəndā ma̰ȳ dɔ nang ní tə́ ō, kadə̄ tél reē ɔjən̄jí najə̄ kə́ dɔ róbə gə̄ ń kadə̄ j-uniī tə́ ní ō, najə̄ kə́ dɔ ɓē gə̄ ń kadə̄ j-aw̄ j-ugī tū tə́ ní tə́ ō. 23Najə̄ ń ɔ̄rī ní m-á̰a̰ kadə̄ i najə̄ kə́ majə, adə̄ m-ɔ̄r̄ de gə̄ kutə gidə i jōó dɔ dáńsí tə́, m-ɔ̄r̄də́ kógə̄ḿ kógə̄ḿ kə gō gír ɓē gēé. 24Nin̄ teēn̄ róbə́ kə́ mbalá ba aw̄n̄ bátə́ ugə̄n̄ wól loo kə́ Esəkol tə́, ba əndān̄ ma̰ȳ wól loo ní. 25Nin̄ tə́jān̄ kan̄ kāgə̄ gə̄ kə́ dɔ nang ní tə́ reēn̄neé adə̄n̄jí, ba ədan̄jí na dɔ nang ń Kɔ́ɔ̄ɓē Nə́ɓā adə̄jí ní na i dɔ nang kə́ majə. 26Banī sḭḭ̄ ī-mbātíī koō ta Kɔ́ɔ̄ɓē Nə́ɓā yāsí, adə̄ āwī alé. 27Ba ī-tāmī kə̄ kem kújə tandā yāsí gə̄ tə́ ə́daī na Kɔ́ɔ̄ɓē im̄sí na i mbée n na teē sesí kɔ̄ɔ́ kem ɓē kə́ Ejiptə tə́ ní. Na ndigə na i kəlasí kem jī *Amor gə̄ tə́. Na ndigə na i nujə sesí kɔ̄ɔ́ malang. 28Ní ké kə ə́laī dɔsí i rá ta wa. Tɔ́gə́sí kə́ kadə̄ āwīneé na gətóo, tām̄ ngákó̰ó̰sí gə̄ na ədan̄sí adə̄ gān̄g na tɔ́gə de kə́ dɔ nang ní tə́ gə̄ na tɔȳ yāsí ō, de gə̄ ní na ngālən tɔȳn̄sí ō, ɓē yādə́ gə̄ na i ɓē kə́ bo ngá̰ý gə̄ ō, ndogə̄ mbal̄ kə́ gidə ɓē yādə́ gə̄ tə́ na i kə́ ngāl̄ ngá̰ý kum kə̄ dɔɔ́ gə̄ ō, na n-a̰a̰n̄ ngán Anak gə̄ dɔ nang ní tə́ ō. 29m̄-téĺ m-ə́dásí m-ə́da na kə ī-lōōī ndebə ō, kə ī-lōōī ɓōĺdə́ ō, 30na Kɔ́ɔ̄ɓē Nə́ɓā yāsí ń a njə̄rā nosí tə́ ní na a rɔ̄ɔ̄ dɔsí tə́, tə́ tītə̄ ń rāań kem ɓē kə́ Ejiptə tə́ adə̄ á̰a̰ī kə kumsí ní ō, 31tītə̄ ń rāań kem dəla loo tə́ ní ō. Kem dəla loo tə́ ní, sḭḭ̄ kɔ́ gə̄ á̰a̰ī kadə̄ Kɔ́ɔ̄ɓē Nə́ɓā yāsí ətōsí i tītə̄ ń deē a ətōń ngōnən ní. Ni-ətōsí dɔ róbə́ ń ī-njə̄rāī tū tə́ bátə́ ī-reē ūgīneé loo ń toō tə́ laā ní. 32Banī kum mbang ń noō tə́ ní, sḭḭ̄ ənīī kemsí ādī Kɔ́ɔ̄ɓē Nə́ɓā yāsí alé. 33Tá i ni n i nge njə̄rā kété nosí tə́ yā sāań loo kə́ yā kadə̄ ī-ndiī tū tə́ ní. Ndɔ̄ɔ́ anī ni i sesí kum hor kə́ ra kə ngālāá ɓururu ń kadə̄ á̰a̰īń loo dɔ róbə́ ń ī-njə̄rāī tū tə́ ní tə́ ō, kadaá anī ni i sesí tū kil̄ man̄ kə́ ra kə ngālāá ɓururu tə́ ō.
34Tām̄ ń ī-tāmī ní Kɔ́ɔ̄ɓē oō. Wōn̄g rāān adə̄ túbə əda na:
35De kə́ tɔgə gə̄ ń i de kə́ majaĺ gə̄ ní, deē kógə̄ḿ dandə́ tə́ kə́ yā ka̰a̰ dɔ nang kə́ majə ń m-ə̄nī ndūḿ yā kadə̄ kaadə́ gə̄ ní a gətóo. 36I Kaleb ngōn̄ Yepune ngóy n a a̰a̰. Dɔ nang ń ni-njə̄rā tū tə́ ní m-ā m-ādə̄n ni ō, ngánən gə̄ ō, ngán kaan gə̄ ō, tām̄ ni-ənī kemən mámák unəń gōḿ mā Kɔ́ɔ̄ɓē.
37Kɔ́ɔ̄ɓē rāā wōn̄g seḿ māá ō najə̄ yāsí tə́. Adə̄ ədam̄ na:
Ḭ̄ ā ə̄ndā njaí dɔ nang ní tə́ aĺ ō. 38Ba i nge kəla yāí ń i Jojue ngōn̄ Nun ní n a əndā njan tū tə́ ní. Əla go̰ kemən tə́ ādə̄ əhɔ rɔ̄n tɔgə. I ni n a ɔr no ngán *Israel gə̄ yā kaw̄ kənīń rɔ̄ɔ̄ ba taāń dɔ nang kadə̄də́ ní. 39Tá ngáńsí gə̄ ń gerə̄n̄ dɔ nin̄ yá̰á̰ kə́ majə ō, kə́ majaĺ ō, aĺ ɓáý á ə́daī na madə̄ ba̰ā̰sí gə̄ na a əhɔn̄də́ ní, i nin̄ n a əndān̄ njadə́ dɔ nang ní tə́ ní. I nin̄ n m-ā m-ādə̄də́ dɔ nang ní ní, adə̄ i nin̄ n a əngen̄ ní. 40Banī sḭḭ̄ ī-rə̄ngōī rɔ̄sí, ī-tél āwī gogə́ kem dəla loo tə́, kə róbə́ kə́ kaw̄ kə̄ bā tə̄ɓā gə̄ tə́. 41Sḭḭ̄ ī-téĺ ə́damī na ī-rāāī majaĺ kə Kɔ́ɔ̄ɓēé, adə̄ na ā āwī yā rɔ̄ɔ̄ kə gō ndū Kɔ́ɔ̄ɓē Nə́ɓā yāsí. Adə̄ ɔ́yiī yá̰a̰ rɔ̄ɔ̄ yāsí gə̄, ɔ́jiīneé na kaw̄ dɔ mbalá ní na i yá̰á̰ kə́ hɔlyɔ karī. 42Tā anī Kɔ́ɔ̄ɓē ədam̄ na, ə́dádə́ ə́da na a aw̄n̄ aĺ ō, na a rɔ̄ɔ̄n̄ aĺ ō, tɔdɔ̄ mā Kɔ́ɔ̄ɓē i dɔ dáńdə́ tə́ alé. Kə lōōn̄ rāā kadə̄ madə̄ ba̰ā̰də́ gə̄ tetən̄də́ rɔ̄ɔ̄. 43Adə̄ m-ə́dásí najə̄ ní, ba sḭḭ̄ ōōī yāḿ alé. Ī-dumī naā ba ī-mbātíī koō ta Kɔ́ɔ̄ɓē, adə̄ āwī dɔ mbalá kə gō dum̄ naā yāsí. 44Anī *Amor gə̄ ń ndin̄ dɔ mbal̄ ngeé ń noō tə́ ní, teē tə́nīn̄ tasí ba rɔ̄ɔ̄n̄sí dɔ mbal̄ Seir tə́. Nin̄ tetən̄sí rɔ̄ɔ̄ ba ngɔ̄də̄n̄sí tītə̄ tejə gə̄ bátə́ ugə̄n̄ sesí Horma. 45Dan ń ī-téliī ní ī-nōōī ta kum Kɔ́ɔ̄ɓē tə́ banī nōō yāsí əsō mbī Kɔ́ɔ̄ɓē tə́ aĺ ō, ni nēl̄ mbīn kə́ rɔ̄sí tə́ aĺ ō. 46Adə̄ ī-ndiī Kades Barnea dan i ngá̰ý.
Currently Selected:
Ndū Najə̄ kə́ nge ko̰ jōó 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad