Makətūbə̄ yā Amos 1
1
1Makətūbə̄ yā Amos ɔjə i gotə najə̄ kɔr̄ Amos.
Ni i nge ngɔ̄m̄ yá̰a̰ kul̄ gə̄.
I de kə́ kem ɓē kə́ Tekoa tə́.
Ɓāl̄ jōó kə̄ kété no tə́ pá tá kadə̄ dɔ nang ndebə ní,
Kɔ́ɔ̄ɓē ɔjən yá̰á̰ kə́ kadə̄
əda dɔ ɓē ko̰o̰ kə́ *Israel tə́.
I dan ń Ojias ndiń mban̄g *Juda tə́ ō,
Jeroboam kə́ ngōn̄ Joas
ndiń mban̄g *Israel tə́ ō ní. 2Amos əda na:
Kɔ́ɔ̄ɓē nōō tītə̄ ɓɔl beé dɔ mbal̄ kə́ *Siyo̰ tə́.
A̰á̰ā̰, ni-ra *Jerusalem rāań adə̄ de gə̄ oōn̄ ndūn.
Loo gə̄ ń a aw̄n̄ kə yá̰a̰ kul̄ gēé tūtə̄
kadə̄ əsan̄ yá̰a̰ ní majən̄ aĺ ngá̰ý.
Dɔ mbal̄ Karmel i kə́ tutə káḿ káḿ kɔ̄ɔ́.
Kɔ́ɔ̄ɓē gɔŕyɔ̄ Israel ō, madə̄ ɓēn gə̄ ō
(Aram gə̄)
3Najə̄ ń Kɔ́ɔ̄ɓē əda ní n toó:
Yá̰á̰ kə́ majaĺ ngá̰ý gə̄ kə́ kadə̄ m̄-gɔŕyɔ̄
Aram gə̄ kə́ Damas dɔ tə́ i ngá̰ý.
Ni kə́ majaĺ ngá̰ý tɔȳ madə̄ gə̄ i nge ń toō:
Nin̄ rējə̄n̄ Galaad gə̄
kə yá̰a̰ jɔ̄r̄yɔ̄ nán̄g ta kɔsə
kə́ rāā kə gindīí ń rīn na i hersə ní.
I tām̄ najə̄ ń noō tə́ n yá̰á̰ ń m̄-gḛy rāā ní,
m-ā m̄-tūr̄ ndūḿ loon tə́ aĺ ní.
4M-ā m-ə́la hor dɔ kújə mban̄g
yā mban̄g gə̄ kə́ Aram tə́.
A̰á̰ā̰, m-ā m-ə́la hor dɔ kújə mban̄g
yā Hajael tə́ ō, yā Ben Hadad tə́ ō.
5M-ā m̄-rāā kadə̄ yá̰á̰ rákə̄ ta róbə gə̄
kə́ Damas i kə́ ró̰ȳ kɔ̄ɔ́.
Wól loo ń de gə̄ a rāān̄ majaĺ tū tə́ ní,
adə̄ i ɓē ń de gə̄ a rāān̄ rɔ̄nel̄ tū tə́ ní,
m-ā m̄-rāā kadə̄ mban̄g kə́ tū tə́ gətóo.
Ba a tə̄ɓān̄ gír de kə́ Aram gə̄
yā kaw̄ sedə́ Kir dɔ gúú tə́.
I Kɔ́ɔ̄ɓē n əda najə̄ ń noó ní.
(Pilistin gə̄)
6Najə̄ ń Kɔ́ɔ̄ɓē əda ní n toó:
Yá̰á̰ kə́ majaĺ ngá̰ý gə̄ kə́ kadə̄
m̄-gɔŕyɔ̄ Pilistin gə̄ kə́ Gaja dɔ tə́ i ngá̰ý.
ni kə́ majaĺ ngá̰ý tɔȳ madə̄ gə̄ i nge ń toō:
Nin̄ ɔyn̄ de kə́ kem ɓēé gə̄ kə taá malang
aw̄ əlan̄də́ jī Edom gə̄ tə́.
I tām̄ najə̄ ń noō tə́ n
yá̰á̰ ń m̄-gḛy rāā ní,
m-ā m̄-tūr̄ ndūḿ loon tə́ aĺ ní.
7M-a m-ə́la hor tū ndogə̄ mbal̄ gə̄
yā ɓē kə́ Gaja tə́, kadə̄ o̰o̰ kújə́
kə́ majə gə̄ kə́ tū tə́ kɔ̄ɔ́.
8M-ā m̄-rāā kadə̄ mban̄g kə́ Asdod ō,
mban̄g ń a o̰o̰ ɓē kə́ Askalon ní ō,
gətóon̄ kɔ̄ɔ́.
M-ā m̄-ə̄nā ɓē kə́ Ekəron rɔ̄ɔ̄,
yā kadə̄ gotə Pilistin gə̄ ń náyn̄ ní oyn̄.
I Kɔ́ɔ̄ɓē n əda najə̄ ń noó ní.
(Penisi gə̄)
9Najə̄ ń Kɔ́ɔ̄ɓē əda ní n toó:
Yá̰á̰ kə́ majaĺ ngá̰ý gə̄ kə́ kadə̄
m̄-gɔŕyɔ̄ Penisi gə̄ kə́ Tir dɔ tə́ i ngá̰ý.
Ni kə́ majaĺ ngá̰ý tɔȳ madə̄ gə̄ i nge ń toō:
Ndūdə́ gə̄ ń ənīn̄ adə̄n̄ naā á ɓoodə́
naā tə́ kə *Israel tītə̄ kə́
nin̄ i ngákó̰o̰ naā gə̄ beé ní,
nin̄ ɓōlə́n̄ gidə alé.
Tɔdɔ̄ nin̄ ɔyn̄ de kə́
kem ɓēé gə̄ kə taá malang
aw̄ əlan̄də́ jī Edom gə̄ tə́.
I tām̄ najə̄ ń noō tə́ n
yá̰á̰ ń m̄-gḛy rāā ní,
m-ā m̄-tūr̄ ndūḿ loon tə́ aĺ ní.
10M-ā m-ə́la hor dɔ ɓē kə́ Tir tə́ tə́.
Adə̄ a o̰o̰ kújə yān kə́ majə ngá̰ý gə̄.
(Edom gə̄)
11Najə̄ ń Kɔ́ɔ̄ɓē əda ní n toó:
Yá̰á̰ kə́ majaĺ ngá̰ý gə̄ kə́ kadə̄
m̄-gɔŕyɔ̄ Edom gə̄ dɔ tə́ i ngá̰ý.
Ni kə́ majaĺ ngá̰ý tɔȳ madə̄ gə̄ i nge ń toō:
Nin̄ ngɔ̄də̄n̄ ngákó̰ó̰də́ *Israel gə̄
kə kaskaraá jīdə́ tə́.
Kumdə́ o̰o̰də́ tām̄ yādə́ tə́ sḛ́ý aĺ bátə́
asədə́ tɔ̄l̄ deē alé,
sɔɔ̄ń wōn̄g kə́ kemdə́ tə́.
Gír kəhɔ deē kem tə́ yādə́ gān̄g aĺ bátə́.
I tām̄ najə̄ ń noō tə́ n
yá̰á̰ ń m̄-gḛy rāā ní,
m-ā m̄-tūr̄ ndūḿ loon tə́ aĺ ní.
12M-ā m-ə́la hor dɔ ɓē yādə́ kə́ Teman tə́ tə́,
adə̄ a o̰o̰ kújə yādə́ kə́ majə gə̄
kə́ kem ɓē kə́ Bosra tə́ kɔ̄ɔ́.
(Amon gə̄)
13Najə̄ ń Kɔ́ɔ̄ɓē əda ní n toó:
Yá̰á̰ kə́ majaĺ ngá̰ý gə̄ kə́ kadə̄
m̄-gɔŕyɔ̄ Amon gə̄ dɔ tə́ i ngá̰ý.
Ni kə́ majaĺ ngá̰ý tɔȳ madə̄ gə̄ i nge ń toō:
Nin̄ gḛyn̄ teē kem ɓē yādə́ kə̄ gogə́,
adə̄ njárə̄n̄ kem dəyá̰ kə́ ndān̄ ngán gə̄
kə́ dɔ nang kə́ Galaad tə́.
I tām̄ najə̄ ń noō tə́ n
yá̰á̰ ń m̄-gḛy rāā ní,
m-ā m̄-tūr̄ ndūḿ loon tə́ aĺ ní.
14M-ā m-ə́la hor dɔ ɓē yādə́ kə́ Raba tə́ tə́.
Adə̄ a o̰o̰ kújə yān
kə́ majə ngá̰ý gə̄ ndɔ̄ rɔ̄ɔ̄ tə́,
dan ń de gə̄ a urnə̄ń kɔĺ rɔ̄ɔ̄ tə́ ní,
dan ń nél man̄ a əlań
ndɔ̄ kedə man̄ kə́ ngá̰ý tə́ ní.
15A aw̄n̄ kə mban̄g yādə́
dɔ ɓē kə́ rang tə́ dɔ gúú tə́ ō,
ngār yān gə̄ a aw̄n̄ seneé ō.
I Kɔ́ɔ̄ɓē n əda najə̄ ń noō ní.
Currently Selected:
Makətūbə̄ yā Amos 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad