Kəla rāā Ngámbang kəla gə̄ 9
9
Sol tél nge ndóō yá̰a̰ yā Jeju
(Á̰a̰ī Kəla 22.6-16; 26.12-18)
1Dan ngeé ń noō tə́ ní, najə̄ yā ka̰ȳ ndíĺ ngé ndóō yá̰a̰ gə̄ yā Kɔ́ɔ̄ɓē ō, najə̄ yā tɔ̄l̄də́ ō, teē dɔ Sol tə́ alé. 2Ni-aw̄ ənge ngol *ngé tun̄ yá̰a̰ gə̄ ba dəjen makətūbə̄ kə rī kújə́ kán̄ naā gə̄ kə́ Damas, yā kadə̄ ré n-ənge dəngam gə̄, aláa dəyá̰ gə̄, kə́ a unən̄ gō róbə yā Kɔ́ɔ̄ɓē anī, kə n-tó̰ō̰də́ kə kəlaá kə n-reē sedə́ *Jerusalem.
3Ba dan ń ni i róbó ɓáý á ugə̄ ngɔr kə̄ Damas ní anī, loo kə́ unjə̄ kow teē dɔ rā̰ tə́ rétə́ gēé reē unjə̄ gīr̄ gidən. 4Ni teē əsō nang tə́, anī oō ndū deē kógə̄ḿ ədan na:
Sol, Sol, i tām̄ rí tə́ á ī-rāām̄ ndoō tə́ beē? 5Sol ədan na:
Ḭ̄ i náā Kɔ́ɔ̄ɓē? Anī deē ní tūr̄ ədan na:
Mā i Jeju ń ī-rāām̄ ndoō tə́ ní. 6Ba ḭ́ḭ dɔɔ́ údə kem ɓēé, anī a ɔjənī yá̰á̰ ń kadə̄ ī-rāā ní. 7De gə̄ ń aw̄n̄ kə Sol ní dəba ran̄ kóńg kə tadə́ kə́ mbóó, tɔdɔ̄ oōn̄ ndū deē ní majə, ba a̰a̰n̄ deē kógə̄ḿ alé. 8Sol ḭḭ dɔɔ́, ni-tḛḛ̄ kumən banī kumən a̰a̰ loo aĺ kɔ̄ɔ́. Əhɔn̄ i ta jīn n aw̄n̄neé seneé kem ɓē kə́ Damas tə́ ní. 9Ni-ndi ndɔ̄ mətá kanjə̄ ka̰a̰ loo, əsa yá̰a̰ aĺ ō, a̰ȳ man̄ aĺ ō.
10Nge ndóō yá̰a̰ yā Jeju kógə̄ḿ kə́ rīn na i Ananias ndi kem ɓē kə́ Damas tə́. Kɔ́ɔ̄ɓē ndɔ̄bən ba ədan na:
Ananias! Anī Ananias ndigən əda na:
Mā n toō Kɔ́ɔ̄ɓē! 11Kɔ́ɔ̄ɓē tél ədan na:
Ḭ́ḭ dɔɔ́ āw̄ róbə́ ń a ɓārə́n̄ na i róbə́ kə́ ra súmūú ní tə́, údə ɓē Judas, ba ī-dəje kōō deē kógə̄ḿ kə́ a ɓāŕnən̄ na i Sol kə́ Tarsə. Ni-ndi a ndɔ̄ȳ noō 12ba a̰a̰ deē kógə̄ḿ kə́ rīn na i Ananias udə kújú gōn tə́ ba əndā jīn dɔn tə́, yā kadə̄ kumən kə tél kə a̰a̰ loo gogə́.
13Anī Ananias tél əda na:
Kɔ́ɔ̄ɓē, de gə̄ ngá̰ý ədamə̄n̄ najə̄ kə́ dɔ deē ń noō tə́, ədan̄ na ni na rāā ngé yāí gə̄ majaĺ ngá̰ý kem ɓē kə́ *Jerusalem tə́. 14Tá laā ní ngol gə̄ kə́ dɔ *ngé tun̄ yá̰a̰ gə̄ tə́ adə̄nən̄ ta róbə kadə̄ kə tṵ́ṵ̄ de gə̄ malang ń a ɓārə́n̄ rīí ní kə kəlaá. 15Banī Kɔ́ɔ̄ɓē ədan na:
Āw̄, tɔdɔ̄ deē ń toō i yá̰a̰ kəla yāḿ kə́ m̄-gə̄rā, yā kadə̄ aw̄ kə rīḿ ta kum nápar de gə̄ tə́ ō, mban̄g gə̄ tə́ ō, ngán *Israel gə̄ tə́ ō. 16Mə̄kɔ́ m-ā m-ɔ́jən yá̰á̰ kə́ tōr̄ gə̄ malang ń kadə̄ a rāān tām̄ yā rīḿ tə́ ní. 17Ananias aw̄, aké udə kújú, əndā jīn dɔ Sol tə́ ba əda na:
Ngōkó̰ó̰ḿ Sol, Kɔ́ɔ̄ɓē Jeju ń ndɔ̄bī róbó adə̄ á̰a̰n ta reēí tə́ ní, əlam̄ kadə̄ ī-tél á̰a̰ loo gogə́ ō, kadə̄ *Ndíĺ kə́ Táĺ rosə kemií ō. 18Anī kə̄ ta jī tə́ noō yá̰a̰ gə̄ kə́ tītə̄ ngɔ́ɔ́ yá̰a̰ gə̄ beē teēn̄ kum Sol tə́ téē tə́sōn̄, adə̄ ni-a̰a̰ loo gogə́. Ni-ḭḭ dɔɔ́ ō, rāānən̄ *batém ō. 19Ba dan ń əsa yá̰a̰ anī tél ənge tɔ́gə gogə́.
Sol ɔjə najə̄ kem ɓē kə́ Damas tə́
Ni-ndi ndɔ̄ kóndóńg wań kə ngé ndóō yá̰a̰ gə̄ kə́ Damas. 20Ni ngóō alé ba udə kə̄ rɔ̄ kɔjə najə̄ tə́ kem kújə́ kán̄ naā gə̄ tə́, əda de gə̄ na Jeju i Ngōn̄ Nə́ɓā. 21De gə̄ malang ń oōn̄ najə̄ kɔrə̄n ní ɔr kumdə́ ngá̰ý, adə̄ ədan̄ na:
I deē ń toō n i nge rāā ngé ɓāŕ rī Jeju gə̄ ndoō tə́ ngá̰ý kem ɓē kə́ *Jerusalem tə́ ní aĺ a? Tá reē laā i tṵ́ṵ̄də́ tə́ kə kəlaá yā kaw̄ sedə́ rɔ̄ ngol gə̄ kə́ dɔ *ngé tun̄ yá̰a̰ gə̄ tə́ tə́ aĺ a? 22Banī tɔ́gə́ Sol kə́ loo kɔjə najə̄ tə́ aw̄ i kum kə̄ kété kété. Dan ń ni ɔjə *Jipə kə́ Damas tə́ gə̄ unjə̄ ngá̰ý kadə̄ Jeju i *Kərist ní a, nin̄-gerə̄n̄ najə̄ kə́ yā kəda to̰ alé.
23Rāā ndɔ̄ ngá̰ý anī *Jipə gə̄ ní oōn̄ naā dɔ loo tɔ̄l̄ Sol tə́. 24Banī Sol ger̄ najə̄ ń nin̄-oōn̄ naā dɔ tə́ ní kɔ̄ɔ́. Nin̄-ndi a ngɔ̄mə̄n̄ ta róbə gə̄ kə́ yā teēn̄ kɔ̄ɔ́ kem ɓēé ndɔ̄ɔ́ ō kadaá ō, yā tɔ̄l̄nəń. 25Banī ngé ndóō yá̰a̰ yān gə̄ unnən̄ ndɔ̄ɔ́ əndānən̄ kem dōbə̄ kógə̄ḿ kə́ bo tə́ ba əlanən̄ dɔ ndogə̄ mbal̄ kə́ gīr̄ gidə ɓē tə́ adə̄ jə̄ngā gidə tə́ ndágá.
Sol ɔjə najə̄ yā Nə́ɓā kem ɓē kə́ Jerusalem tə́
26Dan ń Sol ugə̄ kem ɓē kə́ *Jerusalem tə́ ní a, sāā ɓoo rɔ̄n tū yā ngé ndóō yá̰a̰ gə̄ tə́, banī de gə̄ malang ɓōĺnən̄ kɔ̄ɔ́, tɔdɔ̄ nin̄-taān̄ kem kadə̄ ni-tél nge ndóō yá̰á̰ kə́ rɔ̄kum tə́ alé. 27Anī Barnabas aw̄ seneé rɔ̄ ngámbang kəla gə̄ tə́, ba ɔjədə́ gotə ka̰a̰ ń a̰a̰ Kɔ́ɔ̄ɓē róbó ní ō, kɔr̄ ń Kɔ́ɔ̄ɓē ɔr̄ najə̄ seneé ní ō, ədadə́ gotə kɔjə ń Sol ɔjə najə̄ kə rī Jeju kem ɓē kə́ Damas tə́ kanjə̄ ɓōĺ ní ō. 28Loo ń noō tə́ Sol ndi sedə́ ō, njə̄rā sedə́ kem ɓē kə́ Jerusalem tə́ aw̄ ō tél ō, ɔjə najə̄ kə rī Kɔ́ɔ̄ɓēé kanjə̄ ɓōĺ ō. 29Ni-ɔr̄ najə̄ kə *Jipə kə́ ngé kɔr̄ ta Gərek gə̄ ō, nējə̄ najə̄ sedə́ ō. Banī nin̄-sāān̄ tɔ̄lən. 30Loo ń ngákó̰o̰n gə̄ oōn̄ anī aw̄n̄ seneé Sejare, ba əlan̄ seneé Tarsə.
31Adə̄ Egəlijə ndi lɔm gō nang malang kə́ Jude tə́ ō, Galile tə́ ō, Samari tə́ ō. Nin̄-əngen̄ tɔ́gə ō, ɓōlə́n̄ Ndíĺ Kɔ́ɔ̄ɓē ō, kutədə́ reē kə̄ dɔ madə̄ tə́ kə ta kūl̄ *Ndíĺ kə́ Táĺ ń i nge rāā sedə́ ní ō.
Rɔ̄ Ene ngáā
32Piyer ɔr̄ gō ɓē gə̄ malang a go̰ō̰ń ngé gə̄ ń Nə́ɓā ɔr̄də́ tayā tām̄ yān tə́ ní. Ndɔ̄ kógə̄ḿ tə́ ni-aw̄ ɓē ngé gə̄ ń ndin̄ kem ɓē kə́ Lida tə́ ní, 33anī ənge deē kógə̄ḿ kə́ rīn na i Ene tū tə́. Deē ní to kem tə̄rá i ɓāl̄ sɔ́sɔ́, tɔdɔ̄ ni i de kə́ nge ligə̄rī. 34Piyer ədan na:
Ene, Jeju Kərist rāā adə̄ rɔ̄í ngáā kɔ̄ɔ́! Ḭ́ḭ dɔɔ́ ba ī-rāā tə̄rā toí ādə̄ majə! Anī Ene ḭḭ dɔɔ́ kə̄ ta jī tə́ beē. 35Dan ń de gə̄ malang kə́ kem ɓē kə́ Lida tə́ ō, kə́ ndágə mbō kə́ Saro̰ tə́ ō a̰a̰n̄ anī, tūrə̄n̄ rɔ̄də́ kə̄ rɔ̄ Kɔ́ɔ̄ɓē tə́.
Dorkas oy banī Piyer rāā adə̄ ni-ndól̄
36Nge ndóō yá̰a̰ yā Jeju kógə̄ḿ kə́ dəyá̰ ndi kem ɓē kə́ Jope tə́, rīn na i Tabita. Rīn ní kə ta Gərek na i Dorkas ń kumən na i Jal̄ ní. Dəyá̰ ní rāā kəla kə́ majə gə̄ ngá̰ý ō, adə̄ ngé ndoō gə̄ yá̰á̰ ngá̰ý ō. 37Ba kem ndɔ̄ gə̄ ngeé ń noō tə́ ní mo̰y rāān adə̄ oy. Ndogə̄nən̄ ba ənīnən̄ kem kújə́ kə́ dɔɔ́ tə́. 38Ngé ndóō yá̰a̰ gə̄ ń ndin̄ kem ɓē kə́ Jope tə́ ní, oōn̄ kadə̄ Piyer i kem ɓē kə́ Lida tə́. Tá kḭḭ Lida kaw̄ kə̄ Jope i ngɔr. Adə̄ əlan̄ de gə̄ jōó kadə̄ aw̄ ədanən̄ na:
Jə-rāāī ɓɔ́, ī-reē láẃ kanjə̄ kɔr bā̰ā̰. 39Piyer ɔtə kə̄ ta jī tə́ beē aw̄ sedə́. Dan ń reē ɔtə̄ anī aw̄n̄ seneé kem kújə́ kə́ dɔɔ́ tə́. Dəyá̰ kə́ ngaa koy gə̄ reēn̄ rɔ̄n tə́ malang kə nōó. Nin̄-ɔjənən̄ kūbə̄ kə́ kemeé gə̄ ō, kə́ dɔ madə̄ tə́ gə̄ ō ń Dorkas ur̄də́ dan ń ndiń dandə́ tə́ ní. 40Piyer əda adə̄ de gə̄ teēn̄ ndágá malang, ba ɔsə kejən nang tə́ ndɔ̄ȳ. Gō tə́ anī ni-tūr̄ rɔ̄n kə̄ rɔ̄ nīń tə́ ba əda na: Tabita ḭ́ḭ dɔɔ́! Anī Tabita teē kumən, ba dan ń a̰a̰ Piyer anī ḭḭ ndi dɔɔ́. 41Piyer əla jīn adə̄n, ba unən dɔɔ́. Ni ɓāŕ ngé taā kem gə̄ ō, dəyá̰ kə́ ngaa koy gə̄ ō, ba ɔjədə́ kə Tabita ń ḭḭ ndi dɔɔ́ kə kumneé ní. 42De kə́ Jope gə̄ malang oōn̄ najə̄ ní, adə̄ ngá̰ý gə̄ dandə́ tə́ taān̄ kem Kɔ́ɔ̄ɓē. 43Piyer ndi kem ɓē kə́ Jope tə́ adə̄ dan oy tām̄, ɓē yā deē kógə̄ḿ kə́ nge kɔr̄ gidə ngə̄rā tə́ kə́ rīn na i Simo̰.
Currently Selected:
Kəla rāā Ngámbang kəla gə̄ 9: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad